Hibrù 11 - Mokpwe: Bakwery (New Testament)

Lilòkɛ̀

¹ Lilòkɛ̀ lì hwèlì ndi o lì ika ŋmèma mo aŋgɔ̀ nanù ema o hwɛni lì lùwa mamɛ ema o arza ndèŋgàna o e luwa. O hwi na e jɔ̀kɛ̀ nanù ema hwèèmà ema o rza ɛni hwe hwèlì aŋga.

² Lìlòkɛ̀ ema hwatò hwa kòhwàa, hwà mà lòkɛ̀ Lohwɛ̀ lɔ ndi lì ma gbeyà nanù ema Lohwɛ̀ à mà ohve mɔ̀nyɛ̀ŋgì na wɔ̀.

³ Lìlòkɛ̀ lɔ ndi lì jo gbeyà o lì rzɔŋgìtɛ̀nɛ̀ nanù ema e mbɔrzi ya wàna yɔ ndi Lohwɛ̀ à mà gbeyàne o lì weka e rze. O eŋgànɛ̀lɛ̀ rzɔ hwèèmà ema irzɔ ja ɛnɛ na mììrzɔ̀ ma arzu hwe e uwɛ̀lɛ̀lɛ̀yi ndi o yoma ema irzɔ i rza ɛni na mììrzɔ̀ ma arzu.

⁴ O lìlòkɛ̀ ndi Abɛ̀lì à mà ŋgbe Lohwɛ̀ làhweyà la gbamù, ema lì ma aka lìŋgi ema Kèyini à mà ŋgbe Lohwɛ̀. Liŋgi lìlòkɛ̀ lɔ ndi lì ma gbeyà ema Lohwɛ̀ à mà mo òkane mɔ̀nyɛ̀ŋgì nàa mòtò ema a gbèeyà hweyà ema hwe hvomɛ̀nɛ̀yi. Ène eyà e ma awuŋmɛ̀lɛ̀ na oma Lohwɛ̀ à mà emeyà làhweyà la ama Abɛ̀lì. Lìlòkɛ̀ ndi lì ma gbèya ema tɔ̀ nɛ Abɛ̀lì mɔ̀ à mà ŋwɛɛ, ndi à hwèlì lì ohweyà hwatò hweyà.

⁵ O lìlòkɛ̀ ndi Ènɔ̀kù à mà wowahwe o lìni lòŋgɛ e rzi hwɛ lì akeyà kpelì. A rzi ɛnɛhwɛ hvɛ èhwanja Lohwɛ̀ à ma mo wowa o ŋmanyu. Eyà ya Lohwà e ohwi nanù ema ndèŋgàna Lohwɛ̀ a e mo wowa o ŋmanyu, à mà hwɛ lì gbeyà hweyà ema hwe mà òkìrzɛ̀ Lohwɛ̀ mɔ̀nyɛ̀ŋgì.

⁶ Mòtò a rza ohvi tɛ lìlòkɛ̀ a rza tànɛyi a òkìrzɛ̀ Lohwɛ̀ mɔ̀nyɛ̀ŋgì. Èhwanja tɔ̀ njɛnɛ ema a arza o lì jà o lì kombɛnɛ Lohwɛ̀ a àŋgàmɛ̀nɛ̀yi lìlòkɛ̀ nanù ema Lohwɛ̀ a hwèlì. Ndèŋgana a lòkɛ̀ nanù ema Lohwɛ̀ a taŋgeya hwatò ema hwa arza lì mo nɔ̀ŋgɔ o mburza.

⁷ Lìlòkɛ̀ ndi lì ma gbeyà ema Nowà a hweyàne Lohwɛ̀ na oma Lohwɛ̀ à mà mo òhweyà hweyà ema hwe o gbèyɛ̀nɛ o hvonda ema e o jɛ̀ɛ̀. Tɔ̀ nɛ o eŋge hvonda mɔ̀ à rza ɛnɛ hweŋge hweyà na mìirzɔ̀ ma eni, ndi mɔ̀ à mà gbeyà hweŋge hweyà ema Lohwɛ̀ à mà mo òhweyà ema a gbeye. A ma oŋga wɔ̀lɔ wo ndɛnɛ. O tenì ɔ̀ndi mɔ̀ à mà kpeyaneya lìtumba la eni la arzɛ ndèŋgàna wɔ̀ hwà mà rzùŋgàhwa e hvonda ema màlìhwà ma mà onde e rze ya arzɛ rzìi hwèèmà hwe arzɛ hwe inda. Nà oma Nowà à mà gbèyi nanù e ma awuŋmɛ̀lɛ̀ nanù ema hwatò hwa arzɛ hwa e rze ya mɔ̀nyɛ̀ hwà mà hwɛ wòhwe. Ndi lìlòkɛ̀ ema Nowà à mà hwɛnɛ lì ma gbeyà ema Lohwɛ̀ a mo wowa nàa mòtò ema a tɛmi ehve-ehve.

