Hwèwulùwèlì 1 - Mokpwe: Bakwery (New Testament)

¹ Ène kààtì e ohwa ndi lì hvomɛ̀nɛ̀ hweyà ema hwe o gbèyɛ̀nɛ ema Yerzù Krirztò a gbèyi ndèŋgànà hwe o e hwiyɛnɛ. Lohwɛ̀ à mà mo ŋgba hwene hweyà nanù ema hwe hwiyɛnɛ aŋga nanù mɔ̀ à uŋmɛ̀lɛ̀ hwàgbèèlì hwa eni hweyà ema hwe o gbèyɛ̀nɛ ŋmanà mbɔ. Krirztò à mà gbeyà e mògbèèlì wa eni Yòwanìrzɛ̀ o lì hwiye hwenè hweyà na oma à mà mo òmeya e aŋgèlì ya eni.

² Ndeŋgànɛ̀lɛ̀ Yòwanìrzɛ̀ ndi à mà ohwa hweyà hwe arzɛ na oma mɔ̀ à mà hwe ɛneya. Hwene hweyà hwe ɔndi mɔ̀ à mà ohwe o lì hvomɛ̀nɛ̀ ŋmɛ̀ndì ema mo ò uwɛ̀lɛ̀lɛ̀yi o ma Lohwɛ̀ na e mboŋgi ema mɔ̀ à tɛmeya Yerzù Krirztò.

³ Mònàmɛ̀ na tɔ̀ njɛnɛ ema a làŋgi ene kààti, aŋga nanù hwahvɛhvɛ hwatò hwa o hweyà mono ŋmɛ̀ndì o lì hvomɛ̀nɛ̀ hweyà ema hwe o gbèyɛ̀nɛ. Ndeŋgànɛ̀lɛ̀ mònàmɛ̀ mo hwɛ na tɔ̀ njɛnɛ ema a hweye mono ŋmɛ̀ndì rzìi a ika hvɛ hweyà ema hwe tìlahwì o tenì ya ene kààti. È hvonda e ma kombɛ̀nɛ̀ ema hwene hweyà hwe arzɛ hwe o gbèyɛ̀nɛ.

Yòwanìrzɛ̀ a omelì lìrzàmba la mèemba ikɔ̀mi

⁴ Imba Yòwanìrzɛ̀, nà tìlèlì mììtèlì lìrzàmba ema mè hwèlì ò erzòòkà yà Èrzìyà. Inyɛ̀ è ndèli nà ɛ̀yɔ̀lɛ̀ yà ama Lohwɛ̀, è hwɛ nà inyɔ. Lohwɛ̀ ema à hwèlì, ema à mà hwɛ, nà è mɔ̀ ema à ò hwɛ̀ɛ̀, ndèŋgànɛ̀lɛ̀ hwèlìŋgɛ̀ lìrzàmba hwa è omèlì è ndèli nà ɛ̀yɔ̀lɛ̀. Hweŋge hwèlìŋgɛ̀ hwe hwèlì ò worzo wò è konda yà lìkànèyà yà è ŋmanyu yà lohwà.

⁵ Yerzù Krirztò mɔ̀ hvɛ à è omelì è ndèli nà ɛ̀yɔ̀lɛ̀. Mɔ̀ ndi à hwèlì è mɔ̀ ema à ohwa è jɔ̀kɛ̀ lì hvomɛ̀nɛ Lohwɛ̀ nyayi ema ì hwi nanù ema è hwèlì è jɔ̀kɛ̀. Mɔ̀ ndi à hwèlì è mòtò wà worzo ema à lomi lì hvùmùlɛ, ndèŋgànɛ̀lɛ̀ mɔ̀ ndi à hwèlì è mòkànèlì hwa ikìŋgɛ jà ene rze. À jò lìŋgàni, ndèŋganɛlɛ mɔ̀ à mà gbeyà wòhwe wò rza jò kànèyà hvɛ nà oma mɔ̀ à jo ŋwèlɛ̀lɛ̀yì ò mèyohvo mè arzu.

⁶ À jò gbèyi ì hwèlì ndi nàa Ipilìrzi ema i gbèeyà Lohwɛ̀ è Tatɛ̀ yà eni ema è hwa kànèyà. Inyɛ̀ èluhwe nà lìkànèyà là eni lì hwɛ ò gbìndèyà nà ò gbìndèyà. Inyɛ̀ wò lìya nanù.

⁷ È ɔŋgɔ tɛ, à hwèlì à jà nà lìmbaki, ndèŋgànɛlɛ tɔ̀ ima mòtò à ò mò ɛnɛ, tɔ̀ hwaŋga hwatò ema hwa mà gbeyà ema à ŋwe nà oma hwa mà mò hvànɛ ò mbàrza. Màtumba mà arzɛ mà è rze yà mɔ̀nyɛ̀ hwa ò mò ɛhwɛ. Nànù mɛnɛ ndi è ò hwɛ, inyɛ è hwɛ nanù.

⁸ Rzàŋgo Lohwɛ̀ lì karzamì à ohwi nanù ema, “Imbà ndi nà hwèlì è Àlhvà nà è Omèga,” mɔ̀ ndi à hwèlì Lòohwà ema lì hwèlì, ema lì mà hwɛ, ndèŋgànɛ̀lɛ̀ ema lì ò hwɛ̀ɛ̀.

