Hwèwulùwèlì 2 - Mokpwe: Bakwery (New Testament)

Yòwanìrzɛ̀ a omelì ŋmèmba mo Ɛ̀hvɛ̀rzɔ̀rzì ŋmɛ̀ndì

¹ Oŋgo ema à mà àyɛ̀kɛ̀nɛ̀ è mòtò wà hwènàmà rzìi à nò òhweyà nanù ema, “Tìleyà è aŋgèlì ema è hwèlì ò ŋmèmba mò Ɛ̀hvɛ̀rzɔ̀rzì nanù ema, è mòtò ema à tɛ̀tì lìrzàmba là rzòmbe ò lìya là enì là momɛ̀, ema à ɛ̀ndeyà ò ìtììtènì jà lìrzamba là mboko jà gòòlù ema jò ohvi hwètùlù, mɔ̀ ndi à omi mono ŋmɛ̀ndì.

² Nà hwi hweyà hwe arzɛ ema è gbeyà. Nà hwi hwèwòlò hwe anyu hwe ŋginyà ema è gbeyà ndèŋgànɛlɛ nà hwi nanù ema è kaki mèèmà o lì àjùlɛ̀. Nà hwi nanù ema o rza tanɛyi lì emeyà hwatò hwa wòhwe. Nà hwi na oma e gbeyà rzìi e emba hwatò ema hwa ahwàŋgɛ̀lɛ̀ nanù ema hwa hwèlì ndi i àpɔ̀rzìtòlò ema hwa rza enje àpɔ̀rzìtòlò, rzìi inyɔ e àyèmbɛ nanù ema hwa hwèlì ndi hwà-òhwèlì hwa hwèlìŋgɛ̀ hwa mòlaŋgà.

³ Nà hwi nanù ema o lìinà la ami e ma wɛ̀lìrzɛ̀nɛ̀ ndèŋgànɛlɛ e ma àjùlɛ̀nɛ̀ mètàkà. Ndi tɔ̀ nɛ mèèmà me anyu me eti na oma e no oŋgama.

⁴ Ndi nà ohwa ene eyà lì è teŋgɛ̀nɛ̀ nanù ema, è rza nò lìŋgàni hvɛ naŋgɛ, nà oma è mà lòme lì nò lìŋgàna.

⁵ Ò eŋgànɛlɛ rzɔ, inyɔ hwiti è ɔ̀ŋgɔ tɛ è ŋgànà ema inyɔ hwiti è kpɛ̀lɛ̀lɛ̀yi. È hwɛmɛ hwɛ̀ɛmɛ̀ hwe anyu hwe wòhwe è wòteyà lì gbeyà hweyà ema è mà hwɛ lì gbeyà è hvonda ema è mà wòteyà lì oŋgama Yerzù. È hwèlì tɛ nanù ema inyɔ e rza hwɛmi tɛ hwɛ̀ɛmɛ̀ hwe anyu hwe wòhwe, eŋge ŋgànà e hwèlì ndi nanù ema imba na e jèeya rzìi na e ulɛnɛ e mboko ya anyu ya etùlù o èki ya eni ema e tɛ̀mɛ̀.

⁶ Ndi eyà ya gbàmu ema e gbeyà, e hwèlì ndi nanù ema inyɔ e rzi ikayi mèèmà me anyu o hweyà hwe hwatò hwa ehvehva ya ama Nìkòlàrzì na oma imba hvɛ na rzi ikayi.

⁷ Tɔ̀ njɛnɛ ema à ohvi màto inyɛ à hwèye mamɛ ema è Èlìŋgɛ̀ yà Wòtani è ohweyà mììtèlì. Tɔ̀ njɛnɛ ema à rzùwanì wòhwe nà mò ŋgba è wònja ò lì làa ehvùma ema è gbeyà hwatò hwa hwɛ̀ɛ̀ lòŋgɛ natɛ̀ɛ nà ò gbìndèyà, ema è uwɛlɛlɛ ò gbee ema wò tɛ̀mi ò hvayà yà Pàlàdìrzì.”

