Hibrù 12 - Mokpwe: Bakwery (New Testament)

Lohwɛ̀ a hwèlì ndi Tatɛ̀ hwa arzu

¹ Nà oma, ŋgìndì ndɛnɛ ya mboŋgi e jo toŋgi, inyɛ i hvàke tɔ̀ ima lìtumba la eyà ya wòhwe ema e jo kakumɛ̀nɛyi. Inyɛ̀ i hwàŋge hvɛ lìhwaŋgi ema lì jo hwèlì o worzo na lì àjùlɛ̀.

² Ì rzòkɛ̀ ndi Yerzù mììrzɔ̀ mà arzu. Èhwanja mɔ̀ ndi à hwèlì è mɔ̀ ema à jò timba ò lì hwɛnɛ lìlòkɛ̀. À mà èmeyà ò lì ŋwa è kpèelì yà ìrzɔnì ò mbarza ndeŋgànɛ̀lɛ̀ à rzi wòwè iŋgi ìrzɔnì nàa tɔ̀ eyà aŋga nanù mɔ̀ à luwa mɔ̀nyɛ̀ŋgì ema Lohwɛ̀ à mò ùtelì. Ò èŋgànɛ̀lɛ̀ eŋge è mà gbeyà ema a lìyà ò lìya là mòmɛ̀ ò mbòkò yà lìkànèyà là ama Lohwɛ̀.

³ È lùtèyà nɛ Yerzù à mà emeyà lì taka o màà mà hwatò hwa wòhwe ema hwà mà mo kɔwu. È ɔ̀ŋgɛ̀lɛ̀ lìŋgi lìtake aŋga nanù inyɔ e rza ɔ̀tɔ̀ na lì kpa ŋmèma.

⁴ È njuma ema e ana o lì jànà wòhwè o lìrzùkù, e rzi uka lìmɛni ema hwa tànɛyi lì e oŋwa.

⁵ È rzi hvoŋga e mbɔrzi ema Lohwɛ̀ à mà gbeyàne o lì ètìrzɛ̀ mèèmà me anyu na oma a me hwɛlɛ nanù ema hwàanà hwa eni. A ma ohwa nanù ema, “È ŋmanà wa ami, Lohwɛ̀ a o lomèlì tɛ o wòhwe ema o gbèyi, o rzi kpa ŋmèma a o lomèlì tɛ.

⁶ O hwiye nanù ema Lohwà a lìŋgàni e mɔ̀ ema a lomeya. A kɔ̀kìrzɛ̀ tɔ̀ njɛnɛ a woo nàa e ŋmanà wa eni.”

⁷ È àjùlɛ̀nɛ̀ eŋge kɔ̀kìrzɛ̀ èhwanja e uŋmɛ̀lɛ̀ nanù ema Lohwà à mà e wowa nàa hwàanà hwa eni. Ima ŋmanà a hwèlì e ma e rzàŋgo ya eni e rza mo kɔ̀kìrzɛ̀ o wòhwe ema a gbèyi e?

⁸ È rza kɔ̀kìrzɛ̀hwɛ̀ tɛ o wòhwe ema e gbèyi nàa hwàanà hwa ama Lohwɛ̀ hwa kɔ̀kìrzɛ̀hwɛ̀ eŋge e uŋmɛ̀lɛ̀ ndi nanù ema e rza enje hwàanà hwa jɔ̀kɛ̀ hwa ama Lohwɛ̀. Nànù oma e hwèlì ndi hwàanà ema hwa ŋyààhwì o tenì ya àkpàlà.

⁹ Irzàŋgo ja arzu ja anu rze ya mɔ̀nyɛ̀, hwà mà jo kɔ̀kìrzɛ̀ lì hvomɛ̀nɛ̀ wòhwe ema i ma gbèye ndèŋgàna i hwa ŋgbà èluhwe. O eŋgànɛ̀lɛ̀ rzɔ ja àŋgàmɛ̀nɛ̀ o lì ŋgba Tatɛ̀ hwa arzu ema a hwèlì o ŋmanyu ya Lohwà èluhwe lì aka nanù aŋga nanù i hwɛ lòŋgɛ.

¹⁰ I rzàŋgo ja arzu ja anu rze ya mɔ̀nyɛ̀ ima jo kɔ̀kìrzɛ̀ o ŋmanà hvoka hvonda na oma wɔ̀ hwà mà lìŋgàne. Ndi Tatɛ Lohwɛ̀ a jo kɔ̀kìrzɛ̀ ema i hwɛnɛ lòŋgɛ la wòtani nà mɔ̀.

