Hwègbèèlì 9 - Mokpwe: Bakwery (New Testament)

Rzàwòlò à mà timba lì lòkɛ̀ Yerzù

¹ Ò ene hvònda Rzàwòlò mɔ̀ à mà hwɛ ndi lì kimeya ò lì òŋwa hwàlòkèlì hwa ama è Rzàŋgò. À mà ɛndɛ lì ùŋmànɛ̀lɛ̀ è Pìlìrzì ema è Kàrzami.

² Rzìi à mò ijòwa ama à mò ŋgbe itita, ò lì ŋgba hwàtìmbèlì hwa è ndawò yà màkànɛ̀ ema è hwèlì ò mbòwa yà Dàmàrzkɔ̀rzì. Aŋga nanù, à hwɛnɛ è wònja nanù ema à ɛni tɛ tɔ̀ ima mòtò ema à nɔ̀ŋgɔ è njiya yà ama Yerzù aŋga mɔ̀ à hwa ŋgbaŋgɛ, tɔ̀ hwa hwɛ ndi wunyanà tɔ̀ hwalanà, à hwa ɛ̀ndɛ̀nɛ̀ ò mbòwa yà Jèrurzalɛ̀mù.

³ Aŋga ndi Rzàwòlò à mà anjiye rzi a ɛndɛ. Nà òma mɔ̀ à mà kòmbɛ̀nɛ̀ è mbòwa yà Dàmàrzkɔ̀rzì, lìwòkimɛnɛ lìŋmɛti lì mà uwɛ̀lɛ̀lɛ̀yì ò ŋmanyu yà lohwà, rzìi lì mò hvàyeyà è nyò yà arzɛ.

⁴ À mà kpa ò rze, rzìi à hweyà lìlò ema lì mò òhweyà nanù ema, “Rzàwòlò, ìi Rzàwòlò! Mamɛ ndèŋgàtɛ ò nò tàkìrzɛ̀ e?”

⁵ Rzàwòlò à mà ijòwa nanù ema, “Ìi Rzàŋgò ò wà ò hwèlì ndi njɛ̀nɛ e?” Liŋgi lìlò rzìi lì mò alàhwɛ̀ nanù ema, “Imba ndì nà hwèlì Yerzù, ema ò tàkìrzɛ̀.

⁶ Ò nàŋgɛ̀ rzɔ tɛ̀mɛ̀nɛ̀ ò ŋmanyu ò ɛndɛ ò kpèeyà ò eŋge mbòwà ndɛ̀ɛ̀ndɛ̀, ò òhwàhwɛlɛ mamɛ ema ò hwɛni lì gbeyà.”

⁷ Hwàŋga hwatò ema hwa mà hwɛ lì ɛndɛlɛnɛ nà Rzàwòlò, hwa mà tɛ̀mɛ̀, hwa rzi òhwe tɔ̀ eyà, ndi hwà mà hweya lìlò tɔ̀ nɛ hwa rzi ɛnɛ̀ tɔ̀ mòtò.

⁸ Rzàwòlò à mà tɛ̀mɛ̀nɛ̀ ò ŋmanyu, rzi a lìhvòwà mììrzɔ̀ ma eni ndì a rzì tanɛ lì ɛnɛ tɔ̀ yòma. O èŋgànɛ̀lɛ̀ hwà mà mò tìmba ndi lì tìmba, ò lì kpèeyà ò mbòwa ya Dàmàrzkɔ̀rzì.

⁹ O tenì ya mèènyà meyàwò à mà hwɛ ndima. O eŋge hvònda ya arzɛ a rzi lèè tɔ̀ lì nyɔ tɔ̀ yòma.

¹⁰ Ò mà hwɛ mòlòkèlì mɔ̀kɔ ò mbòwà yà Dàmàrzkɔ̀rzì ema à mà hwɛ̀lɛ̀hwɛ̀ Ànàniyarzì. Onò mòtò à mà ɛnɛ̀ jɛ̀nɛ̀nì. Ò iŋgi jɛ̀nɛ̀nì, è Rzàŋgò Yerzù è mà mò hwɛlɛ nanù ema, “Ìi Ànàniyarzì!” Ànàniyarzì rzìi alàhwɛ̀ nanù ema, “Ìi Rzàŋgò imba ònò.”

