Hibrù 10 - Mokpwe: Bakwery (New Testament)

Krirztò à mà aŋgbɛ mɔ̀ ŋmìti nàa làhweyà ŋgèlì hvɔ̀kɔ, o i ŋgèlì ja arzɛ

¹ Imbenda ema Lohwɛ̀ à mà ŋgbe wònyà Yudà, i rzi hwɛ tɔ̀ eyà lì ayèkɛnɛ̀ hweyà hwe gbamù ema hwe o jɛ̀ɛ̀ o worzo. Iŋgi mbenda i rza tanɛ lì jo uŋmɛ̀lɛ̀ nɛ hwèŋge hweyà hwe o hwɛ. Ŋma tɛ ipilìrzi i ŋgbà Lohwɛ̀ màahweyà. Nɛ rzɔ iŋgi tumba ja mbenda ema i ŋgbà iŋgi tumba ja màahweyà i tànɛyi lì gbeyà hwatò ema hwa kombɛnɛ Lohwɛ̀ o lì hwɛ wòtani e? I rza tànɛyi.

² È ma hwɛ tɛ nanù ema hwa rzi tànɛyi, rzeke oma hwà mà hwɛmɛ o lì ŋgbà Lohwɛ̀ màahweyà e? Hwà mà hwɛnɛ lì hwɛmɛ èhwanja hwatò ema hwà mà ŋgbà Lohwɛ̀ màahweyà wɔ̀ hwa rzi rzàŋgìrzɛhwɛ ŋgelì hvɔ̀kɔ o iŋgèlì ja arzɛ, ndeŋgànɛ̀lɛ̀ oma hwa rza atàkìrzɛ nanù ema hwa hwèlì hwa gbeyà wòhwe.

³ Ndi màŋga màahweyà ŋmitɛ-ŋmitɛ ndi ma mà ɔ̀ŋgɛ̀lɛ̀nɛ hwatò ema hwa gbeyà wòhwe ŋma tɛ,

⁴ èhwanja màyija ma nyàkà na mbolì ma rza tànɛyi lì ulɛ wòhwe wo hwatò.

⁵ Ɔ̀ndeŋgàtɛ̀ e hvonda ema Krirztò à mà jèe o rze, à mà ohweyà Lohwɛ̀ nanù ema, “Rzeketɛ màahweyà na jàhwèyà ndi o arza. Ndi o wa o no rzekelì ndi e nyo ya mòtò ema na hwɛni lì ŋgbà nàa jàhwèyà.

⁶ Hwèembè ema hwa rzɛlɛ o ètàwo ya màkanɛ̀, ndèŋgàna màahweyà ema hwatò hwa o ŋgbà o lì ulɛ wòhwe wo hwatò, ma rza o lìŋgirzɛ.

⁷ Rzìi na ohwa nanù ema, ‘Ìi Tatà Lohwà, imba o no, na woŋgirzɛnɛ o lì gbeyà na oma o arza, na oma e tìlahwì lì no hvomɛ̀nɛ̀ o e kààtì ya aŋgɔ̀.’”

⁸ Mɔ̀ à mà loma lì ohwa nanù ema, “Rzeketɛ màhwèyà na jàhwèyà ndi o arza ndeŋgànɛ̀lɛ̀ hvɛ rzeketɛ lì rzɛ̀lɛ̀ la hwèembè o ètàwo ya màkanɛ̀ o lì ulɛ wòhwe wo hwatò ndi e o lìŋgirzɛ” tɔ̀ nɛ ema hwatò hwa rzi hwɛ lì gbèeyà na oma e mbenda ya ama Morzè e àrzeyà.

⁹ Àŋga ndi à ohwa nanù ema, “Imba o no, na woŋgirzɛnɛ o lì gbeyà mamɛ ema o arza.” O eŋgànɛ̀lɛ̀ Lohwɛ̀ à mà tinda màahweyà ma mbolohwa o toŋgoŋgo aŋga nanù a timbirzɛ màahweyà ma ama Krirztò.

¹⁰ Nà oma Yerzù Krirztò à mà emeyà o lì gbeyà na oma Lohwɛ̀ a àrzeyà, o lì aŋgbɛ mɔ̀ ŋmìti nàa màahweyà, e ma jo gbeyà irzɔ hwa arzɛ o lì rzaŋga o worzo wo ama Lohwɛ̀ ŋgèlì hvɔ̀kɔ, o iŋgèlì ja arzɛ.

¹¹ Èwòlò ya ama e pìlìrzì ya wònyà Yudà, e hwèlì ndi o lì tɛ̀mɛ̀ lì ŋgbà Lohwɛ̀ nyayi hvɔ̀kɔ ya làhweyà wùnyà tɛ. Ini tumba ja màahweyà i rza tànɛyi lì ulɛ wòhwe wo hwatò.

¹² Ndi Krirztò mɔ̀ ŋmìti à mà ŋgbà màahweyà mɔ̀kɔ ema mà hwɛni e ŋginyà o lì ulɛ wòhwe wo hwatò ŋgèlì hvɔ̀kɔ o i ŋgèlì ja arzɛ. O mburza nanù rzìi a lìya o lìya la mome la ama Lohwɛ̀.

