Gàletìyà 1 - Mokpwe: Bakwery (New Testament)

Pàwolò a omi ikɔ̀mi

¹ Ìmba Pàwolò ema nà hwèlì àpɔ̀rzìtòlò ndi na tilì ene kààtì, rzeketɛ hwatò wà hwènàmà ndi hwa no hvɔ̀rzì o lì hwɛ àpɔ̀rzìtòlò. Ndèŋgana na rza gbeyàna ndi lìkànèyà la hwatò. Ndi na hvɔ̀rzɔ̀hwì ndi na Yerzù Krirztò nà Lohwɛ̀ Tatɛ̀ ema à mà hvùmùlɛ̀ Yerzù Krirztò o kpelì.

² Imba na hwàlòkèlì hwa arzɛ ema hwa hwèlì anu na imba je omelì ŋmèmba mo arzɛ ema mo hwèlì o Gàletìyà ikɔ̀mi.

³ Inyɛ̀ è ndèli nà ɛ̀yɔ̀lɛ̀ yà ama Lohwɛ̀ è Tatɛ̀ hwa arzu nà è Rzàŋgo yà arzu Yerzù Krirztò è hwɛ nà inyɔ.

⁴ Ò lì arza nanù ema i rzolowahwa ò lì gbeyà wòhwe ò ene rze yà yawono, Yerzù Krirztò à mà aŋgbɛ mɔ̀ ŋmìti ò lì jò ŋwèeyà ò wòhwe wò arzu. À mà gbeyà ndi nanù èhwanja nanù ndi Lohwɛ̀ è Tatɛ̀ yà arzu è mà tɛ̀yirzɛ.

⁵ Èluhwe è hwɛ nà Lohwɛ̀ ò gbìndèyà nà ò gbìndèyà! Inyɛ̀ wò lìya nanù.

O rza enje mohvɛhvɛ Ŋmɛ̀ndì mò Gbamù

⁶ Lohwɛ̀ à mà e hvɔ̀rzɔ̀ o lì hwɛ hwatò hwa eni o nyòla e ndèli ya ama Yerzù Krirztò. Ndi na tami o lì ɛnɛ nanù ema e akɛ̀lɛ̀yi o lì rzɔ̀rzɔ̀ Lohwɛ̀, ndèŋgàna e hwèlì e nɔ̀ŋgɔ hwehvɛhvɛ hwèyòkòlèlì ema inyɔ e ɔ̀ŋgɛ̀lɛ̀ nanù ema e hwèlì ndi ŋmɛ̀ndì mò gbamù.

⁷ O tɛ̀ɛ̀tɛ̀ɛ o rza enje mohvɛhvɛ ŋmɛ̀ndì mò gbamù. Ndi imba na ohwa ndi nanù èhwanja o hwèlì lòŋgo la hwatò ema hwa e emirzɛ. Hwa arza lì keka o lì tikowa Ŋmɛ̀ndì mò Gbamù mò ama Yerzù Krirztò.

⁸ Ndi na e ohweyà nanù ema, tɔ̀ e hwɛ ndi nanù ema irzɔ tɔ̀ aŋgèlì ndi e uwɛ̀lɛ̀lɛ̀yi o ŋmanyu ya Lohwà rzi a e ohweyà ŋmɛ̀ndì mò gbamù ema mo tikowahwi nanù oma e mɔ̀ ema je e ohweyà mo jɔ̀kɔ̀wè.

⁹ Ima màa lì e ohweyà hvɔni, ndeŋgànɛ̀lɛ̀ nàŋgɛ na hwata hvɛ o lì e ohweyà nanù ema, mòtò a jelì tɛ lì e ohweyà mohvɛhvɛ ŋmɛ̀ndì mò gbamù ema mo tiko na e mɔ̀ ema e ma emeyà, èwoma e hwɛ na oŋgo mòtò.

¹⁰ Nà oma na ohwa nanù, e rza ɔ̀ŋgɛ̀lɛ̀ ndi nanù ema hwatò hwa hwènàmà hwa no tuuwe lìna la gbamù. Imba na rza arza nanù. Lohwɛ̀ ndi imba na arza nanù ema a no tuuwe lìna la gbamù. È ma hwɛ tɛ nanù ema na arza ndi ema hwatò hwa hwènàmà hwa no tuuwe lìna la gbamù, o ma na rza enje ndi e mògbèèlì hwa ama Krirztò.

Ŋmɛ̀ndì mò ama Pàwolò mo uwɛ̀lɛ̀lɛ̀yi ndi o mà Krirztò

¹¹ Inyɛ̀ na e ohweyà wònyamòwè kòkò, nanù ema ŋmɛ̀ndì mò gbamù ema na ohwa mo rza uwɛ̀lɛ̀lɛ̀yi ndi na hwatò hwa hwènàmà.