¹¹ Rzàŋgò rzìi à mò òhweyà nanù ema, “Wòŋgirzɛnɛ ò ɛ̀ndɛ̀ ò ndawò yà ama Jùdàrzì ema è hwèlì ò ekì ema è hwɛ̀lɛ̀hwɛ̀ è Njìya ema ye Ènyòhwɛ̀nɛ̀. Ò uki tɛ aŋga, ò ìjòlɛ̀lɛ̀ mòtò mɔ̀kɔ ema à uwɛ̀lɛ̀lɛ̀yì ò mbòwà yà Tàrzɔ̀rzì ema à hwɛ̀lɛ̀hwɛ̀ Rzàwòlò. À hwèlì ò màkanɛ̀ naŋgɛ,

¹² ndèŋgànà à hwèlì lì ɛnɛ̀ jɛ̀nɛ̀nì. Ò tènì yà iŋgi jɛ̀nɛ̀nì, mɔ̀ à ɛni mòtò ema à hwɛ̀lɛ̀hwɛ̀ Ànàniyarzì ema à kpèèlì rzi à mò hwàkɛ màà mà eni aŋga nanù mɔ̀ à ò ɛnɛ̀ hvɛ.”

¹³ Ànàniyarzì rzìi à mò alàhwɛ̀ nanù ema, “Ìi Rzàŋgò, rzayi-rzayi jà hwatò hwa mà nò òhweyà lì hvòmɛ̀nɛ̀ ònò mòtò, nà hweyà hwe arzɛ hwe wòhwe ema mɔ̀ à mà gbeyànɛ̀ hwatò hwa aŋgɔ̀ hwa wòtani ò mbòwà yà Jèrurzalɛ̀mù.

¹⁴ Ndeŋgànɛlɛ mɔ̀ à jànì wònjà naŋgɛ anu Dàmàrzkɔ̀rzì ema ipìlìrzì ndɛnɛ ì mò ŋgbelì, ò lì ŋgbaŋgɛ hwatò hwa arzɛ ema hwa kanɛ̀ ò lìnà là aŋgɔ̀.”

¹⁵ Ndi Rzàŋgò à mà òhweyà Ànàniyarzì nanù ema, “Ɛ̀ndɛ̀, èhwanja nà mà hvɔ̀rzɔ̀ ònò mòtò ò lì nò gbèeyà. Mɔ̀ à ò gbeyà hwaŋga hwatò ema hwa rza enje wònyà Yudà, ikìŋgɛ̀ jà awu, nà wònyà Yudà ò lì nò hwiya.

¹⁶ Ndeŋgàna imba na hwɛni lì mò uŋmɛ̀lɛ̀ mamɛ ya arzɛ ema a hwɛni lì taka ò nyòla ami.”

¹⁷ O èŋgànɛ̀lɛ̀ Ànàniyarzì à mà ɛndɛ, rzi a kpèeyà ò tenì ya e ndawò ema Rzàwòlò à mà hwɛ, rzìi a mò hwàkɛ màà ma eni. A ma mò òhweyà nanù ema, “Ŋmanyàŋgò wa ami Rzàwòlò kòkò, Rzàŋgò a nò òmani lìkànèyà. Rzàŋgò Yerzù ema a ma ò wùrzeyà ò njiya na òma ò ma hwɛ lì jà anu. A nò òmi ò mbàà aŋgɔ̀ aŋga nanù, ò wa, ò tànɛ lì ɛnɛ̀ hvɛ, na lì òndìrzɛ̀hwɛ nà Èlìŋgɛ̀ yà Wòtani.”

¹⁸ O lìwòkimɛnɛ, hwema hwe ma unda ò mirzɔ̀ ma ama Rzàwòlò, ema hwe ma àkɛnɛ̀ hweyàrzà hwe nyàmà ja malìhwa, ò èŋgànɛ̀lɛ̀ mɔ̀ à mà wòteyà lì ɛnɛ̀ hvɛ. A ma tɛ̀mɛ̀ ò ŋmanyu rzi a lùhwìrzɛ̀hwɛ̀.

