Gàletìyà 2 - Mokpwe: Bakwery (New Testament)

Inɛyi àpɔ̀rzìtòlò i ma emeyà èwòlò ya ama Pàwolò

¹ Ò mburza yà lìyome là meya nà meni, nà mà timba ò Jèrurzalɛ̀mù nà Bànàbàrzì, Tàyìtùrzì hvɛ à mà hwɛ ò mondeŋge nà imba.

² Nà mà ɛndɛ ndi èhwanja Lohwɛ̀ à mà nò wuluhweyà nanù ema nà ɛndɛ aŋga. Nà oma nà mà hwɛ aŋga, ì mà tàneyà wùndɛ̀ nà hwàtìmbèlì hwa ŋmèmba, nà mà hwa telɛlɛ ŋmɛ̀ndì mò gbamù ema nà mà ohweyà hwaŋga ema hwa rza enje wònyà Yudà. Nà mà gbeyà ndi nanù ò lì oka wɔ̀ŋgɔ̀ nanù ema èwòlò ema nà mà gbèyi nà è yɔ̀ ema nà hwèlì nà gbeyà è rzi hwɛ ŋgundu.

³ Tɔ Tàyìtùrzì ema à mà hwɛ ndi mòtò wa èkòmè ya Grìki ema à mà hwɛ na imba, hwa rzi mo nyàkìrzɛ̀ nanù ema à hwɛni lì endàhwà,

⁴ tɔ̀ nɛ loŋgo là hwatò hwa mòlàŋgà ema hwà mà hwɛ ò ìtììtènì ja hwàlòkèlì hwa ama Krirztò, hwa mà hwɛ lì ahwaŋgelɛ nanù ema wɔ̀ hvɛ hwa hwèlì ndi hwàlòkèlì hwa ama Krirztò hwà mà arza nanù ema è gbèyɛ̀nɛ̀. Hwàŋga hwatò hwà mà kpèeyà ndi ò ìtììtènì jà arzu ò jututa, aŋga nanù oma hwa mà ɛnɛ nà oma ì gbèeyà hweyà hwe arzɛ èhwanja i hwèlì ò lìkànèyà la ama Yerzù Krirztò. Wɔ̀ hwà mà arza ndi nanù ema i hwɛ ndi hwàkòmì ò lì oŋgama imbenda jà wònyà Yudà.

⁵ Ndi èhwanja ì ma arza lì e kombɛlɛlɛ è jɔ̀kɛ̀ ema è hwèlì ò Ŋmɛ̀ndì mò Gbamù, ì rzi hwa ŋgbe tɔ̀ hvonda tɔ̀ hvɔ̀kɔ.

⁶ Ndeŋga hvɛ hwatò ema hwa mà hwɛ aŋga nàa hwatimbelì hwa ŋmèmba hwa rzi ohve hvɛ tɔ̀ eyà ò lì lata ò ŋmanyu yà mamɛ ema imba nà okolɛ. Tɔ̀ nɛ wɔ̀ hwa mà hwɛ ndi hwàtìmbèlì è rzi hwɛnɛ tɔ̀ eyà yà lì nò gbeyàna èhwanja hwatò hwa arzɛ hwa hwèlì ndi nyayi hvɔ̀kɔ ò worzo wò ama Lohwɛ̀.

⁷ Ndi tɔ̀ nanù, wɔ̀ hwa mà ayembɛ nanù ema Lohwɛ̀ à nò ŋgbelì èwòlò ya lì ohweyà hwatò ema hwa rza enje wònyà Yudà, Ŋmɛ̀ndì mò Gbamù. Ŋgàna hvɔ̀kɔ na oma Pètrò hvɛ à mà ohve èwòlò ya lì ohweyà wònyà Yudà Ŋmɛ̀ndì mò Gbamù.

