Hwègbèèlì 11 - Mokpwe: Bakwery (New Testament)

Pètrò a òhwi lì hvòmɛ̀nɛ̀ mamɛ ema mɔ̀ à gbèyi

¹ I àpɔ̀rzìtòlò na hwanɛyi hwàlòkèlì hwa erzòòkà ya arzɛ ya Jùdeyà hwà mà hweyà nanù ema hwaŋga hwatò ema hwa rza enje wònyà Yudà, wɔ̀ hvɛ hwà mà hweyà eyà ya Lohwà.

² O èŋgànɛ̀lɛ̀ rzɔ, na òma Pètrò à mà timbe ò mbòwà ya Jèrurzalɛ̀mù, hwaŋga hwatò ema hwà mà hwɛ lì òhwa nanù ema, hwa hwɛni lì enda hwaŋga hwatò ema hwa rza enje wònyà Yudà, hwa wòteyà lì mò kikòwa nanù ema,

³ “Mamɛ ndeŋgatɛ ò ma ɛndɛ ò mandawò ma hwatò ema hwa rza enje wònyà Yudà ema hwa rza endàhwɛ̀ e? Nàtɛ̀ɛ ò wa na wɔ̀ e ma laalɛnɛ ò ekì yɔ̀kɔ.”

⁴ Aŋga ndi Pètrò a hwa nɔŋgeya mamɛ ya arzɛ ema e ma gbèyɛ̀nɛ̀ lì wòteyà ò hwèwòtèlì.

⁵ “Nà mà hwɛ lì kanɛ̀ ò mbòwà yà Jopà. Nà òma nà mà hwɛ lì kanɛ̀ rzi nà ɛnɛ jɛ̀nɛ̀nì. Yòma ema è mà hwɛ nà erzanja ndɛnɛ, ema è mà ɛnèya nàa è lɛ̀mbɛ̀hwì ò màrzùkù mà eni màànìyɛ̀ è uhweyà ò ŋmanyu yà lohwà rzi è rzììrzɛ̀hwɛ̀ ò rze ò wòrzò wò ami.

⁶ Nà òma nà mà ɔŋgɔ̀ ò tenì yà èŋge erzanja, nà mà ɛnɛ inyàmà jà waŋga, inyàmà ema ì kòòwà màwùŋgà ò rze yà mɔ̀nyɛ̀ nà hwènɔ̀nì ema hwe kòowà ò ŋmanyu.

⁷ Rzìi nà hwèya lìlò ema lì nò òhweyà nanù ema, ‘Pètrò tɛ̀mɛ̀nɛ̀ ò ŋmanyu, ò òŋwe ini nyàmà, ò lèè.’

⁸ Imbahvɛ rzìi nà timbirzɛlɛlɛ nanù ema, ‘Jàyɛ̀ Rzàŋgò, tɔ̀ mamɛ ema è mbenda è òhwi nanù ema è rza làahwà tɔ̀ yòma ema è rza rzaŋgɛ è rzi kpèelì ò wàna yà ami.’

⁹ Lìŋgi lìlò lì mà òhwa ò ŋmanyu yà lohwà è ŋgelì ema è mà ùkirzɛ̀ ihwakɛ nanù ema, ‘Ò rzi wòwà tɔ̀ yòma tɔ̀ yɔ̀kɔ ema Lohwɛ̀ à òhwi nanù ema è rzàŋgì nanù ema è rza rzàŋgì.’

¹⁰ Ène eyà è mà gbèyɛ̀nɛ̀ ŋgèlì iyàwò. Rzìi hweyà hwe arzɛ hwe wòwàhwà ò ŋmanyu yà lohwà.

¹¹ Ò lìŋgi lìrzakò mɛ̀nɛ ɔ̀ndi hwatò hwàyàwò ema hwa mà òmahwa ò mbòwà yà Kàyìrzèrìyà hwa mà nò jèeyà ò ndawò ema nà mà hwɛ lì lìya.