¹⁹ O mburza ya hvònda ema mɔ̀ à mà lèè mòlèlì rzi e ŋginyà ya eni e timba. Rzàwòlò à mà lìya na hwàlòkèlì hwa ama Yerzù ŋgùrzu ja mèènyà ò mbòwa ya Dàmàrzkɔ̀rzì.

Rzàwòlò à mà òhwa Ŋmɛ̀ndì mò Gbamù ò mbòwa ya Dàmàrzkɔ̀rzì

²⁰ O lìwòkimɛnɛ a wòteyà lì òhwa eyà ya Lohwà ò tenì ya i ndawò ja màkanɛ̀ nanù ema, Yerzù ndi à hwèlì è Ŋmanà wà ama Lohwɛ̀.

²¹ Hwatò hwa arzɛ ema hwà mà mò òkànèyà hwà mà tàmà. Rzìi hwa wòteyà lì ijòwa nanù ema, “Rzeke ònò mòtò mɔ̀ ndì à mà hwɛ lì òŋwa hwaŋga hwatò ema hwà mà hwɛ lì kanɛ̀ ò lìna la ama Yerzù ò Jèrurzalɛ̀mù e? Ndeŋgàna rzeke hwèjèelì hwe eni hwe anu òma hwe hwèlì ndi ò lì ŋgbaŋgɛ hwaŋga hwatò na lì hwa timbaneya ipìlìrzì ndɛnɛ e?”

²² Ndi tɔ̀ nanù hwèyòhwèlì hwe ama Rzàwòlò hwe eyà ya Lohwà, hwe ma ɛndɛ ndi ò wòrzò na ŋginyà. Ndi à mà tàmìrzɛ̀ hwatò hwa wònyà Yudà ema hwà mà hwɛ ò mbòwa ya Dàmàrzkɔ̀rzì. Nà òma à mà hwa uŋmɛ̀lɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi, wɔ̀ hwa rzi òhve hvɛ tɔ̀ eyà ya lì òhwa.

²³ O mburza ya rzayi-rzayi ja mèenyà ema me ma aka, wònyà Yudà hwà mà arzàŋganɛ rzìi hwa wèka ŋmanò mò lì òŋwa Rzàwòlò.

²⁴ Ndì mɔ̀ Rzàwòlò à mà hweyà ŋmanò mò awu. Ŋmerze na wuu wɔ̀ hwà mà ɔŋgeya mawòhvà mà ikɔtɔ̀ ja mbòwa, ò lì arza lì mò òŋwa.

²⁵ Ndi wùu wɔ̀kɔ, hwaŋga hwatò ema hwà mà òŋgama Rzàwòlò rzìi hwa mò wòwa hwa mò ika ò tenì ya mòrzayi, hwa mò rzìhwìrzɛ̀lɛ̀lɛ̀ ò hvòko ema è mà hwɛ ò èrzu ya kɔ̀tɔ̀ ema e ma lìŋga e mbòwa.

Rzàwòlò à mà timba ò mbòwa ya Jèrurzalɛ̀mù

²⁶ Rzàwòlò à mà ɛndɛ ò Jèrurzalɛ̀mù, na òma à mà uke aŋga, à mà keka ò lì hwɛ na hwatò ema hwa lòkɛ̀ Yerzù. Ndi hwaŋga hwatò hwà mà mò òka wɔ̀ŋgɔ̀ èhwanja wɔ̀ hwa rzi lòkɛ̀ nanù ema mɔ̀ hvɛ a hwèlì ndi mòlòkelì mɔ̀kɔ wa ama Yerzù Krirztò.

