2 Tìmotì 3 - Mokpwe: Bakwery (New Testament)

Pàwolò a ohwi lì hvomɛ̀nɛ̀ wòhwe ema wo ò hwɛ o mèenyà me lìrzùkù

¹ Ìi Tìmòtì na arza ema o hwiye nanù ema, o menya me lìrzùkù hweyà hwe o amba.

² O eŋge hvonda o hwɛ hwatò hwa ikuka, hwatò ema hwa lìŋgàni wolì, hwaŋga ema hwa ayèkirzɛ̀, hwaŋga ema hwa hwɛnyɛnɛ, hwaŋga ema hwa rza hweyàna irzàŋgo na inyàŋgo ja awu, hwaŋga ema hwa rza ekɛnɛ na hwatò ema hwa rza gbeyà mamɛ ema Lohwɛ̀ a arza nanù ema hwa gbeye.

³ O ò hwɛ hvɛ hwatò ema hwa rza uŋmɛ̀lɛ̀ hwahvɛhvɛ hwatò e ndìŋgɛ, o ò hwɛ hvɛ hwatò ema hwa rza ohvɛ mèèmà me ìilì, hwatò hvɛ ema hwa kɔɔyeya hwahvɛhvɛ hwatò hweyà, hwatò hvɛ ema hwa rza o hwiyɛ lì a ohvɛlɛ la awu, hwatò hvɛ ema hwa hwèlì kayɛ na hwatò hvɛ ema hwa rza lìŋgànɛ hweyà hwe gbamù.

⁴ Hwa o hwɛ hwatò ema hwa o àhwirzɛ̀ imbunda ja awu, hwatò hvɛ ema hwa lìya lòŋgɛ la mooŋgoŋgo, hwatò ema hwa ondi na kumba, na hwaŋga hwatò ema hwa lìŋgàni hweyà hwe ene rze lì aka hweyà hwe ama Lohwɛ̀.

⁵ O ò hwɛ hwatò ema hwa awuŋmɛ̀lɛ̀ ò à ɛnɛ oma hwa gbeyà ndi mamɛ Lohwɛ̀ a arza, ndi hwa rza o arza nanù ema e ŋginyà ya ama Lohwɛ̀ e tikowe mòŋgɛ ma awu. O rzi ɛndɛ o toŋgoŋgo ya lìŋgi lìtumba la hwatò.

⁶ Lòŋgo la hwanu hwatò hwa lùkɛ̀lɛ̀ hwatò. Wɔ̀ hwa kpèelì tɛ ndawò hwa lùkɛ̀lɛ̀ hwaŋga hwalanà ema hwa rza ohvɛ mahwiye ema hwa lìiya o tenì ja iŋgi ndawò. Hwàŋga hwalanà hwa gbeyà hweyà hwe wòhwe rzayi-rzayi nyayi ema woŋgo wòhwe wo hwa lìtana ndi nàa muna ndi hwa hwànɛ. Màlùteyà ma wòhwe ndi ma hwa kànèyà.

⁷ Ini nyayi ja hwalanà, hwa hwèlì ndi i hvonda ja arzɛ o lì nɔ̀ŋgɔ hwèyòkòlèlì hwe hvènya, ndi wɔ̀ hwa rza tànɛyi o lì rzɔŋgìtɛ̀nɛ̀ hwèyòkòlèlì hwe jɔ̀kɛ̀ hwe ama Lohwɛ̀.

⁸ Nà oma Jànɛ̀rzi na Jàmbrɛ̀rzi hwà mà teŋgɛ̀nɛ Morzè o hvonda ema e ma aka, nanù hvɛ mɛnɛ ndi hwà-òkòlèlì hwa mòlàŋgà hwa teŋgɛ̀nɛyi hwèyòkòlèlì hwe jɔ̀kɛ̀. Hwa hwɛni ndi màlùtèyà ma wòhwe, Lohwɛ̀ à mà hwa kìnyɛ̀lɛ̀ èhwanja hwa rza ohvi tɔ̀ lìlòkɛ̀ tɔ̀ lɔ̀kɔ.

