Ɛ̀hvìrzìyà 4 - Mokpwe: Bakwery (New Testament)

Hwatò ema hwa lòkɛ̀yi Krirztò hwa hwèlì ndi mɔ̀kɔ na mɔ̀

¹ O èŋgànɛ̀lɛ̀ rzɔ imba ema na hwèlì ndi nàa mòtò wa hwèwòwà èhwanja o nyòla èwòlò ema na gbèeya Rzàŋgo, nà è rzòrzòmèyà nanù ema hwɛ̀ɛ̀mɛ̀ hwe anyu hwe hwɛ ndi na oma Lohwɛ̀ a arza, na oma Lohwɛ̀ à mà e hwɛlɛ à mà e lìya.

² Tɔ̀ mamɛ ema è gbèeyà, è à rzììrzɛ, è hwɛ hvɛ hviyayi, rzìi è ajùlɛ̀nɛ̀ mɔ̀kɔ nà ɔ̀nɛyi. È à ùŋmɛlɛnɛ è ndìŋgɛ nà oma è ajùlɛ̀nɛ̀ mɔ̀kɔ nà ɔ̀nɛyi.

³ Èlìŋgɛ̀ yà Wòtani è mà jò gbeyà ò lì hwɛ mòtò mɔ̀kɔ, ò èŋgànɛ̀lɛ̀ è keke ò lì hwɛ ò ɛ̀yɔ̀lɛ̀ mɔ̀kɔ nà ɔ̀nɛyi aŋga nanù è hwɛ ndi mòtò mɔ̀kɔ.

⁴ Irzɔ hwa arzɛ i hwèlì ndi nyo hvɔ̀kɔ ndèŋgana èlìŋgɛ̀ yɔ̀kɔ hvɛ ndi irzɔ hwa arzɛ i mà lùwe. Jò òhvi ndi lìhvìtà lɔ̀kɔ̀ mɛnɛ ò jàhwèyà jà awɔ̀kɛ ema Lohwɛ̀ à mò òhwe nanù ema à jò ŋgba è hvonda ema à mà jò hvɔ̀rzè.

⁵ Irzɔ hwa arzɛ i hwɛni ndi Rzàŋgo hvɔ̀kɔ. Ndèŋgàna irzɔ hwa arzɛ jò òhvi ndi lì lòkɛ̀ lɔ̀kɔ̀, ndèŋgànà i lu hvɛ ndi lì lùhwìrzɛ̀ lɔ̀kɔ̀.

⁶ Lohwɛ̀ lɔ̀kɔ̀ ndi irzɔ hwa arzɛ i gbèeyà ndèŋgàna mɔ̀ ndi à hwèlì Tatɛ̀ hwa irzɔ hwa arzɛ. Mɔ̀ ndi à jo kànèyà irzɔ hwa arzɛ. À jò gbeyà irzɔ hwa arzɛ ò lì gbèeyà tɔ̀ mamɛ ema à arza nanù ema i gbeye, ndèŋgànà mɔ̀ à hwèlì ò tenì yà irzɔ hwa arzɛ nà èlìŋgɛ̀ yà eni yà arzɛ.

⁷ Krirztò à jò ŋgbèlì irzɔ hwa arzɛ màhwèyà mà towotowo, ò lìmɛ̀nì nà oma mɔ̀ à lìŋgàni. Ndi lìŋgi jàhwèyà lì rza enje ndi nyàyi hvɔ̀kɔ.

⁸ Ɔ̀ndeŋgàtɛ̀ è tìlahwì ò kààtì yà Lohwà nanù ema, “À mà ɛndɛ ò èki ema è kàrzàmi rzayi-rzayi. Nà oma à mà hwɛ lì ɛndɛ, à mà ɛ̀ndɛ̀nɛ̀ hwàkɔ̀yèlì hwa eni ema à mà rzùwanè, rzìi à ŋgbàa hwatò hwa eni màhwèyà.”

⁹ Nà oma è tìlahwì nanù ema, “A ma ɛndɛ o èki ema e kàrzàmi rzayi-rzayi.” Mamɛ e hwèlì jànda ja ini jòohwi e? Ène e uŋmɛ̀lɛ̀ ndi nanù ema, mɔ̀ à mà loma lì jà o èki ema e rzɔ̀ŋgɔ̀, ema e hwèlì ndi ene rze.

¹⁰ È mɔ̀ ema à mà jà o e rze, mɔ̀ mɛnɛ hvɛ ndi à mà ɛndɛ o èki ema e kàrzàmi lì aka weki hwe arzɛ. A ma ɛndɛ o ŋmanyu, aŋga nanù hweyà hwe arzɛ hwe ondìrzɛ̀hwɛ.

