Hwègbèèlì 16 - Mokpwe: Bakwery (New Testament)

Tìmòtì à mà ɛndɛ na Pàwolò na Rzàyilarzi

¹ Hwa Pàwolò hwa mà ɛ̀ndɛ ò mbòwa ndɛnɛ yà Dɛ̀bì na Lìrzìtìrà. Mòtò mɔ̀kɔ à mà hwɛ aŋga ema à mà hwɛ̀lɛ̀hwɛ̀ Tìmòtì. Nyàŋgò wà eni à mà hwɛ ndi mòlanà wa wònyà Yudà ndèŋgànɛ̀lɛ̀ mɔ̀ hvɛ à mà lòkɛ̀ Yerzù, ndi e tatɛ̀ ya eni e ma hwɛ ndi mòtò wa Grìki.

² Hwàlòkèlì hwa imbowà ndɛnɛ ja Lìrzìtìrà na Ikɔ̀nìyùmì hwà mà òhwa gbamù lì hvòmɛ̀nɛ̀ Tìmòtì.

³ Nà òma Pàwolò à mà arze lì wòwa Tìmòtì ò lì ɛndɛ na mɔ̀, à mà mò endà. A ma gbeyà ndi nanù ehwànja à mà hwiya nanù ema hwatò hwa wònyà Yudà ema hwa hwèlì ò eŋge erzòòkà hwà mà hwiya nanù ema e tatɛ̀ ya ama Tìmòtì à mà hwɛ ndi mòtò wa Grìki.

⁴ Nà òma Pàwolò na Tìmòtì hwà mà hwɛ lì akeyà ò mbòwà na mambòwa, ò lì òhweyà hwatò ema hwa lòkɛ̀ hweyà ema I àpɔ̀rzìtòlò na hwàtimbelì hwa ŋmèmba hwa e mbòwà ndɛɛndɛ ya Jèrurzalɛ̀mù hwà mà tɛ̀yirzɛ. Hwà mà hwa òhweyà ò lì òŋgama hweŋge hweyà.

⁵ O èŋgànɛ̀lɛ̀ ŋmèmba mò arzɛ mò ma ètìrzɛ̀hwɛ ò lì lòkɛ̀. O èŋgànɛ̀lɛ̀ mɔ̀rzɔ̀ŋgi mò awu mò hwàlòkèlì mò ma ahwatɛ wùnyà tɛ.

Pàwolò a ɛni jɛ̀nɛ̀nì

⁶ Pàwolò na mòndeŋge mò eni hwà mà akeyà hwèrzòòkà hwe Hvrigèyà na Gàlèrzìyà, èhwanja Èlìŋgɛ̀ yà Wòtani ema hwa keka nanù ema hwa rzi keka lì òhwa eyà ya Lohwà ò erzòòkà ya arzɛ ya Èrzìyà.

⁷ Nà òma hwà mà jèe lì uka ŋmeyò mò erzòòkà ya Mìrzìyà, wɔ̀ hwà mà keka ò lì kpèeyà ò erzòòkà ya Bìtìnìyà. Ndi tɔ̀ nanù Èlìŋgɛ̀ ya ama Yerzù e rzi imanɛlɛ nanù ema hwa kpèeyà aŋga.

⁸ O èŋgànɛ̀lɛ̀, wɔ̀ hwà mà akeyà Mìrzìyà rzi hwa ɔ̀ndɔ̀ natɛ̀ɛ hwa uka ò mbòwa ndɛnɛ ya Trɔ̀wàrzì.

⁹ O wòŋgò wuu, Pàwolò à mà ɛnɛ jɛ̀nɛni. O iŋgi jɛ̀nɛ̀nì à mà ɛnɛ munyanà wa erzòòkà ya Màrzèdonìyà ema à mà tɛ̀mɛ̀ rzìi a à mò rzòrzòmeya nanù ema, “Jà ò Màrzèdonìyà ò jò òŋgòwane.”

¹⁰ O mburza hvònda ema Pàwolò à mà ɛnɛ ini jɛ̀nɛ̀nì, irzɔ i ma wòŋgirzɛnɛ ŋgelì hvɔ̀kɔ ò lì ɛ̀ndɛ ò Màrzèdonìyà, èhwanja i ma kulɛ nanù ema Lohwɛ̀ à mà hwɛ lì jò hwɛlɛ ò lì ɛ̀ndɛ lì òhweyà hwaŋga hwatò Ŋmɛ̀ndì mò Gbamù.

Lideya wa Hvìlìpì a lòkɛ̀ Yerzù

¹¹ O mbòwa ndɛnɛ ya Trɔ̀wàrzì i ma kpèeyà ò melì me ŋmànja, rzìi jɛndɛ ò yòndi ya Rzàmòtrèrzì e rzi hwɛ lì tɛ̀mɛ̀ ò njiya. Nà òma wùnyà wò ma yahwɛ, rzìi jɛ̀ndɛ ò mbòwa ndɛnɛ ya Nìyàpòlìrzì.

