Gàletìyà 3 - Mokpwe: Bakwery (New Testament)

È mbenda tɔ̀ lìlòkɛ̀

¹ Bɔ̀ɔ, inyɔ hwatò hwa èèti hwa Gàletìyà! Njɛnɛ à è jɔ̀ki nanù e? È rza ɔ̀ŋgɛ̀lɛ̀ nà oma nà ma e wuluhweyà nanù ema Yerzù Krirztò à mà ŋwa ndi ò mbarza ò nyòla à anyu e?

² Nà lìŋgàna lì è ijòwa eyà yɔ̀kɔ. È hvonda ema inyɔ è mà lùwe Èlìŋgɛ̀ yà Wòtani èhwanja è mà ika imbenda jà wònyà Yudà ɔ̀ndeŋgàtɛ̀ è mà è lùwa e? Ŋga, èhwanja ema mà lòkɛ̀ Ŋmɛ̀ndì mò Gbamù ema è mà hweye e?

³ Mamɛ ndèŋgàtɛ̀ è hwèlì èèti nanù e? Nà oma ema wòteyà lì gbeyà nà oma Èlìŋgɛ̀ yà ama Lohwɛ̀ è arza, ɛ̀ɛ̀mɛ̀ yà anyu nàŋgɛ è arza ndi lì ayeŋgòwɛ̀ ò lì hwɛ nà oma màlùtèyà mà hwatò hwa hwènàmà è arza e?

⁴ È mà taka nà oma è mà lòkɛ̀ Krirztò. Èŋge ŋgàna è hwèlì ndi ema moŋgo mòtàkà mò hwèlì ndi ŋgundu e?

⁵ Lohwɛ̀ à mà è ŋgba Èlìŋgɛ̀ yà Wòtani rzi mɔ̀ à è gbèeyà hweyà hwe mànyakà ò ìtììtènì ja anyu, è hwèlì ndi nanù ema è mà ika imbenda ɔ̀ndeŋgàtɛ̀ à mà gbeyà nanù e? Jàyɛ̀ rzeketɛ eŋge eyà ndi è mà gbeyà. È hwèlì ndi nanù ema ŋmɛ̀ndì mò gbamù ema è mà lòkɛ̀ ɔ̀ndeŋgàtɛ̀ mɔ̀ à mà gbeyà nanù.

⁶ Inyɔ è ɔ̀ŋgɔ mòtò nàa Abràhamù. È tìlàhwì nanù ema, “À mà lòkɛ̀ Lohwɛ̀, ndèŋgàna ò nyòla lìlòkɛ̀ là eni, Lohwɛ̀ à mà mò wòwà nàa mɔ̀kɔ ema à tɛ̀mì ehve-ehve.”

⁷ Hwatò hwa arzɛ ema hwa lòkɛ̀ Lohwɛ̀ nà oma Abràhamù à mà mò lòkɛ̀, wɔ̀ ndi hwa hwèlì hwàànà hwa jɔ̀kɛ̀ hwa ama Abràhamù.

⁸ Eyà yà Lohwà è mà lòma lì ohwa nanù ema, Lohwɛ̀ à ò wòwà hwaŋga hwatò ema hwa rza enje wònyà Yudà nàa hwatò hwa eni èhwanja hwa mò lòkɛ̀yì. Ène eyà è mà hwiyɛnɛ lì wòteyà lìrzako ema Lohwɛ̀ à mà òhweyà Abràhamù nanù ema, “Lì akeyà nà ò wà, imba nà à ò nàmìrzɛ̀ hwèkòmè hwa arzɛ hwe è rze yà mɔ̀nyɛ̀.”

⁹ O eŋgànɛ̀lɛ̀ Lohwɛ̀ à mà nàmìrzɛ̀ hwatò hwa arzɛ ema hwa mà mò lòkɛ̀ nà oma mɔ̀ à mà nàmìrzɛ̀ Abràhamù.

¹⁰ Hwàŋga ema hwa ika mèèmà mè awu ò lì oŋgama è mbenda hwa lìya ndi ò rze yà mòjèmà. Èhwanja e tìlahwì o kààtì yà ama Lohwà nanù ema, “Mojema mò ò hwɛ nà tɔ̀ ima mòtò ema à rza ika imbenda ja arzɛ ema i tìlahwì ò tenì yà è kààtì yà ama Lohwɛ̀.”