¹¹ Mɔ̀ ndi à ŋgbàa hwatò màahweyà. A ma gbeyà lòŋgo la hwatò ò lì hwɛ i àpɔ̀rzìtòlò, lòŋgo hwà-òhwèlì hwa hwèlìŋgɛ̀, lòŋgo hwa-ɛndɛ̀nàmɛ̀ɛndi, lòŋgo hwàtìmbèlì hwa hwatò ema hwa lòkɛ̀yi, ndèŋgàna à mà gbèeyà lòŋgo hwà-òkòlèlì o lì okòlɛ̀ hwatò ema hwa lòkɛ̀.

¹² Krirztò à mà gbeyà ndi nanù aŋga nanù hwanu hwatò hwa rzèkeya hwatò hwa ama Lohwɛ̀, o lì gbeyà èwòlò ya ama Lohwɛ̀. A ma gbeyà ndi nanù, aŋga nanù hwatò ema hwa lòkɛ̀yi ema hwa gbèyi ndi na e nyo ya ama Krirztò hwe imbame.

¹³ Ène e o hwɛ natɛ̀ɛ na e hvonda ema irzɔ hwa arzɛ jo ò hwɛ mòtò mɔ̀kɔ ndèŋgàna na oma i lòkɛ̀ è Ŋmanà wà munyanà wa ama Lohwɛ̀ jo ò mo hwiya. I hwèlì tɛ nanù, e jo gbeyà jo ò hwɛ hwatò ema hwà mà oŋwɛ o ma i ma hwɛ nàa Krirztò ema a mo òŋwɛ.

¹⁴ O eŋge hvonda i rza hwɛ hvɛ ndi nàa hwàna. Ène eyà e o gbèeyà hwatò ema hwa lukɛlɛnɛ hwa o òkolɛ hwatò hwèokòlelì hwe mòlàŋgà hwa rza o tànɛyi o lì jo lukɛlɛ na lì jo gbèeyà ema i gbeeye hweyà ema hwe rza hvomɛ̀nɛ̀. I rza o hwɛ ndi nàa wɔ̀ɔ̀lɔ̀ ema e mbɛ̀hvɛ̀nì e neŋgirzɛ o tɔ̀ ima èhvàrzù.

¹⁵ I rza ò hwɛ nanù ndi i hwɛ ò lì ohwa è jɔ̀kɛ̀ nà lì à uŋmɛ̀lɛ̀nɛ è ndìŋgɛ mɔ̀kɔ nà ɔ̀nɛyi. Inyɛ̀ ì gbèyi nanù, aŋga nanù jò òŋga ò ì hvèyò ja arzɛ nà lì hwɛ nàa Yerzù Krirztò ema mɔ̀ ndi à hwèlì mòòhvò.

¹⁶ Krirztò à rzàŋga hwatò hwa eni ò èki yɔ̀kɔ nà oma ikɛŋgɛ jà è nyo i làta è nyo yà mòtò. Tɔ̀ ima ènàmà yà nyo è gbèyi tɛ èwòlò yà eni èwòlò, nanù oma è nyo yà arzɛ è oŋga nà lì eta. Nànù hvɛ ndi è hwèlì nà mòndeŋgè mò hwatò hwa ama Lohwɛ̀.

Lòŋgɛ lì hvènya la hwaŋga ema hwa oŋgama Krirztò

¹⁷ O lìinà la ama Rzàŋgo, na e kòkòwɛ̀lɛ̀ kɔ̀yi-kɔ̀yi nanù ema e rzi lìya lòŋgɛ nàa hwatò ema hwa rza hwiyɛ̀ɛ Lohwɛ̀. Hweya ema hwa lùtèyà hwe hwèlì ndi hweyà ema hwe rza hwɛnɛ wòlìto ndeŋgànɛ̀lɛ̀ hwene hweyà hwe rza tànɛyi lì hwa oŋgowàna.

¹⁸ Èhwanja màlùtèyà ma awu ma hwèlì ndi màlùtèyà ma wòhwe wɔ̀ hwa rza oŋgama hweyà hwa ama Lohwɛ̀. Hwa rza ohvi lòŋgɛ ema Lohwɛ̀ a ŋgbà èhwanja hwa ohvi maniya ndeŋgànɛ̀lɛ̀ hwa rza hwi e njiya ya ama Lohwɛ̀.

¹⁹ Hwa rza oka irzɔ̀ni hwa gbèi tɛ eyà ya wòhwe, hwa aŋgbèlɛ̀yi wɔ̀ hwiti o lì gbeyà mamɛ ema e nyàma ya nyo ya arza. Hwa ohvi e nyɔ̀ŋgi i hvonda ja arzɛ o lì gbèeyà hweyà hwe ŋgàndi.

²⁰ Ndi e hvonda ema hwà mà o òkolɛ lì hvomɛ̀nɛ̀ Krirztò, rzeketɛ ene tumba lòŋgɛ ɔ̀ndi hwà mà e ohweyà nanù ema e hwɛni lì hwɛnɛ.