⁸ Lìlòkɛ̀ lɔ̀ ndi lì ma gbeyà ema Abràhamù a hweyàne Lohwɛ̀, e hvonda ema Lohwɛ̀ à mà mo òhweyà ema a anjiya o e mbowà ema à mà lìya lì ɛ̀ndɛ lì lìya o ehvɛhvɛ èki ema mɔ̀ à mà mo rzekeya ema a lìye. A ma hweyàna Lohwɛ̀, rzìi a ɛ̀ndɛ, tɔ̀ nɛ mɔ̀ à rzìi hwiye èki ema à mà hwɛ lì ɛndɛ.

⁹ Lìlòkɛ̀ lɔ ndi lì mà gbeyà nanù ema mɔ̀ à ɛndɛ o erzòokà ema Lohwɛ̀ à mà mo kàkɛ̀nɛ̀ nanù ema a mo ŋgbà. A ma hwɛ ndi àŋga nàa ŋmɛ̀ni. Irzàkì nà Jèkɔ̀bù wɔ̀hvɛ hwà mà lìya ndi o tenì ya mawondo. Lohwɛ̀ à mà hwa ohweyà molemilemi mo eyà ema à mà ohweyà Abràhamù.

¹⁰ Abràhamù à mà hwɛ ndi lì lìya o mawondo ò lì ambɛlɛlɛ e hvonda ema a o lìya o mbowà ndɛnɛ ema Lohwɛ̀ mɔ̀ ŋmìti à mà woŋgirzɛnɛ na lì oŋga la mɔ̀nɔ̀ŋgɔ̀ ema mo eti.

¹¹ Lìlòkɛ̀ ndi lì ma gbeyà Rzèla ema à mà aka mokèka mo lìyalì o lì lìta lemi. A ma hwɛnɛ lìŋgi lìlòkɛ̀ èhwanja à mà lòkɛ̀ nanù ema Lohwɛ̀ a ohwi tɛ ema a gbeyà eyà a e gbeyà na e jɔ̀kɛ̀.

¹² O eŋgànɛ̀lɛ̀ rzɔ tɔ̀ nɛ Abràhamù à mà une rzayi-rzayi nyayi ema a rzi tanɛ lì ŋya ŋmanà, ndi e nyɔ̀ŋgɔ̀nì ya arzɛ e uwɛ̀lɛ̀lɛ̀yi ndi na mɔ̀. Èŋge nyɔ̀ŋgɔ̀nì e ma koka ndi nàa irzombe ja lìwòhwɛ̀ la ŋmanyu na e nyàŋga o rzàawà ya ŋmànja ema e rza tànɛyi lì aŋgahwa.

¹³ Hwàŋga hwatò hwa koohwa hwà ma hwɛnɛ lì lòkɛ̀ natɛ̀ɛ na o kpelì. Tɔ̀ nɛ wɔ̀ hwa rzi luwe hweŋge hwèèmà ema Lohwɛ̀ à mà hwa kàkɛ̀nɛ̀ nanù ema a hwa ŋgba, ndi wɔ̀ hwà mà ɛnɛ hwèŋge hwèèmà hvoohvo hwe ma hwa òkìrzɛ̀ mɔ̀nyɛ̀ŋgì. Wɔ̀ hwa rzìi hwaŋge o lì ohwa nanù ema, hwa hwèlì ndi hwàyɛ̀nì ema hwa rza ohvɛ èki ya lì lìya anu rze ya mɔ̀nyɛ̀.

¹⁴ Hwatò ema hwa ohwa ini nyayi ja hweyà e uŋmɛ̀lɛ̀ ndi nanù ema hwa arza ndi e ya awu èki.

