Hwèwulùwèlì 22 - Mokpwe: Bakwery (New Testament)

Yòwanìrzɛ̀ à ɛni morzo ema mò ŋgba lòŋgɛ là gbìndèyà

¹ È aŋgèlì rzìi e no uŋmɛ̀lɛ̀ morzo mo malìhwa ema mo gbeyà mòtò a hwɛ lòŋgɛ natɛ̀ɛ na o gbìndèyà, ndèŋgànɛ̀lɛ̀ mo uŋmɛ̀lɛ̀ ndi ŋgɛyi-ŋgɛyi nàa lìyɛni. Maŋga malìhwà ma mà uwɛ̀lɛ̀lɛ̀yi ndi o e konda ya lìkànèyà la ama Lohwɛ̀ na e Ŋgumà ya Mɔ̀lɛ̀ŋgù,

² mo ma ɔ̀ndeya ndi o tenì ya moombo mo e mbowà ndɛnɛ. O ma hwɛ nyayi hvɔ̀kɔ ya gbee o tɔ̀ ima rzàawà ya mono morzo ema wo ma ŋyàa hwehvùma ema hwe gbeyà mòtò o lì hwɛ lòŋgɛ natɛ̀ɛ na o gbìndèyà. Màŋga màyi ma mà ŋyàa lìyome la nyayi na mahwakɛ ma hwehvùma, ndèŋgànɛ̀lɛ̀ ŋgbɛndɛ tɛ ma mà ŋyàa hwehvùma. Hwàto hwa e rze ya mɔ̀nyɛ̀ hwà mà hwɛ lì gbeyàna hweyàlì hwe manù màyi o lì luwa hwetune hwe awu.

³ Tɔ̀ mamɛ ema Lohwɛ̀ à mà jemɛ e rza o hwɛ o tenì ya eŋge mbowà ndɛnɛ hvɛ. È konda ya lìkànèyà ya ama Lohwɛ̀ na e ya ama e Ŋgumà ya Mɔ̀lɛ̀ŋgù jo o hwɛ o tenì ya eŋge mbowà ndɛnɛ. Ndeŋgànɛ̀lɛ̀ hwàgbèèlì hwa ama Lohwɛ̀ hwa o mo kanɛ̀.

⁴ Hwa o ɛnɛ Lohwɛ̀ worzo na worzo ndèŋgànɛ̀lɛ̀ lìinà la eni lì o hwɛ o imbɔ̀mbɔ ja awu ja meyohvo.

⁵ O rza o hwɛ hvɛ wuu. Wɔ̀ hwa rza o arza hvɛ tɔ̀ ètùlù tɔ̀ ŋmàye, tɔ̀ moombe mo igbèyi ehwànja Rzàŋgo Lohwɛ̀ a o hwɛ ŋmàye mo awu, ndèŋgànɛlɛ wɔ̀ hwa o kànèyà natɛ̀ɛ na o gbìndèyà.

Yòwanìrzɛ̀ a ɛni hwèjèelì hwe ama Yerzù

⁶ È aŋgèlì rzìi e no òhweyà nanù ema, “Hwene hweyà ema na o ohweyà hwe hwèlì ndi e jɔ̀kɛ̀ o eŋgànɛlɛ e àŋgàmɛ̀nɛ̀ lì hwe lòkɛ̀. È Rzàŋgo, Lohwɛ̀ ema a ŋgbàà hwà-òhwèlì hwa hwèlìŋgɛ̀ elìŋgɛ̀ ya eni, aŋga nanù hwa ohwa ŋmɛ̀ndì mo eni, mɔ̀ à mà oma e aŋgèlì ya eni o lì uŋmɛ̀lɛ̀ hwàgbèèlì hwa eni hweyà ema hwe o gbèyɛ̀nɛ ŋmanà mbɔ̀.”

⁷ Yerzù rzìi a ohwa nanù ema, “È ɔŋgɔ tɛ, imba na jà ŋmanà mbɔ̀. Mònàmɛ̀ mo hwèlì na hwatò ema hwa ikayi hweyà ema hwe tìlahwì o tenì ya ene kààtì, hweyà ema hwe o gbèyɛ̀nɛ o nàŋgɛ na e hvonda ema e o jɛ̀ɛ̀.”

⁸ Imba Yòwanìrzɛ̀ ndì nà mà hweyà na lì ɛnɛ hwene hweyà. Nà oma nà mà hwe hweye na lì hwe ɛnɛ, nà mà kpa o rze o worzo wo eŋge aŋgèlì ema e ma no uŋmɛ̀lɛ̀ hwene hweyà, o lì mo kànɛ.

⁹ Ndi eŋge aŋgèlì e ma no òhweyà nanù ema, “O rza gbeyà nanù! Imba hvɛ na hwèlì ndi mògbèèlì wa ama Lohwɛ̀ nàa o wa, ndèŋgànɛ̀lɛ̀ na hwanɛ wònyànyàŋgo hwa aŋgɔ hwa ama Krirztò ema hwa hwèlì hwà-òhwèlì hwa hwèlìŋgɛ̀ na hwatò ema hwa gbeyà hweyà ema hwe tìlahwì o tenì ya ene kààti. Lohwɛ̀ ndi inyɔ e àŋgàmɛ̀nɛ̀yi lì kànɛ.”

¹⁰ Èŋge aŋgèlì rzìi e no òhweyà hvɛ nanù ema, “È rzi uteya hwatò hweyà ema hwe o gbèyɛ̀nɛ ema hwe tìlahwì o tenì ya ene kààti, ehwànja hwe o gbèyɛ̀nɛ ŋmanà mbɔ̀.

