Hibrù 9 - Mokpwe: Bakwery (New Testament)

O lì gbèeyà Lohwɛ̀ na e nyàma ya nyo na o Èlìŋgɛ̀

¹ O nàŋgɛ tɔ̀ yòombò ya mòlòmɛ̀ e ma ohva imbenda ema jo uŋmɛ̀lɛ̀ nɛ hwa kànɛ̀lɛ̀lɛ̀ Lohwɛ̀, ndèŋganɛlɛ hwà mà ohva èki o e rze ya mɔ̀nyɛ̀ ema hwa kànɛ̀lɛ̀lɛ̀ Lohwɛ̀.

² Lìwondo ema lì ma ohva tùu ihwàkɛ lì ma oŋgahwa. È tùu ema e ma hwɛ o worzo, e ma hwɛ̀lɛ̀hwɛ̀ nanù ema Èki ema e hwèlì wòtani, mboko ema ètùlù e tɛ̀mɛ̀ e ma hwɛ aŋga, tehwèlì e ma hwɛ na èhvòotò ema hwa ŋgbàna Lohwɛ̀ jàhwèyà.

³ O ma hwɛ lìhwatù ema lì mà kahwa e tùu ya worzo na e ya mburza. Èŋge tùu ema e ma hwɛ o mburza ya lìŋgi lìhwatù e ma hwɛ̀lɛ̀hwɛ̀ ndi nanù ema Èki ema e akayi Wòtani Rzayi-rzayi.

⁴ Ò tenì yà eŋge tùu, ò mà hwɛ ètàwò yà gòòlù ema hwà mà hwɛ lì rzɛ̀lɛ̀lɛ̀ itùwà ò ŋmanyu ò lì kànɛ̀lɛ̀lɛ̀ Lohwɛ̀. Iwòŋgo ema hwa mà hwɛlɛ ema iwòŋgo jà yòmbò jɔ̀ hvɛ ì mà hwɛ ò tenì. Iŋgi iwòŋgo i mà kumɛnɛhwɛ ò hwèhvàrzù hwe arzɛ nà gòòlù. Ò tenì yà iŋgi iwòŋgo, ò mà hwɛ lìwonde là gòòlù ema lì mà ohva màna ò tenì. Motimbo mo ama Arɔ̀nì ema mo ma oŋga hweyàlì mo ma hwɛ o tenì. Hwèhvàrzù hwe tàhvelì hwehwàkɛ hwe màŋyàyi ema hwe ma ohva motìla mo imbenda hwe ma hwɛ aŋga.

⁵ O ŋmanyu ya iŋgi iwòŋgo, hwèmà hwehwakɛ hwe ma hwɛ aŋga ema hwe ma àyɛ̀kɛ̀nɛ̀ i aŋgèlì, ema hwe ma uŋmɛ̀lɛ̀ ŋmàye mo ama Lohwɛ̀. Mahvahve ma hweŋge hwema, ma mà kumɛnɛ e ŋgutù ya iŋgi iwòŋgo o èki ema e ma hwɛ èki ya lì làkìrzɛ̀ wòhwe. Ndi hweŋge hwèmà hwe arzɛ, i rza tanɛyi o lì hwe ohwa nàŋgɛ.

⁶ Nànù ndi hwèŋge hweyà hwe ma rzɛŋgɛnɛhwɛ. Ipìlìrzì i kpèeyà o èŋge tùu ya worzo wùnyà tɛ o lì gbeyà èwòlò ya awu.

⁷ È Pìlìrzì e Kàrzàmi mɛnɛ ndi e ɛ̀ndɛ o tùu ema e hwèlì o tenì ŋgelì hvɔ̀kɔ o ŋma. È hvonda ema a ɛ̀ndɛ tɛ o lì kpèeyà, a ohva màyija ma èembè ema a ŋgbàna Lohwɛ̀ màahweyà, o wòhwe wo eni, na o wòhwe ema hwatò hwa gbeyànì Lohwɛ̀ e rzi hwɛ wɔ̀ lì hwiya.

