Hwèwulùwèlì 16 - Mokpwe: Bakwery (New Testament)

Hwewoki hwe hwètàtò hwe ama Lohwɛ̀

¹ Nà ma hweyà hvɛ lìlo lì kàrzàmi lì uwɛ̀lɛ̀lɛ̀yi o e Ndawò ya Lohwà lì ma ohwàna i aŋgèlì lìrzàmba nanù ema, “È ɛ̀ndɛ, e kome hwetàtò hwe ndɛnɛ hwe ama Lohwɛ̀ ema hwe hwèlì o tenì ya hwewoki lìrzamba, o rze ya mɔ̀nyɛ̀.”

² È aŋgèlì ya worzò e ma ɛ̀ndɛ rzìi e koma hwetato hwe ndɛnɛ hwe ama Lohwɛ̀ ema hwe ma hwɛ o tenì ya ewoki ya eni o e rze ya mɔ̀nyɛ̀. Hwèhwàŋgù ema hwe ma ɛneya ŋgandi ŋgandi ema hwe ma hwɛnɛ hvɛ mòrziyò rzayi-rzayi hwe ma wurza hwatò o nyo. Hwàŋga hwatò hwà mà hwɛ ndi hwatò ema hwà mà ohva embànèlì ya eŋge èembè o inyo ja awu na hwàmbaki hwa hwatò ema hwà mà ŋgba eŋge èrzìrzà èluhwe.

³ È aŋgèlì ema e ma ùkirzɛ̀ ihwakɛ e kòma hwètàtò hwe ndɛnɛ hwe ama Lohwɛ̀ ema hwe ma hwɛ o tenì ya eŋge ewoki ya eni o ŋmànja. Mòŋgo ŋmànja mo ma timba ndi nàa màyija ma ewembe. Ndeŋgànɛlɛ tɔ̀ ima yoma ema e ma hwɛ lòŋgɛ o tenì ya moŋgo ŋmànja e ma ŋwa.

⁴ È aŋgèlì ema e ma ùkirzɛ̀ iyàwò e ma koma hwètàtò hwe ndɛnɛ hwe ama Lohwɛ̀ ema hwe ma hwɛ o tenì ya ewoki ya eni o meyorzo na o hwètùŋgu hwe malìhwa rzi hwe àyèŋgòwɛ̀ màyija.

⁵ Nà mà hweyà e aŋgèlì ema e ma hwɛ o lì kànèyà malìhwa e ohwa nanù ema, “O wa o tɛmi ehve-ehve o hwene hwèkàyìrzèlì ema o gbèyi. O wa ema o hwèlì, ndeŋgànɛlɛ ema o ma hwɛ. O wa ema o hwèlì wòtani.

⁶ È mbako ya aŋgɔ e hvomɛ̀nɛ̀ ehwànja, wɔ̀ hwa mà koma màyija ma ama hwatò na hwà-òhwèlì hwa hwèlìŋgɛ̀ hwa aŋgɔ. O eŋgànɛlɛ o ma hwa ŋgba màyija o lì nyɔ. È kɔ̀kìrzɛ̀ ene ema wɔ̀ hwa àŋgàmɛ̀nɛ̀yi lì luwa.”

⁷ Rzìi na hweyà lìlo ema lì ma uwɛlɛlɛ o ètàwo ya itùwà lì ohwa nanù ema, “Ìi Rzàŋgo Lohwɛ̀ lì Kàrzàmi, e mbàko ya àŋgɔ e hvomɛ̀nɛ̀ ndèŋgànɛ̀lɛ̀ e hwèlì jɔ̀kɛ̀.”

⁸ È aŋgèlì ema e ma ùkirzɛ̀ inɛyi e mà koma hwètàtò hwe ndɛnɛ hwe ama Lohwɛ̀ ema e ma hwɛ o tenì ya ewoki ya eni o ŋmanyu ya igbèyi, ndeŋgànɛ̀lɛ̀ Lohwɛ̀ à mà ŋgba igbèyi màyìmbi o lì rzɛlɛ hwatò nàa mùnya.

⁹ Hwàto hwà mà rzeeya o tenì ya eŋge etùmbàtùmbà ndɛnɛ. Rzìi wɔ̀ hwa jema lìinà la ama Lohwɛ̀ ema a kàneya mene mekona. Ndi wɔ hwa rzi ayèŋgowɛ̀ o wòhwe wo awu, o lì ŋgba Lohwɛ̀ èluhwe.

¹⁰ È aŋgèlì ema e ma ùkirzɛ̀ ita, e ma koma hwètàtò hwe ndɛnɛ hwe ama Lohwɛ̀ ema e ma hwɛ o tenì ya ewoki ya eni o ŋmanyu ya e konda ya lìkànèyà ya eŋge èembè ema e ma uwɛlɛlɛ o ŋmànja. Jììtìtì rzìi i lìŋga lìkànèyà la eni. Hwàto ema hwà mà hwɛ lì oŋgama eŋge èembè hwà mà wòteyà lì kɔ̀kɔ̀ mehvehve me awu ehwànja o mòrziyò ema hwà mà hweye.

¹¹ Rzìi wɔ̀ hwa jema Lòohwà la e ŋmanyu yà lohwà o nyòla mòrziyò mo hwèhwàŋgù ema hwà mà hweye. Ndi wɔ̀ hwa rzi tikowe o lì hwɛmɛ hwègbèèlì hwe awu hwe wòhwe ema hwà mà hwɛ lì gbeyà.

