2 Tìmotì 2 - Mokpwe: Bakwery (New Testament)

Tìmòtì a àŋgàmɛ̀nɛ̀yi ndi lì hwɛ ŋmààna njùma wà jɔ̀kɛ̀ wa ama Krirztò

¹ Ìi Tìmòtì kòkò, e ndèli ema Yerzù Krirztò a o ŋgbelì e hwɛ ndi nanù mɛnɛ o lì o ètìrzɛ̀.

² Hweya ema o ma hweye ema nà mà okolɛ rzayi-rzayi ja hwatò lì hvomɛ̀nɛ̀ Krirztò, o wa hvɛ o hwe okolɛ o hwahvɛhvɛ hwatò ema wɔ̀ hvɛ hwa tànɛyi lì okolɛ hwahvɛhvɛ hwatò.

³ O a ajùlɛ̀nɛ̀ mètàkà nàa ŋmanèlì wà njuma wà gbamù wà ama Yerzù Krirztò.

⁴ Ŋmanèlì wa njuma ema a hwèlì o lìyando la njuma, a arza ndi o lì òkirzɛ̀ e mòtimbèlì wa eni mɔ̀nyɛ̀ŋgì. O eŋgànɛ̀lɛ̀ mɔ̀ à rza gbeyà hweyà ema hwatò ema hwa rza enje hwàanà njuma hwa gbeyà.

⁵ Èhvɛhvɛ nyàyi ya lì gbèeyà Krirztò, e hwèlì ndi nàa mòtò ema a hwaŋga lìhwaŋgi na hwahvɛhvɛ hwatò, mɔ̀ à rza tànɛyi a luwa ekòotò e rzi hwɛ nanù ema mɔ̀ à ikayi imbenda ja lìhwaŋgi.

⁶ È mògbeyà mbota ema a gbèyi èwòlò ya gbamù, mɔ̀ ndi à àŋgàmɛ̀nɛ̀yi o lì hwɛ e mòtò wà worzo ò lì laa e mbota ya worzo.

⁷ O lùtèyà kɔ̀yi-kɔ̀yi mamɛ ema na o òhweyà, èhwanja Rzàŋgo à ò oŋgòwànà o lì hwe rzɔ̀ŋgìtɛ̀nɛ̀ hwe arzɛ.

⁸ O hwɛni ndi lì ɔ̀ŋgɛ̀lɛ̀ nanù ema Yerzù Krirztò ema à mà hwɛ o e nyɔ̀ŋgɔ̀nì ya ama kiŋgɛ̀ Dàhwitì, Lohwɛ̀ à mà mo hvùmùlɛ̀ o kpelì. Ŋmɛ̀ndì mò Gbamù mòno ema imba na òhwèyà hwatò.

⁹ Ndèŋgàna, èhwanja na òhwèyà hwatò mono ŋmɛ̀ndì mò gbamù, ɔ̀ndeŋgàtɛ̀ imba na taka, natɛ̀ɛ hwa no kaki iŋgɔkɔhwi ò à ɛnɛ oma na hwèlì ndi mòtò ema a undi mbenda. Ndi tɔ̀ mòtò a rza tànɛyi a kaka Eyà ya ama Lohwɛ̀ na ŋgɔ̀kɔ̀hwi.

¹⁰ O eŋgànɛ̀lɛ̀ na àjùlɛ̀nɛ̀ mono mòtàkà, aŋga nanù hwatò ema Lohwɛ̀ à hvɔ̀rzì wɔ̀hvɛ hwa ò luwa lìrzùŋgàhwa ema lì uwɛ̀lɛ̀lɛ̀yi ò mà Yerzù Krirztò, ndèŋgàna hwa o hwɛ ndi o rze ya èluhwe ya ama Lohwɛ̀ o gbìndèyà na o gbìndèyà.

¹¹ Hwene hweyohwèlì hwe hwèlì ndi e jɔ̀kɛ̀ nanù ema, “È hwèlì tɛ ema, irzɔ i ŋwelì na Krirztò, nanù oma jo ò hwɛ o lòŋgɛ na mɔ̀.

¹² Ja àjùlɛ̀nɛ̀ tɛ o lì taka na mɔ̀, irzɔ jo ò kànèyà na mɔ̀. Irzɔ i mo rzɔ̀rzi tɛ, mɔ̀hvɛ a hwɛni ndi lì jo rzɔ̀rzɔ̀.

¹³ I gbèyi tɛ mamɛ ema Krirztò a arza nanù ema i gbeye, mɔ̀hvɛ a gbeyà hweŋge hwe arzɛ ema a ohwi nanù ema a gbeyà, èhwanja mɔ̀ à rza tanɛ lì arzɔ̀rzɛ̀ mɔ̀ ŋmìti.”

Pàwolò amà Tìmòtì a hwɛ e mògbèèlì wa gbamù

¹⁴ O hwɛ ndi o lì ɔ̀ŋgɛ̀lɛ̀nɛ hwaŋga hwatò ema hwa lòkɛ̀ hwene hweyà, o hwa kòkòwɛ̀lɛ̀ o worzo hwa ama Lohwɛ̀ nanù ema, hwa rza akanjɛnɛ mɔ̀kɔ na ɔ̀nɛyi lì hvomɛ̀nɛ̀ eyà ya Lohwà. Ène nyayi ya hvenda e rza oŋgowàna, ndi e hvàŋga lìlòkɛ̀ la hwaŋga ema hwa e òkànèyà.

