Hwègbèèlì 6 - Mokpwe: Bakwery (New Testament)

Ŋmèmba mò ma hvɔ̀rzɔ̀ lìrzàmbà là hwatò ò lì òŋgòwàna

¹ O mburzà hvònda, na òma Mɔ̀rzɔ̀ŋgi mò hwàlòkèlì mò ma hwɛ lì òŋga, ò ma hwɛ lì arzarzòwɛ ò ìtììtènì ja wònyà Yudà ema hwà mà hwɛ lì òhwa e mbɔrzi ya Grìki na hwaŋga ema hwà mà òhwa e mbɔrzi ya e mbòwa. Hwàŋga ema hwà mà hwɛ lì òhwa e mbɔrzi ya Grìki, hwà mà hwɛ lì òhwa nanù ema, mekurze me awu me hwalana, me ndindahwa ò lì kàyi la wùnyà tɛ la wòlì.

² Aŋga ndi lìyòmɛ̀ la hwà-òkòwèlì na hwàhwàkɛ̀ hwa a rzàŋga hwàlòkèlì hwa arzɛ rzìi hwa hwà òhweyà nanù ema, “O rza ò jò lɔɔnɔ nanù ema, irzɔ i kìnyɛ̀lɛ̀ lì ohwa eyà ya ama Lohwɛ̀ ò lì arza nanù ema jò ɔŋgeya hwèkawèlì hwe wòlì.

³ O èŋgànɛ̀lɛ̀ rzɔ wònyàmòwe kòkò, e hvɔ̀rzè lìrzamba la wunyanà ò ìtììtènì ja anyu ema hwa hwɛnì lì lòkɛ̀ hwa òndi hvɛ na Èlìŋgɛ̀ yà Wòtani, ndèŋgànà hwa òhvi hvɛ lìhwiyè. Wɔ̀ ndi irzɔ i ŋgbàà ene èwòlò.

⁴ O eŋge hvònda irzɔ ja aŋgbɛ irzɔ hwiti hwa arzɛ ò lì kanɛ̀ na ò lì òhwa ŋmɛ̀ndì mò gbamù.”

⁵ Ène eyà ema I àpɔ̀rzìtòlò i ma òhwe e ma lìŋgìrzɛ e ŋgìndì ya arzɛ. Aŋga ndi hwa a hvɔ̀rzɔ̀ Rzìtehvànɛ mɔ̀kɔ ema à mà òhva lìlòkɛ̀ la ŋginyà à mà ònda hvɛ na Èlìŋgɛ̀ yà Wòtani, hwà mà hvɔ̀rzɔ̀ hvɛ Hvìlìpì, Pròkòrùrzì, Nìkanò, Tìmɔ̀nɛ̀, Pàmɛ̀nàrzì na Nìkòlàrzì. Nìkòlàrzì à mà uwɛ̀lɛ̀lɛ̀yi ndi ò mbòwa ya Antìyɔ̀kì a rzi hwɛ ndi mòtò wà Yudà, ndi à mà òŋgama lìlòkɛ̀ la wònyà Yudà.

⁶ Hwà mà jana hwanu hwatò ò wòrzò wò I àpɔ̀rzìtòlò. I àpɔ̀rzìtòlò rzìi i hwa kanɛ̀lɛ̀lɛ̀ i hwa hwàkɛ̀ hvɛ màa.

⁷ Ène eyà e ma gbeyà eyà ya Lohwà e nyàla ò erzòòkà ya arzɛ. Mɔ̀rzɔ̀ŋgi mò hwàlòkèlì ò Jèrurzalɛ̀mù mò ma nyàla karzi-karzi. Ndeŋgànɛ̀lɛ̀ rzayì-rzayì ja Pìlìrzì i ma wòteyà ò lì òŋgama ŋmɛ̀ndì mò gbamù.