¹² Èlìŋgɛ̀ yà wòtani è mà nò òhweyà ò lì ɛ̀ndɛ nà wɔ̀ è rzi hwɛ lì à kìkìyɛ̀. Mònò mòtòhwa mò hwàlòkèlì ema mò mà uwɛ̀lɛ̀lɛ̀yi ò mbòwà yà Jopà mò mà nò nɔŋgɔ ò lì ɛndɛ ò mbòwa yà Kàyìrzèrìyà ndèŋgànɛ̀lɛ̀ irzɔ hwa arzɛ, i mà kpèeyà ò tenì yà è ndawò yà ama Kɔ̀nɛ̀lìyùrzì.

¹³ Kɔ̀nɛ̀lìyùrzì à mà jò òhweyà nɛ è aŋgèlì è mà mò wùrzeyà ò ndawò yà eni, rzìi è mò òhweyà nanù ema, ‘Oma mòtò mɔ̀kɔ ò mbòwà yà Jopà, ò mà mòtò mɔ̀kɔ ema lìinà là eni lì hwèlì ndi Rzìmɔ̀nì Pètrò.

¹⁴ Mɔ̀ à jèlì tɛ à è òhweyà mòndeŋga ema mò gbeyà Lohwɛ̀ à ò rzùŋgà lòŋgɛ là aŋgɔ̀ nà lìtumba là aŋgɔ̀.’

¹⁵ Ò mburza nanù nà òma nà mà wòteyà lì òhwa, Èlìŋgɛ̀ yà wòtani è mà hwa rzihweyà, nyayi hvɔ̀kɔ mɛnɛ, nà òma è mà jò rzihweyà irzɔhvɛ ò hwewòtelì.

¹⁶ Àŋga ndi nà à ɔ̀ŋgɛ̀lɛ̀ hweyà ema Rzàŋgò mɔ̀ à mà òhwe nanù ema, ‘Yòwanìrzɛ̀ à mà lùhwìrzɛ̀ ndi nà malìhwa, ndi inyɔ è ò lùhwìrzɛ̀hwɛ̀ ndi nà Èlìŋgɛ̀ yà Wòtani.’

¹⁷ Ndèŋgànà kanatɛ Lohwɛ̀ à ma ŋgbe hwanù hwatò ema hwa rza enje wònyà Yudà iŋgi jàhwèyà ema à mà jò ŋgbe lìŋgi lìrzakò ema irzɔ, i ma lòkɛ̀ Rzàŋgò Yerzù Krirztò, imbahvɛ nà mà hwɛ ndi njɛ̀nɛ, ò lì tɛmirzɛ hwètɛ̀yìrzèlì hwe ama Lohwɛ̀ e?”

¹⁸ Lirzakò ema hwanɛ̀yi hwatò hwà mà hweye ene eyà, wɔ̀ hwà mà hwɛmɛ e ndandò ya awu na Pètrò rzi hwa wòteya lì eka Lohwɛ̀. Wɔ̀ hwà mà òhwa nanù ema, “Irzɔ i tànɛyi ò lì ɛnɛ nanù ema, Lohwɛ̀ a ŋgbèlì hvɛ hwanù hwatò ema hwa rza enje wònyà Yudà èŋge ehvòlò ya lì tikòwa ò wòhwè wò awu lì timba ò ma Lohwɛ̀ lì luwa lòŋgɛ la gbìndèyà.”

Ŋmèmba mò ma wòteyà ò mbòwà ya Antìyɔ̀kì

¹⁹ O èŋgànɛ̀lɛ̀ rzɔ ò naŋgɛ, hwaŋga hwàlòkèlì ema hwà mà bùweyà ò lìŋgi lìrzakò la e kanjɛ̀-kanjɛ̀ lìrzakò ema Rztèhvànì à mà òŋwahwe, hwà mà ɛ̀ndɛ yɔ̀ndɔ̀ ya hvòò natɛ̀ɛ na ò hwèkòmè hwe, Hvɔ̀yènìrzìyà, Rzàyìprɔ̀rzì, na ò mbòwà ya Antìyɔ̀kì. Wɔ̀ hwà mà hwɛ lì ɛndɛ nanù, hwà mà òhweyà ndi hwatò hwa Yudà mɛnɛ ŋmɛ̀ndì mò gbamù.

²⁰ Ndi tɔ̀ nanù, lòŋgò la hwàlòkèlì ema hwà mà uwɛ̀lɛ̀lɛ̀yi ò mbòwa ya Rzàyìprɔ̀rzì na Rzìlènè, hwà mà ɛ̀ndɛ ò mbòwà ya Antìyɔ̀kì, hwà mà hwɛ lì òhweyà hvɛ hwatò hwa Grìki, na ò lì hwa òhweyà ŋmɛ̀ndì mò gbamù lì hvòmɛ̀nɛ̀ e Rzàŋgò Yerzù.