⁸ Èlìŋgɛ̀ yà Wòtani e ma gbeyà hwene hweyà o lì jo uŋmɛ̀lɛ̀ nanù ema, na oma i hwèlì i gbeyàna lìwondo la e rze ya mɔ̀nyɛ̀, e ma gbeyà ema irzɔ i rza tanɛyi o lì uka Lìwondo la Wòtani o èki ema Lohwɛ̀ a hwèlì.

⁹ Lìŋgi lìwondo lì uŋmɛ̀lɛ̀ ndi hweyà ema hwe gbèyɛ̀nɛ yàwono. Ène eyà e jo uŋmɛ̀lɛ̀ ndi nanù ema jàhwèyà, na màahweyà ma hwèembè ema hwatò hwa mà hwɛ lì ŋgbà Lohwɛ̀, hwe rzi tànɛyi lì rzàŋgirzɛ ŋmèma mo mòtò ema a ŋgbà làhweyà.

¹⁰ Ini mbenda ja arzɛ i ma hwɛ ndi mbenda ja hwèlèèlì na hwènyɔ̀ɔ̀nì na hwehvɛhvɛ hweyà rzayi-rzayi ema hwatò hwà mà gbeeye o lì arzàŋgìrzɛ̀ wɔ̀ hwiti. Ini mbenda ja arzɛ i hwèlì ndi imbenda ja e nyàma ya nyo ema jo o kuwɛ e hvonda ema Lohwɛ̀ a o rzèeya hweyà hwe arzɛ.

Màyìjà ma ama Yerzù ndi ma hwèlì jàhwèyà ema i rzàŋgi

¹¹ Ndi Krirztò mɔ̀ à mà màa lì jà nàa Pìlìrzì e Kàrzàmi o hweyà hwe gbamù ema hwe ma màa lì jà. Mɔ̀ a gbeyà èwòlò ya eni o lìwondo ema lì akayi lìwondo la e rze ya mɔ̀nyɛ̀ ndeŋgànɛlɛ lɔ̀ lì hwèlì gbamù lì aka lìwondo la e rze ya mɔ̀nyɛ̀. Rzeketɛ hwatò hwa hwènàmà ndi hwa oŋgi lìŋgi lìwondo. Lì rza enje ndi lìwondo ema lì hwèlì o e rze ya mɔ̀nyɛ̀.

¹² Nà oma Yerzù à mà kpèeyà o lìŋgi lìwondo, à mà kpèeyà ndi o Èki ema e akayi Wòtani Rzayi-rzayi o ŋgelì hvɔ̀kɔ o iŋgèlì ja arzɛ. A rzi wòwe màyija ma mbolì tɔ̀ e màa nyàkà o lì ŋgbà màahweyà, à mà wowa ndi màyija ma eni mɛnɛ. A ma mà gbeyàna o lì jo kɔ̀tɔ̀ o wòhwe wo arzu aŋga nanù jo o hwɛ o lòŋgɛ la gbìndèyà.

¹³ O mòlòmɛ̀, hwà mà wowa ndi màyija ma imbolì na inyàkà, rzìi hwa wowa hvɛ lìwu la e ŋguma ya nyàkà ema hwà mà rzɛlɛ, rzìi hwa lì hvahva o inyo ja hwatò ema hwa rza rzàŋgɛ o worzo wo ama Lohwɛ̀ aŋga nanù hwa rzàŋga.

¹⁴ È hwèlì tɛ ema màyija ma hwèembè ma tanɛ ma hwɛnɛ màyìmbì ma lì rzàŋgirzɛ hwatò, nanù oma màyija ma ama Yerzù ma hwɛni màyìmbì rzayi-rzayi o lì rzàŋgirzɛ hwatò. Krirztò ema a rza ohvɛ tɔ̀ wòhwe tɔ̀ wɔ̀kɔ à mà aŋgbɛ mɔ̀ ŋmìti nàa jàhwèyà o lì jo kɔ̀tɔ̀ irzɔ hwa arzɛ. A ma gbeyà ndi ene eyà nanù o lì akeyà na èlìŋgɛ̀ yà wòtani ema e hwɛ natɛ̀ɛ na o gbìndèyà. Màyìjà ma eni mɔ̀ ndi ma jo rzàŋgirzɛyi mèèmà me arzu, ema i rza gbeyà hweyà hwe wòhwe ema hwe jo jàneyà e kpelì. Ndi e àŋgàmɛ̀nɛ̀yi lì gbèeyà Lòohwà la lòŋgɛ.