¹² Aŋga ndi i ma anjiye rzìi je ɛndɛ ò Hvìlìpì. Hvìlìpì a hwèlì ndi e mbòwa ndɛnɛ ò erzòòkà ya Màrzèdonìyà, ndèŋgànɛ̀lɛ̀ e ma hwɛ ndi mbòwa ndɛnɛ ema hwà mà ika ndi imbenda ja Lòmani. I ma hwɛ aŋga ò ŋgurzu ja mèenyà.

¹³ O Wùnya wò lì Arzìyòlɛ i ma wurza ò tenì ya mbòwà ndɛnɛ rzi ja ɛndɛ ò rzàawà ya mòrzò, i ma ɔ̀ŋgɛ̀lɛ̀ nanù ema jò ùŋmànɛ̀lɛ̀ èki ema wònyà Yudà hwa kànɛlɛlɛ aŋga. I ma lìya aŋga na hwalanà ema i ma ùŋmànɛ̀lɛ̀ hwa arzàŋgànɛ aŋga rzìi i wòteyà lì tuhwa mendeŋga na wɔ.

¹⁴ O ìtììtènì ja hwaŋga hwalanà ò ma hwɛ mɔ̀kɔ wa awu ema à mà hwɛ̀lɛ̀hwɛ̀ Lideya ema à mà uwɛ̀lɛ̀lɛ̀yi ò mbòwà ndɛnɛ ya Tìyatìrà. A ma hwɛ ndi mòlanà wa nyòŋga ema à mà hwɛ lì àhwirzɛ̀ hwerzanja hwe teyaa ema hwe ma òhva mòrzurzuhwelì mò karzami. Oŋgò mòlàna à mà hwɛ lì gbèeyà Lohwɛ̀. Rzàŋgò à ma mò lìhvòhwa ŋmèma mò eni ò lì òkànèyà mamɛ ema Pàwolò à mà hwɛ lì òhwa.

¹⁵ Hwà mà mò lùhwìrzɛ̀ na lìtumba la eni la arzɛ, ò mburza nanù à mà jò yòwɛ ò màandà mà eni rzi a òhwa nanù ema, “È lutelì tɛ ema imbahvɛ na hwèlì ndi mòlòkèlì mɔ̀kɔ, wa ama Rzàŋgò, e jèe e lìya ò màandà mà ami” mɔ̀ à mà jò tinɛlɛ natɛ̀ɛ rzìi je emeyà.

Pàwolò na Rzàyìlàrzì hwa aŋgɛhwɛ ò hwèwòwà

¹⁶ Wùnya wɔ̀kɔ, na òma irzɔ i ma hwɛ lì ɛndɛ ò èki ya màkanɛ̀, ŋgɔ̀ndɔ̀ hvɔ̀kɔ ya mòkòme ema e ma òhva èlìŋgɛ̀ ya wòhwe e ma jò ùŋmànɛ̀lɛ̀. Èŋge èlìŋgɛ̀ e ma gbeyà à mà hwɛ lì òhweyà hwatò hweyà ema hwe ò gbèyɛ̀nɛ. Liŋgi lìyaŋga ema à mà hwɛ lì aŋgba lì ma gbeyà ema hwatò ema hwà mà mò anda nàa mòkòme hwà mà mo luwàna wòlì rzayi-rzayi.

¹⁷ Oŋgò ŋmanà ŋgɔ̀ndɔ̀ à mà wòteyà lì òŋgama Pàwolò na irzɔ rzi a tɛ ò ŋmanyu nanù ema, “Hwanù wunyanà hwa hwèlì ndi hwàgbèèlì hwa ama Lohwɛ̀ ema lì karzami. Wɔ̀ hwa jèelì ndi ò lì e òhweyà nɛ inyɔ e tànɛyi lì rzùŋgàhwà.”

¹⁸ A ma gbeyà nanù ò tenì ya rzayì-rzayì ja mèenyà, natɛ̀ɛ e ma tàtìrzɛ̀ Pàwolò, rzi a mò ayeŋgòwɛ̀lɛ̀lɛ̀ a kanja èŋge èlìŋgɛ̀, a yò òhweyà nanù ema, “O lìna la ama Yerzù Krirztò na ò kànèlì ò mò anjiye ò nyò.” O lìŋgi lìrzakò mɛnɛ, èŋge èlìŋgɛ̀ ya wòhwe e ma mò anjiya ò nyò.

