Gàletìyà 4 - Mokpwe: Bakwery (New Testament)

¹ Nàŋgɛ rzɔ, o lì ɛndɛ o worzo, e ŋmanà ema mɔ̀ ndi à hwɛni lì rzàŋgowa erzàŋgo ya ama rzàŋgo wa eni, a e hwèlì tɛ ndi ŋmanà a o hwɛ ndi nàa mògbèèlì tɔ̀ nɛ mɔ̀ ndi à hwèlì e wònja ya jɔ̀kɛ̀ ya eŋge erzàŋgo.

² Èhwànja mɔ̀ à e hwèlì ŋmanà, o hwèlì hwatò ema hwa mo ɔŋgeya na lì kànèyà hvɛ hweyà wa eni natɛ̀ɛ a uka mòkèka ema rzàŋgɛ a tɛ̀yirzɛ.

³ Nyayi hvɔ̀kɔ hvɛ mɛnɛ nanù ndi irzɔhvɛ i ma hwɛ nàa hwàanà e hvonda ema Krirztò a rzi jɛ̀ɛ̀. O eŋge hvonda, Iŋginyà ja ene rze i ma jo wowa ndi nàa hwàkòmì.

⁴ Ndi lìrzako ema e hvonda ya jɔ̀kɛ̀ e ma uke ema Lohwɛ̀ à mà kàkɛ̀nɛ̀, Lohwɛ̀ à mà oma Ŋmanà wa eni o rze. Oŋgo ŋmanà à mà uwɛ̀lɛ̀lɛ̀yi ndi o luŋga la molanà rzi a oŋgeya o rze ya e mbenda.

⁵ Lohwɛ̀ à mà mo òma o lì jo kɔ̀tɔ̀ o rze ya e mbenda aŋga nanù irzɔ i timba o lì hwɛ hwàanà hwa ama Lohwɛ̀.

⁶ Nà oma e hwèlì ndi hwàanà hwa ama Lohwɛ̀, eŋge eyà e ma gbeyà Lohwɛ̀ o lì jo òmeya Èlìŋgɛ̀ ya ama Ŋmanà eni o mèèmà me arzu. Èŋge Èlìŋgɛ̀ e ma gbeyà ema nàŋgɛ i hwɛlɛ Lohwɛ̀ nanù ema, “Ìi Tatɛ̀.”

⁷ O nàŋgɛ rzɔ, inyɔ e rza enje hvɛ ndi hwàkòmì. È hwèlì ndi hwaanà hwa ama Lohwɛ̀. Nà oma e hwèlì hwàanà hwa ama Lohwɛ̀, Lohwɛ̀ a e ŋgba tɔ̀ mamɛ ema a àŋgàmɛ̀nɛ̀yi lì ŋgba hwàanà hwa eni.

Màlùteyà ma ama Pàwolò o hwatò hwa Gàletìyà

⁸ O marzalɛ ema e rzi hwiyɛ Lohwɛ̀, e ma hwɛ ndi hwàkòmì o moohwa ema mà rzi hwɛ̀ɛ tɔ̀ eyà.

⁹ Ndi nàŋgɛ ema e hwi Lohwɛ̀, tɔ̀ na ohwa ndi nàŋgɛ nanù ema, Lohwɛ̀ a e hwi, nɛ rzɔ inyɔ e arza lì timba lì hwɛ hwàkòmì hvɛ o rze ya e ŋginyà ya ene rze.

¹⁰ È wowa loŋgo la mèenyà, loŋgo la ŋgbɛ̀ndɛ, loŋgo la marzako ma ŋma, na loŋgo la meya nàa mèenyà me ndɛnɛ o a ɛnɛ oma e gbèeyà ndi Lohwɛ̀.

¹¹ Ène eyà e gbèyi na oki wɔ̀ŋgɔ̀ nanù ema na hvàŋgi ndi e hvonda ya ami o èwòlò ya arzɛ ema na e gbèelì.

¹² Wònyamòwè kòkò, na e arzarzɛ nanù ema, e hwɛ ndi nàa imba èhwanja o nàŋgɛ nanù imba hvɛ na hwèlì ndi nàa inyɔ. Nà rza enje hvɛ ndi o rze ya e mbenda hvɛ ndeŋgànɛ̀lɛ̀ e rzi no gbèyi eyà ya wòhwe.