⁸ Lohwɛ̀ ema à mà hvɔ̀rzɔ̀ Pètrò o lì hwɛ e àpɔ̀rzìtòlò ya wònyà Yudà mɔ̀ mɛnɛ hvɛ ndi à mà no hvɔ̀rzɔ̀ o lì hwɛ e àpɔ̀rzìtòlò o hwaŋga hwatò ema hwa rza enje wònyà Yudà.

⁹ Jèmìrzì, Pètrò nà Yòwanìrzɛ̀ ema hwatò hwà mà hwiye nàa màwòndì ma ŋmèmba, hwà mà ayèmbɛ nanù ema Lohwɛ̀ ndi à mà no ŋgba ene ndèli ya lì hwɛ e àpɔ̀rzìtòlò ya eni, o eŋgànɛ̀lɛ̀ wɔ̀ hwà mà jo hwatɛ irzɔ na Bànàbàrzì o lì uŋmɛ̀lɛ̀ nanù ema hwà mà emeyà nanù ema irzɔ na wɔ̀ i gbeyà ndi èwòlò yɔ̀kɔ. Irzɔ na wɔ̀ i ma tɛ̀yirzɛyi nanù ema i hwɛ o lì ohweyà hwatò ema hwa rza enje wònyà Yudà ŋmɛ̀ndì mò gbamù, na oma wɔ̀ hvɛ hwa lìmeya ndi o lì ohweyà wònyà Yudà ŋmɛ̀ndì mò gbamù.

¹⁰ Ndi hwà mà jo òhweyà nanù ema i rzi hvoŋga o lì oŋgowàna mèlìrza me hwatò. Ndeŋgànɛ̀lɛ̀ eyà eŋge ema imba nà mà lìŋgane o lì gbeyà rzayi-rzayi.

Pàwolò à mà kanja Pètrò o mbowà ya Antìyɔ̀kì

¹¹ Ndi è hvonda ema Pètrò à mà jèe ò mbowà ya Antìyɔ̀kì, nà mà mò kanja ò mote èhwanja à mà hwɛ lì gbeyà hweyà ema hwe rzi lɔ̀wu.

¹² Nà oma mɔ̀ à mà lòme lì uka aŋga, à mà nyàmɛ̀lɛ ò lì làa nà hwatò ema hwa rza enje wònyà Yudà. Ndi nà oma loŋgo là hwatò hwa wònyà Yudà ema hwa mà uwɛ̀lɛ̀lɛ̀yi ò mà Jèmìrzì ò Jèrurzalɛ̀mù rzi hwa jà ò Antìyɔ̀kì, à mà wòteyà lì timbeya ò mburza. A rzi hwɛ hvɛ lì làa nà hwaŋga hwatò ema hwa rza enje wònyà Yudà. Mɔ̀ à mà hwɛ lì gbèeyà nanù èhwanja à mà hwɛ lì oka hwatò ema hwa mà hwɛ lì ohwa nanù ema hwa hwɛni lì enda hwatò ema hwa rza enje wònyà Yudà wɔ̀ŋgɔ̀.

¹³ Ène eyà à mà gbeyà ema loŋgo là hwàlòkèlì hwa ama Krirztò hwa wònyà Yudà, wɔ̀ hvɛ hwa mà wòteyà lì timbeya ò mburza. Tɔ Bànàbàrzì mɔ̀ hvɛ ŋmìti à mà hwa nɔ̀ŋgɔ ò lì gbeyà lìŋgi lùùrze.

¹⁴ Nà oma nà mà ɛnɛ nanù ema wɔ̀ hwa rza gbeyà nà oma ŋmɛ̀ndì mò gbamù mò òhwa nanù ema hwa gbeye, nà mà ohweyà Pètrò o worzo wo awu nanù ema, “Tɔ nɛ o hwèlì ndì mòtò wa wònyà Yudà, o ma hwɛmɛ ɛ̀ɛ̀mɛ̀ ya wònyà Yudà o gbeyà ndi hweyà nàŋgɛ nàa mòtò ema a rza enje wònyà Yudà. Nɛ rzɔ o tànɛyi lì nyàkìrzɛ̀ hwatò ema hwa rza enje wònyà Yudà o lì nɔ̀ŋgɔ ɛ̀ɛ̀mɛ̀ ya wònyà Yudà.”

