Hibrù 3 - Mokpwe: Bakwery (New Testament)

Yerzù a kàrzàmi lì aka Morzè

¹ Ìi wònyàmòwe hwa ama Krirztò kòkò, inyɔ ema Lohwɛ̀ à mà hwɛ̀lɛ o lì hwɛ hwatò hwa eni, inyɛ̀ e ika màlùtèyà ma anyu o ma Yerzù. Mɔ̀ ndi à hwèlì e mògbèèlì ema Lohwɛ̀ à mà ome o lì hwɛ e Pìlìrzì e kàrzàmi o hweyà ema irzɔ jo ohwi nanù ema i lòkɛ̀yì.

² Lohwɛ̀ ndi à mà mo hvɔ̀rzɔ̀ ndèŋgànɛlɛ à mà gbeyà èwòlò ema Lohwɛ̀ à mà arze nanù ema a gbeye na ŋmèma mɔ̀kɔ ŋgana hvɔ̀kɔ na oma Morzè mɔ̀ hvɛ à mà hwɛ lì gbèeya Lohwɛ̀ na ŋmèma mɔ̀kɔ o tenì ya e ndawò yà Lohwà.

³ Mòtò ema a oŋgi ndawò a hwɛni èluhwe lì aka e ndawò yɔ yiti nanù mɛnɛ hvɛ ndì e hwèlì na Yerzù ema a hwɛni èluhwe ndɛnɛ lì aka Morzè.

⁴ Ò jɔ̀kɛ̀ ndawò tɛ e oŋgahwa na mòtò ndì Lohwɛ̀ ndì a oŋga hwèèmà hwe arzɛ.

⁵ Morzè à mà hwɛ ndi e mògbèèlì o e ndawò yà Lohwà ema à mà hwɛ lì gbèeyà Lohwɛ̀ na ŋmèma mɔ̀kɔ. A ma uŋmɛ̀lɛ̀ mamɛ ema Lohwɛ̀ a o gbèeyɛ o e hvonda ema e o jɛ̀ɛ̀.

⁶ Ndi Krirztò nàa è Ŋmanà wà munyanà wa ama Lohwɛ̀, à mà hwɛ lì kànèyà e ndawò yà Lohwà na ŋmèma mɔ̀kɔ. Irzɔ hvɛ i hwèlì ndì hwatò hwa lìtumba la e ndawò ya ama Lohwɛ̀, e hwèlì tɛ nanù ema jo ohvi etembe, ndèŋgànɛ̀lɛ̀ ji ikayi mèèmà me arzu na eyà ema ja àyèkìrzɛ̀nɛ̀ ema ji ikayi màhvìtà mà arzu.

Mayòwa o hwatò ema hwa rza lòkɛ̀ Lohwɛ̀

⁷ Ò eŋgànɛlɛ, è okànèyà mamɛ ema Èlìŋgɛ̀ yà Wòtani è ohwa. Yɔ̀ è ohwa nanù ema, “Yàwonò, è hweyi tɛ lìlo là ama Lohwɛ̀,

⁸ è rzi kèka lì hwɛ̀neyà Lohwɛ̀ màniya, nà oma imbamba jà anyu ì mà hwɛ̀neyà Lohwɛ̀ màniya è hvonda ema hwa mà tèŋgɛ̀nɛ̀ Lohwɛ̀. Hwa mà mò tèŋgɛnɛ è hvonda ema hwa mà mò kèkìrzɛ ò mòrzanjɛ̀.

⁹ Ò moŋgo mòrzanjɛ̀, hwa mà nò kèkirzɛ, ndèŋgànɛ̀lɛ̀ hwa mà ɛnɛ hweyà ema nà mà gbeye ò hvoka yà menìmènìì mè meya.

¹⁰ Ɔ̀ndeŋgàtɛ̀ nà mà tàtànà hwaŋga hwatò rzìi nà ohwa nanù ema, ‘Mèèmà mè awu mè lùteyà ndì hwehvɛhvɛ hweyà ì hvonda jà arzɛ, ndèŋgànɛlɛ hwa rzi ika imbenda jà ami.’

¹¹ Nà mà hwa tàtànà natɛ̀ɛ nà àtɛ̀ɛ̀ yòmbo nanù ema, ‘Hwa rza ò kpèya à kpèeyà hvɛ tɔ̀ ò èki yà ami yà lì àrzìyòlɛ̀.’”

¹² È wòwè hvonda ìi wònyanyàŋgò hwa ami hwa Krirztò ema tɔ̀ mɔ̀kɔ wà anyu à rza ohva ŋmèma mò wòhwe ema mò rza lòkɛ̀, aŋga nanù è rza hwɛmɛ Lohwɛ̀ ema à hwèlì lòŋgɛ.

¹³ Ndi è àyètìrzɛ̀nɛ̀ mɔ̀kɔ nà ɔnɛyi wùnyà tɛ, na oma eyu e hwɛ̀lɛ̀hwɛ̀ nanù ema, “Yàwono,” aŋga nanù wòhwe wo rza lukɛlɛ mèèmà me anyu o lì hwɛneya Lohwɛ̀ maniya.

¹⁴ I hwèlì ndi mɔ̀kɔ na Yerzù Krirztò, è hwèlì tɛ̀ ema i lɛmbi tɛ lìlòkɛ̀ ema i ma lome lì hwɛnɛ kɔ̀yi-kɔ̀yi natɛ̀ɛ na o lìrzùkù.

¹⁵ È tìlàhwì ò tenì yà è kààtì yà Lohwà nanù ema, “Yàwonò è hweyi tɛ lìlo là ama Lohwɛ̀, è rzi kèka lì hwɛ̀neyà Lohwɛ̀ màniya, nàa imbamba ja anyu ì mà hwɛ̀neyà Lohwɛ̀ màniya e hvonda ema hwa mà tèŋgɛ̀nɛ̀ Lohwɛ̀.”

¹⁶ Hwa njɛnɛ hwa mà hweyà lìlo là ama Lohwɛ̀, rzìi hwa hwɛ ndi ò lì teŋgɛ̀nɛ̀ Lohwɛ̀ e? Rzeke hwaŋga hwatò hwa arzɛ mɛnɛ ema Morzè à mà ànjìyanè ò èkomè yà Ìjiptò e?

¹⁷ Ndèŋgànɛ̀lɛ̀ hvɛ hwa njɛnɛ hvɛ ema Lohwɛ̀ à mà tàtanè ò mèŋge mènimenì mè meya, rzeke hwaŋga mɛnɛ ema hwa mà gbeyà wòhwe, ndi hwa mà ŋwèeyà ò mòrzanjɛ e?

¹⁸ Hwa njɛ̀nɛ ema Lohwɛ̀ à mà ààtɛ̀ nanù ema hwa rza ò kpèeyà ò èki yà eni yà lì arziyolɛ ema à mà hwa kàkɛ̀nɛ̀ e? Rzeke è wɔ̀ ema hwa rzi mò hweyànɛ̀ e?

¹⁹ Ò eŋgànɛ̀lɛ̀ rzɔ, irzɔ jè ɛni nanù ema hwa rzi tànɛ lì kpèeyà ò eŋge èki yà lì arzìyolɛ, èhwanja hwa rzi lòkɛ̀ Lohwɛ̀.