Hibrù 13 - Mokpwe: Bakwery (New Testament)

Hwɛ̀ɛ̀mɛ̀ ema hwe lìŋgirzɛ Lohwɛ̀

¹ Inyɛ̀ e ɛndɛ o worzo ò lì alìŋgànɛ mɔ̀kɔ nà ɔ̀nɛyi nàa hwatò hwa ama Krirztò.

² È rzì hwɛmɛ o lì karzɛ hwàyɛ̀nì o màndà ma anyu o i hvonda ja arzɛ. Nànù ndi lòŋgo la hwatò hwà mà gbeye hwà mà karzɛnɛ i aŋgèlì o màndà ma awu e rzi hwɛ lì hwiya.

³ È ɔ̀ŋgɛlɛ hwaŋga ema hwa hwèlì o hwèwòwà nàa wà ɛ̀nɛ oma e hwèlì aŋga na wɔ̀. È ɔ̀ŋgɛ̀lɛ̀ hvɛ hwaŋga ema hwa taka o rze ya hwahvɛhvɛ hwatò, inyɛ e hwɛ nàa inyɔ hvɛ e taka ndi na wɔ̀.

⁴ Tɔ̀ ima mòtò ema a hwèlì o ndawò ya lìhwa a hwɛnì lì ŋgbà lìhwa èluhwe. Mojomɛ na jòjìyɛ̀ hwa rza hwɛni lì gbeyà mòrzònje mo Lìhwa o tenì ya lìhwa la awu. Lohwɛ̀ à kàyìrzɛ̀ hwaŋga ema hwa gbeyà hweyà hwe morzonje na e wɔ̀ ema hwa gbèeyà morzonje mo lìhwa.

⁵ È rzì keka lì ika mèèmà me anyu o lì lìŋgàna wolì ndeŋgànɛ̀lɛ̀ e ohve mɔ̀nyɛ̀ŋgì na mamɛ ema e ohvi èhwanja Lohwɛ̀ à ma ohwa nanù ema, “Nà rza e hwɛmɛ, ndeŋgànɛ̀lɛ̀ hvɛ na rza e rzɔ̀rzɔ̀.”

⁶ O èŋgànɛ̀lɛ̀ jo ohwa nà èkɔ̀ɔnjì nanù ema, “Lohwɛ̀ ndi à hwèlì e mòoŋgòwànèlì wa ami, nà rza oka wɔ̀ŋgɔ̀, mamɛ̀ mòtò wa hwènàmà a tanɛ̀yi lì no gbeyà e?”

⁷ È ɔ̀ŋgɛ̀lɛ̀ hwàtimbèlì hwa anyu hwa kòhwà ema hwa mà e ohweyà Eyà ya Lohwà è ɔ̀ŋgɛ̀lɛ̀ nà oma hwà mà lìya mòŋgɛ ma awu, e hwa nɔŋge matàŋgà mà awu ndeŋgànɛ̀lɛ̀ e lòkɛ̀ na oma wɔ̀ hvɛ hwà mà lòkɛ̀.

⁸ Yerzù Krirztò a hwèlì ndi molemilemi o i hvonda ja arzɛ. Nà oma à mà hwɛ ŋmɛlɛ ema wɔ̀ ma aka, nanù ndi à hwèlì yàwonò ndeŋgànɛ̀lɛ̀ nanù ndi à o hwɛ natɛ̀ɛ nà o mòlìkɛ̀.

⁹ È rzi kèka lì lùkɛlɛhwɛ na hwèyokòlelì ema hwe ayeŋgòwɛ̀. O lɔ̀wu nanù ema è ndèli ya ama Lohwɛ̀ è ètìrzɛ, rzeketɛ imbenda lì hvomɛ̀nɛ̀ mòlelì. Iŋgi mbenda e rza ohvi tɔ̀ mɔ̀rzɛ̀ŋgì na hwaŋga ema hwa ja ika.

¹⁰ I hwɛnì ètàwò yà màhwèyà ema ipìlìrzì ema i ŋgba màahweyà o lìwondo la màkanɛ̀ i rza hwɛni wònjà ò lì làa tɔ̀ yòma aŋga.

¹¹ È Pìlìrzì è karzami e ŋgba Lohwà màahweyà ò nyòla wòhwe wò hwatò. À wòwa màyija mà hwèembè à mà ɛ̀ndɛ̀nɛ̀ o èki ema e hwèlì Wòtani lì Akà na Limɛni. Ndi hwa wowa e èembè ya eembe hwe e wurzana hwewoka rzi hwa e rzɛlɛ aŋga.

¹² Nànù mɛnɛ ndi Yerzù mɔ̀ hvɛ à mà tàke rzìi a ŋwèeyà o èwoka ya e ŋgawo ya e mbowà aŋga nanù màyija ma eni ma gbèeyà hwatò hwa hwɛ worzaŋgi.

¹³ Irzɔ hvɛ rzɔ i hwɛnì lì mò ɛndeya o èwoka ya hwèlìyelì aŋga nanù irzɔ i hwɛnɛ erzambo ema à mà luwe.

