Ɛ̀hvìrzìyà 1 - Mokpwe: Bakwery (New Testament)

Pàwolò a omelì hwatò ìikɔ̀mi

¹ Ìmba Pàwolò ndi nà e omelì inì itita ema nà ma hwɛ̀lɛ̀hwɛ̀ na lemeyà la ama Lohwɛ̀ o lì hwɛ àpɔ̀rzìtòlò ya ama Yerzù Krirztò. Ìmba na e tìleya inyɔ hwatò hwa ama Lohwɛ̀ ema hwa lìya o mbowà ya Ɛ̀hvɛ̀rzɔ̀rzì. È hwèlì ndi mòtò mɔ̀kɔ na Yerzù Krirztò ema e mo òŋgama hvɛ na ŋmèma mɔ̀kɔ.

² Inyɛ̀ è ndèli nà ɛ̀yɔ̀lɛ̀ ema è uwɛ̀lɛ̀lɛ̀yi oma Lohwɛ̀ Tatɛ̀ wà arzu nà Rzàŋgo Yerzù Krirztò è hwɛ nà inyɔ.

Jàhwèyà ema hwatò ema hwa hwèlì nà Krirztò hwa ò lùwɛ̀

³ Inyɛ̀ je eke Lohwɛ̀. Mɔ̀ ndi à hwèlì Lòohwà la ama Rzàŋgo wa arzu Yerzù Krirztò na Tatɛ̀ ya eni. Lohwɛ̀ ndi à hwèlì e mɔ̀ ema à mà jo nàmìrzɛ̀ na menàmirzelì me arzɛ ema me uwɛ̀lɛ̀lɛ̀yi o ŋmanyu yà lohwà. A gbèyi ndi nanù èhwanja irzɔ ima hwɛ ndi mɔ̀kɔ na Krirztò.

⁴ Ndèŋgànà Lohwɛ̀ à è wèka è rze, à mà màà lì jò hvɔ̀rzɔ̀ ò lì hwɛ hwatò wà eni mòndèŋge nà Yerzù Krirztò. À gbèyi ndi nanù, aŋga nanù irzɔ ì hwɛ wòtani ema ì rza ohva màtònà ò worzò wò ama Lohwɛ̀. Nà oma Lohwɛ̀ à jò lìŋgàni,

⁵ mɔ̀ à mà lòma lì ika nà è kòòhwà, à mà irzɔ jò ò hwɛ ndi hwàànà hwa eni, lì akeyà nà èwòlò ema Yerzù Krirztò à mà jò gbèeyà. Lohwɛ̀ à mà gbeyà ndi ene eyà nanù, èhwanja nanù ndi à mà tɛ̀yirzɛ̀ nà oma è mò lɔ̀ɔ̀nì.

⁶ À jò gbèyi ema i hwɛ hwàànà wà eni aŋga nanù irzɔ i mò eka ò hweyà hwe gbamù ema à mà gbeyɛ. À jò ŋgbèlì è ndèli yà eni ndɛnɛ ò ŋgundu. Irzɔ i lù eŋge ndèli ehwànja ì hwèlì ndi mɔ̀kɔ nà è ŋmanà wà eni wà munyanà ema mɔ̀ à lìŋgàni rzayi-rzayi.

⁷ Nà oma i hwèlì mɔ̀kɔ nà Krirztò, ndèŋgànà màyija mà eni ema à jò kòmelì ɔ̀ndeŋgàtɛ̀ i kɔ̀tɔ̀hwì ò lì làkìrzɛ̀ là wòhwe wò arzu. Nà oma Lohwɛ̀ à mà gbeyɛ ene, à jò uŋmɛ̀lɛ̀ nanù ema è ndèli yà eni è olo.

⁸ A jo ŋgbelì ene ndèli ya arzɛ, rzìi a jo ŋgbelì hvɛ lìhwiyè rzayi-rzayi na lì jo gbèeyà o lì rzɔ̀ŋgìtɛ̀nɛ̀ hweyà rzayi-rzayi.

⁹ Lohwɛ̀ à mà gbèeya hweyà hwe arzɛ na oma mɔ̀ à mà arze nanù ema a hwe gbèye. A jo gbèyi o lì hwiya hweyà ema natɛ̀ɛ na naŋgɛ, tɔ̀ mòtò a rza rzɔ̀ŋgìtɛ̀nɛ̀. Hwene hweyà hwe hwèlì ndi hweyà ema mɔ̀ à mà gbeye lì akeyà na Krirztò.

¹⁰ Lohwɛ̀ à mà tɛ̀yirzɛ̀ nanù ema à ò gbeyà hwene hweyà hwe arzɛ ò è hvonda yà jɔ̀kɛ̀. Ò eŋge hvonda à ò rzàŋga hwèèmà hwe arzɛ ema hwe hwèlì ò ŋmanyu yà lohwà nà ò rze yà mɔ̀nyɛ̀ rzìi hwe hwɛ ò rze yà ama Yerzù Krirztò ema mɔ̀ ndi à hwèlì mòòhvò.

¹¹ Nà oma ì hwèlì mɔ̀kɔ nà Krirztò ɔ̀ndeŋgàtɛ̀ Lohwɛ̀ à mà jò hvɔ̀rzɔ̀ ò lì hwɛ̀ɛ̀ è hwa eni hwatò. À mà gbeyà ndi nanù èhwanja nanù ndi mɔ̀ à mà tɛ̀yirzɛ̀ nà è kòòhwà. À gbèyi hweyà hwe arzɛ ò lì gbèyɛ̀nɛ nà oma à mà hwe tɛ̀yirzɛ̀.