¹³ È hwiye nanù ema e hvonda ema nà mà lome lì e ohweyà Ŋmɛ̀ndì mò Gbamù, imba nà mà hwɛ lì lìya na inyɔ èhwanja nà mà ɔ̀kirzɛ̀.

¹⁴ Ndi tɔ̀ nɛ e nyàmbɛ̀ ya ami e ma hwɛ ndi ema e ma hwɛnɛ lì no rzɔ̀rzɔ̀, ndi inyɔ e rzi no rzɔ̀rzɔ̀ ndeŋgànɛ̀lɛ̀ e rzi no hvaye. È ma no karzɛ ndi o a ɛnɛ ema na hwèlì ndi aŋgèlì yà ama Lohwɛ̀ tɔ̀ nàa nà mà hwɛ ndi Yerzù Krirztò.

¹⁵ O eŋge hvonda e ma onda na mɔ̀nyɛ̀ŋgì. Mamɛ e gbèyɛ̀nɛ o moŋgo mɔ̀nyɛ̀ŋgì ema e ma hwɛnɛ e? Imba mbiti na hwèlì ndi e mboŋgi ya anyu nanù ema, o eŋge hvonda e ma no lìŋgàna màlìŋgo ema e ma hwɛ tɛ nanù ema mòtò a tuma lìirzɔ̀ la eni o lì li ŋgba mbunda eni nanù ema a lì gbeyàne oma e ma tuma mìirzɔ̀ ma anyu rzi e no ŋgba e mɔ̀.

¹⁶ Èhwanja na e ohweyà e jɔ̀kɛ̀ lì hvomɛ̀nɛ̀ ŋmɛ̀ndì mò gbamù o eŋgànɛ̀lɛ̀ nàŋgɛ nanù nà mà timba ndi e mɔ̀kɔ̀yèlì hwa anyu e?

¹⁷ Hwanɛyi hwà-òkòlèlì hwa mòlàŋgà hwa ohvi o mèèmà me awu nanù ema e hwa nɔŋge, ndi mɔ̀ŋgɛ̀lɛ̀ ma awu ma rza lɔ̀wu. Wɔ̀ hwa arza ndi nanù ema e rza hwɛ na imba aŋga nanù e hwɛnɛ ndi e nyɔ̀ŋgi o lì hwɛ na wɔ̀.

¹⁸ O nàŋgɛ rzɔ, o lɔ̀wu lì hwɛnɛ eŋge tumba nyɔ̀ŋgi ema e rzɔ̀ŋgɔ̀ o lì gbeyà eyà e hwèlì tɛ nanù ema eŋge nyɔ̀ŋgi e hwèlì ndi o lì gbeyà eyà ya gbamù. O lɔ̀wu lì hwɛnɛ nyɔ̀ŋgi ya lì gbeyà eyà i hvonda ja arzɛ, rzeketɛ e hvonda mɛnɛ ema e hwèlì na imba.

¹⁹ Ìi hwàanà hwa ami kòkò, o nyòla inyɔ na hweyà mòrziyò ema mo gbèyi ndi nàa molanà ema a hwèlì o mòrziyò mo lìyalì. Ndeŋgànɛ̀lɛ̀ na hweyà moŋgo mòrziyò natɛ̀ɛ ɛ̀ɛ̀mɛ̀ ya ama Krirztò è ò è kpèeyà gbamù.

²⁰ Nà lìŋgàneyayi lì hwɛ na inyɔ nàŋgɛ, o ma na hwi mamɛ ema na e ohwirzɛnɛ. Èhwanja na àkàyìrzɛ̀ rzayi-rzayi o lì e hvomɛ̀nɛ̀.

Èmbanelì ya ama Haga na Rzela

²¹ Inyɛ̀ na e ijowe hwaŋga ema hwa arza o lì hwɛ o rze ya mbenda: e rza hweyà mamɛ e mbenda e ohwa e?

²² È tìlahwì o kààtì ya Lohwà nanù ema, Abràhamù à mà hwɛnɛ hwàna hwa wunyanà hwahwakɛ, molanà mɔ̀kɔ ema à mà hwɛ ndi mokome à mà mo ŋyàyenyà ŋmanà mɔ̀kɔ wa munyanà, ɔ̀nɛyi ŋmanà hvɛ e jòjìyɛ̀ ya eni ndi e ma mo ŋya.