Hwatò hwa rzùŋgàhwa èhwanja hwa lòkɛ̀yi Yerzù

¹⁵ Irzɔ ema o hwèŋyàyèlì i hwèlì ndi wònyà Yudà, i rza enje ndi nàa hwatò ema hwa rza enje wònyà Yudà ema irzɔ i hwi nanù ema hwa rza hwi e mbenda ya ama Lohwɛ̀.

¹⁶ Ndi tɔ̀ nɛ irzɔ i hwi nanù ema Lohwɛ̀ a rza emeyà mòtò ema a hwèlì wòtani èhwanja a nɔ̀ŋgɔ e mbenda. Ndi lì lòkɛ̀ ema mòtò a lòkɛ̀ Yerzù Krirztò lɔ ndi lì gbeyà Lohwɛ̀ a emeyà mòtò ema a tɛmi ehve-ehve. O eŋgànɛ̀lɛ̀ rzɔ irzɔ hvɛ i lòkɛ̀yi Yerzù Krirztò aŋga nanù Lohwɛ̀ a jo emeyà èhwanja i lòkɛ̀yi Yerzù ndi rzeketɛ ema èhwanja ji ikayi e mbenda. Lohwɛ̀ a rza emeyà e mòtò èhwanja a nɔ̀ŋgɔ e mbenda.

¹⁷ È hwèlì tɛ nanù ema na oma i keka o lì tɛmirzɛhwɛ ehve-ehve o worzo wo ama Lohwɛ̀ èhwanja i lòkɛ̀yi Krirztò, ene eyà e ma gbeyà loŋgo la wònyà Yudà, hwa jo wowa ndi nàa i hwèlì ndi hwatò hwa wòhwe, èhwanja i rzi ika imbenda ja wònyà Yudà hvɛ. Ène ŋgàna rzɔ e uŋmɛ̀lɛ̀ ndi nanù ema Krirztò ndi à jo tindɛlɛ o lì gbeyà wòhwe e? Jàyɛ̀, e rza tànɛyi e hwɛ nanù.

¹⁸ Ndi na timbi tɛ o mburza nàŋgɛ o lì nɔ̀ŋgɔ iŋgi mbenda ema imba nà mà hwɛmɛ, nanù oma na undi e mbenda.

¹⁹ È hwèlì tɛ ndi o lì nɔ̀ŋgɔ e mbenda mɛnɛ nanù oma nà mà ŋwa. Nànù oma e mbenda yɔ yiti yɔ ndi e no òŋwi. Ndi Yerzù Krirztò à mà no ulɛ o tenì ya e mbenda aŋga nanù na tanɛ lì gbèeyà Lohwɛ̀.

²⁰ Nà oma Yerzù à mà ŋwèeyà o mbarza, e hwèlì ndi ema imbahvɛ nà mà ŋwa. Nà rza enje lòŋgɛ hvɛ. Krirztò ndi à hwèlì o tenì ya ami. O eŋgànɛ̀lɛ̀ rzɔ tɔ̀ ima lìtumba la eyà ema na gbèeyà o rze ya mɔ̀nyɛ̀ nàŋgɛ, na e gbèeyà ndi èhwanja o lìlòkɛ̀ ema na ohvani è Ŋmanà wà ama Lohwɛ̀ ema a no lìŋgàni rzii a ŋwa o nyòla ami.

²¹ Nà rza enje mòtò ema na tànɛyi lì ohwa nanù ema e ndèli ya ama Lohwɛ̀ e rza enje tɔ̀ eyà. O nyòla ene e hwɛ̀ɛyayi tɛ ema Lohwɛ̀ a tànɛyi a emeyà mòtò èhwanja a ikayi imbenda, eŋge ŋgàna e hwèlì rzɔ ndi nanù ema Yerzù Krirztò à mà ŋwèeyà o ndi mbarza ŋgundu.