Ɛ̀hvìrzìyà 6 - Mokpwe: Bakwery (New Testament)

Màyòwà Pàwolò a ŋgbelì itatɛ̀, inyàŋgo na hwàanà

¹ Inyɔ hwàànà, è hweyànè irzàŋgo nà inyàŋgo jà anyu nàa hwatò ema hwa hwèlì nà è Rzàŋgo hwa hwɛni lì gbeyà, eyà yà jɔ̀kɛ̀ yè eŋge ò lì gbeyà.

² È tìlahwì ò kààtì yà Lohwà nanù ema, “È lùwɛ i tatɛ̀ nà i nyàŋgo jà anyu” èhwanja ò imbenda ja arzɛ ema Lohwɛ̀ à ŋgbèlì, ene ndi è hwèlì è mbenda yà worzo ema Lohwɛ̀ à mà ohwè nà lì kàkɛ̀nɛ̀.

³ Mamɛ à mà ohwe e hwèlì ndi nanù ema, “È hweyàna tɛ i tatɛ̀ na i nyàŋgo ja anyu nanù oma hweyà hwe lɔ na inyɔ e lùwa hvɛ lòŋgɛ la mɔ̀tɛ̀yi anu rze.”

⁴ Inyɔ hvɛ i tatɛ̀, e rzi tàtìrzɛ̀ hwàànà hwa anyu. Ndi tɔ̀ nanù na oma e hwa woŋgowa e hwa wòŋgowe na hwèyòkòwèlì na màyòwà nyayi ema e Rzàŋgo e arza.

Mayohwa Pàwolò a ŋgbelì hwàkòmì na irzaŋgo ja awu

⁵ Inyɔ hvɛ hwàkòmì e hweyàne irzaŋgo ja anyu ja èwòlò. Ndeŋgànɛ̀lɛ̀ e hwa ŋgbe èluhwe, ndeŋga e hwa hweyàne na ŋmèma mɔ̀kɔ molemilemi na oma e hweyàna Krirztò.

⁶ È rzi hwa gbèeyà ndi lìrzakò mɛnɛ ema hwa ɛnɛ̀ ò lì arza nanù ema hwa yè eke. Ndi inyɔ nàa hwàkòmì hwa ama Krirztò nà oma è gbèeyà Lohwɛ̀ inyɛ è uwɛ̀lɛ̀lɛ̀yì natɛ̀ɛ nà ò tenì yà mèèmà mè anyu.

⁷ È gbeye èwòlò yà anyu nà mèèmà mè anyu mè arzɛ nà ò à ɛnɛ oma è gbèeyà ndi Lohwɛ̀ rzeketɛ nà oma è gbèeyà hwatò hwa hwènàmà.

⁸ È hwiye nanù ema è Rzàŋgo è jò rzàweyà ndi ò tɔ̀ ima èwòlò yà gbamù ema i mà gbèèyɛ̀. I hwɛ hwàkòmì tɔ̀ wònja.

⁹ Inyɔ hwatò ema è ohvi hwàkòmì è ɔŋgeya hwàkòmì hwa anyu gbamù. È rzìi hwa kàkɛ̀nɛ̀ nanù ema hwa ò taka. È hwiye nanù ema inyɔ nà wɔ̀ hwa arzɛ è hwèlì ndi ò rze yà è mbenda. È mɔ̀ ema mɔ̀ mɛnɛ ndi à hwèlì ò ŋmanyu yà Lohwà, ndèŋgàna mɔ̀ à rza tìmbana tɔ̀ mòtò mburzà.

Nɛ̀ hwàlòkèlì hwa àŋgàmɛ̀nɛ̀ lì teŋgɛ̀nɛ̀ mòkarzɛ̀

¹⁰ Ò lì umba ene mbɔrzi rzɔ, inyɛ nà è òhweyà hwene hweyà, è hwɛ ndi nanù mɛnɛ nà è Rzàŋgo, aŋga nanù è ŋginyà yà eni ndɛnɛ è ètirzɛ̀ mèèmà mè anyu ò kòkò.

¹¹ È akpatɛ rzɔ nà hwèèmà hwe arzɛ hwe njuma è mà Lohwɛ̀ à è ŋgbèlì, aŋga nanù è tànɛyi lì teŋgɛ̀nɛ̀yi Mòkarzɛ̀ meyànò mè eni.

¹² È njuma ema jà ana è rza enje ndi yà hwatò hwa hwènàmà. Ndi irzɔ jà ànànà ndi lì teŋgɛ̀nɛ̀ iŋginyà ja wòhwe, hwàtìmbèlì hwa awu ema hwa kànèyà e rze ya jìtìtì na iŋginyà ja wòhwe ema i hwèlì o lìwòhwɛ̀ la ŋmanyu.

¹³ O èŋgànɛ̀lɛ̀ rzɔ e akpatɛ na hwèèmà hwe arzɛ hwe njuma ema Lohwɛ̀ a e ŋgbelì aŋga nanù o wùnyà wo wòhwe hwa jèelì tɛ, e o tànɛyi lì teŋgɛ̀nɛ̀ hwàkɔ̀yèlì. È o ana natɛ̀ɛ na o lìrzùkù ndeŋgànɛ̀lɛ̀ e o tɛ̀mɛ̀ na ŋginyà.

¹⁴ O èŋgànɛ̀lɛ̀ rzɔ, inyɔ e akpatɛ o lì ohwa e jɔ̀kɛ̀ o ihvonda ja arzɛ. Inyɔ e gbèyi tɛ nanù, e o hwɛ ndi nàa mòtò ema a nyamì e ŋgolì o woluhwe wa eni, ema a wòŋgìrzɛ̀nɛ o lì gbèeyà eyà. Inyɔ e lìmeya ndi o lì gbeyà hweyà hwe jɔ̀kɛ̀ ehwànja o lì gbèeyà hweyà ema hwe hvomɛ̀nɛ̀yi e hwèlì ndi nàa mòtò ema a wɔ̀ti e mbɔ̀ti ya hwɛ̀ɛkɛ̀ o lì ahwàndɛ mɔ̀ ŋmìti o hvonda ya njuma.