²³ È ŋmanà wa munyanà ema e molanà wa mokome à mà ŋya, à mà ŋyàahwà ndi nàa oma hwatò hwa arzɛ hwa ŋyàahwà, e hwèlì e jɔ̀kɛ̀ nanù ema Abràhamù à mà ŋya ŋmanà na jòjìyɛ̀ wa eni ema a rzi hwɛ̀ɛ mokome, ene eyà e ma gbeeyɛnɛ ndi nanù o lì ondìrzɛ̀ lì kàkɛ̀nɛ̀ là ama Lohwɛ̀ ema à mà kàkɛ̀nɛ̀ Abràhamù.

²⁴ I tànɛyi ndi lì kitirzɛnɛ hwanu hwalanà hwahwàkɛ nà hwèyòmbò hwe ahwakɛ hwe ama Lohwɛ̀. Haga à akitirzɛnɛ ndi nà yòòmbò ema Lohwɛ̀ à mà ààtɛ̀ nà wònyà Yudà è hvonda ema à mà tɛ̀tìrzɛ̀ Morzè imbenda ò hvàko yà Rzìnàyì. Hwatò hwa arzɛ ema hwa hwèlì ò rze yà eŋge yòmbo hwa hwèlì ndi hwàkòmì.

²⁵ Haga à hwèlì ndi nàa yòòmbò ema Lohwɛ̀ à mà ààtɛ̀ nà Morzè ò hvàko yà Rzìnàyì ò èkòmè ya Arèbìyà. Hwatò hwa Jèrurzalɛ̀mù wɔ̀ hvɛ hwa gbèyi ndi nàa Haga èhwanja wɔ̀ hwa arzɛ hwa hwèlì ndi hwàkomè.

²⁶ Ndi è molanà wà wònja à kìtìrzɛ̀nɛ̀ nà è Jèrurzalɛ̀mù yà è ŋmanyu yà Lohwà. Ndèŋgànà oŋgo molanà mɔ̀ ndi à hwèlì è nyàŋgo yà arzu.

²⁷ È tìlahwì ò kààtì yà Lohwà nanù ema, “Ò wà yòmbà yà molanà ò òke mɔ̀nyɛ̀ŋgì, ò tɛ̀ɛ̀ mòrzèya mò mɔ̀nyɛ̀ŋgì. Ò wà ema ò rzi hweyi à hweyà mòrziyò mò lìyalì, ò òke mɔ̀nyɛ̀ŋgì èhwanja, è molanà ema à mà hvakàwɛ̀ nà mòjòmɛ̀ wà eni à ò ŋya hwàna rzayi-rzayi nàŋgɛ lì aka è molanà ema à hwèlì ò lìhwa na mòjòmɛ̀ mo eni.”

²⁸ O nàŋgɛ rzɔ, wònyamòwè kòkò, lì kàkɛ̀nɛ̀ ema Lohwɛ̀ à mà ŋgbe Abràhamù lì ma e gbèeyà inyɔ hvɛ e ma hwɛ ndi hwàna hwa ama Lohwɛ̀ nàa oma Irzàkì hvɛ a hwèlì ndi e ŋmanà wa ama Lohwɛ̀.

²⁹ O eŋge hvonda o ma hwɛ ndi nanù ema, e ŋmanà ema à mà ŋyàahwa na oma e mòtò wà hwènàmà a ŋyàhwɛlɛ, à mà hwɛ lì tàkìrzɛ̀ e ŋmanà ema à mà ŋyahwa na e ŋginyà ya Èlìŋgɛ̀ yà Wòtani. Nànù mɛnɛ ndi e hwèlì nàŋgɛ natɛ̀ɛ na yawono.

³⁰ Ndi mamɛ e Kaàti ya Lohwà e ohwa lì hvomɛ̀nɛ̀ ene eyà e? È kààtì ya Lohwà e ohwa ndi nanù ema, “Hvaya e molanà wa mokome na e ŋmanà wa eni, èhwanja e ŋmanà wa e molanà wa mokome a rza tànɛyi a laa erzàŋgo ya ama rzaŋgɛ na e ŋmanà wa ama e jòjìyɛ̀.”

³¹ O èŋgànɛ̀lɛ̀ rzɔ, wònyamòwè kòkò, irzɔ i rza enje ndi hwàna hwa e molanà wa mokome ndi irzɔ i hwèlì ndi hwàanà hwa e wònja molanà.