Hwèwulùwèlì 17 - Mokpwe: Bakwery (New Testament)

Yòwanìrzɛ̀ a ɛni molanà ema a lìyayi o ŋmanyu ya wɔ̀rzi

¹ Mɔ̀kɔ wa iŋgi aŋgèlì lìrzàmba ema i ma ohva hwewoki lìrzàmba e no jèeya rzìi e no ohweyà nanù ema, “Jà ono, na uŋmɛ̀lɛ̀ nɛ e molanà wa àkpàlà ndɛnɛ a o kɔ̀kìrzɛ̀hwɛ̀. Oŋgo molanà wa àkpàlà ema a lìya o mbowà ndɛɛndɛ ema e hwèlì o toŋgoŋgo ya rzayi-rzayi ja meyorzo.

² Ikìŋgɛ ja arzɛ ja ene rze ima gbeyà mòrzònje na mɔ̀. Hwàto hwa e rze ya mɔ̀nyɛ̀ hwà mà hwɛ lì nyɔ oŋgo molanà mìimbà ma eni natɛ̀ɛ hwa woma, ndèŋgànɛ̀lɛ̀ hwà mà gbeyà mòrzònje na mɔ̀.”

³ Èlìŋgɛ̀ yà ama Lohwɛ̀ rzìi è nò rzìhweyà, è aŋgèlì rzìi è nò ɛndɛ̀nɛ̀ ò mòrzànjɛ. Nà mà ɛnɛ molanà mɔ̀kɔ aŋga ema à mà lìya ò ŋmanyu yà è nyàmà yà wòhwe ema è teya. Ène nyàmà è mà onda nà mìinà mà ìrzìlako ò è nyo yà eni. È mà ohva lìrzàmba là mèyòhvò nà lìyomɛ là mèrzehwa.

⁴ Oŋgo molanà à mà wɔ̀tɔ̀ lìhwatu là màlenà ema lì ma ohva hvɛ mɔ̀rzɔ̀nɔ̀ ema mo teya. A ma ahwàndɛ e nyo ya eni ya arzɛ na hwema hwe gòòlù, na hwàanà màŋyàyi ma wòlìtò ema mà hvànya, na hwehvɛhvɛ hwema hwe wòlìtò. A ma tɛ̀ɛ̀tɛ̀ɛ lìwonde la gòòlù o lìya la eni ema lì ma onda na hwèèmà hwe ndɔ̀ki na hwema hwe mbindo hwe mòrzònje.

⁵ O ma hwɛ lìna o mbɔ̀mbɔ̀ ya eni ema e ma hwɛ ndi nàa wùndɛ̀ ema tɔ̀ mòtò a rzi hwiyɛ. Lìŋgi lìna lì ma hwɛ ndi, “Bàbìlɔ̀nì, e mbowà ndɛnɛ. È nyàŋgo ya hwalana hwa àkpàlà, na e hwa hwèèmà hwe ndɔ̀ki hwe e rze.”

⁶ Nà ma ɛnɛ nanù ema oŋgo molanà à mà woma na màyija ma hwatò hwa wòtani hwa ama Lohwɛ̀, màyija ma hwaŋga hwatò ema hwà mà oŋwahwa ehwànja hwa oŋgàma Yerzù. Nà ma tàmà rzayi-rzayi e hvonda ema nà mà mo ɛnɛ.

⁷ È aŋgèlì è mà nò ijòwa nanù ema, “Mamɛ ndèŋgatɛ ò tàmì e? Nà ò telɛ̀lɛ̀ è wùndɛ̀ yà ama ono molàna nà è wùndɛ̀ yà è nyàmà yà wòhwe ema è mò ɛ̀ndɛ̀nɛ̀, ema è ohvi lìrzàmba là mèyòhvò nà lìyome là mèrzehwa.

⁸ È nyàmà yà wòhwe ema ò ɛ̀neyàyi è mà lòma lì hwɛ lòŋgɛ, ndi ò nàŋgɛ è rza enje lòŋgɛ. È ò uwɛlɛlɛyi ndi ò ehvɔ̀ndi ema è rza ohvɛ lìrzùkù rzi è ɛndɛ ò èki ema hwa ò è oŋwa. Hwàto ema hwa lìya ò rze yà mɔ̀nyɛ̀ ema lìwòteyà hwèwèkelì hwe ene rze Lohwɛ̀ à rzi tilɛ mìinà mà awu ò tenì yà è kààtì ema è ohvi mìinà mà hwatò ema hwa lùwa lòŋgɛ ema lì rza kuwa, hwa mà tàmà. Hwa mà tàmà ò lì ɛnɛ è nyàma yà wòhwe ema è mà hwɛ lòŋgɛ, rzìi è rza enje lòŋgɛ ndèŋgànɛ̀lɛ̀ è ò hwɛ ò lòŋgɛ hvɛ.

