Hwèwulùwèlì 14 - Mokpwe: Bakwery (New Testament)

Yòwanìrzɛ̀ à ɛni è Ŋgùma yà Mɔ̀lɛ̀ŋgù nà hwatò hwa eni

¹ Nà ma ɔ̀ŋgɔ rzìi na ɛnɛ è Ŋguma yà Mɔ̀lɛ̀ŋgù e tɛmi o Hvàko ema e hwɛ̀lɛ̀hwɛ̀ Rzàyɔ̀nì. Mɔ̀rzɔ̀ŋgi mo hwatò ema mo ma hwɛ na mɔ̀ mo ma hwɛ egbe yɔ̀kɔ na mènìmènì me hwekolì, ema hwà mà ohva lìinà la eni na lìinà la ama e Tatɛ̀ wa eni o imbɔ̀mbɔ̀ ja awu.

² Èŋge hvonda ndi na a hweyà lìlo ema lì ma uwɛ̀lɛ̀lɛ̀yi o ŋmanyu yà lohwà. Lìŋgi lìlo lì ma hwɛ̀ɛnɛ ndi nàa malìhwa ema mo unda o lìyohwà, ndèŋgànɛ̀lɛ̀ lì ma hwɛ ndi nàa mɔ̀tɔ̀wu ema mo hwɛ̀ɛnɛ e ŋgala ya lohwà e kandeyà tɛ. Lìlo ema nà mà hweye lì ma hwɛ ndi nàa mɔ̀tɔ̀wu mo hwatò ema hwa oka indiŋga ja awu.

³ Èŋge egbe yɔ̀kɔ na mènìmènì me hwekolì hwe hwatò hwe ma emba mɔ̀rzɔ̀kɔ̀ mohvènya o worzò wo e konda ya lìkànèyà ya ama Lohwɛ̀, ndèŋgànɛ̀lɛ̀ o worzo wo hweŋge hwèembè hwe aniyɛ ema hwe hwèlì lòŋgɛ, na o worzo wo hwàmbaki. Tɔ̀ mòtò a rzi tànɛ lì okowa moŋgo mɔ̀rzɔ̀kɔ̀ lì aka tɛ eŋge egbe yɔ̀kɔ na mènìmènì me hwekolì hwe hwatò ema Lohwɛ̀ à mà kɔ̀te o e rze ya mɔ̀nyɛ̀.

⁴ Hwanu hwatò hwà mà hwɛ ndi hwatò ema hwa rza atukɛ e mbìndo ya hwalana, ehwànja hwa rzi hwi morzombo mo molàna. Hwàŋga hwatò ndi hwa oŋgamà e Ŋguma ya Mɔ̀lɛ̀ŋgù tɔ̀ ima èki ema e Ŋguma ya Mɔ̀lɛ̀ŋgù e ɛ̀ndɛ. Hwanu hwatò ndi hwa o kɔ̀tɔ̀wɔ̀ o ìtììtènì ja hwatò hwa hwènàmà. Ndeŋgànɛ̀lɛ̀ wɔ̀ ndi hwa hwèlì nàa e mbota ya worzo ema e ŋgbàahwì Lohwɛ̀ na e Ŋgùma ya mɔ̀lɛ̀ŋgù nàa làhweyà.

⁵ Wɔ̀ hwa rzi kɔ̀ɔ tɔ̀ eyà tɔ̀ wùnyà. Ndeŋgànɛ̀lɛ̀ hwa rza ohvi tɔ̀ njɔ̀mi.

Aŋgèlì iyàwò i jàni ŋmɛ̀ndì

⁶ Nà mà ɛnɛ ehvɛhvɛ aŋgèlì è kòòhwà hvòò ò ŋmanyu yà lìwòhwɛ̀ là ŋmanyu. Èŋge aŋgèlì è mà jànà ŋmɛ̀ndì mò gbamù ema mò hwèlì natɛ̀ɛ nà ò gbìndèyà. Moŋgo ŋmɛ̀ndì mò gbamù mɔ̀ ndi à mà hwɛ lì ohweyà hwatò ema hwa hwèlì ò è rze yà mɔ̀nyɛ̀, nyàyi nà nyàyi jà hwatò, màtumba nà màtumba, nyàyi nà nyàyi jà mbɔrzi nà hwèkòmè nà hwèkòmè.