¹¹ Hwàto ema hwa gbeyà wòhwe inyɛ hwa eleyà ndi o lì gbeyà wòhwe. Inyɛ̀ hwaŋga ema hwa gbeyà hweyà hwe mbìndo inyɛ hwa eleyà ndi o lì gbeyà hweyà hwe mbìndo. Hwàŋga ema hwa gbeyà hweyà ema hwe hvomɛ̀nɛ̀, inyɛ hwa eleyà ndi o lì gbeyà hweyà ema hwe hvomɛ̀nɛ̀, ndèŋgànɛ̀lɛ̀ hwaŋga ema hwa hwèlì wòtani inyɛ hwa eleyà ndi o lì hwɛ wòtani.”

¹² Yerzù a ohwi nanù ema, “È ɔŋgɛ tɛ, na ja ŋmanà mbɔ̀, o lì rzaweyà tɔ̀ ima mòtò lì wowàna èwòlò ema mɔ̀ à gbèyi.

¹³ Imba ndi nà hwèlì Àlhvà ndèŋgànɛ̀lɛ̀ nà hwèlì Omèga, ema nà hwèlì è wà Worzo nà è wà Njùŋgɛ, ndèŋgànɛ̀lɛ̀ imba ndi nà hwèlì Hwèwòtèlì nà Lìrzùkù.”

¹⁴ Mònàmɛ̀ nà hwaŋga hwatò ema hwa rzòrza mèŋgombe me awu, hwa o luwa è wònjà ya lì akeyà o lìyohva la kɔ̀tɔ̀ o lì kpèeyà o eŋge mbowà ndɛɛndɛ aŋga nanù wɔ̀ hwa o laa hwehvùma ema hwe gbeyà hwatò hwa hwɛ o lòŋgɛ natɛ̀ɛ na o gbìndèyà.

¹⁵ Hwàto ema hwa rza o kpeeyɛ o tenì ya eŋge mbowà ndɛɛndɛ, hwa hwèlì ndi hwatò ema hwa gbeyà hweyà hwe mbìndo, hwatò ema hwa aŋgba màaŋga, hwatò ema hwa gbeyà mòrzònje, hwatò ema hwa oŋwa hwatò, hwatò ema hwa kanɛ̀ mòohwà mà mòlàŋga, hwatò ema hwa lìŋgàni lì kɔ̀ɔ hweyà na e wɔ̀ ema hwa kɔ̀ɔ hweyà.

¹⁶ “Imba, Yerzù, imba ndi na omi e aŋgèlì ya ami o lì e ohweyà inyɔ ema e hwèlì o tenì ya ŋmèmba hwene hweyà. Imba ndi na hwèlì e mɔ̀ ema a uwɛlɛlɛyi o mòtendè mò ama kìŋgɛ Dàhwitì, e rzombe ya elele ema e hvàànyà.”

¹⁷ Èlìŋgɛ̀ ya ama Lohwɛ̀ nà Mɔ̀ɔmbì hwa ohwa nanù ema, “Jà.” Tɔ̀ njɛnɛ ema a hweyi ene eyà mɔ̀ hvɛ a ohwa nanù ema, “Jà.” Tɔ̀ njɛnɛ ema a hwɛni nyìrzɛ ya malìhwa inyɛ a jèe a nyɔ malìhwa emà mà gbeyà hwatò hwa hwɛ o lòŋgɛ natɛ̀ɛ na o gbìndèyà. Tɔ̀ njɛnɛ ema a arzi manù malìhwa à mà luwa ŋgundu.

Yòwanìrzɛ̀ a ohwi e mbɔrzi ya lìrzùku

¹⁸ Imba, Yòwanìrzɛ̀, na kòkòwɛ̀lɛ̀ tɔ̀ njɛnɛ ema a hweya hweyà ema hwe tìlahwì o tenì ya ene kààtì, o lì hvomɛ̀nɛ̀ hweyà ema hwe o gbèyɛ̀nɛ, e hwèlì tɛ nanù ema mòtò a hwàtɛ tɛ eyà o tenì ya ene kààti, aŋga ndi Lohwɛ̀ a o mo hwàteya ikàndɛ ema i tìlahwì o tenì ya ene kààtì.

¹⁹ È hwèlì tɛ nanù ema mòtò a kako tɛ tɔ̀ eyà ema e ma tìlahwɛ o tenì ya ene kààtì lì hvomɛ̀nɛ̀ hweyà ema hwe o gbèyɛ̀nɛ, Lohwɛ̀ a o kakòhwà lòŋgo la eni la hwehvùma ema hwe gbeyà mòtò o lì hwɛ o lòŋgɛ natɛ̀ɛ na o gbìndèyà. Ndeŋgànɛ̀lɛ̀ Lohwɛ̀ a o kakòhwà ehvolo ya eni o tenì ya e mbowà ndɛɛndɛ ya wòtani. Hwene hweyà ndi hwe tìlahwì o tenì ya ene kààtì.

²⁰ È mɔ̀ ema a tɛmi e mbòŋgi ya hwene hweyà hwe arzɛ a ohwi nanù ema, “Ò jɔ̀kɛ̀, na o jà ŋmanà mbɔ̀.” Inyɛ̀ wo lìya nanù, jà, ìi Rzàŋgo Yerzù.

²¹ Inyɛ̀ è ndèli yà ama è Rzàŋgo Yerzù è hwɛ nà hwatò hwa arzɛ.