Hibrù 5 - Mokpwe: Bakwery (New Testament)

¹ Tɔ̀ ima Pìlìrzì e Kàrzàmi ema Lohwɛ̀ a hvɔ̀rzì o ìtììtènì ja hwatò, a mo hvɔ̀rzɔ̀ ndi nanù ema a mo gbèeyà o lìinà la hwaŋga hwatò. Èŋge Pìlìrzì ndi e hwèlì e mɔ̀ ema a wowa màahweyà ma hwatò, rzìi à mà ŋgbà o ma Lohwɛ̀ nàa jàhwèyà na màahweyà aŋga nanù Lohwɛ̀ a o làkìrzɛ̀ wòhwe wo hwatò.

² O àjùlɛ̀nɛ̀ hwatò ema hwà mà hvònda e njiya, ehwànja wɔ̀ hwa rza hwi hweyà ema hwa gbeyà, ndèŋgànɛ̀lɛ̀ mɔ̀ hvɛ a hwèlì ndi e mòtò wa hwènàmà ndeŋga ehwànja mɔ̀ hvɛ a ohvi màtona.

³ Lìtiŋga lìŋgi ema mɔ̀ à hwɛnì lì ŋgbà màhwèyà o wòhwe wo eni, nanù mɛnɛ na o wòhwe wo hwanɛ̀yi hwatò.

⁴ Tɔ̀ mòtò a rza tanɛ a aŋgbɛ mɔ̀ ŋmìti èluhwe ya e Pìlìrzì e Kàrzàmi. Lohwɛ̀ ndi à hvɔ̀rzɔ̀ mòtò o lì hwɛ e Pìlìrzì e Kàrzàmi, ŋgàna hvɔ̀kɔ hvɛ na oma à mà hvɔ̀rzè Arɔ̀nì.

⁵ Ɔ̀ndeŋgàtɛ̀ Krirztò mɔ̀ ŋmìti à rzi awòwɛ̀ ò ene èluhwe ò lì hwɛ è Pìlìrzì è Kàrzàmi. Mɔ̀ à mà hvɔ̀rzɔ̀wɔ̀ ndi nà Lohwɛ̀. Lohwɛ̀ à mà mò òhweyà nanù ema, “Ò hwèlì ndi è Ŋmanà wà ami wà munyanà. O lì wòteya yàwono na hwèlì ndi e Tatɛ̀ ya aŋgɔ.”

⁶ Ò tenì yà èhvɛhvɛ èki è tìlàhwì ò è kààtì yà Lohwà nanù ema, Lohwɛ̀ à mà mò ohweyà nanù ema, “O ò hwɛ ndi Pìlìrzì nàtɛ̀ɛ nà ò gbìndèyà, nàa Mɛlchirzɛdɛki.”

⁷ È hvonda ema Yerzù à mà hwɛ ò è rze yà mɔ̀nyɛ̀, à mà hwɛ lì kànɛ, lì atɛkɛ Lohwɛ̀, à mà hwɛ lì eeya lùwa lì ndɛnɛ, ndèŋgànɛ̀lɛ̀ mììrzɔ̀lì ma mà hwɛ lì mò wurza. À mà hwɛ lì kànɛ̀lɛ̀lɛ̀ Lohwɛ̀ ema à tanɛyi lì rzùŋga lòŋgɛ là eni. Lohwɛ̀ à mà hweyàna lìkanɛ̀ là eni, èhwanja mɔ̀ à hwɛni wɔ̀ɔ̀ŋgɔ̀ wo ama Lohwɛ̀ o tenì ya eni.

⁸ Tɔ̀ nɛ Yerzù à mà hwɛ ndi è Ŋmanà wà ama Lohwɛ̀, à mà okowa lì hweyàna Lohwɛ̀ o hweyà ema à mà tàkìrzɛ̀hwɛ̀.

⁹ Lohwɛ̀ à mà mo gbeyà o lì hwɛ e Pìlìrzì e Kàrzàmi ema e hvomɛ̀nɛ̀, aŋga nanù, hwatò ema hwa mo hweyàna, hwa o luwa lìrzùŋgàhwa ema lì o hwɛ natɛ̀ɛ na o gbìndèyà.

¹⁰ Ò èŋgànɛ̀lɛ̀ rzɔ Lohwɛ̀ à mà mò gbeyà ò lì hwɛ è Pìlìrzì è Kàrzàmi ò mòtènde mò ama Mɛlkirzɛdɛki.

Màyohwa ò hwatò aŋga nanù hwa rza kìnyɛ̀lɛ̀ lìlòkɛ̀

¹¹ Irzɔ i hwɛni rzayì-rzayì ò lì ohwa, ò lì hvomɛ̀nɛ̀ enè eyà. Ndi è nò ambani ò lì gbeyà nanù ema è hwe rzɔ̀ŋgìtɛ̀nɛ̀, èhwanja è rza hwàmìrzɛ̀ ò lì rzɔ̀ŋgìtɛ̀nɛ̀.

¹² Nà ohwa ndi nanù ehwànja, ò nàŋgɛ inyɔ è mà àŋgàmɛ̀nɛ̀ ndi lì hwɛ hwatò ema hwa okòlɛ hwahvɛhvɛ hwatò. Ndi hwa àŋgàmɛ̀nɛ̀ o lì e okolɛ hvɛ, hweyà ema inyɔ̀ e ma màa lì hwiya lì hvomɛ̀nɛ̀ ŋmɛ̀ndì mo ama Lohwɛ̀. È hwèlì ndi nàa mɛɛŋgɛ me hwanà ema hwa arza ndi lì nyɔ̀ŋgìrzɛhwɛ, rzeketɛ mòlelì ema mo eti.

¹³ Tɔ̀ ima mòtò ema a nyɔ̀ŋgìrzɛ̀hwɛ, a hwèlì ndi nàa ŋmɛ̀ŋgɛ mo ŋmanà. A rza hwi mamɛ ema e hvomɛ̀nɛ̀ na e yɔ̀hvɛ ema e rza hvomɛ̀nɛ̀.

¹⁴ Molelì ema mo eti mo hwèlì ndi o hwatò ema hwà mà kòkɛ. Mòtò ema à mà kòkɛ rzɔ̀ a hwèlì ndi mòtò ema a ma okowɛ ndèŋgànɛ̀lɛ̀ a hwi hweyà ema hwe hvomɛ̀nɛ̀ na e hweyɔ ema hwe rza hvomɛ̀nɛ̀.