Hwèwulùwèlì 7 - Mokpwe: Bakwery (New Testament)

Hwàgbèèlì hwa ama Lohwɛ̀ hwa kukɛhwɛ hwèèmbànèlì o imbɔ̀mbɔ̀ ja awu

¹ O mburzà ya hwenè hweyà, rzìi na ɛnɛ aŋgèlì inɛyi ema i ma tɛ̀mɛ̀ o màrzuku mààniyɛ ma e rze. Wɔ̀ hwà mà keka marzuku mààniyɛ ma e rze ya mɔ̀nyɛ̀ ema e mbɛ̀hvɛ̀nì e akeyà aŋga nanù e mbɛ̀hvɛ̀nì e rza akeyà e rze ya mɔ̀nyɛ̀, tɔ̀ o tenì ya ŋmànja, tɔ̀ o lì teŋgɛ̀nɛ̀ gbèe.

² Rzìi na ɛnɛ èhvɛhvɛ aŋgèlì ema e uwɛ̀lɛ̀lɛ̀yi o ehvàrzu ema igbèyi ji uwɛ̀lɛ̀lɛ̀yi, e ma ohva lì àyɛ̀kɛ̀nɛ̀ la Lòohwà la lòŋgɛ. Aŋga ndi eŋge aŋgèlì na lìlo lì kàrzàmi ya a hwɛlɛ iŋgi aŋgèlì ja aniyɛ ema i ŋgbàahwì màyìmbì o lì hvàŋga e rze na ŋmàànja,

³ rzìi a hwa ohweyà nanù ema, “Inyɔ e rzi hvàŋga e rze ya mɔ̀nyɛ̀, tɔ̀ ŋmàànja, tɔ̀ mayi, natɛ̀ɛ e hvonda ema i kukɛ eembànelì o imbɔ̀mbɔ̀ ja hwàgbèèlì hwa ama Lohwɛ̀.”

⁴ Rzìi na hweyà mɔ̀rzɔ̀ŋgi mo hwatò ema hwa kukɛhwɛyi hwèembànèlì o imbɔ̀mbɔ̀ ja awu. Mɔ̀rzɔ̀ŋgi mo ma hwɛ ndi egbe yɔ̀kɔ na mènìmenì me hwekolì hwe hwatò. Moŋgo mɔ̀rzɔ̀ŋgi mo ma uwɛ̀lɛ̀lɛ̀yi ndi o ìtììtènì ja lìyome la matumba na mahwakɛ ma èkomè ya Irzàyɛ̀lì.

⁵ Mɔ̀rzɔ̀ŋgi mo hwatò ema mo ma kukɛhwɛ eŋge eembànelì o imbɔ̀mbɔ̀ ja awu ema mo ma uwɛ̀lɛ̀lɛ̀yi o lìtumba la Judà mo ma hwɛ lìyomɛ̀ la hwekolì hwe hwatò na hwehwàkɛ. O lìtumba la ama Rubɛ̀nì o ma hwɛ lìyomɛ la hwekolì hwe hwatò na hwehwakɛ, o lìtumba la ama Gadì o ma hwɛ lìyomɛ la hwekolì hwe hwatò na hwehwakɛ.

⁶ O lìtumba là mà Arzɛ o ma hwɛ lìyomɛ la hwekolì hwe hwatò na hwehwakɛ, o lìtumba la ama Nàhvìtàlì, o ma hwɛ lìyomɛ la hwekolì hwe hwatò na hwehwakɛ, o lìtumba la ama Manarzɛ o ma hwɛ lìyomɛ la hwekolì hwe hwatò na hwehwakɛ.

⁷ O lìtumba la ama Rzìmèyɔ̀nì, o ma hwɛ lìyomɛ la hwekolì hwe hwatò na hwèhwàkɛ, o lìtumba la ama Lɛ̀hvì, o ma hwɛ lìyomɛ la hwekolì hwe hwatò na hwèhwàkɛ, o lìtumba la ama Irzàkì, o ma hwɛ ndi lìyomɛ la hwekolì hwe hwatò na hwèhwàkɛ.

⁸ O lìtumba la ama Rzɛ̀bulɔ̀nì o ma hwɛ lìyomɛ la hwekolì hwe hwatò na hwèhwàkɛ, o lìtumba la ama Jòrzɛ̀hvù, o ma hwɛ lìyomɛ la hwekolì hwe hwatò na hwèhwàkɛ, na o lìtumba la ama Bènjàmɛ̀nì, o ma hwɛ lìyomɛ la hwekolì hwe hwatò na hwèhwàkɛ.