¹² Nà rzì luwe ŋmɛ̀ndì mo ami lì akeyà na tɔ̀ mòtò mɔ̀kɔ wa hwènàmà, ndèŋgàna tɔ̀ mòtò tɔ̀ mɔ̀kɔ a rzi no òkolɛ e mɔ̀. Yerzù Krirztò mɔ̀ ŋmìti ndi à mà no wuluweya e mɔ̀.

¹³ È mà hweyà nɛ lòŋgɛ là ami lì mà lome lì hwɛ è hvonda ema na mà nɔ̀ŋgɔ ɛ̀ɛ̀mɛ̀ ya wònyà Yudà. È ma hweyà nanù ema imba nà mà hwɛ lì tàkìrzɛ̀ hwatò hwa ama Krirztò na ekɔɔni ya ami ya arzɛ. Nà ma arza lì hwa kulɛ hwa arzɛ.

¹⁴ Nà ma nɔ̀ŋgɔ hwèyòkòwèlì hwe wònyà Yudà, lì aka tɔ̀ i mbunda ja ami ema i ma hwɛ mòkèka mɔ̀kɔ. Nà ma rzɔ̀ŋgɔ̀ hvɛ lì rzɔŋgìtɛ̀nɛ̀ la hwɛ̀ɛ̀mɛ̀ hwe ama imbamba ja arzu.

¹⁵ Ndi tɔ̀ nɛ è mà hwɛ nanù, Lohwɛ̀ à mà lòma lì nò hvɔ̀rzɔ̀ ndèŋgàna nà è ŋyàahwà. À mà nò hwɛlɛ nà è ndèli yà eni ò lì mò gbèeyà.

¹⁶ A ma no wuluhweyà è Ŋmanà wà eni, aŋga nanù imba na ohweyà hwaŋga hwatò ema hwa rza enje wònyà Yudà ŋmɛ̀ndì mò gbamù mo ama oŋgo ŋmanà wa eni. Nà oma à mà gbeye nanù, na rzi ɛndɛ o lì ùŋmànɛ̀lɛ̀ tɔ̀ mòtò tɔ̀ mɔ̀kɔ wa hwènàmà o lì no òkolɛ mamɛ ema na hwɛni lì gbeyà.

¹⁷ Nà rzi ɛndɛ hvɛ tɔ̀ o Jèrurzalɛ̀mù lì ɛnɛ hvɛ tɔ̀ hwaŋga ema hwà mà loma lì hwɛ i àpɔ̀rzìtòlò ndeŋgànɛ̀lɛ̀ imba na e hwɛ mɔ̀kɔ. Ndi nà mà ɛndɛ ndi ŋgelì hvɔ̀kɔ o erzòokà ya Arèbìyà, rzìi na timba hvɛ o mbowà ndɛnɛ ya Dàmàrzkɔ̀rzì.

¹⁸ Meya meyawo me ma aka, ndèŋgàna na e ɛndɛ o mbowà ndɛnɛ ya Jèrurzalɛ̀mù o lì ɛnɛ Pètrò. Nà ma lìya na mɔ̀ lìyomɛ la mèenyà na meta.

¹⁹ Nà rzi ɛnɛ hvɛ tɔ̀ ehvɛhvɛ àpɔ̀rzìtòlò lì aka tɛ Jèmìrzì, e Rzàŋgo Yerzù ŋmanyàŋgò wa eni.

²⁰ Hweyà ema na e tìleyà hwe hwèlì ndi è jɔ̀kɛ̀. Lohwɛ̀ a hwi nanù ema na rza kɔ̀ ndi hweyà.

²¹ Nà oma nà mà uwɛ̀lɛ̀lɛ̀yi ò Jèrurzalɛ̀mù, nà mà ɛndɛ weki ò erzòòkà yà Rzìrìyà nà Rzìlìrzìyà.

²² O eŋge hvonda ŋmèmba mò hwatò hwa mìitelì mò erzòokà ya Jùdeyà hwa rzi no hwiye hvɛ tɔ̀.

²³ Hwà mà hwiya ndi mamɛ ema hwahvɛhvɛ hwatò hwà mà hwɛ lì ohwa nanù ema, “È mòtò ema à mà hwɛ lì jo tàkirzɛ rzayi-rzayi, mɔ̀ ndi à hwèlì e mɔ̀ ema a ohweyà hwatò nàŋgɛ ema hwa lòkɛ̀yi Yerzù Krirztò, lìŋgi lìlòkɛ̀ mɛnɛ ema à mà arze lì kònirzɛ.”

²⁴ Eyà ema Lohwɛ̀ à mà no gbèeyà e ma hwa gbeyà o lì eka Lohwɛ̀.