Hvìlipìyà 3 - Mokpwe: Bakwery (New Testament)

Hwàto ema hwa lòkɛ̀ Yerzù wɔ̀ ndi hwa o emàyɛ̀lɛ̀hwɛ̀ o worzo wo ama Lohwɛ̀

¹ Ìi wònyàmòwe kòkò, o lì umba ene mbɔrzi, e oke mɔ̀nyɛ̀ŋgì na oma e hwèlì ndi mòtò mɔ̀kɔ na e Rzàŋgo. È rza o no tàkirzɛ o lì timba lì e tìleya hvɛ hweyà ema nà mà lome lì e tìleya. Ène eyà e hwèlì ndi o lì e kombɛ.

² È aŋgoweya hwaŋga hwatò hwa wòhwe ema hwa hwèlì ndi nàa iŋgbà, e hwa aŋgoweya ehwànja wɔ̀ hwa ohwa nanù ema mòtò a àŋgàmɛ̀nɛ̀yi lì endàhwa.

³ Irzɔ ndi je endàlɛ̀hwɛ ŋgànà ema e hvomɛ̀nɛ̀, Èlìŋgɛ̀ e jo oŋgowàna o lì ŋgba Lohwɛ̀ èluhwe na oma i mo gbèeyà. Jo oki mɔ̀nyɛ̀ŋgì na oma irzɔ i hwèlì na Yerzù Krirztò. Irzɔ i hwi nanù ema hwatò hwa hwènàmà hwa rza tanɛ hwa jo oŋgowàna.

⁴ Tɔ̀ nɛ imba mbiti na ohvi lìtiŋga o lì ika lìlòkɛ̀ la ami o hweyàrzèlì hwe e mòtò wa hwènàmà. Tɔ̀ njɛnɛ ema a hwèlì o ìtììtènì ja anyu ema a ɔ̀ŋgɛlɛ nanù ema a ohvi lìtiŋga o lì ika lìlòkɛ̀ la eni o hwema hwe e mòtò wa hwènàmà, nanù oma imba na ohvi màtiŋga o hweŋge hwema lì aka nanù.

⁵ È hvonda ema nà mà ŋyàahwè, nà ma endàhwa o mèenyà hwàmbi. Nà hwèlì ndi mùnyanà hwa Irzàyɛ̀lì ema na uwɛlɛlɛ o lìtumba la ama Bènjàmɛ̀nì. È rzàŋgo na e nyàŋgo ya ami hwà mà hwɛ ndi hwatò hwa Hibrù. Nà ma hwɛ ndi mùnyanà wa Hvàlìrzàyì, nà mà ika imbenda na oma ja arzahwa.

⁶ Nà ma hwɛnɛ e nyɔ̀ŋgi rzayi-rzayi nyayi ema e ma gbeyà ema na tàkirzɛ lì arzàŋganɛ la hwatò hwa ama Yerzù Krirztò. Tɔ̀ mòtò a rzi tanɛ lì ohwa nanù ema nà mà ohva tɔ̀ lìtɔ̀tì tɔ̀ lɔ̀kɔ la wòhwe o nyo ya ami, ehwànja nà mà ika e mbenda ya arzɛ ya hwatò hwa Irzàyɛ̀lì.

⁷ Ndi o nàŋgɛ hweŋge hweyà ema imba nà mà ɛnɛ ndi nàa mɔ̀rzɛ̀ŋgì na hwe wowi ndi nàa eyoyo, ehwànja o hweyà ema Krirztò a no gbèeyà.

⁸ Rzeketɛ hweŋge hweyà mɛnɛ, ndi na wowi hweyà hwe arzɛ nàa eyoyo, na hwe mɛnɛni tɛ na eŋge eyà ndɛnɛ ema e hwèlì o lì hwiya Yerzù Krirztò e Rzàŋgo ya ami. Èhwànja hweŋge hweyà hwe arzɛ hwe hwèlì ndi eyoyo ndèŋgànɛ̀lɛ̀ nà hwe ɛnɛ ndi nàa mbindo aŋga nanù na hwiya Krirztò,

⁹ ndèŋgànɛ̀lɛ̀ na hwɛ mòtò mɔ̀kɔ na mɔ̀. Rzeketɛ o lì ika imbenda ndi e gbèyi nanù ema na emàyɛ̀lɛ̀hwɛ̀ o worzo wo ama Lohwɛ̀. Ndi na emàyɛ̀lɛ̀hwɛ̀ o worzo wo ama Lohwɛ̀ ehwànja na lòkɛ̀ Krirztò. Ndeŋgànɛ̀lɛ̀ Lohwɛ̀ ndi à gbèyi nanù ema na emàyɛ̀lɛ̀hwɛ̀ o worzo wo eni ehwànja na lòkɛ̀ Krirztò.

¹⁰ Nà arza lì hwiya Krirztò na o lì hwɛnɛ màyìmbi ema mɔ̀ à mà hwɛnɛ o hwehvùmuwelì hwe eni. Nà lìŋgàni nanù ema na luwe mètàkà ŋgànà hvɔ̀kɔ mɛnɛ na oma mɔ̀ hvɛ à mà me luwe. Ndeŋgànɛ̀lɛ̀ na lìŋgàni nanù ema na luwe mètàkà na oma mɔ̀ hvɛ à mà me luwe, natɛ̀ɛ hwa no oŋwe na oma hwà mà mo oŋwe mɔ̀ hvɛ.