²⁷ Bànàbàrzì rzìi a tɛ̀mɛ̀ a mò lɛmbɛ lìiyà la eni, a mò timbà lì mò ɛndɛneya inɛyi àpɔ̀rzìtòlò. A ma kuwa lì hwa nɔ̀ŋgeya nɛ Rzàwòlò mɔ̀ à mà ɛnɛ Rzàŋgò ò jɛ̀nɛ̀nì ò njiya, ndèŋgànɛlɛ nɛ e Rzàŋgò e ma mò òhwirzɛnɛ. A ma hwa òhweyà hvɛ na òma Rzàwòlò à mà hwɛ lì òhweyà hwatò hweyà lì hvòmɛ̀nɛ̀ Yerzù ò Dàmàrzkɔ̀rzì e rzi hwɛ mɔ̀ lì òka wɔ̀ŋgɔ̀.

²⁸ Ène ŋgàna rzɔ, ema gbeyà Rzàwòlò a lìya na wɔ̀ rzi mɔ̀ à ɛndɛ ò hwekì hwe arzɛ hwe Jèrurzalɛ̀mù, ò lì òhwa Ŋmɛ̀ndì mò gbamù ò lìinà la ama Rzàŋgò à rzi hwɛ lì òka wɔ̀ŋgɔ̀.

²⁹ Mɔ̀ à mà òhwa na lì kanja hvɛ hwatò hwa wònyà Yudà ema hwà mà hwɛ lì òhwa e mbɔrzi ya Grìki. Rzìi hwa wòteyà lì lùtèyà ŋmanò mò lì mò òŋwa.

³⁰ Nà òma hwàlòkèlì hwà mà àyɛ̀mbɛ̀ nanù ema ò hwèlì ŋmanò mò lì arza lì òŋwa Rzàwòlò, wɔ̀ hwà mà mò anjiyana lì mò ɛ̀ndɛ̀nɛ̀ ò mbòwa ya Kàyìrzèrìyà rzìi hwa mò òma ò mbòwa ya Tàrzùrzì.

³¹ O èŋgànɛ̀lɛ̀ rzɔ, ò eŋge hvònda ya arzɛ hwatò ema hwà mà lòkɛ̀ Yerzù ò hwèrzòòkà hwe arzɛ hwe Yùdeyà, Galìlì na Rzàmàrìyà hwe ma luwa ɛ̀yɔ̀lɛ̀. Ndeŋgànɛ̀lɛ̀ hwà mà òhva wɔ̀ɔŋgɔ̀ wò ama Lohwɛ̀ na wɔ̀, ndèŋgànɛ̀lɛ̀ Èlìŋgɛ̀ yà Wòtani e ma gbeyà hwà mà imbama.

Pètrò a ɛndi ò mbòwa ya Lida na ò mbòwa ya Jopà

³² Pètrò à mà hwɛ lì ɛndɛ ò ekì ya arzɛ, ò lìrzakò lɔ̀kɔ, à mà ɛndɛ ò lì hvɛhvɛ hwatò hwa ama Lohwɛ̀ ema hwà mà hwɛ ò mbòwa ya Lida.

³³ Nà òma mɔ̀ à mà uke aŋga à mà ùŋmànɛ̀lɛ̀ mòtò mɔ̀kɔ ema à mà hwɛ̀lɛ̀hwɛ̀ Aneyàrzì, ema à mà ɔ̀kirzɛ̀ e nyàmbɛ ya njɛ̀mbu. Onò mòtò a rzi tanɛ lì anjiya ò lìnɔ̀ŋgɔ ò hwàmbi ya meya.

³⁴ Pètrò à mà mò òhweyà nanù ema, “Aneyàrzì e, Yerzù Krirztò a ò wɔ̀wìrzɛ̀ anu naŋgɛ. Tɛmɛ ò ŋmanyu, ò rzeeya lìnɔ̀ŋgɔ la aŋgɔ̀.” Ŋgelì hvɔ̀kɔ Aneyàrzì à mà tɛ̀mɛ̀nɛ.

³⁵ Nà òma hwatò hwa arzɛ ema hwa lìya ò mbòwa ya Lida na ò mbòwa ya Rzàlɔ̀nì hwà mà ɛnɛ na òma òŋgò mòtò à mà wɔ̀wìrzɛ̀hwɛ̀, rzìi hwa arzɛ hwa àyèŋgòwɛ̀lɛ̀lɛ̀ e Rzàŋgò Yerzù.