¹² È aŋgèlì ema e ma ùkirzɛ̀ mòtòhwa e ma koma hwètàtò hwe ndɛnɛ hwe ama Lohwɛ̀ ema e ma hwɛ o tenì ya ewoki ya eni o morzo mo ndɛnɛ mo Yùhvrètìrzì. Mono morzo mo ma hwànja, o lì rzekeya e njiya aŋga nanù ikiŋgɛ ema i uwɛlɛlɛyi ehvàrzu ema igbèyi i uwɛlɛlɛ hwa o tanɛ lì aka.

¹³ Rzìi na ɛnɛ hwèlìŋgɛ̀ hweyàwò hwe wòhwe, ema hwe ma akɛnɛ hwètɔ̀lɔ̀lɔ̀ hwe ma hwɛ lì wurza. Hweŋge hwèlìŋgɛ̀, yɔ̀kɔ e ma wurza o e wàna ya e dragɔ̀ni, yɔ̀kɔ e ma wurza o e wàna ya eŋge èembè ema e ma uwɛlɛlɛ o ŋmànja, ndèŋgànɛ̀lɛ̀ inɛyi jɔ̀hvɛ i ma wurza o e wàna ya e mòòhwèlì wà èlìŋgɛ̀ wa mòlàŋgà.

¹⁴ Hwene hwèlìŋgɛ̀, hwe hwèlì ndi hwèlìŋgɛ̀ hwe wòhwe ema hwe gbeyà hweyà hwe mànyaka, hwene hwèlìŋgɛ̀, hwe ɛndeya ikiŋgɛ o e rze ya arzɛ, o lì hwa rzàŋga o èki yɔ̀kɔ aŋga nanù hwa rzekeya e njuma o wùnyà ema Lòohwà lì Kàrzàmi a kàyìrzɛ hwatò.

¹⁵ Yerzù à ohwi nanù ema, “È okànèyà, nà ò jà ò wùnyà ema tɔ̀ mòtò à rza ò hwiyɛ nàa ŋmìhwɛ̀ à jà. Mònàmɛ̀ nà oŋgo mòtò ema à ò lìya ehvɛ̀nyɛ̀, ndèŋgànɛ̀lɛ̀ à ò ohvɛ mààtù mà eni, aŋga nanù mɔ̀ à rza ò ɛndɛ̀nɛ̀ morzombo ò lì luwa erzàmbo ò marzo mà hwatò.”

¹⁶ Ò naŋgɛ rzɔ, hweŋge hwèlìŋgɛ̀ hwe wòhwe hwe mà rzàŋga iŋgi kiŋgɛ ò èki ema è hwɛ̀lɛ̀hwɛ̀ ò è mbɔrzi yà Hibrù nanù ema, Amàgɛ̀dɔ̀nì.

¹⁷ È aŋgèlì ema è mà ùkirzɛ̀ lìrzàmba è mà koma hwètàtò hwe ndɛnɛ hwe ama Lohwɛ̀ ema è mà hwɛ ò tenì yà ewoki yà eni ò yùlulì. Lìlo lì ndɛnɛ lì mà uwɛlɛlɛ ò è konda yà lìkànèyà ò tenì yà è Ndawò yà Lohwà lì mà ohwa nanù ema, “È mà gbèyɛ̀nɛ.”

¹⁸ Ò mà hwɛ lìŋmɛti, lìwòhwɛ̀ là ŋmanyu lì mà hwɛnɛ ndùndùmèlì, mɔ̀tɔ̀wù mò è ŋgala lohwà. Ò mà hwɛ mònyìŋgìrzɛ̀nɛ̀ mò ndɛnɛ nyayi ema è rzi gbèyɛ̀nɛ̀ hvɛ lì wòteyà hwewotelì hwe è mòtò wà hwènàmà anu rze yà mɔ̀nyɛ̀. Mono mònyìŋgìrzɛ̀nɛ̀ mò mà nyìŋgìrzɛ̀nɛ̀ è rze nyayi yà màwɔ̀ŋgɔ̀.

¹⁹ Aŋga ndi è mbowà ndɛ̀ɛ̀ndɛ̀ yà ŋginyà yà à kàndeya moŋgo mayawò. Ndeŋgànɛlɛ màmbowà mà ndɛ̀ɛ̀ndɛ̀ mà arzɛ mà hwèkòmè hwe arzɛ hwe è rze yà mɔ̀nyɛ̀ ma mà rzùùwa. Lohwɛ̀ à mà ɔ̀ŋgɛ̀lɛ̀ mbowà ndɛnɛ yà ŋginyà, Babìlɔ̀nì, rzìi mɔ̀ à gbeyà nanù ema hwatò ema hwa hwèlì ò eŋge mbowà ndɛnɛ hwa ò luwa kɔ̀kìrzɛ̀ yà lì nyɔ mììmbà mà eni mà hwètàtò hwe eni hwe ndɛnɛ.

²⁰ Hweyondi hwe arzɛ hwe mà nyɔ̀ŋgɔ̀. Ndeŋgànɛ̀lɛ̀ ihvàko ja arzɛ hvɛ i mà nyɔ̀ŋgɔ̀.

²¹ È mbuwà yà màŋyàyi ema è mà ohva eyà yà menimenì nà mèta mè kilo ò lìŋyàyi lɔ̀kɔ ò morzìmbɔ̀ è mà uwɛ̀lɛ̀lɛ̀yi ò ŋmanyu ò lì undeya hwatò. Hwàŋga hwatò hwa mà jema Lohwɛ̀ ehwànja eŋge mbuwà yà màŋyàyi ema è mà lìteya è mà hwɛ wòhwe rzayi.