⁷ Èŋge aŋgèlì è mà ohwa nà lìlo lì kàrzami nanù ema, “È ŋgbe Lohwɛ̀ èluhwe, ndèŋgànɛ̀lɛ̀ è hwɛ ndi ò lì mò eka, ehwànja è hvonda yà eni yà lì kàyìrzɛ hwatò è mà ɔlɛ̀. È mò kanɛ̀ mɔ̀ ema à wèki è ŋmanyu yà lohwà, è rze yà mɔ̀nyɛ̀, ŋmàànjà nà hwètùŋgu hwe malìhwa.”

⁸ È aŋgèlì ema è mà ùkirzɛ̀ ihwàkɛ, è mà oŋgama è yà worzò rzìi è ohwa nanù ema, “Èŋge Mbowà ndɛ̀ɛ̀ndɛ̀, Babìlɔ̀nì è mà kòna! È mà gbeyà hwatò hwa arzɛ hwa hwèkòmè hwe arzɛ hwe è rze yà mɔ̀nyɛ̀ ò lì nyɔ̀ mììmbà mà eni ema mà eti. Maŋga mìmbà ma mà hwɛ ndi è nyɔ̀ŋgi yà eni ò lì hwɛ è àkpàlà.”

⁹ È aŋgèlì ema è mà ùkirzɛ̀ iyàwò yɔhvɛ rzi yo oŋgama iŋgi jà ahwakɛ jà worzò, è ohwa nà lìlo lì kàrzàmi nanù ema, “È hwèlì tɛ nanù ema mòtò à kanɛ̀ èembe ema è uwɛlɛlɛ ò ŋmànja, nà èrzìrzà yà eni, rzìi à lùwa embànelì yà eŋge èembe ò mbɔ̀mbɔ̀ yà eni tɔ̀ ò lìya là eni,

¹⁰ mɔ̀ hvɛ à ò nyɔ̀ mììmbà ema mà hwèlì hwètàtò hwe ama Lohwɛ̀. Wɔ̀ hwa mà è rzɔ̀lɛ̀ ò lìwonde là hwètàtò là ama Lohwɛ̀ nà è ŋginyà ya awu ya arzɛ. Tɔ̀ ima mòtò ema à kanɛ̀ eŋge èembe oŋgo mòtò à ò lùwa mòtàkà mò mùnya ema mò ɔ̀kɔ̀ rzayi-rzayi, ò worzò wò i aŋgèlì jà wòtani nà è Ŋguma yà Mɔ̀lɛ̀ŋgù yà ama Lohwɛ̀.

¹¹ Yùùtùtù ema è ò wurza ò mùnya ema mò hwa rzɛ̀lɛ̀, è ò agba ò ŋmanyu natɛ̀ɛ nà ò gbìndèyà. Ò rza ò hwɛ tɔ̀ lìwɔ̀wìrzɛ̀ là nyo ŋmèrze nà wuu ò hwaŋga hwatò ema hwa kanɛ̀ eŋge èembe nà èrzìrzà yà eni. Ndeŋgànɛ̀lɛ̀ nanù ndi è àŋgàmɛ̀nɛ̀yi lì hwɛ nà tɔ̀ ima mòtò ema à ohvi eŋge embànelì ya lìinà la eŋge èembè.”

¹² Ène eyà è hwèlì ndi nanù ema, hwatò hwa wòtani hwa ama Lohwɛ̀ hwa àŋgàmɛ̀nɛ̀ lì ajùlɛ̀ ò tenì yà mètàkà, ò lì ika imbenda jà ama Lohwɛ̀ nà ò lì kombɛ̀ lìlòkɛ̀ là awu nà Yerzù.

¹³ Rzìi nà hweyà lìlo lì uwɛ̀lɛ̀lɛ̀yi ò ŋmanyu yà lohwà lì ohwa nanù ema, “Tìla ò rze nanù ema, ò lì wòteyà nàŋgɛ, mònàmɛ̀ nà hwatò ema hwa ŋwelì, ehwànja hwa lòkɛ̀yì è Rzàŋgo.” Èlìŋgɛ̀ yà wòtani è ohwi nanù ema, “Ɛ̀ɛ̀, wɔ̀ hwa ò lùwa lì arzìyòlɛ̀ ò nyòla èwòlò ema hwa mà gbeyɛ, ndèŋgànɛ̀lɛ̀ hwa ò lùwa mòrzàhwèlì ò nyòla hwèwòlò hwe gbamù ema hwa mà gbèyɛ.”