³⁶ O mbòwa ya Jopà ò ma hwɛ mòlòkèlì wa mòlanà ema à mà hwɛ̀lɛ̀hwɛ̀ Tàbità. (jànda ja lìinà la eni ò mbɔrzi ya Grìki lì hwèlì ndi Dɔ̀kàrzì eŋge ŋgàna e hwèlì ndi ìrzɛ̀wù). Onò mòlanà, à mà akɛlɛ e hvònda ya eni ya arzɛ ò lì gbeyà hweyà hwe gbamù na ò lì òŋgòwànà mèlìrza me hwatò.

³⁷ O eŋge hvònda, mɔ̀ à mà ɔ̀kirzɛ̀ rzìi a ŋwa. Èhwèmbè ya eni e ma rzòrzahwa rzìi hwa e nàŋgɛ̀lɛ ò tenì ya tùu ya ŋmanyu ò e ndawò ya ndɛkì.

³⁸ È mbòwa ya Jopà e rzi rzɔlɛnɛ na e mbòwa ya Lida. O èŋgànɛ̀lɛ̀ na òma hwàlòkèlì hwa Jopà hwà mà hweye nanù ema Pètrò a hwèlì ò mbòwa ya Lida, wɔ̀ hwà mà mò òmeya wunyanà hwahwakɛ ò lì mò rzòrzòmeya nanù ema, “Jò ò atɛ̀kɛ̀yi nanù ema ò hvinjɛ̀lɛ ò jò jèeya.”

³⁹ O èŋgànɛ̀lɛ̀ rzɔ, Pètrò à mà wòŋgirzɛnɛ rzii a ɛndɛ na hwaŋga hwatò. Lirzakò ema mɔ̀ à mà uke aŋga, hwà mà mò agbana ò tùu ya ŋmanyu ya eŋge ndawò ya ndɛkì. Mekurze me hwalana me arzɛ me ma mò tòŋga, rzìi hwa a eyà na lì mò uŋmɛ̀lɛ̀ màatù ma arzɛ, na ikòti ema Dɔ̀kàrzì à mà hwa kɔleya, e hvònda ema mɔ̀ à mà hwɛ lòŋgɛ̀.

⁴⁰ Pètrò à mà hwa wurzirzɛ hwa arzɛ ò tenì ya eŋge tùu, rzìi a rzùma màwɔ̀ŋgɔ̀ŋgɔ̀ ma eni ò rze, rzìi a wòteyà ò lì kànɛ̀. Rzi a àyèŋgòwɛ̀lɛ̀lɛ̀ mòŋgò ŋmìmbà, a òhwa nanù ema, “Tàbità, tɛ̀mɛ̀nɛ ò ŋmanyu!” Tàbità à mà kutuwa mìirzɔ ma eni. Nà òma à mà ɛnɛ Pètrò rzìi a tɛ̀mɛ̀nɛ̀.

⁴¹ Pètrò rzìi a òma lìiya la eni a mò òŋgòwànà ò lì tɛ̀mɛ̀nɛ. Aŋga ndi Pètrò a à hwɛlɛ hwàlòkèlì hwa arzɛ, na hwaŋga hwalana hwa mekurze, rzìi a hwa ŋgba òŋgò mòlanà Tàbità ema a hwèlì lòŋgɛ.

⁴² Mònò ŋmɛ̀ndì, mò ma hweyàhwà ò e mbòwa ya arzɛ ya Jopà, ò èŋgànɛ̀lɛ̀ rzayi-rzayi ja hwatò hwà mà lòkɛ̀ Rzàŋgò Yerzù.

⁴³ Pètrò à mà lìya ò mbòwa ya Jopà ŋgurzu ja mèenyà hvɛ. A ma lìya ò ndawò ya ama munyanà mɔ̀kɔ ema èwòlò ya eni e ma hwɛ ndi ò lì rzeeya meyòwò me nyàmà ema à mà hwɛ̀lɛ̀hwɛ̀ Rzimɔ̀ni.