Iìtaŋgi ema hwatò hwa ama Lohwɛ̀ hwa o luwɛ

⁹ Ò mburzà yà hwenè hweyà hwe arzɛ, ɔndi nà à ɛnɛ ŋgìndì ndɛnɛ yà hwatò. Hwa mà kòka nyayi ema tɔ̀ mòtò à rzìi tànɛ ò lì hwa aŋga. Hwa mà uwɛ̀lɛ̀lɛ̀yi ò èkomè nà èkomè, hwa mà uwɛ̀lɛ̀lɛ̀yi ò màtumba nà màtumba, hwa mà hwɛ inyayi ja hwatò jà arzɛ rzìi hwa à ohwa hvɛ ò ihvɛhvɛ mbɔrzi. Hwa mà tɛ̀mɛ̀ ò worzo wò è konda yà lìkànèyà nà ò worzo wò è Ŋguma yà Mɔ̀lɛ̀ŋgù. Hwa mà wɔtɔ̀ meŋgombe mè mbɔ̀mi rzìi hwa tɛtɛ hvɛ ì nyàŋgo ò màa mà awu.

¹⁰ Èŋge ŋgindi è mà tɛ̀ɛ̀ nà lìlo lì kàrzàmi nanù ema, “Lì oŋgirzɛhwɛ là è mòtò wà hwènàmà lì uwɛ̀lɛ̀lɛ̀yi ndi nà Lòohwà là arzu, Lohwɛ̀ ema à lìyàyi ò kònda yà lìkànèyà, ndèŋgànɛ̀lɛ̀ lì uwɛ̀lɛ̀lɛ̀yi ò mà è Ŋguma yà Mɔ̀lɛ̀ŋgù yà eni.”

¹¹ Hwàto ema hwa mà tòŋga è kondà yà lìkànèyà hwa arzɛ hwa mà hwɛ ndi aŋgèlì, hwàmbaki hwa hwatò, nà hweŋge hwèembe hwe ànììyɛ̀. Wɔ̀ hwa arzɛ hwa mà kpa ò rze ò worzo wò è konda yà lìkànèyà ò lì ŋgba Lohwɛ̀ èluhwe.

¹² Hwa mà hwɛ lì ohwa nanù ema, “Inyɛ̀ wò lìya nanù! Mònàmɛ̀, lì ekàhwà, lìhwiyè, jèka, èluhwe, màyìmbì nà ŋginyà inyɛ hwe hwɛ nà Lòohwà la arzu natɛ̀ɛ nà ò gbìndèyà! Inyɛ̀ wò lìya nanù.”

¹³ Rzìi mòmbàkì mɔ̀kɔ wa hwaŋga hwàmbàkì hwa hwatò a no ijòwa nanù ema, “Ima hwatò hwanù ema hwa wɔti meŋgombe me mbɔ̀mi e? Ndèŋgànɛ̀lɛ̀ one wɔ̀ hwa uwɛ̀lɛ̀lɛ̀yi e?”

¹⁴ Nà ma mo timbirzɛlɛlɛ nanù ema, “Ìi rzàŋgo kòkò, o wa ndi o hwi.” Rzìi à no òhweyà nanù ema, “Hwatò hwanù ema hwa karzo ò tenì ya metàkirzɛnɛ mendɛnɛ. Wɔ̀ hwà mà rzorza meŋgombe me awu na màyija ma ama e Ŋguma ya Mɔ̀lɛ̀ŋgù o lì me timbirzɛ mbɔ̀mi.

¹⁵ O eŋgànɛlɛ rzɔ, wɔ hwa hwèlì o worzò wo e konda ya lìkànèyà la ama Lohwɛ̀, ndèŋgànɛ̀lɛ̀ hwa ŋgba Lohwɛ̀ èluhwe wuu na ŋmerze tɛɛ. Mɔ̀ ema a lìyayi o e konda ya lìkànèyà, a hwèlì aŋga o ihvonda ja arzɛ o lì hwa ɔ̀ŋgeyà.

¹⁶ Wɔ̀ hwa rza o hweyà a hweyà hvɛ tɔ̀ njàwò, ndèŋgànɛ̀lɛ̀ hwa rza o hwɛnɛ ahwɛ̀nɛ̀ hvɛ tɔ̀ nyìrzɛ ya malìhwa. Igbe i rza o hwa hvahva hvɛ, ndèŋgànɛ̀lɛ̀ hwa rza o atowɛ tɔ̀ ètùmbàtùmbà ndɛnɛ hvɛ.

¹⁷ Èhwànja e Ŋguma ya Mɔ̀ɔ̀lɛ̀ŋgù ema e hwèlì o ìtììtènì ja hwèlìyelì hwe lìkànèyà, mɔ̀ ŋmìti ndi mo hwa ɔŋgeya. Mɔ̀ a o hwa timba o hwètùŋgu ema hwe ŋgbàa lòŋgɛ. Ndèŋganɛlɛ Lohwɛ̀ a o hwa titowa tɔ̀ ima lìrzɔ̀lì o mìrzɔ̀ ma awu.”