Hwèwulùwèlì 4 - Mokpwe: Bakwery (New Testament)

Yòwanìrzɛ̀ a ɛni e konda ema e hwèlì o ŋmanyu yà lohwà

¹ O mburza hwene hwèyòhwèlì, nà mà luwa ihvɛhvɛ jɛ̀nɛ̀nì rzii na ɛnɛ lìyohva lì lìhvowahwi o lìkànèyà la ama Lohwɛ̀. Ndeŋgàna lìŋgi lìlo ema imba nà mà lome lì hweyà ema lì ma hwɛ lì no ohwirzɛnɛ nàa lìyɔ̀mi, lì ohwa nanù ema, “Jà ono ŋmanyu, na uŋmɛ̀lɛ̀ hwèèmà ema hwe hwɛni lì gbèyɛ̀nɛ o mburza ya ene hvonda.”

² Lìwokìmɛnɛ, ɔndi Èlìŋgɛ̀ ya ama Lohwɛ̀ e a no rzihweyà. Rzìi na ɛnɛ e konda ya lìkànèyà, ndèŋgànɛ̀lɛ̀ nà mà ɛnɛ mòtò ema à mà lìya o eŋge konda.

³ È mɔ̀ ema à mà lìya o ŋmanyu ya eŋge konda rzìi à a hvànya kɛ̀yi-kɛ̀yi nàa màŋyàyi ma wòlìto emà mà hwɛ̀lɛ̀hwɛ̀ jarzipa na kànelìyànì. Ndeŋgànɛ̀lɛ̀ e ŋguhwelì yɔ̀hvɛ e ma lìŋga eŋge konda. Èŋge ŋguhwèlì e ma hvànya kɛ̀yi-kɛ̀yi nàa lìnyayi ema lì hwɛ̀lɛ̀hwɛ̀ ɛmɛ̀làdì.

⁴ Ihvɛhvɛ mbàŋgɛ ja konda na inɛyi ja lìkànèyà i ma tòŋga eŋge konda, ndèŋgànɛ̀lɛ̀ mbàŋgɛ ya hwàmbaki na hwànìi, hwà mà lìya o ŋmanyu ja iŋgi konda. Hwà mà wɔ̀tɔ̀ màatù ma mbɔ̀mi rzìi hwa wɔ̀tɔ̀ hvɛ hwèkòòtò hwe gòòlù o meyohvo me awu.

⁵ O eŋge konda ya lìkànèyà, lìŋmɛti lì ma hwɛ lì wurza, mɔ̀tɔ̀wù mo ma hwɛ lì wurza, ndèŋgànɛ̀lɛ̀ e ŋgala lohwà yɔ hvɛ e ma hwɛ lì kèhwa. Lìrzàmba la mekàko ema me ma hwɛ lì hvàyèya, lì ma hwɛ o worzo wo eŋge konda ya lìkànèyà. Liŋgi lìrzàmba la mekàko lì hwèlì ndi lìrzàmba la hwèlìŋgɛ̀ hwe ama Lohwɛ̀.

⁶ O worzo wo e konda ya lìkànèyà o ma hwɛ yoma nàa ŋmànja ema mo ma àyɛ̀kɛ̀nɛ̀ lìyɛ̀ni ema lì ma hwɛ lì ɛnɛ o tenì. Hwèembe hwenii hwe ma toŋgà eŋge konda ya lìkànèyà o hwèhvàrzù hwe aniyɛ, mìirzɔ mo ma onda o inyo ja awu o worzo na o mburza.

⁷ Èembe ya worzo e ma hwɛ ndi nàa njila, e yɔ ema e ma ùkirzɛ̀ hwehwàkɛ e ma gbeyà ndi nàa nyàkà, e yɔ ema e ma ùkirzɛ̀ hweyàwò e ma hwɛnɛ ndi worzo nàa e mòtò wa hwènàmà, e yɔ ema e ma ùkirzɛ̀ hwenii e ma hwɛ ndi nàa mbela ema e kòhwà.

⁸ Tɔ̀ ima yɔ̀ yà hweŋge hwèembe è mà ohva màhvàhve mòtòhwa, ndeŋgànɛlɛ hwe mà kùmɛ̀nɛ̀hwɛ̀ nà mììrzɔ̀ è nyo yà arzɛ, tɔ̀ natɛ̀ɛ nà ò tenì yà mahvàhve mà awu. Hwe rzi hwɛ̀mɛ̀ jèembò ŋmèrze nà wùù. Hwe mà hwɛ lì emba nanù ema, “Lòohwɛ̀ ema a karzamì, à hwèlì, Wòtani, wòtani, wòtani. Mɔ̀ ema à mà hwɛ, è mɔ̀ ema à hwèlì ndèŋgànɛlɛ è mɔ̀ ema à hwɛni lì jà.”

⁹ Hweŋge hwèembe hwe aaniyɛ hwe ma hwɛ lì embeya ò è mɔ̀ ema à lìyayi ò è konda yà lìkànèyà, mɔ̀ ema à hwèlì lòŋgɛ ò gbìndèyà nà ò gbìndèyà. Hwe mà hwɛ lì mò embeya mɛ̀rzɔ̀kɔ̀ ema mè mò ŋgba wònyaki, èluhwe, nà jèka.

¹⁰ È hvonda ema hwe mà hwɛ lì emba, eŋge mbàŋgɛ yà hwàmbaki nà hwànìi hwa mà kpa ò worzo wò ama è mɔ̀ ema à lìyayi ò konda yà lìkànèyà, ema à hwèlì ò lòŋgɛ ò gbìndèyà nà ò gbìndèyà. Wɔ̀ hwa mà hwɛ lì mò ŋgba èluhwe, rzìi hwa hvimba hwèkòòtò hwe awu ò rze, ò worzo wò è konda yà lìkànèyà rzìi hwa à emba nanù ema,

¹¹ “Ìi Rzàŋgo hwa arzu nà Lòohwà là arzu, ò àŋgàmɛ̀nɛ̀yi lì lùwa wonyàki, èluhwe nà màyìmbì, ehwànja ò wà ndi ò hwèlì è mɔ̀ ema à wèki hwèèmà hwe arzɛ, ndèŋgànɛlɛ ò lì emeyà là aŋgɔ hwe arzɛ hwe mà wèkàhwà nà lì hwɛnɛ hwèhwɛ̀ɛ̀lì hwe awu.”