Hwèŋgbàŋgèlì hwe ama Rzìtehvànɛ

⁸ Nàŋgɛ Rzìtehvànɛ à mà hwɛ ndi mòtò ema lòŋgɛ la eni lì ma hwɛ lì uŋmɛ̀lɛ̀ e ndèli ya ama Lohwɛ̀ rzayi-rzayi. A ma hwɛnɛ ŋginyà ò lì gbeyà hweyà hwe ndɛnɛ hwe mànyakà ò ìtììtènì ja hwatò.

⁹ Ndi lòŋgò la hwatò hwà mà wòteyà lì tɔ̀wɔ na mɔ̀. Hwàŋga hwatò hwà mà hwɛ ndi hwatò ema hwà mà uwɛ̀lɛ̀lɛ̀yi ò e ŋgindi ya hwatò ema hwɛ lì ɛndɛ ò e ndawò ya màkànɛ ŋgɛ̀lɛŋgɛlɛ ema e ma hwɛ̀lɛ̀hwɛ̀ ndi e ndawò ya màkanɛ̀ ya hwàkòmì ema hwa rza enje hwàkòmì hvɛ. Hwàŋga hwatò hwà mà hwɛ ndi hwa wònyà Yudà ema hwà mà uwɛ̀lɛ̀lɛ̀yi ò mambòwà mà Rzìrènè na Alɛ̀rzàndrìyà. Wɔ̀ na hwahvɛhvɛ hwatò hwa wònyà Yudà ema hwà mà uwɛ̀lɛ̀lɛ̀yi ò hwèrzòòkà hwe Rzìlirzìyà na Èrzìyà, wɔ̀ hwà mà wòteyà lì tɔ̀wɔ na Rzìtehvànɛ.

¹⁰ Ndi Èlìŋgɛ̀ yà Wòtani e ma mò ŋgba nyayi tumba ya lìhwiyè ema mɔ̀ à mà òhwa tɛ eyà wɔ̀ hwa rzìi tànɛyi ò lì eŋgòwa.

¹¹ O èŋgànɛ̀lɛ̀ rzɔ wɔ̀ hwà mà aka hwatò ò jututa ò lì òhwa nanù ema, “Irzɔ i hweyi Rzìtehvànɛ a òhwa mbɔrzi ya ìrzìlàkò lì teŋgɛ̀nɛ̀ Mòrzè na lì teŋgɛ̀nɛ̀ Lohwɛ̀.”

¹² O ene ŋgàna rzɔ hwaŋga hwatò ema hwà mà teŋgɛ̀nɛ̀ Rzìtehvànɛ, rzìi hwa hvuŋguwa mèèmà me hwatò, hwàmbaki hwa mbòwa na hwà-òkòlèlì hwa mbenda. Hwà mà hvùma Rzìtehvànɛ rzìi hwa mò ɛ̀ndɛnɛ ò wòrzò wò wòlìya wò hwèkàyìrzèlì.

¹³ Hwà mà jànà lòŋgò la hwatò ò lì mò tɛmeya mbòŋgi ya mòlàŋgà. Hwanu hwatò hwà mà òhwa nanù ema, “Onò mòtò a òhwa hweyà hwe wòhwe ò i hvònda ja arzɛ lì teŋgɛ̀nɛ̀ e Ndawò yà Lohwà ema e hwèlì wòtani na lì teŋgɛ̀nɛ̀ imbenda ema Lohwɛ̀ à mà jò ŋgbɛ.

¹⁴ I ma mò hwèya a òhwa nanù ema ònò Yerzù wa Nàrzàrɛ̀tì a rzuulɛ ene Ndawò yà Lohwà a eŋgòwa hvɛ hwɛ̀ɛ̀mɛ̀ hwe arzu ema hwe jò ŋgbàahwì na Mòrzè.”

¹⁵ Hwatò hwa arzɛ ema hwà mà hwɛ ò wòŋgò wòlìya hwà mà rzòkɛ Rzìtehvànɛ mìirzɔ̀ rzìi hwa ɛnɛ nanù ema wòrzò wò eni wò ma hvànya ndi nàa wòrzò wò aŋgèlì.