⁹ Ndi wɔ̀ hwa o lukɛlɛ ndi hwatò ò ŋmanà hvoka hvonda mɛnɛ, èhwanja hwatò hwa o ayembɛ èèti ya awu ŋgàna hvɔ̀kɔ nà oma e ma gbèyɛ̀nɛ hvɛ na Jànɛ̀rzi na Jàmbrɛ̀rzi.

Pàwolò a hwatɛyi o lì kòkòwɛ̀lɛ̀ Tìmòtì

¹⁰ Ndi o wa Tìmòtì o nɔŋgi gbamù hwèyòkòlèlì ema nà mà okolɛ hwatò, ndèŋgàna o nɔŋgi ɛ̀ɛ̀mɛ̀ ya ami, ndèŋgàna o òŋgami mamɛ ema na arza lì gbeyà o lòŋgɛ la ami. O hwi oma na lòkɛ̀yì Lohwɛ̀, o hwi lì àjùlɛ̀ la ami ndèŋgàna o hwi e ndìŋgɛ ya ami ema na uŋmɛ̀lɛ̀ hwatò. O hwi nɛ imba na kaki ŋmèma o ene èwòlò ema na gbeyà.

¹¹ O hwi nɛ hwatò hwa no tàkìrzɛ̀, ndèŋgàna o hwi mètàkà ema imba na lu o tenì ya moŋgo motaka. O hwi lìtumba la hweyà ema hwe ma no gbèyɛ̀nɛ o tenì ya màmbowà mà Antìyɔ̀kì, Ikònìyùmì na Lìrzìtìrà. O hwi nɛ nà mà kake ŋmèma o mètàkà ema nà mà luwe aŋga. Ndi Rzàŋgo Yerzù à mà no rzùŋga o tenì ya meŋge mètàkà me arzɛ.

¹² Ndi o jɔ̀kɛ̀, tɔ̀ ima mòtò ema a arza o lì lìya lòŋgɛ la ehve-ehve, na oma mɔ̀ à hwèlì na Yerzù Krirztò a hwɛni lì tàkìrzɛ̀hwɛ o màà mà hwatò.

¹³ Ndi hwatò hwa wòhwe na hwatò hwa menito, hwa o ɛndɛ ndi o worzo ò lì gbeyà hweyà hwe wòhwe, o lì lukɛlɛ hwatò, ndèŋgàna hwahvɛhvɛ hwa o hwa lukɛlɛ.

¹⁴ Ndi o wa Tìmòtì, ɛndɛ ndi o worzo ò lì gbeyà hweyà ema o ma okowɛ ema o lòkɛ̀ nanù ema hwe hwèlì ndi e jɔ̀kɛ̀ èhwanja o hwi hwatò ema hwà mà o òkolɛ e hweyɔ.

¹⁵ Ndeŋgana o hwi ema lìwòteyà o hwàna o ma hwiya mamɛ eyà ya Lohwà e hwèlì. Ène eyà ya Lohwà yɔ ndi e o ŋgbelì lìhwiyè o lì hwiya nanù ema Lohwɛ̀ à mà o rzùŋga èhwanja o lòkɛ̀ Yerzù Krirztò.

¹⁶ Tɔ̀ mamɛ ema e tìlahwì o kààtì ya ama Lohwɛ̀ e uwɛ̀lɛ̀lɛ̀yi ndi o ma Lohwɛ̀. È oŋgowàna o lì okolɛ hwatò, e oŋgowàna o lì ohweyà hwatò màtonà ma awu, e oŋgowàna hvɛ hwatò ò lì tɛnɛnɛ màtonà ma awu, ndèŋgàna e oŋgowàna hvɛ hwatò ò lì gbeyà mamɛ ema e hvomɛ̀nɛ̀.

¹⁷ Eyà ya Lohwà e oŋgowàna aŋga nanù, e mòtò ema a gbèeyà Lohwɛ̀, a hwɛni lì awombɛlɛ, o lì gbèeyà hwèwòlò hwe arzɛ hwe gbamù.