¹⁵ Hwà mà hwɛ tɛ lì lùtèyà èki ema hwà mà uwɛ̀lɛ̀lɛ̀yi, oma hwà mà lùwa hveyo ò lì tìmba.

¹⁶ Ndi tɔ̀ nanù hwà mà lìya o lì ambɛlɛlɛ èki ya gbamù, o èkomè ya ŋmanyu yà lohwà. O èŋgànɛ̀lɛ̀ rzɔ Lohwɛ̀ a rza ohvi ìrzɔnì nanù ema hwa mo hwɛlɛ Lòohwà la awu, èhwanja a hwa rzekelì mbowà ndɛnɛ.

¹⁷ Lìlòkɛ̀ ndi lì ma gbeyà Abràhamù à mà ŋgbe e ŋmanà wa eni Irzàkì nàa làhweyà e hvonda ema Lohwɛ̀ à mà kèkirzɛ Abràhamù. Abràhamù ndi à mà hwɛ e mɔ̀ ema Lohwɛ̀ à mà kàkɛ̀nɛ̀ ema hwàanà hwa eni hwa o koka rzayi-rzayi, lìlòkɛ̀ lɔ ndi lì ma gbeyà Abràhamù à mà woŋgirzɛnɛ o lì ŋgbà ehvowa ya eni ya ŋmanà nàa làhweyà.

¹⁸ O lì akeyà na Irzàkì ndi Lohwɛ̀ à mà ohweyà Abràhamù nanù ema, “Lì akeyà na e ŋmanà wa aŋgɔ̀ Irzàkì ndi o ò lùwa e nyɔ̀ŋgɔ̀nì ema nà mà o kàkɛ̀nɛ̀.”

¹⁹ Abràhamù a mà lòkɛ̀ nanù ema Lohwɛ̀ a hwɛni ŋginyà o lì hvùmùlɛ̀ tɔ̀ mòtò ema à mà ŋwɛɛ. O eŋgànɛ̀lɛ̀ irzɔ i tanɛ jo òhwa nanù ema Abràhamù à mà timba ndi lì luwa Irzàkì o mburza hwèhvùmùwèlì hwe e kpelì hwe ama Irzàkì.

²⁰ Lìlòkɛ̀ lɔ ndi lì ma gbeyà ema Irzàkì à mà ohwe nanù ema Jèkɔ̀bù na Èrzàwù hwa o nàmìrzɛ̀hwɛ̀ o hvonda ema è ò jɛ̀ɛ̀.

²¹ Lìlòkɛ̀ lɔ ndi lì ma gbeyà Jèkɔ̀bù e hvonda ema mɔ̀ à mà kombɛnɛ e kpelì, o lì nàmìrzɛ̀ tɔ̀ ima ŋmanà hwa ama Jòrzɛ̀hvù. A ma rzɛmeya hvɛ o motimbo mo eni o lì kanɛ̀ Lohwɛ̀.

²² Lìlòkɛ̀ lɔ ndi lì ma gbeyà ema Jòrzɛ̀hvù lìrzako ema à mà kombɛ̀nɛ̀ e kpelì, à mà ohwe à mà o hvonda ema è ò jɛ̀ɛ̀, wònya Irzàyɛ̀lì hwa o anjiya o èkomè ya Ìjiptò. Ɔ̀ndeŋgàtɛ̀ à mà hwa kòkòwɛlɛ nɛ wɔ̀ hwa àŋgàmɛ̀nɛ̀yi lì gbeyàna èembè ya eni.

²³ Lìlòkɛ̀ lɔ ndi lì ma gbeyà ema e rzàŋgo na e nyàŋgo ya ama Morzè hwà mà mo uta ŋgbɛ̀ndɛ iyàwò ò mburza hwe ŋyahwèlì wa eni. Wɔ̀ hwà mà ɛnɛ nanù ema Morzè a ondi mòlòŋgà rzayi-rzayi o eŋgànɛ̀lɛ̀ wɔ̀ hwa rza arze lì unda e mbenda ema kiŋgɛ̀ à mà akɛlɛ.

²⁴ Lìlòkɛ̀ lì ɔ̀ndi lì ma gbeyà ema, lìrzako ema Morzè à mà koke, a rza emeyà nanù ema hwatò hwa mo hwɛlɛ e ŋmanà wa mùnyanà wa ama e ŋmanà wa ŋgɔ̀ndɔ̀ wa ama kiŋgɛ̀ Hvèro.