¹⁴ Jɛ̀ɛ̀ ɛndɛ lì mo ùŋmànɛ̀lɛ̀ aŋga èhwanja irzɔ i rza ohvì mbowà ya mòlìkɛ̀ anù rze ya mɔ̀nyɛ̀. Ndi inyɛ je ika mèèmà me arzu o e mbowà ema è hwɛnì lì jà o worzo.

¹⁵ Inyɛ̀ ì kanɛ̀ Lohwɛ̀ nanù mɛnɛ, lì akeyà nà Yerzù. Inyɛ̀ lì kanɛ̀ la arzu lì hwɛ nàa jàhwèyà ema i ŋgbà Lohwɛ̀. Inyɛ̀ je ɛndɛ rzìi ja a ohwa nanù ema mɔ̀ ndi à hwèlì e Rzàŋgo.

¹⁶ È rzi hvoŋga hvɛ o lì gbeyà gbamù, na o lì òŋgòwàna hwahvɛhvɛ hwatò ema hwa hwèlì o lìtake. Tɔ̀ mamɛ ema mòtò a ohvi inyɛ a e gbeyàne o lì oŋgowàna mɔ̀kɔ na ɔ̀nɛyi. Màhweyà manù ema mà lìŋgìrzɛ Lohwɛ̀.

¹⁷ È hweyàne hwatimbelì hwa anyu. È gbeye hvɛ mamɛ ema hwa ohwi nanù ema e gbeye. Èwòlò ya awu e hwèlì ndi o lì e ɔŋgeya. Wɔ̀ hvɛ ndi hwa hwɛnì lì ohweyà Lohwà nɛ hwa e ɔŋgeya. È hwa ŋgbe ehvolo ò lì gbeyà nanù na mɔ̀nyɛ̀ŋgì rzeketɛ na hwetàtò. Hwenè hweyà hwe arzɛ hwe rzà jo jàneyà tɔ̀ mɔ̀rzɛ̀ŋgì.

¹⁸ È jo kanɛ̀lɛ̀lɛ̀ èhwanja màlùtèyà ma arzu ma rzaŋgi, ndèŋgànɛ̀lɛ̀ hvɛ irzɔ ja arza lì lìya na èluhwe o tɔ̀ ima eyà ema i gbeyà.

¹⁹ O tɛ̀ɛ̀tɛ̀ɛ, je e rzorzomeya nanù ema e jo kanɛ̀lɛ̀lɛ̀ aŋga nanù Lohwɛ̀ a gbeyà na jà karzi-karzi o lì hwɛ na inyɔ.

Màkànɛ̀ ma lìrzùkù

²⁰ O eŋgànɛ̀lɛ̀ rzɔ, Lohwɛ̀ ndi à ŋgba hwatò ɛ̀yɔ̀lɛ̀, ndeŋgànɛ̀lɛ̀ mɔ̀ ndi à hvùmùlɛ̀ Yerzù, e Rzàŋgo ya arzu. Yerzù mɔ̀ à hwèlì e Mɔ̀ŋgèlì ema e imbami wa Mɛ̀lɛ̀ŋgù ema hwà mà gbeyànɛ màyija ma eni o lì gbeyà lì emeyà la mòlìkɛ̀ o ìtììtènì ja ama Lohwɛ̀ na mɛ̀ɛlɛ̀ŋgù me eni.

²¹ Imba nà kanɛ̀ nanù ema Lohwɛ̀ à yè gbèèyè ò lì wòŋgìrzɛ̀nɛ̀ ò lì gbeyà hweyà hwe arzɛ ema mɔ̀ à arza nanù ema è gbèèyè ndeŋgànɛ̀lɛ̀ è ohve è nyɔ̀ŋgi yà lì gbeyà hweyà ema hwe hvomɛ̀nɛ̀. Yerzù à hwèlì à è oŋgowàna ò lì gbeyà hweyà ema hwe lìŋgìrzɛ Lohwɛ̀. Èluhwe è hwɛ nà Yerzù Krirztò ò gbìndèyà nà ò gbìndèyà. Inyɛ̀ wò lìya nanù.

Hweyohwèlì hwe lìrzùkù

²² Ìi wònyànyàŋgo hwa ami, na e atɛkɛyi nanù ema, e òkànèyà manù màyòwà kɔ̀yi-kɔ̀yi. Ène kààtì ema na e tìleya e rza wahwi.

²³ Nà arza ema e hwiye ema ŋmanyàŋgo wa arzu Tìmòtì, à mà ulɛ̀hwɛ o ndawò ya hwèwòwà. A no ùŋmànɛ̀lɛ̀ tɛ karzi-karzi je e jèeya.

²⁴ È kɔmè hwatimbelì hwa anyu hwa arzɛ, nà hwatò hwa arzɛ hwa ama Lohwà. Hwatò hwa Lohwɛ̀ ema hwa uwɛ̀lɛ̀lɛ̀yi o Itàlì wɔ̀ hvɛ hwa e omelì ikɔ̀mi.

²⁵ Inyɛ̀ e ndèli ya ama Lohwɛ̀ è hwɛ nà inyɔ hwa arzɛ.