Hvìlipìyà 4 - Mokpwe: Bakwery (New Testament)

Pàwolò a ŋgbelì mayohwa

¹ O eŋgànɛ̀lɛ̀ rzɔ wònyàmòwe kòkò, inyɔ ema na lìŋgàni na lì okeya o lì ɛnɛ, inyɔ ndi e hwèlì màlìŋgo na iitàŋgi ja ami o nyòla èwòlò ema imba nà mà gbeyɛ. Imbunda ja ami kòkò, o lì wowàna hweyà hwe arzɛ ema nà mà e ohweyà, e tɛmeya lìlòkɛ̀ la anyu o ma e Rzàŋgo kɔ̀yi-kɔ̀yi.

² Yùdìyà na Rzìntìkɛ̀ na e atɛkɛ nanù ema e ahweyànɛlɛ, ehwànja inyɔ hwahwàkɛ e hwèlì ndi indomɛ ja arzu ema i lòkɛ̀ Rzàŋgo Yerzù.

³ Mbunda ami kòkò, ema ì gbèyɛnɛ èwòlò, nà ò atɛ̀kɛ̀ nanù ema ò òŋgowane hwanu hwalanà hwahwàkɛ nanù ema hwa àwohvanɛ̀ mɔ̀kɔ nà ɔnɛyi ɛ̀yɔ̀lɛ̀. Hwanu hwalana hwahwàkɛ, Klɛ̀mɛ̀ntì nà hwahvɛhvɛ hwàgbèèlì hwa mà hwɛ ò toŋgoŋgo yà ami. Irzɔ nà wɔ̀ ì mà gbeyà èwòlò gbamù, aŋga nanù imba nà ò tànɛ lì ohwa ŋmɛ̀ndì mò gbamù. Mììnà mà awu mà arzɛ mà hwèlì ò tenì yà è kààtì yà lòŋgɛ.

⁴ È oke mɔ̀nyɛ̀ŋgì ihvonda jà arzɛ ehwànja è hwèlì ndi hwatò hwa ama è Rzàŋgo. Imba nà ohwa hvɛ nanù ema, inyɔ è oke mɔ̀nyɛ̀ŋgì.

⁵ Inyɛ̀ hwɛ̀ɛ̀mɛ̀ hwe anyu e uŋmɛ̀lɛ̀ o worzo wo hwatò hwa arzɛ nanù ema e arzihwirzɛ. È Rzàŋgo e jà ŋmanà mbɔ.

⁶ È rzi ahvàhvɛ lì hvomɛ̀nɛ̀ tɔ̀ eyà. Ndi tɔ nanù o tɔ ima eyà ema ye e ùŋmànɛ̀lɛ̀, e kànɛ Lohwɛ̀ nanù ema a e ŋgbe mamɛ ema e arza. Ndeŋgànɛlɛ e kànɛ tɛ e mo eke.

⁷ È gbèyi tɛ nanù, Lohwɛ̀ a gbeyà e hwɛnɛ ɛ̀yɔ̀lɛ̀. Ène ɛ̀yɔ̀lɛ̀ e olo lì aka mamɛ hwatò hwa tanɛyi lì rzɔ̀ŋgìtɛ̀nɛ̀. Ène ɛ̀yɔ̀lɛ̀ ye e oŋgòhwànà aŋga nanù e rza oka wɔ̀ŋgɔ̀ na lì ohva màlùtèyà ema mà e tàkirzɛ, ehwànja e hwèlì ndi mòtò mɔ̀kɔ na Yerzù Krirztò.

⁸ Ìi wònyàmòwe kòkò, o lì kulɛ ene mbɔrzi, e lùteyà hwène hweyà o ihvonda ja arzɛ. È lùteyà tɔ̀ ima eyà ema e hwèlì e jɔ̀kɛ̀, tɔ̀ ima eyà ema e hwèlì ema e lɔ̀wu, tɔ̀ ima eyà ema e hvomɛ̀nɛ̀, tɔ̀ ima eyà ema e rza ohvɛ tɔ̀ lìtɔ̀tì la wòhwe, tɔ̀ ima eyà ema hwatò hwa àŋgàmɛ̀nɛ̀yi lì lìŋgàna na tɔ̀ ima eyà ema e ɛni nanù ema ye e lɔ̀ɔ̀ni. È ɔ̀ŋgɛ̀lɛ̀ hweyà ema hwe lɔ̀wu rzayi-rzayi ndèŋgànɛ̀lɛ̀ e hweyɔ ema hwatò hwa ohwa nanù ema hwe lɔ̀wu. Ini nyayi ja hweyà ndi e àŋgàmɛ̀nɛ̀yi lì ika o màlùtèyà ma anyu o ihvonda ja arzɛ.

⁹ Tɔ̀ ima eyà ema nà mà e okolɛ ema e ma emeyà, na tɔ̀ ima eyà ema e ma no hweyàne, na tɔ̀ ima eyà ema e ɛni imba na gbeyà, inyɛ ye e gbeye. È gbèyi tɛ nanù, Lohwɛ̀, mɔ̀ ema a ŋgbàà ɛ̀yɔ̀lɛ̀ a e ŋgba ɛ̀yɔ̀lɛ̀.

