Hibrù 8 - Mokpwe: Bakwery (New Testament)

Yerzù ndi à hwèlì e Pìlìrzì e Kàrzàmi ya arzu o yombò hvènya

¹ jànda jà mamɛ ema jò òhwa i hwèlì ndi nanù ema, jo òhvi ene tumba ya Pìlìrzì e Karzami ema, e lìyayi o èhvarzù ya lìya la mòmɛ̀ la e konda ya Lohwà lì karzami, o ŋmanyu yà lohwà.

² A gbèeyà ndi nàa è Pìlìrzì è Kàrzàmi o èki ema e hwèlì wòtani ema hwèèmà hwe wòtani hwe utahwa, o èki ema lìwondo la ama Lohwɛ̀ lì hwèlì. Rzàŋgo Lohwɛ̀ mɔ̀ ŋmitɛ ŋmitɛ ndi à oŋgi lìŋgi lìwondo rzeketɛ hwatò hwa hwènàmà.

³ Tɔ̀ ima Pìlìrzì e Kàrzàmi e hvɔ̀rzɔ̀hwì o lì ŋgbà jàhwèyà, na màhwèyà ma hwèembè oma Lohwɛ̀. O èŋgànɛ̀lɛ̀ rzɔ, e Pìlìrzì e Kàrzàmi e hweni lì ohva yòma o lì ŋgbà nàa e la eni làhweyà o ma Lohwɛ̀.

⁴ O nàŋgɛ rzɔ, e ma hwɛ tɛ nanù ema à mà hwɛ ndi o rze ya mɔ̀nyɛ̀ o ma a rzi hwɛ Pìlìrzì, èhwanja o hwèlì Ipìlìrzì ema ja ahweyà màahweyà na oma e mbenda e ohwi.

⁵ Èwòlò ema iŋgi Pìlìrzì i gbeyà, i hwèlì ndi embànelì na elìŋgɛ̀ ya hwèèmà ema hwe hwèlì o ŋmanyu yà lohwà. Nànù mɛnɛ hvɛ ndi e ma hwɛ na Morzè. È hvonda à mà arze lì oŋga lìwondo la hwetanelì la ama Lohwɛ̀, Lohwɛ̀ à mà mo kòkòwɛ̀lɛ̀ nanù ema, “O ɛnɛ nanù ema o oŋge hwèema hwe arzɛ o lìŋgi lìwondo na oma nà mà o uŋmɛ̀lɛ̀ o hvàko.”

⁶ Ndi o nàŋgɛ rzɔ Lohwɛ̀ a ŋgbelì Yerzù èwòlò ya Pìlìrzì ema e akayi hwèwòlò hwe i pìlìrzì ja kòohwa. Ŋgana hvɔ̀kɔ hvɛ na lì ahvìyànɛ̀ ema Yerzù a jànelì Lohwɛ̀ na hwatò hwa eni, lì akayi lì ahvìyànɛ̀ la worzo ema hwà mà lome lì hwɛnɛ ehwànja Lohwɛ̀ mɔ̀ à mà maà lì kàkɛ̀nɛ hwatò nanù ema a o hwa ŋgbà hwema hwe gbamù.

⁷ È ma hwɛ tɛ nanù ema yòombò ya mòlòmɛ̀ e ma gbeyà hwatò o lì emeyàhwa o worzo wo ama Lohwɛ̀, o ma o rzi hwɛ ehvɛhvɛ yòombò.

⁸ Ndi Lohwɛ̀ à mà ɛnɛ njɔ̀mi na hwatò hwa eni, rzìi a ohwa nanù ema, “Imba e Rzàŋgo na ohwa nanù ema, wùùnya wo hwèlì wo jà, ema imba na o aàtɛ yombò hvènya, na hwatò hwa Irzàyɛ̀lì, na hwatò hwa Yudà.

⁹ Èŋge yombò e rza o hwɛ nàa yòombò ema nà mà aàtɛ na imbamba ja awu. È hvonda ema nà mà lɛmbɛ màà mà awu, rzìi na hwa anjiyana o èkomè ya Ìjiptò. Wɔ̀ hwa rzìi oŋgame eŋge yombò. O eŋgànɛlɛ rzɔ̀, imba nà mà hwa hwɛmɛ.

¹⁰ Lohwɛ̀ à ohwa hvɛ nanù ema, Imba è Rzàŋgo ndi nà ohwa. Ò nàŋgɛ nanù yòòmbò ene ema nà hwɛni lì ààtɛ̀ɛ̀ nà wònyà Irzàyɛ̀lì, ò è hvonda ema è ò jɛ̀ɛ̀ è hwèlì ndi nanù ema: nà ò hwa gbeyà ò lì hwiya imbenda jà ami, ndèŋgànɛ̀lɛ̀ hwa ò ohva ŋmèma mò lì ika iŋgi mbenda. Imba nà ò hwɛ Lòohwà là awu, ndèŋgànɛ̀lɛ̀ wɔ̀ hvɛ hwa ò hwɛ hwatò hwa ami.

¹¹ Tɔ̀ mɔ̀kɔ wà awu à rza tanɛyi lì okolɛ̀ e mbunda ya eni ndèŋgànɛ̀lɛ̀ tɔ̀ mòtò a rza o ohweyà ŋmanyàŋgò wa eni nanù ema a hwi Lohwɛ̀, èhwanja wɔ̀ hwa arzɛ hwa o no hwiya, lì wòteya o hwarzàlì natɛ̀ɛ no o hwàmbaki.

¹² Imba nà ò hwa làkìrzɛ wòhwe wò awu, rzìi nà rza ɔ̀ŋgɛ̀lɛ̀ màtònà mà awu.”

¹³ Jòòhwì ema Lohwɛ̀ à ohwi lì hvomɛ̀nɛ̀ yòombò ehvènya è uŋmɛ̀lɛ̀ nanù ema à mà ohva yòòmbò yà mòlòmɛ̀ è rza gbeyàhwɛnɛ hvɛ. Ndèŋgànɛlɛ tɔ̀ yòma ema hwa rza gbeyàna hvɛ, ema è mà unɛ̀, è ò nyɔ̀ŋgɔ̀ ŋmanà mbɔ̀.