¹⁹ Nà òma hwaŋga hwatò ema hwà mà anda òŋgò ŋmanà ŋgɔ̀ndɔ̀ nàa mòkòme hwà mà ayɛ̀ɛmbɛ̀ nanù ema mɔ̀ à rza tànɛyi lì gbeyà hvɛ nanù ema hwa luwe wòlì, wɔ̀ hwà mà hvùma Pàwolò na Rzàyìlàrzì rzìi hwa hwà kòòwà ò lì hwa ɛ̀ndɛ̀nɛ̀ ò hwàkànèlì ema hwà mà hwɛ ò ìtììtènì ja e mbòwa ndɛnɛ.

²⁰ Wɔ̀ hwà mà hwa jànà ò wòrzò wò hwàtimbelì hwa Ròmànì, rzìi hwa hwà òhwàna nanù ema, “Hwanù wunyanà hwa hwèlì ndi wònyà Yudà, ndèŋgàna hwa jànà lùwànje ò mbòwà ya arzu ndɛnɛ.

²¹ Wɔ̀ hwa hwèlì hwa òkòlɛ̀ hwɛ̀ɛ̀mɛ̀ hwe wòhwe ema hwe teŋgɛ̀nɛ̀yi i mbenda ja arzu nàa hwatò hwa Ròmànì. Irzɔ i rza tànɛyi ò lì emeyà hwenè hwɛ̀ɛ̀mɛ̀ tɔ̀ lì hwe gbeyàna.”

²² Aŋga ndi e ŋgìndì yɔhvɛ ya lata hwaŋga hwatò ò lì teŋgɛ̀nɛ̀ Pàwolò na Rzàyìlàrzì. Hwàtimbelì hwa Ròmànì hwà mà hwa nyàawànà màatù ma awu rzìi hwa hwà kɔrze merzòmbò. Rzìi hwa òma hwatò ò lì hwa gbìiyɛ̀ hvònji.

²³ O mburzà èŋge hvònji ya ŋginyà rzi hwa hwà aŋgɛ̀ ò hwèwòwà. È mɔ̀ɔ̀ŋgèlì wa hwatò hwa hwèwòwà à mà kànèyàhwa nanù ema a hwa hvendane gbamù.

²⁴ Nà òma òŋgò mɔ̀ɔ̀ŋgèlì wa hwèwòwà à mà luwe lìni lìlò, rzìi a aŋgɛ Pàwolò na Rzàyìlàrzì ò tenì ya iluka ema i hwèlì ò tenì ya tenì ya hwèwòwà. A hwa kanya matàŋgà mà awu na lìkɔ̀rzɔ̀.

²⁵ O eyà ya kɔrzi ya wuu, Pàwolò na Rzàyìlàrzì hwà mà hwɛ lì kànɛ na lì embeya Lohwɛ̀ mɛ̀rzɔ̀kɔ̀ me kààtì. Rzìi hwanɛ̀yi hwatò hwa hwèwòwà hwa a hwa òkànèyà.

²⁶ O wòtɛmɛ̀tɛmɛ̀ mònyìŋgìrzɛ̀nɛ̀ mò ŋginyà mò ma wòteya, rzìi mò nyìŋgìrzɛ̀nɛ̀ mòŋgò mɔ̀nɔ̀ŋgɔ̀ mò arzɛ mò èŋge ndawò ya hwèwòwà. O lìwòkimɛnɛ mawòhvà mà arzɛ ma mà kùwa lì lìhvòweya, iŋgɔ̀kɔ̀hwi ema hwà mà kɔ̀wɔ̀nè hwatò hwa hwèwòwà ja arzɛ i ma kùwa lì tumeya.

²⁷ È mɔ̀ɔ̀ŋgèlì wa hwèwòwà à mà imòwe ò ijɔ, rzìi a ɛnɛ mawòhvà mà hwèwòwà ma arzɛ na òma mà lìhvòwelì a ɔ̀ŋgɛ̀lɛ̀ ndi nanù ema hwatò hwa hwèwòwà hwa arzɛ hwà mà kùwa lì hwaŋga. Ène eyà e ma gbeyà a rzìima e rzɔ̀lɔ̀ ya eni ò lì àwòŋwɛ̀.

²⁸ Ndi Pàwolò à mà tɛ na lìlò lì karzami nanù ema, “O rza àwòŋwɛ̀ ò wà witi, irzɔ hwa arzɛ i hwèlì anù.”

²⁹ Oŋgò mɔ̀ɔ̀ŋgèlì wa hwèwòwà à mà òhwa nanù ema hwa jàne hwètùlù, à mà ahwèŋgɛ̀ rzìi a kpèeyà ò tenì ya e ndawò ya hwèwòwà, rzìi a kpàana mòkambiya ò wòrzò wò ama Pàwolò na Rzàyìlàrzì.