Pàwolò a èki o lì hvomɛ̀nɛ̀ jàhwèyà ema a lu

¹⁰ Nà ohvi màlìŋgo rzayi-rzayi na oma imba na hwèlì e mòtò wa ama e Rzàŋgo. Èhwànja o lìrzùkù inyɔ e ma uŋmɛ̀lɛ̀ nanù ema e no ɔŋgeya. Nà hwi nanù ema e ohvi màlùtèyà ma lì no ɔŋgeya o ihvonda ja arzɛ, ndi e rzi hwɛnɛ tɔ̀ ehvolo ò lì gbeyà nanù.

¹¹ Ndeŋgànɛ̀lɛ̀ na rza ohwa ndi nanù ehwànja na endèli yoma. Ò jɔ̀kɛ̀ nà mà nyàmɛ̀lɛ̀ o lì emeyà tɔ̀ ima yoma ema e no jɛlɛlɛyi o lòŋgɛ.

¹² Nà hwi na oma mòtò a hwɛ̀ɛ a rza lu tɛ mamɛ ema mɔ̀ à arza, ndèŋgànɛ̀lɛ̀ na hwi nɛ e hwɛ̀ɛ e hwèlì tɛ ema mòtò a ohvi hwèèmà rzayi-rzayi na oma mɔ̀ à arza. Nà ma nyàmɛ̀lɛ̀ o lì emeyà tɔ̀ ima yoma ema e no ùŋmànɛ̀lɛ̀. Ndeŋgànɛ̀lɛ̀ nà mà nyàmɛ̀lɛ̀ o lì luwa rzayi-rzayi ja hwèèmà hwe lì laa, ndèŋgànɛ̀lɛ̀ nà mà nyàmɛ̀lɛ̀ hvɛ o lì lìya njawu. Nà ma nyàmɛ̀lɛ̀ o lì luwa hvèyi lì aka na oma imba na arza, ndèŋgànɛ̀lɛ̀ nà mà nyàmɛ̀lɛ̀ hvɛ o lì hwɛ ema imba na rza ohvɛ mamɛ ema imba na arza.

¹³ Nà tànɛyi lì gbeyà hweyà hwe arzɛ ema hwe no jɛlɛlɛyi o lì akeyà na e ŋginyà ema Krirztò a no ŋgbelì.

¹⁴ Ndi tɔ̀ nanù, e ma gbeyà gbamù o lì no òmeya lìhwoŋgo ò e hvonda ema nà mà hwɛ o mòtàkà.

¹⁵ Ò jɔ̀kɛ̀ inyɔ hwatò hwa Hvìlìpì, inyɛ e hwiye gbamù nanù ema, e hvonda ema nà mà wòteyà o lì ohwa ŋmɛ̀ndì mò gbamù, e hvonda ema imba nà mà anjiye o Màrzèdonìyà, inyɔ mɛnɛ ndi e ma hwɛ ŋmèmba ema mo ma no oŋgòhwànà.

¹⁶ Tɔ̀ e hvonda ema nà mà hwɛ o mbowà ndɛnɛ ya Tɛ̀rzàlonìkà, e ma no òmeya lìhwoŋgo ŋgelì rzayi-rzayi.

¹⁷ Nà rza e ohweyà ndi ene eyà nanù ehwànja na arza nanù ema e no òmeya màhwèyà, ndi na arza lì ɛnɛ nanù ema Lohwɛ̀ a e nàmìrzɛ̀ ŋgɛ̀lɛŋgɛlɛ.

¹⁸ O nàŋgɛ rzɔ, nà mà luwa hwèèmà hwe arzɛ ema e ma no òmeya ndeŋgànɛlɛ na hwe lu hvèyi lì aka tɔ̀ nanù. Èpàhvrɔ̀dìtùrzì à mà no jàneya hwèèmà ema e ma no òmeya. È gbèyi ndi nàa o a ɛnɛ oma inyɔ e ŋgbelì ndi Lohwɛ̀ màhwèyà emà mà ohvi erzunju ya gbamù. Lohwɛ̀ à mà luwa iŋgi jàhwèyà ndèŋgànɛ̀lɛ̀ i mo lìŋgirzɛ.

¹⁹ O tenì ya mònàmɛ̀ mo eni mondɛnɛ, Lòohwà la ami a e ŋgba tɔ̀ mamɛ ema inyɔ e endelì, lì akeyà na Yerzù Krirztò.

²⁰ Èluhwe è hwɛ nà Lòohwà là arzu, Tatɛ̀ hwa arzu natɛ̀ɛ nà ò gbìndèyà. Inyɛ̀ wò lìya nanù.

Ìikɔ̀mi ja lìrzùkù ja ama Pàwolò

²¹ È kɔmè tɔ̀ ima mòtò wà ama Lohwɛ̀ ema à lòkɛ̀yì Yerzù Krirztò. Wònyànyàŋgo hwa arzu hwa ama Krirztò ema hwa hwèlì anu nà imba hwa è omèlì ikɔ̀mì.

²² Hwàto hwa arzɛ hwa ama Krirztò hwa e omelì ikɔ̀mi, erzɛ̀hvɔ̀ni lìtumba la ama Kàyìrzà.

²³ Inyɛ̀ è ndèli yà ama Rzàŋgo Yerzù Krirztò è hwɛ nà inyɔ hwa arzɛ. Inyɛ̀ wò lìya nanù.