¹³ Àŋga ndi à o lìya, o lì ambɛ̀lɛ e hvonda ema Lohwɛ̀ a mo gbeyà o lì làala hwàkɔ̀yèlì wa eni na mataŋgà mà eni.

¹⁴ Èhwanja o màhwèyà mɔ̀kɔ ema mɔ̀ à ŋgbelì à mà gbeyà hwatò ema mɔ̀ à mà ulɛ wòhwe wo awu wòtani wo awu wo ma ondìrzɛ̀hwɛ.

¹⁵ Èlìŋgɛ̀ ya wòtani yɔ hvɛ e jo uŋmɛ̀lɛ̀ nanù ema e hwèlì ndi e jɔ̀kɛ̀. È ohwi nanù ema,

¹⁶ “È Rzàŋgo è ohwi nanù ema, ‘Yòòmbò ene ema nà hwɛni lì ààtɛ̀ɛ̀ ò hvonda ema è hwɛni lì jà ò worzo. Nà hwa gbeyà ò lì hwiya ì mbenda jà ami, ndèŋgàna nà hwa gbeyà ema hwa rzìi keka lì jì hvoŋga.’”

¹⁷ Rzìi à ohwa hvɛ nanù ema, “Imba nà rza ɔ̀ŋgɛ̀lɛ̀ wòhwe wò awu nà màtònà mà awu hvɛ.”

¹⁸ Lohwɛ̀ mɔ̀ à mà màa lì làkìrzɛ̀ wòhwe wò hwatò. Ò rza enje hvɛ tɔ̀ màhwèyà ema hwatò hwa hwɛni lì ŋgbà ò lì luwa lìlàkìrzɛ̀nɛ̀ ò wòhwe.

Inyɛ̀ ì jɛ̀ɛ̀ ì kombɛnɛ Lohwɛ̀

¹⁹ Ò eŋgànɛ̀lɛ̀ ìi wònyamòwè, jo òhvi e wònja o lì kpèeyà o eŋge Èki ema e Rzàŋgi lì Akà na Lìmɛ̀nì la Wòrzàŋgì.

²⁰ Yerzù à mà jo lìhvòweyà e njiya hvènya ema e jànà lòŋgɛ na oma à mà aŋgbɛ mɔ̀ ŋmìti. È nyo ya eni e gbèyi ndi nàa lìhwatu ema lì ma jo keka o lì uka èki ema Lohwɛ̀ a hwèlì.

²¹ Irzɔ jo òhvì e Pìlìrzì ema è olo ema e ɔ̀ŋgeya hwatò ò ndawò o ya Lohwà.

²² Inyɛ̀ i keke o lì ɛndɛ lì kombɛnɛ Lohwɛ̀ nà mèèmà mɔ̀kɔ na o lì mo ŋgbà mèèmà me arzu me arzɛ. Ène eyà e hwèlì ndi nanù èhwanja màyija ema Yerzù à mà kome o mbarza, mà rzaŋgirzɛ mèèmà me arzu. Mɔ̀ a timbi hvɛ o lì jo rzaŋgirzɛ na malìhwa ema mà rzaŋgi kɛɛŋgɛŋgɛ.

²³ Inyɛ̀ i lɛmbɛ lìhvìtà là arzu kɔ̀yi-kɔ̀yi, e rzi hwɛ lì nyiŋgirzɛhwɛ, èhwanja irzɔ i lòkɛ̀yi nanù ema Lohwɛ̀ ema a ohwi à mà a gbeyà mamɛ ema a ohwa nanù ema a gbeyà a e gbeyà.

²⁴ Inyɛ̀ i lùtèyà nɛ i tànɛyi lì àyètìrzɛ̀nɛ̀ mèèmà me arzu mɔ̀kɔ na ɔ̀nɛyi aŋga nanù ja alìŋgànɛ mɔ̀kɔ na ɔ̀nɛyi o lì gbeyà hweyà hwe gbamù.

²⁵ Inyɛ̀ i rza ɔ̀tɔ̀ o lì arzàŋganɛ èki yɔ̀kɔ o i hvonda ja arzɛ na oma hwahvɛhvɛ hwatò hwa gbeyà. Ndi inyɛ ja a kɔ̀mɛ̀lɛ̀nɛ mɔ̀kɔ na ɔ̀nɛyi, rzɛ̀hvɔ̀nì nàŋgɛ ema e ɛnɛ Èyu ya ama Rzàŋgo e ma kombɛnɛ.

²⁶ È hwèlì tɛ nanù ema i lìmelì ndi o lì gbeyà hweyà hwe wòhwe, ema irzɔ i ma màa lì hwiya e jɔ̀kɛ̀, tɔ̀ làhweyà tɔ̀ lɔ̀kɔ hvɛ lì rza tànɛyi lì ulɛ wòŋgo wòhwe.