Yòwanìrzɛ̀ à ɛni Krirztò ò tenì yà jɛ̀nɛ̀nì

⁹ Imbà ndi nà hwèlì Yòwanìrzɛ̀ ŋmanyàŋgò wà anyu. Nà hwèlì ndi mɔ̀kɔ ema mɔ̀hvɛ à hwèlì ndi nàa inyɔ, ò lì kaka ŋmèma nà ò lì àjùlɛ̀nɛ̀ mètàke ema mè jèeyà hwatò ema hwa hwèlì ò lìkànèyà là ama Yerzù Krirztò. Hwa mà nò ika ò erzòòkà ema malìhwà ma mà toŋge ema è hwɛ̀lɛ̀hwɛ̀ Pàtìmòrzì ehwànja nà mà ohwa Eyà yà ama Lohwɛ̀ rzìi nà ohweyà hwatò lì hvomɛ̀nɛ̀ hweyà ema nà mà ɛnɛ lì e hvomɛ̀nɛ̀.

¹⁰ Èlìŋgɛ̀ yà Wòtani è mà nò rziweya o Wùnyà wo ama e Rzàŋgo. Nà ma hweyà lìlo lì ndɛnɛ ema lì ma lì uwɛlɛlɛyi o mburza ya ami lì ma gbeyà ndi nàa mɔ̀tɔ̀wu mo lìyɔ̀mi.

¹¹ Lì ma ohwa nanù ema, “Tila o kààti hwèèmà ema o ɛni, rzìi hwe e omeya lìni lìrzàmba la mìitelì. Ò è omeya o lìni lìrzàmba la mìtelì ema me hwèlì o Ɛ̀hvɛ̀rzɔ̀rzì, o Rzɛ̀màyìnà, o Pɛ̀gàmùmì, o Tìyatìrà, o Rzàdìrzì, o Hvìladɛlhvìyà na o Làwòdèrzìyà.”

¹² Nà ma ayeŋgòwɛ̀ o lì ɔ̀ŋgɔ lìlo ema lì ma hwɛ lì na ohwìrzɛ̀nɛ̀. È hvonda ema nà mà ayeŋgòwɛ̀, nà mà ɛnɛ mboko lìrzamba ja gòòlù ema hwètùlù hwe tɛmi o ŋmanyu.

¹³ O ìtììtènì ja lìŋgi lìrzamba la mboko, o ma tɛ̀mɛ̀ mɔ̀kɔ ema à mà akɛnɛ mòtò wa hwènàmà. A ma rzoŋgɛ mòŋgòmbè ema mo ma ɔ̀ndɔ̀ natɛ̀ɛ na o màtàŋgà mà eni ndèŋgànɛ̀lɛ̀ ŋgolì ya gòòlù e ma kakahwa o ŋgeŋge ya eni.

¹⁴ Lìhvumbu o moòhvo mo eni lì ma tana ndi nàa mbɔ̀mi, mìirzɔ̀ ma eni ma mà ɛneya ndi nàa mùnya ema mo òŋwa.

¹⁵ Matàŋgà mà eni ma mà ɛneya ndi nàa ɛ̀ɛkɛ̀ ema e hwɛ̀lɛ̀hwɛ̀ nanù ema brɔ̀nrzi, ema e ikahwi o mùnya rzìi e a ɛnɛ o a ɛnɛ oma e mɔ̀tɛ̀lɛ̀, ndèŋgànɛ̀lɛ̀ lìlo la eni hvɛ lì ma rziŋga ndi nàa màlìhwa emà mà rzihwa o lìyohwa.

¹⁶ O lìya la eni la momɛ̀, à mà tɛtɛ rzombe lìrzamba. Rzɔ̀lɔ̀ ema e ma eeya rzayi-rzayi o hwèhvàrzù hwe-ahwakɛ yɔ̀hvɛ e ma wurza o wàna ya eni. Wòrzo wa eni wɔ̀ hvɛ wo ma hvànya na ŋginyà nàa igbèyi ja kɔ̀rzi ya ŋmerze.

¹⁷ Nà oma nà mà mo ɛnɛ, nà mà kpa o matàŋgà mà eni rzìi na hwɛ ndi nàa mòtò ema à mà ŋwɛɛ. Rzìi à no hwàkɛ lìya la eni la mome rzìi a ohwa nanù ema, “O rza oka wɔ̀ŋgɔ̀, imba ndi na hwèlì e Mòtò wa Hwèwòteli ndèŋgànɛ̀lɛ̀ na hwèlì e Mòto wa Lìrzukù.

¹⁸ Imba ndi na hwèlì oŋgo ema a hwèlì lòŋgɛ. Nà ma ŋwa, ndi o naŋgɛ na hwèlì lòŋgɛ o gbìndèyà na o gbìndèyà. Ndeŋgànɛ̀lɛ̀ na kànèyà e mbowà ya e kpelì.

¹⁹ O eŋgànɛ̀lɛ̀ rzɔ, tìla mamɛ ema o ma ɛnɛ, ema hwe hwèlì hwe gbèyɛ̀nɛ naŋgɛ ndèŋgànɛ̀lɛ̀ ema hwe o gbèyɛ̀nɛ.

²⁰ È wùndɛ̀ ema e hwèlì lì hvomɛ̀nɛ̀ lìrzàmba la rzombe ema lì hwèlì o lìya la ami la mome na lìrzamba la mboko ja gòòlù ja hwètùlù hwe hwèlì ndi: Lìrzàmbà la rzombe lì hwèlì ndi i aŋgèlì lìrzàmba ja lìrzàmba la mèèmbà, ndeŋgànɛlɛ lìrzàmba la mboko ja gòòlù ja hwètùlù hwe hwèlì ndi lìŋgi lìrzàmba la mèèmbà.”