²¹ Nà hwi nanù ema e ma hweya hweyà hwe jɔ̀kɛ̀ lì hvomɛ̀nɛ̀ Krirztò. Nà oma e ma hwɛ mòtò mɔ̀kɔ na mɔ̀, hwà mà e ohweyà hweyà o lì mo hvomɛ̀nɛ̀.

²² Hwa mà è okolɛ̀ ò lì hwɛ̀mɛ̀ ɛ̀ɛ̀mɛ̀ yà worzo ema è mà lomè lì hwɛ̀nɛ̀. Ò eŋge hvonda mòŋgɛ mà anyu ma mà hwɛ wòhwe ehwànja è mà ohva ndi mèèmà mè lì gbèeyà hweyà hwe wòhwe mɛnɛ. Meŋge mèèmà ema è mà hwɛ̀nɛ̀ ò lì gbèeyà hweyà hwe wòhwe mè mà è eŋgìrzɛ̀.

²³ È mà okòlɛhwɛ̀ nanù ema è hwɛmɛ Lohwɛ̀ à è tìkòwè mèèmà mè anyu aŋga nanù è lùwa mɔ̀ŋgɛ̀lɛ̀ mà hvènya.

²⁴ Lohwɛ̀ à mà è ŋgbà ɛ̀ɛ̀mɛ̀ hvènya ema è gbèyi ndi nàa ɛ̀ɛ̀mɛ̀ ya eni, o èŋgànɛ̀lɛ rzɔ ɛ̀ɛ̀mɛ̀ ya anyu e hwɛ̀ɛ ndi nàa ɛ̀ɛ̀mɛ̀ ya eni hvènya. Ɛ̀ɛmɛ̀ ya anyu hvènya e hwèlì ndi ɛ̀ɛ̀mɛ̀ hvènya ya jɔ̀kɛ̀ na oma Lohwɛ̀ a arza ndèŋgànɛ̀lɛ e hwèlì wòtani.

²⁵ O èŋgànɛ̀lɛ̀ rzɔ e hwɛmɛ hweyà hwe lì kɔ̀. Ja àwòhwànɛ̀lɛ̀ e jɔ̀kɛ̀ mɔ̀kɔ na ɔ̀nɛyi, ehwànja i gbèyi ndi nàa hwatò ema hwa ahviyànɛ nyo hvɔ̀kɔ na Krirztò.

²⁶ È tàtì tɛ e rzìi emeyà nanù ema hwetato hwe anyu hwe e lìyɛlɛ o wòhwe. È rzi lìyana hwetàtò wùùnya hwa arzɛ.

²⁷ È rzi aŋgbɛ̀ inyɔ hwiti o ma Mòkarzɛ̀ o lì e ɔnjɔ.

²⁸ Hwàyihwɛ̀ hwa hwɛmɛ lìihwa. Ndi tɔ̀ nanù hwa gbeyàne màà mà awu o lì gbeyà èwòlò na ŋmèma mɔ̀kɔ. Aŋga nanù, hwa luwa yoma ema hwa tànɛyi lì oŋgowàna hvɛ mèlìrza me hwatò.

²⁹ È rzi ohwa mbɔrzi ja èèti o wàna ja anyu. È ohwe ndi hweyà ema hwe oŋgowàna hwatò ò lì oŋgà o lìlòkɛ̀ la awu. Aŋga nanù hwaŋga ema hwe e okànèyà na oma e ohwa hwà okoweya o johwi ja anyu.

³⁰ È rzi gbeyà hweyà ema hwe gbèeyà Èlìŋgɛ̀ yà Wòtani e hwɛ̀ɛ rzɔ̀lùu. Èlìŋgɛ̀ yà Wòtani e gbèyi ndi nàa embànèlì ema Lohwɛ̀ à mà e ika o lì ambɛlɛlɛ wùùnya wo lìrzùkù ema a e kɔ̀tɔ̀.

³¹ È ulɛ̀ màlùtèyà mà wòhwe mà arzɛ ema mè è hwèlì ò mèèmà mè anyu, rzìi è hwɛmɛ lì ambirzɛnɛ nà hwètàtò hwe ŋginyà ema hwe hwèlì ò mèèmà mè anyu. È hwàà, motàŋgo, nà ɛkɔ̀ni ò mèèmà mè anyu. È rzi tɔ̀wɔ tɔ̀ lì ahwɛnyɛnɛ mɔ̀kɔ nà ɔ̀nɛyi, è rzi ahwɛ̀nɛ̀nɛ̀ wɔ̀ɔ̀ nà tɔ̀ ima mòtò.

³² Inyɔ è àwùŋmɛ̀lɛ̀nɛ̀ mɔ̀kɔ nà ɔ̀nɛyi èènjì ndèŋgana è àwòhvànɛ mèèmà mè ììlì. È àlàkìrzɛ̀nɛ̀ mɔ̀kɔ nà ɔ̀nɛyi nà oma Lohwɛ̀ à mà è làkìrzɛ̀ lì akeyà nà Krirztò.