¹¹ È hvonda ema i kɔ̀kìrzɛ̀hwɛ̀, e hwèlì ndi e hvonda ema i hweyà mòrziyò ndèŋgànɛ̀lɛ̀ hvɛ i rza ohva mɔ̀nyɛ̀ŋgì. Ndi o mburzà hvonda, hwaŋga ema hwà mà kɔ̀kìrzɛ̀hwɛ̀, hwa lùwa etàŋgì ema e hwèlì ndi lòŋgɛ la ɛ̀yɔ̀lɛ̀ na e laa ehve-ehve.

¹² O èŋgànɛ̀lɛ̀ màà mà anyu ema mà ma ɔ̀tɔ̀, e me ɛmbɛ. È rzi inyɛ meende me anyu me a nyiŋga o rze.

¹³ È rzɛ̀ŋgɛ̀nɛ̀ e njiya ema e hwɛnì lì akeyà, aŋga nanù e wɔ̀ ema hwa hwèlì mboko hwa lùwa etembe hwa timba hvɛ lì wɔ̀wìrzɛ̀hwɛ.

Èkeka ya lì hweyàna Lohwɛ̀

¹⁴ È keke e hwɛnɛ ɛ̀yɔ̀lɛ̀ na hwatò hwa arzɛ na lì lìya lòŋgɛ la wòtani, èhwanja hwaŋga ema hwa rza nɔ̀ŋgɔ lòŋgɛ la wòtani hwa rza o ɛnɛ e Rzàŋgo.

¹⁵ È aŋgòwa, nanù ema tɔ̀ mòtò tɔ̀ mɔ̀kɔ a rza o hvònda lì lùwa ììlì ja ama Lohwɛ̀. È aŋgòwa tɔ̀ mɔ̀kɔ hwa anyu a rzi hwɛ nàa mbota ya wòhwe ema e oŋgi tɛ e jànà ndùtù rzìi e hvaŋga ihvɛhvɛ mbota.

¹⁶ È àŋgàmɛ̀nɛ̀yi lì ɛnɛ nanù ema tɔ̀ mɔ̀kɔ wa anyu a rza hwɛnɛ lòŋgɛ la mòrzònje, ndèŋgàna e rzi gbeyà hweyà nàa hwatò ema hwa rza ohvɛ tɔ̀ eyà o lì gbeyà na Lohwɛ̀, nàa Èrzàwù à mà gbeye. Èrzàwù à mà àhwirzɛ̀ è wònjà ya eni nàa e molulu wa ŋmanà wa mùnyanà o nyòla lìhvurzu la mòlelì.

¹⁷ È hwi nanù ema, Èrzàwù à mà arza nanù ema rzaŋgɛ a mo nàmìrzɛ̀, ndi rzaŋgɛ a rzi imanɛlɛ o lì mo nàmìrzɛ̀. Li atiyɛ la eni lì ma tɔ̀ɔlɛ̀ o lì tikowa mamɛ e ma loma lì gbeyàhwa, tɔ̀ nɛ mɔ̀ à mà rzòrzòmèyà nà mirzɔ̀lì.

¹⁸ Inyɔ e hwiye nanù ema èki ema e tɛmi nàŋgɛ e hwèlì ndi o worzo wo ama Lohwɛ̀. È rza tɛmi ndi nàa hwatò hwa Irzàyɛ̀lì ema hwà mà tɛ̀mɛ̀ o lì kombɛnɛ e hvàko ya Rzìnàyì ema mùnya ema mo imbami mo ma hwɛ lì wurza o ŋmanyu. Nà oma hwà mà tɛ̀mɛ̀ aŋga o ma hwɛ jììtìti ema i ma hwa ŋgba wɔ̀ŋgɔ̀, rzìi wùùnya wo ma inda rzi muulì mondɛnɛ mo ma aka.

¹⁹ Hwà mà hweyà rzehwa ema e ma tòŋga na ŋginyà rzìi hwa hweyà lìlo. Hwà mà oka wɔ̀ŋgɔ̀ rzayi-rzayi. Hwà mà rzorzomeya Lohwɛ̀ nanù ema, a rzi ohwa hvɛ tɔ̀ eyà.

²⁰ Hwà mà rzorzomeya Lohwɛ̀ èhwanja mamɛ ema à mà hwa ohweyà o lì gbeyà e ma hwa òkìrzɛ̀ wɔ̀ŋgɔ̀ rzayi-rzayi. Lohwɛ̀ à mà ohwa nanù ema, “Tɔ̀ yoma e rzi tɔ̀tɔ̀ liya o ene hvàko. Tɔ e hwɛ ndi nanù ema èembè e tɔ̀ti eŋge hvàko, e ùŋmahwa na màŋyàyi natɛ̀ɛ e ŋwa.”