¹⁵ Lìtìŋga lìiŋgi ema lì gbèyi Krirztò o lì hwɛ e mòtò wa ìtììtènì wa yòombò hvènya aŋga nanù hwatò ema Lohwɛ̀ mɔ̀ à hvɔ̀rzì hwa o luwa mònàmɛ̀ ema mo o hwɛ natɛ̀ɛ na o gbìndèyà. Moŋgo mònàmɛ̀ ndi Lohwɛ̀ a ohwi nanù ema a o ŋgba hwatò hwa eni. È kpelì ema Krirztò a ŋwelì, yɔ ndi e gbèyi ndeŋgatɛ ene eyà e gbèyɛ̀nɛ nanù. È kpelì ya eni e ma kɔ̀tɔ̀ hwatò o wòhwe ema hwà mà hwɛ lì gbeyà e hvonda ema yòombò ya mòlòmɛ̀ e ma hwɛ lì hwa kànèyà.

¹⁶ Yòombò e hwèlì ndi nàa lì rzàrzowa, tɔ̀ ima hvonda ema mòtò a rzàrzowa lìrzàŋgo la eni, e hwɛni ndi lì uŋmɛ̀lɛ̀ nanù ema e mòtò ema a rzàrzowi erzàŋgo ya eni à mà màa lì ŋwa. Ndi hwa àŋgàmɛ̀nɛ̀yi lì oŋgama mamɛ ema mɔ̀ à rzàrzowi.

¹⁷ Ène eyà e hwèlì ndi nanù ehwànja, e hvonda ema e mòtò ema a rzàrzowi erzàŋgo ya eni a ŋwelì tɛ, ɔ̀ndi lìrzàrzowa la eni lì hwɛnɛ màyìmbì. Lìrzàrzowa lì rza hwɛni màyìmbì e hvonda ema e mòtò ema a rzàrzowa erzàŋgo ya eni a e hwèlì lòŋgɛ.

¹⁸ Nànù ɔ̀ndeŋgàtɛ̀ yòombò ya mòlòmɛ̀ ema Lohwɛ̀ à mà aàtɛ na e mòtò wa hwènàmà e rzi hwɛnɛ tɔ̀ màyìmbì natɛ̀ɛ màyija ma àŋgàmɛ̀nɛ̀yi lì komahwa.

¹⁹ Morzè à mà loma lì ohweyà hwatò imbenda ja arzɛ ema Lohwɛ̀ à mà ohwe nanù ema hwatò hwa ika. O e mbenda ya ama Lohwɛ̀ o mburzà nanù à mà wowa màyija ma mbolì na e ma nyàkà à mà hvuŋguwanɛlɛ na malìhwa. A ma gbeyàna ekɔ̀kɔ̀ ya gbee wo hìrzɔ̀pì na majumbu ma mbolì ema e teya, rzìi a hvahva màŋga màyija o tenì ya e kààti ema iŋgi mbenda i ma tilàhwe na o inyo ja hwatò.

²⁰ Nà oma Morzè à mà hwɛ lì hvahva maŋga màyija rzìi a wòteya lì ohwa nanù ema, “Manù màyija ndi ma uŋmɛ̀lɛ̀ nanù ema yòombò ya ama Lohwɛ̀ e rza àyeŋgowɛ.”

²¹ Ŋgana hvɔ̀kɔ hvɛ mɛnɛ ndi Morze à mà hvahve màŋga màyija o ŋmanyu ya lìwondo la màahweyà, na o ŋmanyu ya tɔ̀ ima yoma ema hwà mà gbeyàne o lì ŋgba màahweyà.