¹¹ Nàŋgɛ rzɔ è uŋmɛ̀lɛ̀ tèlèlè nanù ema, tɔ̀ mòtò à rza ikàhwa ehve-ehve nà Lohwɛ̀ èhwanja à gbeyà mamɛ ema è mbenda è ohwi. Nà ohwa ndi nanù èhwanja Eyà yà Lohwà è ohwi nanù ema, “Hwatò ema hwa tɛ̀mì ehve-ehve ò worzo wò ama Lohwɛ̀ èhwanja hwa lòkɛ̀, hwa ò lùwa lòŋgɛ là gbìndèyà.”

¹² Ndi è mbenda è rza hwɛni tɔ̀ eyà ò lì gbeyàna lìlòkɛ̀. È tìlahwì ò è kààtì yà Lohwà nanù ema, “È hwèlì tɛ nanù ema mòtò à ika tɛ è mbenda ò lì hwɛ lòŋgɛ, eŋge ŋgàna è hwèlì ndi nanù ema mɔ̀ à hwɛni ndi lì ika imbenda ja arzɛ.”

¹³ Ndi Krirztò à mà jò kɔ̀tɔ̀ ò mòjèmà ema è mbenda è jàni. È tìlahwì ò è kààtì yà Lohwà nanù ema, “Mojema mò hwèlì nà tɔ̀ ima mòtò ema à wòmàyɛ̀lɛ̀hwɛ̀ ò mbarza.” Ò eŋgànɛ̀lɛ̀ rzɔ nà oma hwa mà wòmeyà Yerzù ò mbarza, à mà hwanɛ mòjèmà ò nyòla wòhwe wò arzu.

¹⁴ Krirztò à mà gbeyà ndi nanù ò lì arza nanù ema mònàmɛ̀ ema Lohwɛ̀ à mà kàkɛ̀nɛ̀ Abràhamù mò ŋgbahwe hvɛ hwaŋga ema hwa rza enje wònyà Yudà. Èŋge è ma gbeyà ema lìlòkɛ̀ ema ì mò lòkɛ̀ lì mà gbeyà ema irzɔhvɛ ì lùwe Èlìŋgɛ̀ yà Wòtani ema à mà kàkɛ̀nɛ̀ nanù ema à jò ŋgba.

È mbenda nà lì kàkɛ̀nɛ̀

¹⁵ Nà arza lì wòwa ɛ̀mɛ̀nɛ̀nì yà hweyà ema hwe gbèyɛ̀nɛ wùnyà tɛ. Hwatò hwahwakɛ hwa emelì tɛ eyà rzìi hwa tɛ̀yirzɛ̀ hwa uka hwètɛ̀yìrzèlì, tɔ̀ mòtò à rza tànɛyi lì hvàŋga hweŋge hwètɛ̀yìrzèlì.

¹⁶ Nàŋgɛ rzɔ, Lohwɛ̀ à mà gbeyà lì kàkɛnɛ là eni nà Abràhamù, nà ŋmanà eni. Èya yà Lohwà è rza ohwi nanù ema, “Hwàna,” ò à ɛnɛ oma hwatò hwa koki. Ndi Eyà yà Lohwà è ohwi nanù ema, “Ŋmanà.” Krirztò ndi à hwèlì oŋgo Ŋmanà.

¹⁷ Eyà ema nà hwèlì nà ohwa nà jɔ̀kɛ̀ è hwèlì ndi nanù ema, Lohwɛ̀ à mà gbeyà yòòmbò nà Abràhamù rzìi à ohwa ama à hwɛni lì ondìrzɛ̀ lìŋgi lì kàkɛ̀nɛ. Ò mburza hwègbe hwenìì nà rzàyiyàwò jà mèya ɔ̀ndi Lohwɛ̀ à mà ŋgbe Morzè è mbenda. Iŋgi mbenda ì rza tànɛyi ì gba è hweyi ò lì titowa mamɛ ema Lohwɛ̀ à mà kàkɛ̀nɛ̀ nanù ema à gbeyà.

¹⁸ È hwèlì tɛ nanù ema Lohwɛ̀ à ò ŋgbelì tɔ̀ mamɛ ema à hwɛni ò lì ŋgbàà hwàanà hwa eni èhwanja hwa ika è mbenda, nanù oma mònàmɛ̀ mò eni ema à ò ŋgba mò rza enje hvɛ ndi ò mamɛ ema mɔ̀ à mà ohwe nanù ema à ŋgba Abràhamù.