³⁰ À ma hwa wurzirzɛ ò ewòka rzìi a hwa ijòwa nanù ema, “Ìi hwa rzàŋgò, mamɛ na hwɛni lì gbeyà ò lì rzùŋgàhwà na Lohwɛ̀ e?”

³¹ Wɔ̀ hwà mà mò alàhwɛ̀ nanù ema, “O lòkɛ̀ Rzàŋgò Yerzù, aŋga nanù Lohwɛ̀ a ò rzùŋgà. A ò rzùŋgà na lìtumba la aŋgɔ.”

³² Rzìi wɔ̀ hwa mò òhweyà mɔ̀, na hwatò hwa arzɛ ema hwà mà hwɛ ò ndawò ya eni ŋmɛ̀ndì mò gbamù mò ama Rzàŋgò.

³³ O wòŋgò wu mɛnɛ, òŋgò mɔ̀ɔ̀ŋgèlì wa hwatò hwa hwèwòwà rzi a hwa wòwa, a hwa rzòrza hwèhwàŋgù hwe awu. O lìwòkimɛnɛ mɔ̀ na lìtumba la eni la arzɛ hwà mà lùhwìrzɛ̀hwɛ̀.

³⁴ Oŋgò mɔɔŋgelì wa hwèwòwà à mà ɛ̀ndɛ̀nɛ̀ Pàwolò na Rzàyìlàrzì ò ndawò ya eni, rzìi a hwa ŋgba mòlelì. Oŋgò mòtò na lìtumba la eni la arzɛ hwà mà ònda na mɔ̀nyɛ̀ŋgì ehwànja hwà mà lòkɛ̀ Lohwɛ̀.

³⁵ O eka ya elele, hwàtimbelì, hwà mà òmeya òŋgò mɔɔŋgelì hwa hwèwòwà i pòlìrzi na ŋmɛ̀ndì ema mò ma òhwa nanù ema, “È hwɛmɛ hwaŋga wunyanà hwa ɛ̀ndɛ.”

³⁶ O èŋgànɛ̀lɛ̀ rzɔ e mɔ̀ɔ̀ŋgèlì hwa hwèwòwà à mà òhweyà Pàwolò nanù ema, “Hwàtimbèlì hwà mà òma ŋmɛ̀ndì nanù ema, ò wa na Rzàyìlàrzì e rzòlòwahwe ò hwèwòwà. O èŋgànɛ̀lɛ̀ rzɔ e tànɛyi lì ɛ̀ndɛ naŋgɛ. È ɛndɛ na ɛ̀yɔ̀lɛ̀.”

³⁷ Ndi Pàwolò à mà òhweyà iŋgi pòlìrzi nanù ema, “Irzɔ i rza lùwahwi tɔ̀ njɔ̀mi, tɔ̀ hvɔ̀kɔ ya lìtòna, ndi hwà mà jò gbiyɛ hvònji ò marzò ma hwatò. Ndèŋgànɛ̀lɛ̀ hvɛ irzɔ i hwèlì ndi wònjà ja lìkànèyà la Ròmànì. O mburzà nanù, rzi hwa jò aŋgɛ hvɛ ò hwèwòwà. O nàŋgɛ̀ nanù wɔ̀ hwa arza nanù ema je ɛ̀ndɛ ò wùndɛ̀ e? Jàyɛ̀ e rza ɛndeya! Hwàŋga hwàtimbèlì hwiti ndi hwa hwɛnì lì jà anù, ò lì jò rzòlòwa.”

³⁸ Iŋgi pòlìrzi, i ma ɛ̀ndɛ lì òhweyà hwaŋga hwàtimbèlì mamɛ ema Pàwolò à mà òhwe. Nà òma hwaŋga hwàtimbèlì hwà mà hweye nanù ema, Pàwolò na Rzàyìlàrzì hwà mà hwɛ ndi wònjà ja Ròmànì, hwà mà lɛmbeya wɔ̀ŋgɔ̀.

³⁹ Ène ŋgàna e ma hwa gbeyà ema hwà mà ɛ̀ndɛ lì hwa atɛkɛ. Rzi hwa hwà rzòlòwa ò hwèwòwà, hwa hwà òhweyà nanù ema e hwɛ gbamù nanù ema hwa anjiye ò mbòwà ndɛnɛ ya awu.

⁴⁰ Pàwolò na Rzàyìlàrzì hwà mà anjiya ò hwèwòwà, rzìi hwa ɛ̀ndɛ lì kpèeyà ò ndawò ya ama Lideya. Nà òma hwà mà uke aŋga hwà mà ùŋmanɛlɛ hwàlòkèlì, Pàwolò na Rzàyilarzi rzìi hwa òhweyà hwaŋga hwàlòkèlì mbɔrzi ya lì hwa embɛ rzìi hwa ɛndɛ e ya awu.