²⁵ Mɔ̀ Morzè à mà emeyà o lì taka na hwatò hwa Irzàyɛ̀lì, lì aka o lì oka mɔ̀nyɛ̀ŋgì o tenì ya wòhwe o ŋmanà hvoka hvonda.

²⁶ Mɔ̀ à mà lùtèyà ema o lì luwa ìrzɔnì o nyòla è Mɔ̀ ema à Ɔ̀kirzɛ̀hwɛ̀yi a hwèlì mòrzàhwelì ema mo akayi mònàmɛ̀ mo arzɛ ema mo hwèlì o tenì ya èkomè ya Ìjiptò. A ma gbeyà ndi nanù èhwanja à mà hwɛ lì ambɛlɛlɛ mòrzawèlì ema Lohwɛ̀ a mo ŋgba o e hvonda ema e o jɛ̀ɛ̀.

²⁷ Lìlòkɛ̀ lì ɔ̀ndi lì ma gbeyà ema, Morzè mɔ̀ à hwɛmɛ èkomè ya Ìjiptò, e rzi hwɛ tɔ̀ lì oka hwetàtò hwe ama e kiŋgɛ̀ wɔ̀ŋgɔ̀. A ma kaka ŋmèma natɛ̀ɛ a ɛ̀ndɛ nàa e mòtò ema a ɛnɛ Lohwɛ̀ na mììrzɔ̀ ma eni ema tɔ̀ mòtò a rza tànɛyi lì ɛnɛnɛ na mììrzɔ̀ ma eni.

²⁸ Lìlòkɛ̀ lɔ ndi lì ma gbeyà ema, Morzè à mà kànèyà hwatò hwa Irzàyɛ̀lì o lì kombɛ è Ndèma yà lì Akà Ɔnɛ̀yi. A ma ohweyà hwatò ò lì tuka màyija ma hwèembè o ŋmèna-ŋmèna me mandawò ma awu, aŋga nanù e aŋgèlì ya ama Lohwà e jelì tɛ o lì oŋwa hwàanà hwa worzo, a rza oŋwa hwàanà hwa worzo hwa Irzàyɛ̀lì.

²⁹ Lìlòkɛ̀ lɔ ndi lì ma gbeyà ema, hwatò hwa Irzàyɛ̀lì hwà mà akeyà o ìtììtènì ja ŋmànja ema mo hwɛ̀lɛ̀hwɛ̀ Ŋmanja mo Teya. Hwà mà mo aka o e ɛnɛ oma hwa laala ndi mɔ̀nyɛ̀ ema mo eti na mataŋga. Ndi lìrzako ema hwatò hwa Ìjiptò wɔ̀ hvɛ hwà mà arze lì keka o lì aka, wɔ̀ hwa arzɛ hwà mà kuwa lì inda o ŋmànja.

³⁰ Lìlòkɛ̀ la hwatò hwa Irzàyɛ̀lì lɔ ndi lì ma gbeyà ema hwerzù hwe e kɔtɔ̀ ya e mbowà ya Jèrìkò hwe ma rzuhwe, na oma hwà mà làale marziya, o lì tòŋga e mbowà ndɛnɛ ya Jèrìkò mèenyà lìrzamba.

³¹ Lìlòkɛ̀ lì ɔ̀ndi lì ma gbeyà ema e molanà wa àkpàlà ema à mà hwɛ̀lɛ̀hwɛ̀ Ràhàbì a rzi ŋwɛ ehvonda ema hwatò ema hwà mà hwɛnɛ maniya oma Lohwɛ̀ hwà mà ŋwe. Ène eyà e ma gbèyɛ̀nɛ nanù èhwanja mɔ̀ à mà hwɛ à mà loma lì emeyà hwaŋga hwatò ema hwà mà ja o jututa o lì inja e mbowà, o ndawò ya eni.

³² Nà ohwa hvɛ lì uka one e? Nà rza hwɛnì hvonda o lì e ohweyà hweyà lì hvomɛ̀nɛ̀ hwatò nàa, Gìdìyɔ̀nì, Balàkì, Rzàmrzìnì, Jɛ̀hvìtà, Dàhwitì, Rzamùwɛlì na hwà-òhwèlì hwa hwèlìŋgɛ̀ hwa arzɛ.