¹⁹ Mamɛ rzɔ è mà hwɛ lìtiŋga ema Lohwɛ̀ à mà ŋgbe è mbenda e? À mà hwa ŋgba è mbenda ò lì uŋmɛ̀lɛ̀ hwatò mamɛ wòhwe wò hwèlì, eŋge mbenda è mà àŋgàmɛ̀nɛ̀yi lì hwɛ natɛ̀ɛ nà ò è hvonda ema è ŋmanà wà è nyɔ̀ŋgɔ̀nì yà ama Abràhamù ema Lohwɛ̀ à mà kàkɛ̀nɛ̀ à mà hwɛni lì jà. Lohwɛ̀ à mà ŋgba ì aŋgèlì è mbenda ò lì ŋgba Morzè. Morzè ndi à mà hwɛ è mòtò wà ìtììtènì ema à mà tɛ̀meyà è mòtò wà hwènàmà nà Lohwɛ̀.

²⁰ Nàŋgɛ mòtò wà ìtììtènì à arzahwa è hwèlì tɛ nanù ema hwatò hwa hwàhwakɛ hwa tɛ̀mi tɛ mburza ihwakɛ. Ndi Lohwɛ̀ à mà ŋgba Abràhamù lì kàkɛ̀nɛ̀ là eni mɔ̀ ŋmìti è rzi hwɛ ema mòtò wà ìtììtènì à ukelì.

È mbenda nà eyà ema Lohwɛ̀ à mà ohwe nanù ema à gbeyà

²¹ Ène ŋgàna è hwèlì rzɔ ndi nanù ema è mbenda è teŋgɛ̀nɛ lì kàkɛ̀nɛ là ama Lohwɛ̀ e? Jàyɛ̀, rzeketɛ nanù! Ò mà hwɛ tɛ mbenda ema è ŋgba lòŋgɛ là gbìndèyà, ò mà ì tɛmi ndi ehve-ehve ò worzo wò ama Lohwɛ̀ èhwanja ì ji ika.

²² Ndi Eyà yà Lohwà è ohwa ndi nanù ema è rze yà arzɛ è hwèlì ndi ò rze yà ŋginyà yà wòhwe, ò eŋgànɛ̀lɛ̀ rzɔ, jàhwèyà ema Lohwɛ̀ à mà ohwe nanù ema à ŋgba, à mà ji ŋgba hwatò ema hwa lòkɛ̀yì Yerzù Krirztò.

²³ Ndèŋgàna Krirztò à è jà, è mbenda è mà jò kaka ndèŋgàna ì mà hwɛ ò rze yà eŋge mbenda natɛ̀ɛ nà è hvonda ema Lohwɛ̀ à mà wuluwe nanù ema hwatò hwa ika mèèmà mè awu oma Krirztò.

²⁴ Ò eŋgànɛ̀lɛ̀ rzɔ è mbenda ndi è mà hwɛ lì jo òŋgeya natɛ̀ɛ nà hwejèelì hwe ama Krirztò, ò lì arza nanù ema Lohwɛ̀ à jò emeyà èhwanja i lòkɛ̀ Krirztò.

²⁵ Nàŋgɛ rzɔ ema è hvonda è mà jɛ̀ɛ̀ ema i hwɛni lì ika lì lòkɛ̀ là arzu nà Krirztò, ò rza enje tɔ̀ yoma hvɛ ema è jò ɔ̀ŋgeya.

²⁶ Inyɔ hwa arzɛ è hwèlì ndi hwàanà hwa ama Lohwɛ̀ èhwanja è lòkɛ̀yì Yerzù Krirztò.

²⁷ Nà oma è mà lùhwìrzɛ̀hwɛ̀, ò eŋgànɛ̀lɛ̀ è hwèlì ndi mɔ̀kɔ naŋgɛ nà Krirztò, ndeŋgànɛ̀lɛ̀ è hwɛni wònjà nàa mɔ̀.

²⁸ Ò eŋgànɛ̀lɛ̀ rzɔ, o rza enje lì akahwanɛ ò hwaŋga ema hwa hwèlì wònyà Yudà nà hwaŋga ema hwa rza enje wònyà Yudà, ò hwàkòmì nà ò hwaŋga ema hwa hwèlì wònja, ò wunyanà nà hwalanà. Inyɔ hwa arzɛ è hwèlì ndi mòtò mɔ̀kɔ èhwanja è lòkɛ̀ Yerzù Krirztò.

²⁹ Nà oma è hwèlì ndi hwatò hwa ama Krirztò, è hwèlì ndi hwàanà hwa ama Abràhamù, ndèŋgàna inyɔ è luwa mònàmɛ̀ ema Lohwɛ̀ à mà kàkɛ̀nɛ nanù ema à ŋgba Abràhamù.