Yòwanìrzɛ̀ à omelì ŋmèmba ema mò hwèlì ò Rzàmàyinà ŋmɛ̀ndì

⁸ À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàmàyinà nanù ema, “È mòtò ema à hwèlì è wà worzo ndèŋgànɛ̀lɛ̀ à hwèlì è mòtò ema à hwèlì è wà lìrzùkù, mɔ̀ ema à mà ŋwa ndèŋgànɛ̀lɛ̀ à hwèlì ò lòŋgɛ hvɛ, mɔ̀ ndi à omi mono ŋmɛ̀ndì.

⁹ Imba nà hwi mètàkà mè anyu, ndèŋgànɛ̀lɛ̀ nà hwi nanù ema è hwèlì ndi mèlìrzà mè hwatò, ndi tɔ̀ nanù è hwèlì ndi hwèwàŋgì. Nà hwi hweyà hwe wòhwe ema hwatò ema hwa ohwa nanù ema hwa hwèlì ndi wònyà Yudà tɔ̀ nɛ hwa rza enje wònyà Yudà, hwa ohwa ò lì è teŋgɛ̀nɛ̀. Wɔ̀ hwa hwèlì ndi hwatò hwa ama Mòkarzɛ̀ tɔ̀ hwatò ema hwa hwèlì ò mòndèŋge mò eni.

¹⁰ È rza oka metàkà ema mè hwèlì ò njiya mè è jèeyà wɔ̀ŋgɔ̀. Nà è ohweyà nanù ema, Mòkarzɛ̀ à gbeyà nanù ema hwe aŋgɛ lòŋgo là anyu ò hwèwòwà, èki ema è ò lùwa mètàkà ò tenì yà lìyomɛ̀ là mèènyà. Mɔ̀ à ò gbeyà ndi nanù, ò lì kèkirzɛ lìlòkɛ̀ là anyu, tɔ̀ è hwɛ ndi nanù ema yà à ŋwa è nò lòkɛ̀ ndi nanù mɛnɛ. È gbèyi tɛ nanù rzìi imba hvɛ nà ò è ŋgba lòŋgɛ ema lì rza kuwa nàa etaŋgi jà mòtò ema à rzùù.

¹¹ Tɔ̀ njɛnɛ ema à ohvi mato inyɛ à hwèye eyà ema Èlìŋgɛ̀ è ohweyà ŋmèmba. Hwàto ema hwa akayi wòhwe hwa rza ò ŋwa è kpelì yà èlìŋgɛ̀.”

Yòwanìrzɛ̀ à omelì ŋmèmba ema mò hwèlì ò Pɛ̀gàmùmì ŋmɛ̀ndì

¹² À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba mò Pɛ̀gàmùmì nanù ema, “‘Mono ŋmɛ̀ndì mò uwɛ̀lɛ̀lɛ̀yì ndi nà è mɔ̀ ema à ohvi è rzɔ̀lɔ̀ ema yè èeyà hwèhvàrzù hwe ahwàkɛ.

¹³ Nà hwi èki ema ò lìya. Aŋga ndi è konda yà lìkànèyà là ama mòkarzɛ̀ è hwèlì. Ndi è eka mèèmà mè anyu nà imba nanù mɛnɛ. È mà nò lòkɛ̀ nà ŋmèma mɔ̀kɔ nanù mɛnɛ tɔ̀ ò è hvonda yà ama Àntipàrzi. Àntipàrzi à mà nò tɛ̀meyà è mboŋgi yà jɔ̀kɛ̀, ndèŋgànɛ̀lɛ̀ hwa mà mò oŋwa ò ìtììtènì jà anyu ò hwèlìyelì hwe ama Mòkarzɛ̀.