¹² À mà gbeyà ndi nanù, aŋga nanù irzɔ ema i mà lòmɛ lì ika lìhvìta là arzu ò mà Yerzù Krirztò, jò ò ohva ɛ̀ɛ̀mɛ̀ ema è ò gbeyɛ hwahvɛhvɛ hwatò ò lì mò eka èhwanja ò è ŋginyà yà eni ndɛnɛ.

¹³ Inyɔ hvɛ è mà hweyà ŋmɛ̀ndì mò jɔ̀kɛ̀. Mòŋgo ŋmɛ̀ndì mò jɔ̀kɛ̀ mɔ̀ ndi mò hwèlì Ŋmɛ̀ndì mò Gbamù ema mò è jànelì lì kɔ̀tɔ̀wɔ̀. Inyɔ è lòkɛ̀ Yerzù ndèŋgànà è ma hwɛ ndi mòtò mɔ̀kɔ nà mɔ̀. Ène eyà è mà gbeyà Lohwɛ̀ à mà è ŋgbà Èlìŋgɛ̀ yà Wòtani ema à mà ohwe nanù ema à ŋgba hwatò hwa eni. Èŋge Èlìŋgɛ̀ yà Wòtani è hwèlì ndi nàa embànèlì ema è uŋmɛ̀lɛ̀ nanù ema inyɔ è hwèlì ndi hwatò hwa ama Lohwɛ̀.

¹⁴ Ène Èlìŋgɛ̀ yà Wòtani yɔ ndi e jo uŋmɛ̀lɛ̀ nanù ema i luwa hwèèmà ema Lohwɛ̀ à mà jo kàkɛ̀nɛ nanù ema i luwa. Irzɔ jo ò luwa hwene hwema e hvonda ema Lohwɛ̀ à ò jo rzolohwɛ irzɔ hwatò hwa eni o èki ema i kakahwi. Ène eyà e o gbèeyà hwatò wo ò eka Lohwɛ̀ o nyòla e ŋginyà ya eni ndɛnɛ.

Lì kànɛ̀ la ama Pàwolò

¹⁵ Ò lìni lìtiŋgà nà mà hweyà nanù ema è lòkɛ̀ Rzàŋgo Yerzù Krirztò nà lì lìŋgàna hwatò hwa arzɛ hwa ama Lohwɛ̀. Ò èŋgànɛ̀lɛ rzɔ,

¹⁶ imba nà è ekeyà Lohwɛ̀ ihvonda ja arzɛ nà hwèlì tɛ lì è kànɛ̀lɛ̀lɛ̀.

¹⁷ Ndèŋgànɛ̀lɛ̀ nà kanɛ̀ ndi nanù ema Lòohwà là ama Rzàŋgo yà arzu Yerzù Krirztò, Tatɛ̀ yà èluhwe, à è ŋgbe Èlìŋgɛ̀ yà Wòtani nà ò lì rzɔ̀ŋgìtɛ̀nɛ̀ iŋgi wùndɛ̀ jà hweyà ema hwe utamì aŋga nanù è hwe hwiya gbamù.

¹⁸ Nà kanɛ̀ nanù ema, Lohwɛ̀ à è lìhvowe mèèmà mè anyu aŋga nanù è hwiya hweyà hwe gbamù ema è mà ika mèèmà mè anyu ò tenì èhwanja à mà è hvɔ̀rzɔ̀. Nà kanɛ̀ hvɛ nanù ema è hwɛni lì rzɔ̀ŋgìtɛ̀nɛ̀ màhwèyà mà ndɛnɛ ema mɔ̀ à hwɛni lì ŋgba hwatò hwa eni.

¹⁹ Nà kanɛ̀ hvɛ nanù ema, è hwiya è ŋginyà yà eni ndɛnɛ ema è olò lì aka hweyà hwe arzɛ, ndèŋgànà eŋge ŋginyà ndi è jò oŋgòhwànà irzɔ ema ì mò lòkɛ̀yì. Ène ŋginyà ndɛnɛ,

²⁰ yɔ̀ ndi Lohwɛ̀ à mà gbeyàne ò lì hvùmùlɛ̀ Krirztò ò kpelì rzìi è mò lììlɛ̀ ò èki yà èluhwe ò èhvàrzù yà lìya là momɛ̀ là ama Lohwɛ̀ ò lìkànèyà là ŋmanyu yà lohwà.

²¹ Krirztò à hwèlì aŋga, à kànèyà iŋginyà ja arzɛ nà hwàkànèlì hwa arzɛ. Lìinà là eni lì hwɛni ŋginyà lì aka mìinà mà hwàkànèlì hwa arzɛ ema hwa hwèlì ò naŋgɛ nà ò è hvonda ema è ò jɛ̀ɛ̀.

²² Lohwɛ̀ à mà ika hweyà hwe arzɛ ò rze yà lìkànèyà là ama Krirztò. À mò ŋgbèlì hvɛ wònjà ò lì kànèyà hweyà hwe arzɛ, ndèŋgàna mɔ̀ ndi à hwèlì mòòhvò mò lì arzàŋganɛ là hwatò hwa Lohwà.

²³ Lì arzàŋganɛ la hwatò hwa Lohwɛ̀ lì hwèlì ndi è nyo yà ama Krirztò. Liŋgi lì arzàŋganɛ là hwatò hwa Lohwɛ̀ ndi lì hwèlì lì ondìrzɛ̀ la ama Krirztò ndeŋga Krirztò à ondìrzɛ̀ hweyà hwe arzɛ ò tɔ̀ ima èki ema hwe hwèlì.