Hwèwulùwèlì 11 - Mokpwe: Bakwery (New Testament)

Yòwanìrzɛ̀ a ɛni mbòŋgi ihwàkɛ

¹ Nà ma ŋgbààhwà eeye ema e ma hwɛ ndi nàa eeye ya lìmɛ̀nì, rzìi na ohwahwɛlɛ nanù ema, “Ɛndɛ o mɛnɛ e Ndawò ya Lohwà ya ama Lohwɛ̀, na ètàwo ya itùwà, rzìi o aŋga mɔ̀rzɔ̀ŋgi mo hwatò ema hwa ŋgba Lohwɛ̀ èluhwe àŋga.

² Ndi ò rzi mɛ̀nɛ̀ eŋge ewòka. Ò rzi è mɛ̀nɛ̀ ehwànja è mà ŋgbààhwà hwaŋga hwatò ema hwa rza enje wònyà Yudà. O mènimènìì mè ŋgbɛndɛ nà ihwakɛ, wɔ̀ hwa ò làalà è Mbowà ndɛnɛ yà Wòtani.

³ Nà ŋgba imboŋgi jà ami jà ahwàkɛ è wònjà o lì ohwa hweyà ema hwe ò gbèyɛ̀nɛ ò tenì yà ikolì jɔ̀kɔ hwègbe hwehwakɛ nà mèni mòtòhwa mè mèènyà. Ndeŋgànɛ̀lɛ̀ hwa ò wɔ̀tɔ̀ mààtù mà màyɛ̀hwɛ̀.”

⁴ Ini mboŋgi jà ahwakɛ, wɔ̀ ndi hwa hwèlì màyi màahwàkɛ̀ mà Njàhwɛ̀ nà mboko ihwakɛ ema hwètùlù hwe tɛ̀mɛ̀, ema hwe tɛ̀mì ò worzo wò ama è Rzàŋgo ema à kànèyà è rze yà mɔ̀nyɛ̀.

⁵ È hwèlì tɛ nanù ema mòtò a arzi lì hwa gbeyàna wòhwe, mùnya mo hwa wurza o iwàna ja awu rzìi mo hvàŋga hwàkɔ̀yèlì hwa awu. Nànù ndi tɔ̀ ima mòtò ema a keki lì hwa gbeyàna wòhwe a àŋgàmɛ̀nɛ̀yi lì ŋwa.

⁶ Hwanu wùnyànà hwa ohvi è wònjà ya lì tɛmirzɛ lìwòhwɛ là ŋmanyu nanù ema lì rza yɔ̀lìrzɛ mbuwà e hvonda ema wɔ̀ hwa ohweyà hwatò hweyà ema Lohwɛ̀ a ohwi nanù ema hwe o gbèyɛ̀nɛ. Hwa hwɛni hvɛ e màyìmbì ma lì gbeyà nanù ema meyorzo me timbe màyija. Hwa hwɛni hvɛ màyìmbì ma lì nyàkohwa e rze na tɔ̀ ima nyayi ya kàndɛ ŋgɛlɛ-ŋgɛlɛ na oma wɔ̀ hwa àrzeyà.

⁷ È hvonda ema wɔ̀ hwa ò kulɛ ò lì ohwa hweyà ema hwa mà ohwahwɛlɛ ò lì ohwa, eŋge èembe ema è ò uwɛ̀lɛ̀lɛ̀yi ò tenì yà ehvɔ̀ndi ema è rza ohvɛ lìrzùkù è ò hwa urzùweyà. Èŋge èembè è ò hwa aka màyìmbì ndeŋgànɛlɛ è hwa oŋwa.

⁸ Ŋmìimbà mè awu mè o nàŋga o moombo ema mo akeyà e mbowà ndɛɛndɛ ema hwà mà wòmeya e Rzàŋgo ya awu o mbàrza. Èŋge mbowà ndɛɛndɛ e ma hwɛ̀lɛ̀hwɛ̀ ndi na ŋmàna nanù ema, Rzodomi na Ìjiptò.

⁹ Ò tenì yà mèènyà meyàwò nà ehvàrzu, hwatò hwa mà uwɛ̀lɛ̀lɛ̀yi ò hwèkòmè nà hwèkòmè, màtumba nà màtumba, nyàyi nà nyàyi jà mbɔrzi, nà nyàyi nà nyàyi jà hwatò, wɔ̀ hwa ò ɔŋgɔ ŋmìimbà mè awu ndèŋgànɛ̀lɛ̀ hwa rza ò emeyà nanù ema hwa mè imeya.

¹⁰ Hwatò ema hwa hwèlì ò rze yà mɔ̀nyɛ̀ hwa ò lìŋgeyà è kpelì yà hwanu hwatò hwààhwàkɛ. Hwa ò wòŋgìrzɛ̀nɛ̀ ndèma, ndèŋgànɛ̀lɛ̀ hwa ò aŋgbàànɛ màhwèyà mɔ̀kɔ nà ɔnɛyi ò lì uŋmɛ̀lɛ̀ màlìŋgo. Hwa ò gbèeyà nanù ehwànja, hwanu hwà-òhwèlì hwa hwèlìŋgɛ̀ hwahwàkɛ hwa mà tàkirzɛ̀ hwatò è hvonda ema hwa mà hwɛ ò è rze yà mɔ̀nyɛ̀.