Yòwanirzɛ à ɛni nà oma hwa rzàŋga è mbòtà ya è rze yà mɔ̀nyɛ̀

¹⁴ Nà mà ɔ̀ŋgɔ, rzìi nà ɛnɛ ò worzo wò ami lìmbàki ema lì tàna. Ò mà lìya mòtò ò ŋmanyu yà lìŋgi lìmbaki ema à mà àyɛ̀kɛ̀nɛ̀ è Ŋmanà wà è mòtò wà hwènàmà. À mà wɔtɔ̀ ekòòtò yà gòòlù ò mòòhvò mò eni, ndèŋgànɛ̀lɛ̀ à mà ohva lùwɛ̀ndi là lìŋgɔ̀tɔ̀ ema lì eyàà ò lìya là eni.

¹⁵ Èhvɛhvɛ aŋgèlì rzìi e wurza o tenì ya e Ndawò ya Lohwà rzìi e arzàrzòwɛ na lìlo lì kàrzàmi o e mɔ̀ ema à mà lìya o ŋmanyu ya lìŋgi lìmbàki nanù ema, “Wowa luwɛ̀ndi la lìŋgɔtɔ̀ la aŋgɔ o hvàte e mbota, èhwanja e hvonda ya lì hvàte e mbota e ma uka, e mbòta ya e rze ya mɔ̀nyɛ̀ e ma oŋwa.”

¹⁶ O eŋgànɛlɛ e mɔ̀ ema à mà lìya o ŋmanyu yà lìŋgi lìmbàki à mà ŋmàrzɛlɛ lùwɛ̀ndi la lìŋgɔtɔ̀ ò è rze yà mɔ̀nyɛ̀, ndeŋgànɛlɛ a hvàta e mbota ya è rze ya mɔ̀nyɛ̀ ya arzɛ.

¹⁷ Èhvɛhvɛ aŋgèlì e ma wurza o e Ndawò ya Lohwà yà è ŋmanyu yà lohwà yɔ̀hvɛ e ma ohva lùwɛndi la lìŋgɔtɔ̀ ema lì eyàa.

¹⁸ Èhvɛhvɛ aŋgèlì e ma jà ema e ohvi màyìmbì o lì kànèyà mùùnya, e ma uwɛ̀lɛ̀lɛ̀yi o ètàwo ya itùwà. Rzìi e tɛɛya eŋge aŋgèlì ema e ma ohva lìŋgi luwɛndi la lìŋgɔ̀tɔ ema lì eeya, na lìlo lì kàrzàmi nanù ema, “Wowa luwɛ̀ndi la lìŋgɔtɔ̀ la aŋgɔ ema lì eyàa, o rzàŋge mbuhva ja hwehvùma hwe mayi ma hwehvùma ema mà hwèlì o hvaya ya e rze mɔ̀nyɛ̀, èhwanja hwehvùma hwe eni hwe ma tana.”

¹⁹ O èŋgànɛ̀lɛ̀ rzɔ, e aŋgèlì e ma ŋmarzɛlɛ luwɛ̀ndi la lìŋgɔtɔ̀ la eni o rze ya mɔ̀nyɛ̀, rzìi e rzàŋga hwaŋga hwatò rzìi a hwa hvimba o èki ema Lohwɛ̀ a uŋmɛ̀lɛ̀ hwetàtò hwe eni hwe ŋginyà. Ène nyayi e hwèlì ndi ŋgànà hvɔ̀kɔ na oma hwa rzàŋga hwehvùma o lì hwe ɛ̀ndɛ̀nɛ̀ o èki ema hwa hwe nyùkeya.

²⁰ Hweŋge hwehvùma hwe ma nyukahwa o èki ema hwà mà hwe nyùkeya o èki ema e rza enje o tenì ya e mbowà ndɛnɛ. Màyija ma mà wurza o èŋge èki ema hwa nyùkeyà hwehvùma, ma mà rzɔŋgɔ lìmɛni la meta mɔ̀kɔ na ehvàrzu, ndèŋgànɛ̀lɛ̀ ma mà wawa mɔ̀tɛ̀yi nàa hwègbe hwehwakɛ hwe màyilì.