³³ Lìlòkɛ̀ la hwaŋga hwatò lɔ ndi lì ma gbeyà ema hwà mà rzuwane hwèkòmè ema hwà mà ànane o njuma. Hwà mà hwɛ lì timba hwatò ema hwà mà hwɛ o rze ya awu o njìya ya jɔ̀kɛ̀. Ndèŋgàna wɔ̀ hwà mà luwa hwèèmà ema Lohwɛ̀ à mà ohwe nanù ema a hwa ŋgba. Hwà mà umba e wàna ya njila.

³⁴ Hwà mà lìmìrzɛ̀ meyonda. Hwà mà anjiya hvɛ o màà mà hwaŋga ema hwà mà arza lì hwa oŋwa na irzɔ̀lɔ̀. Tɔ̀ nɛ o hwewotelì hwa rzi hwɛnɛ ŋginyà, Lohwɛ̀ à mà hwa ŋgba e ŋginyà. Hwà mà hwɛ ndi hwàanèlì hwa njuma hwa ŋginyà ema hwà mà anana hwahvɛhvɛ hwàanèlì hwa njuma hwa hwehvɛhvɛ hwèkòmè ema hwe ma hwàŋga.

³⁵ Lìlòkɛ̀ la lòŋgo la hwalanà lɔ ndi lì ma hwa gbeyà o lì ɛnɛ hwatò hwa awu ema hwà mà ŋwɛɛ o lì timba o lì hwɛ o lòŋgɛ. Ndi hwahvɛhvɛ hwatò hwà mà gbiyahwa natɛ̀ɛ hwa ŋwa. Wɔ̀ hwà mà rzɔ̀rzɔ̀ o lì rzɔ̀rzɔ̀ Lohwɛ̀ aŋga nanù hwa hwà hwɛmɛ. Wɔ̀ hwà mà gbeyà ndi nanù èhwanja hwà mà hwiya ema hwa hvùmù tɛ hwa o luwa lòŋgɛ la gbamù lì aka e lɔ ema lì hwèlì o rze.

³⁶ Lòŋgò hwà mà tàkìrzɛ̀hwɛ, hwà mà lorzowahwa, ndèŋgàna hwà mà gbiyɛhwɛ. Hwanɛyi hvɛ, hwà mà rzòŋgɛ̀hwɛ̀ iŋgɔ̀kɔ̀hwì na lì ikahwa o hwèwòwà.

³⁷ Lòŋgò hwà mà àŋgbàhwà màŋyàyi rzi hwa ŋwa. Lòŋgò hwà mà kɛɛhwɛ hwèrzùŋgu hwehwakɛ. Hwà mà gbeyàna e rzɔ̀lɔ̀ o lì oŋwa lòŋgo. Hwàŋga hwatò hwà mà wɔ̀tɔ̀ ndi meyowo me mbolì rzìi hwa a lìŋgòwàna e èki ya arzɛ. Hwanu hwatò hwà mà hwɛ ndi mèlìrza me hwatò, ema me ma akeyà o lìtake, na lì luwa hvɛ ndùtù o màà mà hwàkɔ̀yèlì.

³⁸ È rzi lɔ̀wu nanù ema hwatò hwa gbamù nàa wɔ̀ hwa hwɛ o ene rze ya wòhwe. Hwà mà hwɛ ndi lì amàmìyɛ̀nɛ̀ o mèrzanjɛ̀ nà ò ihvàko, hwà mà lìya ndi o jeŋga na ihvoko.

³⁹ Lìlòkɛ̀ la hwanu hwatò hwa arzɛ lì ma gbeyà Lohwɛ̀ à mà hwa okana mɔ̀nyɛ̀ŋgì. Ndi tɔ̀ nanù, tɔ̀ mɔ̀kɔ wa awu a rzi luwe mamɛ Lohwɛ̀ à mà kàkɛ̀nɛ̀ hwatò hwa eni.

⁴⁰ È ma hwɛ ndi nanù èhwanja Lohwɛ̀ à mà loma lì woŋgirzɛnɛ nanù ema a jo ŋgba yoma ema e akayi mamɛ ema à mà ohwe nanù ema a hwa ŋgba. A ma woŋgirzɛnɛ nanù ema hwaŋga hwatò hwa hwɛni ndi o lì hwɛ gbamù mondeŋge na irzɔ o mbe eni.