¹¹ Ndi ò mburza yà mèŋge mèènyà mè ayɛ̀ nà ehvàrzu, mùùlù mò lòŋgɛ ema mò uwɛ̀lɛ̀lɛ̀yi ò mà Lohwɛ̀ mò mà kpèeyà hwaŋga hwà-òhwèlì hwa hwèlìŋgɛ̀ hwahwàkɛ rzìi hwa tɛ̀mɛ̀ ò ŋmanyu. Wɔ̀ɔ̀ŋgɔ wò ndɛnɛ wò mà kpèeyà hwatò ema hwa mà hwa ɛnɛ.

¹² Rzìi hwaŋga hwà-òhwèlì hwa hwèlìŋgɛ̀ hwa hweyà lìlo lì ndɛnɛ ema lì uwɛ̀lɛ̀lɛ̀yi ò ŋmanyu yà lohwà lì hwa ohweyà nanù ema, “È agbe ono ŋmanyu.” Rzìi hwa kpèeyà ò tenì yà lìmbaki hwa ɛndɛ o ŋmanyu yà lohwà rzìi hwàkɔ̀yèlì hwa awu hwa à hwa ɔ̀ŋgɔ nà oma hwa agba.

¹³ Ò lìŋgi lìrzàkò mɛnɛ ò mà hwɛ monyìŋgìrzɛ̀nɛ̀ mòndɛnɛ rzìi lòŋgò lɔ̀kɔ ò tenì yà lìyòmè là eŋge mbowà ndɛ̀ɛ̀ndɛ̀ è wuhweyà. Mɔ̀rzɔ̀ŋgi mò hwatò ema mò mà ŋwa ò moŋgo mònyìŋgìrzɛ̀nɛ̀ mò mà hwɛ hwèkolì lìrzamba. È wɔ̀ ema hwa mà kàrzowà hwa mà oka wɔ̀ŋgɔ̀ rzìi hwa eka Lohwɛ̀ là màyìmbì ema lì hwèlì ò ŋmanyu yà lohwà.

¹⁴ È kàndɛ̀ ema è mà ùkirzɛ̀ ihwàkɛ è mà aka. È kàndɛ̀ ema è ùkirzɛ̀ iyàwò è jà ŋmanà mbɔ̀.

È aŋgèlì è mà tòŋga lìyɔ̀mi ema lì ùkirzɛ̀ lìrzamba

¹⁵ È aŋgèlì è ùkirzɛ̀ lìrzamba hvɛ è tòŋga è là eni lìyɔ̀mi. Rzìi lìlo ema lì kàrzami lì uwɛlɛlɛ ò ŋmanyu yà lohwà lì à ohwa nanù ema, “È wònjà yà lìkànèyà ene rze ò naŋgɛ è mà tìmba ndi è yà ama è Rzàŋgo, Lòohwà là arzu nà è Krirztò yà eni, ndèŋgànɛlɛ mɔ̀ à ò kànèyà natɛ̀ɛ nà ò gbìndèyà.”

¹⁶ Rzìi è mbàŋgɛ yà hwàmbaki nà hwànìi ema hwa mà lìya ò ikonda jà awu jà màkànèyà ò worzo wò ama Lohwɛ̀, hwa mà kpa ò worzo wò ama Lohwɛ̀ rzìi hwa à mò ŋgba èluhwe.

¹⁷ Hwa mà ohwa nanù ema, “Jò ò ŋgbelì jèka Rzàŋgo Lohwɛ̀ ema ò kàrzàmi, ò wà ema ò hwèlì, ndèŋgànɛ̀lɛ̀ ema ò mà hwɛ. Jò ò èki ehwànja ò gbeyànì màyìmbì mà aŋgɔ màndɛ̀nɛ̀ ò lì wòteyà lì kànèyà.

¹⁸ Hwàto ema hwa rza ò gbèeyà hwa mà tatà ehwànja hwètàtò hwe aŋgɔ hwe màyìmbì hwe mà jà. È hvonda è mà uka ò lì kàyìrzɛ hwatò ema hwa ŋwelì. È hvonda è mà uka ema hwàgbèèlì hwa aŋgɔ, hwà-òhwèlì hwa hwèlìŋgɛ̀, nà hwatò hwa aŋgɔ hwa ò gbèeyà ema hwa ò ŋgba èluhwe, hwatò hwa arzɛ, tɔ̀ hwatò ema hwa hwèlì wòlìto tɔ̀ hwa rza hwɛnɛ wòlìtò, ò hwa rzàweyà. Ò eŋge hvonda ndi o ò hvaŋga hwatò ema hwa hvàŋga hwatò ò è rze yà mɔ̀nyɛ̀!”

¹⁹ Aŋga ndi nà à ɛnɛ è Ndawò yà Lohwà ema è hwèlì ò ŋmanyu yà lohwà yà à lìhvoweya. Ndeŋgànɛ̀lɛ̀ ò tenì yà eŋge Ndawò yà Lohwà, nà mà ɛnɛ Iwòŋgo jà eni jà Yòmbo. Lìŋmɛti lì mà aka, mɔ̀tɔ̀wù mòndɛnɛ mò mà wurza ò ŋmanyu, è ŋgalà yà lohwà è mà kàndeyà, mònyìŋgìrzɛ̀nɛ̀ mò mà hwɛ, ndèŋgànɛ̀lɛ̀ è mbuwà yà màŋyàyi màndɛ̀nɛ̀ è mà yɔ̀ɔ̀.