¹⁴ Ndi nà ohvi ŋgùrzù jà hweyà ò lì è teŋgɛ̀nɛ̀. È òhvi hwatò ò ìtììtènì jà anyu ema hwa oŋgama hwèyòkòlèlì hwe ama Bàlàamì. Bàlàamì mɔ̀ ndi à mà uŋmɛ̀lɛ̀ Bàlàkì ò lì timba la wònyà Irzàyɛ̀lì ò lì gbeyà wòhwe nà oma à mà lèè mòlelì ema mò mà ŋgbàhwɛ mahvɛhvɛ mohwà nàa jàhwèyà. À mà gbeyà hwa mà hwɛ lì gbeyà hweyà hwe mòrzònje.

¹⁵ Ò ŋgànà hvɔ̀kɔ hvɛ mɛnɛ, ò hwèlì lòŋgo là hwatò ò ìtììtènì jà anyu ema hwa oŋgama lìlòkɛ̀ ema Nìkòlàwùrzì à okòlɛ.

¹⁶ Ò eŋgànɛlɛ rzɔ è ayèŋgowɛ̀ ò wòhwe wò anyu, è rzi ayèŋgowɛ̀ tɛ ò wòhwe wò anyu, rzìi nà ò ahwèŋgɛ̀ ò lì jà lì anana hwaŋga hwatò. Nà ò gbeyàna è rzɔ̀lɔ̀, ema è uwɛlɛlɛ ò tenì yà è wàna yà ami ò lì anàna hwaŋga hwatò.

¹⁷ Tɔ̀ njɛnɛ ema à hwɛnì matò inyɛ à okànèyà mamɛ Èlìŋgɛ̀ è ohweyà ŋmèmba. Hwàto ema hwa akayi wòhwe, imba nà ò hwa ŋgbà mana ema imba nà hwa utelì, ndèŋgànɛ̀lɛ̀ nà ò hwa ŋgba hvɛ lìŋyàyi ema lì ɛneyà mbɔ̀mi. Ò ŋmanyu yà lìŋgi lìŋyàyi, hwa mà tìla lìnà lì hvènya ema tɔ̀ mòtò à rza hwiyɛ, lì aka tɛ è mòtò mɛnɛ ema à ò ŋgbahwa lìŋgi lìŋyàyi.’”

Yòwanìrzɛ̀ à omelì ŋmèmba ema mò hwèlì ò Tìyatìrà ŋmɛ̀ndì

¹⁸ À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba mo Tìyatìrà nanù ema, “Mono ŋmɛ̀ndì mò uwɛ̀lɛ̀lɛ̀yi ndi ò mà è Ŋmàna wà ama Lohwɛ̀, ema mììrzɔ̀ mà eni mà tèeyà ndi nàa mùnya ema mò òŋwa, matàŋga mà eni hvɛ mà ɛneyà ndi nàa ɛ̀ɛkɛ̀ ema è hwɛ̀lɛ̀hwɛ̀ brɔ̀nrzi ema è hvànya.

¹⁹ Nà hwi èwòlò ema è gbeyà. Nà hwi è ndìŋgɛ ema è nò hwɛ̀nèlì, ndèŋgànɛ̀lɛ̀ nà hwi hvɛ lìlòkɛ̀ ema è nò hwɛ̀nèlì. Nà hwi nà oma è nò gbèeyà, ndèŋgànɛ̀lɛ̀ nà oma è kàki mèèmà nà lì ajùlɛ. Ndeŋgànɛ̀lɛ̀ nà hwi nanù ema, èwòlò ema è hwèlì è gbeyà nàŋgɛ, è akayi è yɔ̀ ema è mà lòme lì gbeyà.