⁹ Hwene hweyà ema nà arza lì ohwa nanù, nanù ndi lìhwiyè nà lì rzɔ̀ŋgìtɛ̀nɛ̀ hwe arzahwa. Mèyòhvò lìrzàmba ema eŋge nyàma è ohvi mè hwèlì ndi, lìrzàmba là mèyolì ema oŋgo molàna à lìya, ndèŋgànɛ̀lɛ̀ mè hwèlì ndi ikiŋgɛ lìrzamba.

¹⁰ Ò ìtììtènì jà iŋgi kiŋgɛ lìrzàmba, ita ì ma mà lì ŋwa, mɔ̀kɔ à è hwèlì ò lìkànèyà ndi mɔ̀kɔ à rzi jelì ò lìkànèyà. Ndi mɔ̀ à jelì tɛ, à àŋgàmɛ̀nɛ̀ ndi lìkànèyà ò ŋmanà hvòkà hvonda mɛnɛ.

¹¹ È nyàmà yà wòhwe ema è mà hwɛ rzìi è rza enje naŋgɛ, yɔ̀ ndi è ùkirzɛ̀ è kìŋgɛ wàmbi. À hwèlì ndi mɔ̀kɔ hwa ikìŋgɛ lìrzàmba ndèŋgànɛlɛ a ɛndɛ o èki ema à hwɛni lì ŋwèeyà.

¹² Lìyomɛ̀ là mèrzehwa mè eŋge nyàmà ema ò ɛ̀neyàyì, mè hwèlì ndi lìyomɛ̀ là ikìŋgɛ ema ì rzi lù lìkànèyà, ndi ema ò awa hvɔ̀kɔ hwa ò lùwa lìkànèyà nàa ikìŋgɛ molàndàko mɔ̀kɔ nà è nyàmà yà wòhwe.

¹³ Lini lìyomɛ̀ là kiŋgɛ jo ohvi ndi jànda jɔ̀kɔ, o eŋgànɛlɛ rzɔ, hwa mà ŋgbàà eŋge nyàmà yà wòhwe màyìmbi nà màkànèyà mà awu.

¹⁴ Hwa ò teŋgɛ̀nɛ̀ ò lì anàna è Ŋguma yà Mɔ̀lɛ̀ŋgù njùma. Ndi è Ŋguma yà Mɔ̀lɛ̀ŋgù è ò hwa rzùùwanà ehwànja mɔ̀ ndi à hwèlì è Rzàŋgo yà hwatò hwa arzɛ ndèŋgànɛ̀lɛ̀ à hwèlì ndi è Kìŋgɛ yà ikìŋgɛ jà arzɛ. À hwèlì nà hwatò hwa eni ema Lohwɛ̀ à mà hwɛlɛ nà lì hvɔ̀rzɔ̀, ema hwa mò gbèeyà nà ŋmèmà mɔ̀kɔ.”

¹⁵ Èŋge aŋgèlì rzìi è nò òhweyà nanù ema, “Màlìhwa ema ò ɛ̀neyàyi, ema oŋgo molanà wà àkpàlà à lìyàyi, mà hwèlì ndi hwatò, ŋgindi jà hwatò, hwèkòmè nà hwèkòmè, nà ihvɛhvɛ imbɔrzi.

¹⁶ Lìyome là mèrzehwa ema ò ɛ̀neyàyi nà eŋge nyàmà yà wòhwe hwe ò kɔ̀ɔ̀ oŋgo molanà wà àkpàlà. Hwe ò mò wòwàna hwèèmà hwe arzɛ ema à ohvi, rzìi hwa ò mò gbeyà ò lì hwɛ mòrzombo. Hwa ò làa è nyàma nyo yà eni, ndèŋgànɛ̀lɛ̀ hwa ò mò rzɛ̀lɛ̀ ò mùnya.

¹⁷ Hwa ò gbeyà ndi nanù ehwànja, Lohwɛ̀ à mà ika nà oma mɔ̀ àrzeyà nanù ema hwa gbèèyè ò mèèmà mè awu. Lohwɛ̀ à mà rzèkeyà nanù ema hwèŋge hwèembe hwe ohve ndi janda jɔ̀kɔ, ò lì mò gbèeyà nàa mòtò mɔ̀kɔ. Wɔ̀ hwa ò ŋgba eŋge nyàmà yà wòhwe màyìmbì mà awu mà lìkànèyà natɛ̀ɛ nà ò è hvonda ema hweyà ema Lohwɛ̀ à mà ohwe hwe ò ondìrzɛ̀hwɛ̀.

¹⁸ È molanà ema ò mà ɛnɛ à hwèlì ndi è mbowà ndɛ̀ɛ̀ndɛ̀ ema è kànèyà ikìŋgɛ jà è rze yà arzɛ.”