¹⁵ Inyɔ e lìmeya ndi o lì ohwa Ŋmɛ̀ndì mò Gbamù. Mɔ̀ mo jànà ɛ̀yɔ̀lɛ̀. È gbèyi tɛ nanù, rzìi e gbèeyà ndi nàa e wɔti hwetambi ema hwe e gbèeyà o lì tɛ̀mɛ̀ gbamù.

¹⁶ O ŋmanyu ya hwene hweyà hwe arzɛ e ohve lìlòkɛ̀ nanù mɛnɛ na Yerzù Krirztò. Lìlòkɛ̀ la anyu lì hwɛ ndi nàa ŋguhwa ema ye e keka aŋga nanù mawɔ̀ŋgɔ̀ na mùùnya ema Mòkarzɛ̀ a o òma hwe rza o gbèeyà tɔ̀ eyà.

¹⁷ È ɛndɛ tɛ o lì ana njuma, inyɔ e hwiye nanù ema e ma luwa lì oŋgirzɛ o màà mà ama Lohwɛ̀ o eŋgànɛ̀lɛ̀ rzɔ tɔ̀ mòtò a rza tànɛyi a e gbeyà tɔ̀ eyà. È o hwɛ ndi nàa e ŋmanelì wa njuma ema a wɔti e tamba ya hwɛ̀ɛkɛ̀. Ndèŋgàna e ɛndɛ tɛ, e àŋgàmɛ̀nɛ̀ lì ohva e rzɔ̀lɔ̀ ema Èlìŋgɛ̀ yà Wòtani e ma e ŋgbɛ. Èŋge rzɔ̀lɔ̀ e gbèyi ndi nàa eyà ya ama Lohwà.

¹⁸ È kànɛ̀ na oma Èlìŋgɛ̀ yà Wòtani ye e lìyɛlɛ o ihvonda ja arzɛ. Inyɔ e ohweyà Lohwɛ̀ o lì e oŋgowàna o tɔ̀ mamɛ ema e gbeyà. È hwɛni lì aŋgowa, e kànɛ̀ o ihvonda ja arzɛ e rzi hwɛ nanù ema e ɔ̀tɔ̀. Ndèŋgànɛ̀lɛ̀ e a kànɛ̀lɛlɛ hwatò hwa arzɛ hwa ama Lohwɛ̀.

¹⁹ È no kànɛ̀lɛlɛ imba hvɛ, ema tɔ̀ ima hvonda ema na ohwa Èya ya ama Krirztò, Lohwɛ̀ a no ŋgba e mbɔrzi ema e hvomɛ̀nɛ̀yi. Aŋga nanù, na o tànɛyi lì ohweyà hwatò Ŋmɛ̀ndì mò Gbamù ema hwa rza rzɔ̀ŋgìtɛ̀nɛ̀ e rzìi hwɛ lì oka tɔ̀ wɔ̀ŋgɔ̀.

²⁰ Yerzù Krirztò a no hvɔ̀rzɔ̀ o lì hwɛ e rzuwɛlɛ ya eni o lì ohwa mono Ŋmɛ̀ndì mò Gbamù. Litiŋga lìiŋgi ɔ̀ndeŋgàtɛ̀ na gbèyi ndi naŋgɛ nàa e mòtò wa hwèwòwà. O èŋgànɛ̀lɛ̀ inyɔ e no kànɛ̀lɛlɛ nanù ema Lohwɛ̀ a na ètìrzɛ̀ ŋmèma mo ami, o lì ohwa mono ŋmɛ̀ndì mò gbamù e rzi hwɛ lì oka tɔ̀ wɔ̀ŋgɔ̀.

Pàwolò a ohwi à mà Lohwɛ̀ a nàmìrzɛ̀ hwaŋga ema hwa lòkɛ̀yi

²¹ Ŋmanyàŋgò wà arzu wà Krirztò Tàyìchìkùrzì, ema i lìŋgàni à gbèeyà Rzàŋgo nà ŋmèma mɔ̀kɔ. Mɔ̀ ndi à hwèlì è mɔ̀ ema à è òhweyà hweyà lì nò hvomɛ̀nɛ̀. Ène yè è gbèeyà ò lì hwiya njɛnɛ ema nà hwèlì ndèŋgàna mamɛ ema nà gbèeyà.

²² Nà è òmeyà è mɔ̀ àŋga nanù mɔ̀ à è ohweyà hweyà ema hwe jò gbèyɛ̀nɛ. Nà ò lì è ètìrzɛ̀ mèèmà mè anyu.

²³ Inyɛ̀ ɛ̀yɔ̀lɛ̀ yà ama Lohwɛ̀ è Tatɛ̀ yà arzu nà Rzàŋgo wà arzu Yerzù Krirztò è hwɛ nà inyɔ hwàlòkèlì. Wɔ̀ hwa ò è gbèeyà ò lì lìŋgana mɔ̀kɔ nà ɔ̀nɛyi nanù mɛnɛ nà ò lì lòkɛ̀ hvɛ Krirztò nanù mɛnɛ.

²⁴ Inyɛ̀ è ndèli yà ama Lohwɛ̀ è hwɛ nà hwaŋga hwa arzɛ ema hwa lìŋgàni Rzàŋgo wà arzu Yerzù Krirztò nà ndìŋgɛ ema è rza kùwa.