Hibrù 1 - Mokpwe: Bakwery (New Testament)

Lohwɛ̀ a òhwìrzɛ̀nɛ̀ hwatò lì akeyà na è Ŋmanà wà eni

¹ Ò màrzalɛ Lohwɛ̀ à mà òhwìrzɛ̀nɛ̀ ì mbamba jà arzu jà kòhwà nyayi nà nyayi jà ŋgelì nà rzayì-rzayì jà mà njiya lì akeyà nà hwà-òhwèlì hwa hwèlìŋgɛ̀.

² Ndì ò mene mèènyà me lìrzùkù rzɔ, Lohwɛ̀ à jò òhwìrzɛ̀nɛ̀ ndi lì akeyà nà è Ŋmanà wà eni. Lì akeyà nà mɔ̀ ndi Lohwɛ̀ à mà wèke è ŋmanyu yà lohwà nà rze yà mɔ̀nyɛ̀. Ndeŋgànɛ̀lɛ̀ mɔ̀ ndi Lohwɛ̀ à hvɔ̀rzì nanù ema a hwɛni ewèkèlì ya arzɛ ema Lohwɛ̀ à mà wèkɛ.

³ Oŋgo Ŋmanà ndi à hwèlì ŋmɛ̀ɛ̀nɛ̀nì mò ŋmàye mò ama Lohwɛ̀, ndèŋgànɛ̀lɛ̀ mɔ̀ ndi à jò uŋmɛ̀lɛ̀ njɛnɛ Lohwɛ̀ à hwèlì nà è jɔ̀kɛ̀, à hwèlì ndi nyàyi hvɔ̀kɔ nà oma Lohwɛ̀ mɔ̀ hvɛ à hwèlì. Màyimbì mà hweyà hwe ama oŋgo Ŋmanà, hwe mà gbeyà hweyà hwe arzɛ hwe ɛndɛ ndi ò worzo nà oma hwe àŋgàmɛ̀nɛ̀yi lì hwɛ. Nà oma mɔ̀ à jò hvɔ̀ɔ̀tì ò wòhwe, mɔ̀ à mà jò gbeyà nanù ema i hwɛ wòtani. Ò mburza nanù à mà lìya ò lìyà là momɛ̀ là ama Lòohwɛ̀ ema lì kàrzàmi ò ŋmanyu yà lohwà.

È Ŋmanà wà ama Lohwɛ̀ à akayi i aŋgèlì

⁴ O èŋgànɛ̀lɛ̀ rzɔ̀ è Ŋmanà wà ama Lohwɛ̀ à akayi i aŋgèlì. Nyayi hvɔ̀kɔ hvɛ nà lìinà là eni là èluhwe ema Lohwɛ̀ a mo ŋgbelì lì ɔhvɛ lì akayi mìinà mà i aŋgèlì.

⁵ Ò eŋgànɛ̀lɛ̀ rzɔ Lohwɛ̀ à rza ohweyà tɔ̀ aŋgèlì yà eni hvɔ̀kɔ nanù ema, “Ò wà ndi ò hwèlì è Ŋmanà wà ami, yawònò, nà hwèlì ndi Tatɛ̀ wà aŋgɔ.” Lohwɛ̀ à rzi ohweyà tɔ̀ aŋgèlì tɔ̀ hvɔ̀kɔ nanù ema, “Nà ò hwɛ è Tatɛ̀ wà eni, mɔ̀ hvɛ à ò hwɛ è Ŋmanà wà ami.”

⁶ È hvonda ema Lohwɛ̀ à mà arze ò lì oma è Ŋmanà wà eni wà worzo ò ene rze à mà ohwa nanù ema, “Inyɛ̀ i aŋgèlì jà ami ja arzɛ i mò kanɛ̀.”

⁷ Ndi Lohwɛ̀ à mà ohwà lì hvomɛ̀nɛ̀ i aŋgèlì nanù ema, “A ma gbeyà i aŋgèlì ja eni i hwèlì ndi nàa yùlulì. Iŋgi aŋgèlì ema i hwèlì hwàgbèèlì hwa eni, mɔ̀ à mà hwa gbeyà hwà mà hwɛ ndi nàa mùnya ema mo oŋwà.”

⁸ Ndi Lohwɛ̀ à mà ohwa lì hvomɛ̀nɛ̀ e Ŋmanà wà eni nanù ema, “Ìi Lohwà, lìkànèyà la aŋgɔ, lì o hwɛ o gbìndèyà na o gbìndèyà. O ò kànèyà hwatò hwa aŋgɔ nyayi ema e hvomɛ̀nɛ̀.

⁹ O wa o lìŋgàni mamɛ ema e hvomɛ̀nɛ̀yi, ndèŋgàna o kɔwu hvɛ mamɛ ema e rza hvomɛ̀nɛ̀. Ɔ̀ndeŋgàtɛ̀ Lohwɛ̀, Lòohwà là aŋgɔ̀, à o hvɔ̀rzì o lì hwɛ wòlìto lì aka hwatò hwa arzɛ ema inyɔ na wɔ̀ e hwèlì, ndèŋgànɛlɛ a o hvɔ̀rzì o wa o lì oka mɔ̀nyɛ̀ŋgì lì aka hwatò hwa arzɛ ema inyɔ na wɔ̀ e hwèlì.”

¹⁰ Lohwɛ̀ rzìi a ohwa hvɛ nanù ema, “Ìi Rzàŋgo, o wa ndi o ma weka e rze o hwewòtelì, ndèŋgànɛ̀lɛ̀ e ŋmanyu yà lohwà hvɛ e hwèlì ndi èki ema o weki na màà mà aŋgɔ.

¹¹ Hweŋge hwèemà hwe arzɛ hwe o kùwa, ndi o wa, o ò hwɛ natɛ̀ɛ na o gbìndèyà. Hweŋge hwèèmà hwe arzɛ hwe o kɔ̀rzɔ̀ na lìhwatu.

¹² O hwe nika ndi na oma hwa nika mòŋgombe, ndèŋgànɛ̀lɛ̀ o ò hwe tikowa ndi na oma hwa tikowa mààtu. Ndi na o wa, o eleyà ndi nanù mɛnɛ, ndèŋgànɛlɛ lòŋgɛ la aŋgɔ̀ lì rza kuwa.”

¹³ Lohwɛ̀ a rzi ohweyà tɔ̀ aŋgèlì tɔ̀ hvɔ̀kɔ nanù ema, “Liya anù o mɔ̀ɔ mo ami mo mome natɛ̀ɛ na e hvonda ema na gbeyà rzìi o yàaya hwàkɔ̀yèlì hwa aŋgɔ na matàŋgà mà aŋgɔ.”

¹⁴ Hwa njɛnɛ rzɔ hwa hwèlì i aŋgèlì e? Rzeke hwa hwèlì ndi hwèlìŋgɛ̀ ema hwe gbèeyà Lohwɛ̀ e? Ndeŋgànɛ̀lɛ̀ Lohwɛ̀ à mà hwa oma o lì oŋgowàna hwatò ema hwa o luwɛ lìrzùŋgàhwa.