²⁰ Mamɛ ema imba nà ohwa ò lì è teŋgɛ̀nɛ̀ è hwèlì ndi nanù ema, inyɔ e àjùlɛ̀nɛ̀ òŋgo molanà ema à hwɛ̀lɛ̀hwɛ̀ Jèrzɛ̀bɛ̀lì à àhwɛ̀lɛ̀hwɛ̀ mɔ̀ ŋmìti nanù ema à hwèlì ndi mòòhwèlì wà èlìŋgɛ̀ wà molanà wà ama Lohwɛ̀. Mɔ̀ à okòlɛ nà lì ɔnjɔ hwàgbèèlì wà ami ema wɔ̀ hwa gbeyà hweyà hwe mòrzònje, nà ò lì làa mòlelì ema hwa ŋgbàà mahvɛhvɛ mohwà nàa jàhwèyà.

²¹ Nà mà mò ŋgba hvonda ema à àyèŋgowɛ̀ ò wòhwe wò eni, ndi à rza arza lì hwɛmɛ mòrzònje mò eni.

²² Ò èŋgànɛ̀lɛ̀ nà ò mò hvimba nà hwatò ema hwa gbeyà mòrzònje mò lìhwa nà mɔ̀ ò lìnɔ̀ŋgɔ̀ là nyàmbɛ, èki ema hwa ò lùwa lìtàkè lì ndɛnɛ. Nà ò gbeyà ene eyà nanù è hwèlì tɛ nanù ema wɔ̀ hwa rza hwɛmi tɛ ò lì gbeyà hweŋge hweyà hwe wòhwe nà oŋgo molàna.

²³ Nà o oŋwa hwatò ema hwa ika hweyà ema mɔ̀ à okòlɛ, ndèŋgànɛ̀lɛ̀ meemba me arzɛ me hwiya nanù ema imba ndi na hwèlì e mɔ̀ ema a hwi màlùtèyà na mèèmà me hwatò hwa arzɛ. Tɔ̀ ima mòtò ema a gbèyi wòhwe, nanù hvɛ ndi na mo kɔ̀kìrzɛ̀.

²⁴ “Ndi na e ohweyà inyɔ hwatò ema e lìyelì o Tìyatìrà, inyɔ ema e rzi ika hwenè hwèokòlelì, inyɔ i rzi okowi hwèokòlelì hwe hweyà ema hwe hwɛ̀lɛ̀hwɛ̀ nanù ema, ìwùndɛ̀ ja ama Mòkarzɛ̀. Nà e ohweyà nanù ema, na rza arza lì e tàkìrzɛ̀ hvɛ.

²⁵ Ndi tɔ̀ nanù inyɔ è ika mèèmà mè anyu nà imba natɛ̀ɛ nà ò è hvonda ema nà ò jɛ̀ɛ̀.

²⁶ Hwàto ema hwa lìya lì aka hweyà hwe wòhwe, ndèŋgànɛ̀lɛ̀ ema hwa gbeyà hweyà ema imba nà hwa ohweyà ò lì gbeyà, natɛ̀ɛ nà ò lìrzùkù là lòŋgɛ là awu anu rze, nà ò hwa ŋgba è wònja yà lì kànèyà hwèkòmè hwe arzɛ hwe anu rze yà mɔ̀nyɛ̀.

²⁷ Wɔ̀ hwa ò kànèyà hwatò hwa hweŋge hwèkòmè nà màa ema mà eti, ndèŋgànɛ̀lɛ̀ hwa ò hwa yààyà nàa mòtò à yààyà màànyà.

²⁸ Ŋgàna hvɔ̀kɔ nà oma Tatɛ̀ wà ami à nò ŋgbelì màyìmbì. Imba hvɛ nà ò ŋgba hwatò ema hwa lìya lì aka wòhwe màyìmbì. Ò eŋgànɛ̀lɛ̀ rzɔ, nà oma wɔ̀ hwa lìya lì aka wòhwe nà ò hwa ŋgba è rzòmbe yà èluhwe.

²⁹ Tɔ̀ njɛnɛ ema à hwɛnì matò inyɛ à okànèyà mamɛ ema Èlìŋgɛ̀ è ohweyà ŋmèmba.”