²⁷ Ndi mòtò a lìmelì tɛ o lì gbeyà wòhwe, nanù oma wɔ̀ɔŋgɔ̀ ndi wo mo hwɛ o tenì nanù ema Lohwɛ̀ a mo tùulɛ̀ màaŋgo ò Wùnyà wo Hwèkàyìrzèlì. Hwa mo rzɛlɛ o tenì ya mùùnya mondɛnɛ ema mo rzɛlɛ hwaŋga ema hwa teŋgɛ̀nɛ Lohwɛ̀.

²⁸ Tɔ̀ ima mòtò ema a rza ika imbenda ja ama Morzè, rzìi hwatò hwahwakɛ tɔ̀ hwàyàwo hwa mo tɛmeya mboŋgi nanù ema mɔ̀ à rza ika iŋgi mbenda, a oŋwahwa ndèŋgàna hwa rza mo òkeya ììlì.

²⁹ Mòtò a rza wowi tɛ e Ŋmanà wà mùnyanà wa ama Lohwɛ̀ nàa tɔ̀ eyà, nanù oma mɔ̀ à rza wowi màyija ma yòòmbò ya ama Lohwɛ̀ ema mà mo gbèyi ema a hwɛ worzaŋgi nàa tɔ̀ eyà. Ndèŋgàna e hwèlì tɛ ema mɔ̀ à hwɛnyɛ Èlìŋgɛ̀ ema e jànà ndèli nɛ rzɔ e kɔ̀kìrzɛ̀ ya ama ene nyayi ya mòtò e tànɛyi lì hwɛ e?

³⁰ Ndi irzɔ i hwi è mòtò ema à mà ohwa nanù ema, “Imba ndi na hwèlì e mɔ̀ ema a o kɔ̀kìrzɛ̀ hwatò, ndeŋgànɛ̀lɛ̀ na o ò hwa tìmbirzɛlɛlɛ wòhwe ema hwa no gbèelì.” Rzìi à ohwa hvɛ nanù ema, “Rzàŋgo a o kàyìrzɛ hwatò hwa eni.”

³¹ È o hwɛ wòhwe na tɔ̀ ima mòtò ema a o kpèeyà o màà mà ama Lohwɛ̀ ema lì hwèlì lòŋgɛ o lì luwa kɔ̀kìrzɛ̀.

³² Ndi inyɔ e rzi hvoŋga na oma e ma hwɛ o hwèwotèlì ema e ma luwe ŋmàye. O eŋge hvonda tɔ̀ nɛ inyɔ e ma luwe mètàkà me ŋginyà e ma kaka mèèmà.

³³ O ma hwɛ hvonda ema hwatò hwà mà hwɛ lì e enyìrzɛ̀ na lì e tàkirzɛ o marzo ma hwatò. O manɛyi marzako hvɛ inyɔ e ma hwɛ na hwatò ema wɔ̀ hvɛ hwà mà hwɛ lì luwa iŋgi nyayi ja mètàkà.

³⁴ Inyɔ e ma hwɛnɛ mèèmà me ììlì o hwatò ema hwà mà hwɛ o hwèwòwà. Tɔ̀ nɛ hwà mà e lumbane erzàŋgo ya anyu, e ma hwɛni mɔ̀nyɛ̀ŋgì nanù mɛnɛ èhwanja inyɔ e ma hwiya nanù ema e hwɛni erzàŋgo ema e akayi eŋge erzàŋgo ema e o hwɛ̀ɛ natɛ̀ɛ na o gbìndèyà.

³⁵ O èŋgànɛ̀lɛ̀ e kakè mèèmà me anyu nanù mɛnɛ èhwanja eŋge ndi e gbeyà ema Lohwɛ̀ a e ŋgbà etàŋgì ya ŋginyà.

³⁶ È hweni ndi o lì àjùlɛ̀, aŋga nanù e gbeyà ndi na oma Lohwɛ̀ a àrzeyà, ndèŋgàna inyɔ e lùwa mamɛ ema Lohwɛ̀ a kàkɛ̀nɛ̀ nanù ema e luwa.

³⁷ È tìlahwì o e kààtì ya ama Lohwà nanù ema, “O ŋmanà hvonda, e mɔ̀ ema à hwɛni lì jà a o jà, o rza wowa hvonda.

³⁸ Ndi hwatò hwa ami ema hwa hwèlì ehve-ehve, hwa hwɛnì lì hwɛ lòŋgɛ èhwanja hwa lòkɛ è mbɔrzi yà ami. Ndi tɔ̀ njɛnɛ ema à ò tìmbeyà ò mburza, nà rza ò òka mɔ̀nyɛ̀ŋgì nà mɔ̀.”

³⁹ Ndi irzɔ ì rza enje ndi nàa hwaŋga ema hwa timbeya ò mburzà rzi hwa wɔ̀lɛ̀nɛ̀. Ndi ì hwèlì ndi hwaŋga ema hwa lòkɛ̀yì Lohwɛ̀ rzi hwa oŋgìrzɛ̀hwɛ.