²¹ È ŋginyà ya ama e Rzàŋgò e ma hwɛ na wɔ̀. Ndèŋgànà ŋgìndì ndɛnɛ ya hwatò e ma lòkɛ̀ rzi e timbeya Rzàŋgò.

²² Mòŋgò mòndeŋga mò ma hweyàhwà ò ŋmèmba mò hwatò hwa Jèrurzalɛ̀mù. O eŋgànɛ̀lɛ̀ hwà mà òma Bànàbàrzì ò mbòwà ya Antìyɔ̀kì ò lì ɛndɛ lì hwa ɛnɛ.

²³ Nà òma mɔ̀ à mà ùke àŋga rzi a ɛnɛ mamɛ e ndèli ya ama Lohwɛ̀ e ma gbeyɛ, à mà ònda na mɔ̀nyɛ̀ŋgì. Rzìi à kòkòwɛ̀lɛ̀ hwaŋga hwàlòkèlì nanù ema wɔ̀ hwa òŋgame Rzàŋgò na ŋmèma mɔ̀kɔ.

²⁴ Bànàbàrzì à mà hwɛ ndi mòtò wa gbamù, à mà ònda na Èlìŋgɛ̀ yà Wòtani, à mà imbama hvɛ ò lì lòkɛ̀. Ndèŋgànɛ̀lɛ̀ rzayì-rzayì ja hwatò hwà mà tikòwahwa ò lì lòkɛ̀ Rzàŋgò.

²⁵ Bànàbàrzì rzìi a ɛ̀ndɛ ò Tàrzùrzì ò lì arza Rzàwòlò.

²⁶ Nà òma à mà mò luwe, rzi a mò tìmbana ò mbòwà ya Antìyɔ̀kì. Wɔ̀ hwahwàkɛ hwà mà lìya aŋga na ŋmèmba mò mitelì natɛ̀ɛ na ŋma mɔ̀kɔ mòrzurzu. Hwà mà hwɛ lì òkòlɛ̀ ŋgìndì ndɛnɛ ya hwatò. O mbòwà ya Antìyɔ̀kì aŋga ndi hwàlòkèlì hwà mà lòme ò lì hwɛ̀lɛ̀hwɛ̀ hwànɔ̀ŋgèlì hwa ama Krirztò.

²⁷ O ene hvònda ndi lòŋgò la hwà-òhwèlì hwa hwèlìŋgɛ̀ hwà mà anjiye ò mbòwa ya Jèrurzalɛ̀mù lì ɛ̀ndɛ ò mbòwà ya Antìyɔ̀kì.

²⁸ Mɔ̀kɔ hwa hwaŋga hwà-òhwèlì hwa hwèlìŋgɛ̀ ema à mà hwɛ̀lɛ̀hwɛ̀ Agàbùrzì à mà tɛ̀mɛ̀ ò ŋmanyu. Nà e ŋginyà ya Èlìŋgɛ̀ yà Wòtani rzìi mɔ̀ à tɛ̀mɛ̀nɛ̀ ò ŋmanyu rzìi a òhwa nanù ema, “Njawò ndɛnɛ e hwɛnì lì jèeyà e rze ya arzɛ.” Ène eyà e ma gbèyɛ̀nɛ e hvònda ema Klàwɔ̀dìyùrzì à mà hwɛ e mòkànèlì.

²⁹ O èŋgànɛ̀lɛ̀ hwà-òkòwèlì ò lì atanɛ la awu, wɔ̀ hwà mà tɛ̀yirzɛ̀ nanù ema tɔ̀ ima mɔ̀kɔ wa awu a ò òma lìwòŋgò ò hwatò ema hwa lòkɛ̀ Yerzù ò erzòòkà ya Jùdeyà.

³⁰ Nànù ndi wɔ̀ hwà mà gbèye. Hwà mà rzàŋga wòlì, rzìi hwa wò òmana Bànàbàrzì na Rzàwòlò ò lì ŋgba hwàtìmbèlì hwa ŋmèmba.