¹¹ Nà àhvìtɛ̀ nanù ema hwene hweyà hwe arzɛ hwe o gbèyɛ̀nɛ aŋga nanù Lohwɛ̀ a o no hvùmùlɛ o mburza ya e kpelì ya ami.

Pàwolò ama a hwèlì a takeya o lì tɛ̀yirzɛ hweyà gbamù o lìrzùkù

¹² Nà rza ohwa nanù ema nà mà màa lì gbeyà hwene hweyà hwe arzɛ, tɔ̀ nanù ema nà mà màa lì tɛmi ehve-ehve o hweyà hwe arzɛ. Ndi na hwèlì lì keka o lì hwɛ e nyayi ya mòtò ema Yerzù Krirztò à mà arza ema na hwɛ e hvonda ema à mà no hvɔ̀rzè.

¹³ Ìi wònyàmòwe kòkò, nà rza ohwa nanù ema nà mà kulɛ hweyà hwe arzɛ, ndi o hwèlì eyà yɔ̀kɔ ema na ika mɔ̀ŋgɛ̀lɛ̀ o lì gbeyà. Nà hvoŋgà hwèèmà ema hwe ma aka o mburza ndèŋgànɛ̀lɛ̀ o lì ana o lì luwa hwema ema hwe jà o worzo.

¹⁴ Nà hwèlì ndi lì taka o lì ɛndɛ o worzo natɛ̀ɛ na uka èki ema na àŋgàmɛ̀nɛ̀yi lì rzuweya aŋga nanù na luwa etaŋgi ema Lohwɛ̀ à mà no uteya o ŋmanyu yà lohwà. Mɔ̀ à mà no hwɛlɛ nanù ema na ɛndɛ o ŋmanyu yà lohwà lì akeyà na Yerzù Krirztò.

¹⁵ O eŋgànɛlɛ rzɔ, inyɛ irzɔ hwa arzɛ ema i ma màa lì òŋgeyà o lìlòkɛ̀, inyɛ ja alɛ̀mbɛ̀nɛ ndi ene nyayi ya màlùtèyà o hwene hweyà. Ndi e hwèlì tɛ nanù ema inyɔ e ohvi tɛ ma hvɛhvɛ màlùtèyà o lì hvomɛ̀nɛ̀ hwene hweyà, aŋga nanù Lohwɛ̀ a o e oŋgòhwànà o lì hwe rzɔ̀ŋgìtɛ̀nɛ̀ gbamù.

¹⁶ Tɔ̀ e hwɛ ndi mamɛ, i hwɛni lì oŋgama hweyà ema i ma màa lì hwiya.

¹⁷ Ìi wònyàmòwe kòkò, inyɛ e late e oŋgame màtaŋgà mà ami nanù mɛnɛ, ndèŋgànɛ̀lɛ̀ inyɔ e injàneyà hwatò ema hwa gbeyà na oma inyɔ e ma ɛnɛ na oma irzɔ i gbeyà.

¹⁸ Nà oma na yɔki lì e ohweyà, o naŋgɛ nanù na e ohweyà hvɛ na mìirzɔ̀lì, lì hvomɛ̀nɛ rzayi-rzayi ja hwatò ema ɛ̀ɛ̀mɛ̀ ya awu e uŋmɛ̀lɛ̀ ndi nanù ema hwa hwèlì ndi hwàkɔ̀yèlì lì hvomɛ̀nɛ̀ ŋmɛ̀ndì ema mo ohwa nanù ema Krirztò à mà ŋwèeyà o mbàrza.

¹⁹ Ini nyayi ja hwatò, lìrzùkù la awu lì o hwɛ ndi o ɛhvɔ̀ndi ya mùnya. Eyà ema e hwa kànèyà e hwèlì ndi hweyà ema hwe hwèlì e nyɔ̀ŋgi ya e nyàma nyo ya awu. Hwa lìŋgàni o lì gbeyà hweyà ema hwe hwa jàneya irzɔ̀ni, wɔ̀ hwa lùteyà ndi hwèèmà hwe e rze ya mɔ̀nyɛ̀.

²⁰ Ndi o irzɔ, i hwèlì ndi hwatò ema e mbowà ya awu e hwe ndi o ŋmanyu yà lohwà. Ndeŋgànɛ̀lɛ̀ ja ambɛlɛlɛ e Mòrzùŋgèlì hwa arzu, Rzàŋgo Yerzù Krirztò nanù ema mɔ̀ à anjiye o ŋmanyu yà lohwà a timbe o rze ya mɔ̀nyɛ̀.

²¹ Mɔ̀ a o gbeyàna màyìmbi ma eni ema mɔ̀ à gbeyàna o lì kànèyà hweyà hwe arzɛ, ndèŋgànɛ̀lɛ̀ mɔ̀ à o tikowa inyo ja arzu ja e rze, inyo ja arzu ema i rza hwɛnɛ màyìmbi aŋga nanù jo luwa inyo ndɛnɛ ja màyìmbi na oma mɔ̀ à mà luwe e hvonda ema Lohwɛ̀ à mà mo hvùmùlɛ o kpelì.