²¹ Hweema ema hwà mà ɛnɛ hwe ma gbeyà hwà mà ohva wɔ̀ŋgɔ̀ rzayi-rzayi. Wɔ̀ɔŋgɔ̀ wo ma lɛmbɛ tɔ̀ Morzè mɔ̀ ŋmìti. A ma ohwa nanù ema, “Wɔ̀ɔŋgɔ̀ wo no tumìrzɛ̀ mòkambiya!”

²² Ndi inyɔ e ma jà ndi o lì kombɛnɛ e hvàko ya Rzayɔ̀nì. È ma jà o e mbowà ndɛ̀nɛ ya ama Lohwà ema lì hwèlì lòŋgɛ. Èŋge mbowà e hwèlì ndi Jèrurzalɛ̀mù ema e hwèlì o ŋmanyu. Rzayi-rzayi ja aŋgèlì i ma arzàŋgànɛ̀ o tenì na mɔ̀nyɛ̀ŋgì.

²³ Inyɔ̀hvɛ e ma jà ndi o la arzàŋganɛ la hwàànà hwa worzò hwa ama Lohwɛ̀, wɔ̀ ema mìinà ma awu ma tìlahwì o ŋmanyu yà lohwà. È ma jà o ma Lohwɛ̀ ema mɔ̀ ndi à hwèlì e mòkayìrzèlì wa hwatò hwa arzɛ. Inyɔ e ma jà o ìtììtènì ja hwèlìŋgɛ̀ hwe hwatò hwa ehve-ehve ema Lohwɛ̀ a emelì.

²⁴ Inyɔ e ma jà oma Yerzù mɔ̀ ema a tɛmi o ìtììtènì ja hwatò na Lohwɛ̀ na yòombò e hvènya. Inyɔ e ma jà nàŋgɛ o ma Yerzù a hwèlì lì e hvahva màyija ma eni. Maŋga màyija ma mà jo ŋgba ndèli lì aka màyija ma ama Abɛ̀lì.

²⁵ È hwɛnì lì aŋgòwa, nanù ema e rzi ndinda mamɛ ema Lohwɛ̀ a e ohweyà. Hwatò ema hwa rzi hweyàne e mòtò ema Lohwɛ̀ à mà ike o rze o lì kòkòwɛ̀lɛ̀ hwatò hwà mà kɔ̀kìrzɛ̀hwɛ̀. Nà oma hwà mà kɔ̀kìrzɛ̀hwɛ̀, nanù ndi irzɔ hvɛ jo ò kɔ̀kìrzɛ̀hwɛ̀ i rza hweyàni tɛ màyòwà ema mà uwɛ̀lɛ̀lɛ̀yi o ŋmanyu ya Lohwà.

²⁶ O èŋge hvonda ema Lohwɛ̀ à mà ohwe o hvàko ya Rzìnàyì, lìlo la eni lì ma nyìŋgìrzɛ̀nɛ̀ e rze ya arzɛ. Ndi o nàŋgɛ a gbèyi lì hvɛhvɛ lì kàkɛ̀nɛ̀ nanù ema “Nà rza o nyìŋgìrzɛ̀nɛ̀ ndi e rze ya mɔ̀nyɛ̀ mɛnɛ, ndi na nyìŋgìrzɛ̀nɛ̀ hvɛ hwèkòmè ema hwe hwèlì o ŋmanyu yà lohwà.”

²⁷ Nà oma à mà ohwe nanù ema, “Nànù mɛnɛ,” e jo uŋmɛ̀lɛ̀ nanù ema Lohwɛ̀ a o ulɛ hwèèmà hwe arzɛ ema hwe ma nyiŋga o rze. Hweŋge hwèèmà hwe hwèlì ndi hwèèmà ema à mà wèkè. A o gbeyà nanù aŋga nanù hwèèmà ema hwe rza o nyiŋga hwe o lìiya.

²⁸ Kanatɛ irzɔ ima ŋgbàhwe lìkànèyà ema lì rza nyiŋgirzɛhwɛ. Inyɛ̀ irzɔ i ŋgbe Lohwɛ̀ jeka na lì mo kanɛ̀ nyayi ema e mo lìŋgirzɛ. Inyɛ̀ je e gbeye na wɔ̀ŋgɔ̀ na èluhwe ya arzɛ.

²⁹ Nà e jɔ̀kɛ̀ Lohwà la arzu a hwèlì ndi nàa mùnya ema mo rzɛlɛ hweemà hwe arzɛ.