²² Ò jɔ̀kɛ̀, o lì hvomɛ̀nɛ̀ e mbenda ya ama Morzè, tɔ̀ ima yòma ema e ma hvahvahwa màyija yɔ ndi hwatò hwà mà wowe nanù ema e hwèlì wòtani. Ène ŋgàna e hwèlì ndi nanù ema wòhwe wo rza ohvi tɔ̀ lì làkìrzɛ̀ natɛ̀ɛ màyija ma komahwa o rze.

Ŋmita mo ama Krirztò ema a ŋgbelì nàa jàhwèyà mɔ̀ndi mo ulɛ wòhwe

²³ O eŋgànɛ̀lɛ̀ rzɔ, ene eyà ndi e gbèyi ɔ̀ndeŋgàtɛ̀ lìwondo la e rze ya mɔ̀nyɛ̀ na hwèèmà hwe arzɛ ema hwe hwèlì o tenì, hwe ma rzàŋgìrzɛ̀hwɛ na màyija ma hwèembè. O eŋganɛlɛ hwèèmà hwe arzɛ, hwe àyɛ̀kɛ̀nɛ̀ hwèèmà ema hwe hwèlì o ŋmanyu ema hwe hwèlì na e jɔ̀kɛ̀. Ndi hweŋge hwèèmà ema hwe hwèlì o ŋmanyu, hwe ma àŋgàmɛ̀nɛ̀yi ndi lì hwe rzàŋgìrzɛ̀ na màyija emà mà akayi e màa hwèembè.

²⁴ Krirztò mɔ̀ à rzi kpèeyà Èki ya Wòtani ema e ma oŋgahwa ndi na màà mà hwatò hwa hwènàmà, ema e ma àyɛ̀kɛ̀nɛ̀ hwèèmà hwe e ŋmanyu yà lohwà. Krirztò mɔ̀ à mà kpèeyà o ŋmanyu yà lohwà yitɛ-yitɛ, o nàŋgɛ nanù mɔ̀ à tɛmì o worzò wo ama Lohwɛ̀ o lì ohwa o nyòla arzu.

²⁵ Mɔ̀ a rzi ɛndɛ aŋga o lì aŋgbɛ mɔ̀ ŋmìti nàa màahweyà rzayi-rzayi ja ŋgelì. Mɔ̀ a rza ɛndɛ na oma e Pìlìrzì e Kàrzàmi e ma ɛndɛ ŋma tɛ o Èki ema e akayi Wòtani Rzayi-rzayi o lì ŋgba màahweyà na màyija ma hwèembè.

²⁶ Èma hwɛ tɛ nanù, o ma Krirztò à mà àŋgàmɛ̀nɛ̀yi lì taka hvɛ o rzayi-rzayi ja ŋgelì lì wòteya ewèkelì ya e rze ya mɔ̀nyɛ̀. Ndi e rzi hwɛ nanù, Krirztò mɔ̀ à mà jà ndi o ŋgelì hvɔ̀kɔ o iŋgèlì ja arzɛ nàŋgɛ ema e rze ya mɔ̀nyɛ̀ e a kombɛnɛ lìrzukù. Mɔ̀ à mà aŋgbɛ e nyo ya eni nàa jàhwèyà o lì ulɛ wòhwe wo tɔ̀ ima mòtò.

²⁷ Mòtò tɛ a àŋgàmɛ̀nɛ̀yi lì ŋwa ŋgelì hvɔ̀kɔ, ndèŋgànɛ̀lɛ̀ o mburzà nanù a o kàyìrzɛ̀hwɛ.

²⁸ Nànù hvɛ mɛnɛ ndi Krirztò à mà aŋgbɛ mɔ̀ ŋmìti o ŋgelì hvɔ̀kɔ o iŋgèlì ja arzɛ nàa jàhwèyà o lì ulɛ wòhwe ema wo koki o hwatò. Ndeŋgànɛ̀lɛ̀ mɔ̀ à o jà hvɛ e ŋgelì ema e ùkirzɛ̀ ihwàkɛ, rzeketɛ o lì ulɛ wòhwe o hwatò, ndi mɔ̀ à o jà o lì rzùŋgà mòŋgɛ ma hwatò ema hwa mo ambɛ̀lɛ.