Gàletìyà 6 - Mokpwe: Bakwery (New Testament)

Tɔ̀ Mamɛ ema Mòtò a oni, yo ndi à Rzàŋgà

¹ Ìi wònyàmòwè kòkò, e hwèlì tɛ nanù ema mɔ̀kɔ wa anyu a undi o tenì ya wòhwe, inyo ema e hwèlì lì gbeyà mamɛ ema Èlìŋgɛ̀ ya Lohwà ya arza, e àŋgàmɛ̀nɛ̀ lì mo ulɛ o tenì ya wòhwe. È mo oŋgòhwànà tɛ, e mo òŋgowane na lì àjùlɛ̀. Ndi e hwɛni lì aŋgowa inyo hwiti e rza kpa o màkèkìrzɛ̀nɛ̀ o lì gbeyà woŋgo wòhwe.

² È a oŋgowanɛ mɔ̀kɔ na ɔnɛ̀yi o lì anjiya o tenì ya ndùtù. È gbèyi tɛ nanù, o ma e ma ika imbenda ja ama Krirztò.

³ Tɔ̀ ima mòtò ema a lùtèyà nanù ema mɔ̀ ndi à hveti, a à lukɛlɛ ndi mɔ̀ ŋmìti. Èŋge tumba mòtò e rza enje tɔ̀ mòtò.

⁴ Tɔ̀ ima mɔ̀ wa anyu àkàyìrzɛ̀ hwègbèèlì hwe eni mɛnɛ. Mòtò a gbèyi tɛ eyà ema e lɔ̀wu, mɔ̀ ŋmìti a oka mɔ̀nyɛ̀ŋgì. Ndèŋgana a rza a kitirzɛnɛ mɔ̀ ŋmìti na hwahvɛhvɛ hwàtò.

⁵ Nà ohwa ndi nanù èhwanja hwègbèèlì hwe tɔ̀ ima mòtò, hwe mo ɔ̀ŋgɔ̀ ndi mɔ̀.

⁶ Tɔ̀ ima mòtò ema a okolɛhwɛ Eyà ya Lohwà, a àŋgàmɛ̀nɛ̀ lì ŋgbàà tɔ̀ mamɛ ya gbamù ema o òhvi o lì oŋgòwànà e mòòkòlèlì wa eni.

⁷ È rza alukɛlɛ inyɔ hwiti. Tɔ̀ mòtò a rzi keka lì ɔ̀ŋgɛ̀lɛ̀ nanù ema a tanɛ a lukɛlɛ Lohwɛ̀. Tɔ̀ mamɛ ema mòtò a oni, yɔ̀ ndi à hwɛni lì rzàŋgà.

⁸ Tɔ̀ njɛnɛ ema a gbeyà hweyà hwe wòhwe o hweyàrzèlì hwe e nyàmà nyo, a hwiye nanù ema hweŋge hweyà hwe mo jàneyà e kpelì. Ndèŋgàna tɔ̀ njɛnɛ ema o gbèyi hweyà hwe gbamù na oma Èlìŋgɛ̀ ya ama Lohwɛ̀ e arza, mɔ̀ à hwiyè nanù ema hweŋge hweyà hwe mo gbeyà a lùwà lòŋgɛ la gbìndèyà.

⁹ Inyɛ̀ i rza ɔ̀tɔ̀ o lì gbeyà mamɛ ema e lɔ̀wu. Èhwanja irzɔ i rza ɔ̀tɔ̀ tɛ, jo ò luwa etaŋgi ja arzu o hvonda ya jɔ̀kɛ̀ ema e o jɛ̀ɛ̀.

¹⁰ O èŋgànɛ̀lɛ̀ rzɔ, tɔ̀ ima hvonda ema i lu o lì gbeyà gbamù, inyɛ i wo gbèeyà tɔ̀ ima mòtò, rzɛ̀hvɔ̀nì wònyàmòwe hwa Krirztò.

Lì kòkòhwɛ̀lɛ̀ nà ìikɔ̀mi là lìrzùkù

¹¹ Inyɔ hwiti e ɔ̀ŋgɔ e mbɔrzi ndɛnɛ ema nà wowi màà mà ami o lì e tìleya ene kààtì.

¹² Hwatò ema hwa hwèlì lì keka lì e nyàkìrzɛ̀ nanù ema e hwɛni lì endàhwà, hwa gbeyà ndi nanù o lì ayèkìrzɛ̀ aŋga nanù oma hwà mà luwa lìna la gbamù na hwatò hwa arzɛ. Wɔ̀ hwa oka wɔ̀ŋgɔ̀ nanù ema hwatò hwa o hwa tàkìrzɛ̀ nanù ema wɔ̀ hwa ohwa nanù ema e kpelì ema Yerzù a ŋwelɛlɛ o mbarza yɔ mɛnɛ ndi e gbeyà ema hwatò hwa o rzùŋgàhwa.

¹³ Tɔ̀ hwaŋga hwatò ema hwa endàhwà, hwa rza ika imbenda, wɔ̀ hwa arza nanù ema e endahwe, aŋga nanù hwa tànɛyi lì ayèkirzɛ̀ nanù ema, inyɔ e ma emeyà o lì endàhwà.

¹⁴ Ndi o imba na o ayèkirzɛ̀ ndi, lì ayèkirzɛ̀ la ami lì hwèlì ndi e kpelì ema e Rzàŋgo ya arzu Yerzù Krirztò e ŋwɛlɛlɛ o mbàrza o nyòla arzu. È kpelì ya eni e ma no gbeyà ema hweyà hwe ene rze hwe rza enje tɔ̀ eyà o mirzɔ̀ ma ami. Ndeŋgànɛ̀lɛ̀ na rza ohvi tɔ̀ eyà o lì gbeyàna ene rze.

¹⁵ Ò rza hvàŋgèlì tɔ̀ eyà mòtò à endàhwà tɔ̀ à rzi endàhwè. Eyà ema è hwèlì wòlìtò è hwèlì ndi ema Lohwɛ̀ à gbèye mòtò à timbe mohvènya.

¹⁶ Ò nàŋgɛ rzɔ, inyɛ ɛ̀yɔ̀lɛ̀ nà ììlì jà ama Lohwɛ̀ ì hwɛ nà hwaŋga hwatò hwa arzɛ ema hwa nɔ̀ŋgɔ hwène hwèyòkòlèlì. Hwàŋga hwatò ndi hwa hwèlì hwatò ema hwa hvɔ̀rzɔ̀hwì nà Lohwɛ̀.

¹⁷ O lì umba ene kààtì, na e ohweyà nanù ema, tɔ̀ mòtò a rzi no tàkìrzɛ̀nɛ hwene hweyà, èhwanja na ohvi hwetɛndɛ anu nyo ya ami, ema hwe uŋmɛ̀lɛ̀ nanù ema imba na gbèeyà ndi Yerzù.

¹⁸ Ìi wònyamòwè kòkò, inyɛ è ndèli yà ama è Rzàŋgo ya arzu Yerzù Krirztò è hwɛ nà inyɔ hwa arzɛ. Inyɛ̀ wò lìya nanù!