¹⁵ O gbeye èwòlò ya aŋgɔ̀ na ŋginyà, aŋga nanù Lohwɛ̀ a ɛnɛ nanù ema o rza enje mògbèèlì ema a oka ìrzɔnì o lì gbeyà èwòlò ya eni. Ndèŋgànɛ̀lɛ̀ o hwɛni ndi lì hwɛ mòtò ema a okolɛ ŋmɛ̀ndì mò ama Lohwɛ̀ mò gbamù nà è jɔ̀kɛ̀.

¹⁶ O rzɔnjɛ̀lɛ̀ imbɔrzi ja arzɛ ja èèti na mbɔrzi ema i rza ohvɛ wòlìto, èhwanja hwatò hwa ohwa tɛ iŋgi tumba ja mbɔrzi eŋge e hwa gbeyà ndi o lì gbeyà hweyà ema Lohwɛ̀ a rza arza nanù ema hwa gbeye.

¹⁷ Lòŋgo là hwatò ema hwa ohwa iŋgi tumba ja mbɔrzi i hwèlì ndi Hàmɛ̀nùrzi nà Hvìlɛ̀tùrzì. Jòòhwì ja awu i hwèlì ndi nàa lìrziyɛyi ema lì rza kuwa lì laa mòtò o tenì.

¹⁸ Wɔ̀ hwà mà hwɛmɛ lìlòkɛ̀ la jɔ̀kɛ̀ ndèŋgàna hwa hwèlì hwa okolɛ nanù ema irzɔ ema i lòkɛ̀yi, Lohwɛ̀ à mà màa lì jo hvùmùlɛ̀. Ini nyayi ja hwèyòkòlèlì hwe hvàŋga lìlòkɛ̀ la loŋgo la hwatò.

¹⁹ Ndi tɔ̀ nanù hweyà ema Lohwɛ̀ à mà rzeeya, hwe rza tikowahwa. Ndèŋgana e tìlahwì o ŋmanyu ya eni nanù ema, “È Rzàŋgo e hwi hwaŋga hwatò ema hwa hwèlì e hwe eni,” ndèŋgàna e tìlahwì nanù ema, “Hwaŋga hwatò hwa arzɛ ema hwa ohwa nanù ema wɔ̀ hwa hwèlì ndi na e Rzàŋgo, hwa hwɛni lì kumbɛ e mburza o hwègbèèlì hwe wòhwe.”

²⁰ O tenì ya e ndawò yà mòndɛnɛ, lòŋgo là màluku mà mèyɔnjɔ ma gbeyànɛhwɛ ndi na gòòlù, lòŋgo mà hvomàhwi ndi na hwèeye, lòŋgo hvɛ mà gbeyànɛhwɛ ndi na mɔ̀nyɛ̀ mò jèka. Hwa gbeyàna lòŋgo ò hvonda ya ndèma hwenɛyi hvɛ tɔ̀ ima lìrzàkò la hvonda.

²¹ Tɔ ima mòtò ema a rzɔnjɛ̀lɛ̀ lì gbeyà la hweyà hwe mbindo, à ò hwɛ ndi nàa màlùkù mà mèyɔnjɔ ema me gbeyànɛhwɛ o ndèma yà towotowo. Oŋgo mòtò a ondi wòrzaŋgi ndèŋgàna e Rzàŋgo ya eni e mo gbeyàna. Ndèŋgana oŋgo mòtò a woŋgirzɛnɛyi o lì gbeyà eyà yà gbamù o tɔ̀ ima hvonda.

²² Ìi Tìmòtì, o rzi gbeyà hweyà hwe wòhwe ema imberza i gbeyà, ndi o keke ndi lì gbeyà mamɛ ema e hvomɛ̀nɛ̀, o inyàmɛnɛ lìlòkɛ̀ Krirztò o keke lì lìŋgàna hwahvɛhvɛ hwatò, o hwɛ hvɛ ndi o ɛ̀yɔ̀lɛ̀ na tɔ̀ ima mòtò. O nɔ̀ŋge hwene hweyà na hwahvɛhvɛ hwatò ema hwa kanɛ̀lɛ̀lɛ̀ Lohwɛ̀ na ŋmèma mɔ̀kɔ.

²³ O rzɔnjɛ̀lɛ̀ e mbɔrzi ya hvenda ya èèti ema e rza oŋgowàna tɔ̀ mòtò tɔ̀ eyà. O hwi nanù ema e hvenda ndi e jànà mòtaŋgo.

²⁴ Nàa e mògbèèlì wa ama Lohwɛ̀ o rza hwɛni lì tɔ̀wɔ, ndi o hwɛni lì hwɛ eenji na tɔ̀ ima mòtò, o hwɛni lì okolɛ hwatò gbamù, na lì ajùlɛ̀nɛ̀ hwatò kɔ̀yi-kɔ̀yi.

²⁵ O òkolɛ hwaŋga hwatò ema hwa o teŋgɛ̀nɛ, aŋga nanù wɔ̀ hwa hwiya nanù ema hweŋge hweyà ema wɔ̀ hwa ohwa lì o teŋgɛ̀nɛ hwe rza enje e jɔ̀kɛ̀. O hwa okolɛ tɛ o hwa ajùlɛ̀nɛ̀, o hwɛni lì hwɛnɛ lìhvìtà nanù ema Lohwɛ̀ a gbeyà ema hwa embɛ lùùrzè la awu aŋga nanù hwa a eŋgohwɛ̀, ndèŋgàna hwa rzɔŋgìtɛ̀nɛ̀ e jɔ̀kɛ̀ ya mamɛ ema eyà ya Lohwà e ohwa.

²⁶ Ène e hwa gbeyà hwa jà o mahwiye ma awu, rzìi hwa anjiya o ŋgùndèli ya ama mòkarzɛ̀. Mòkarzɛ̀ à mà màa lì hwa lɛmbɛ na lì hwa lukɛlɛ o lì gbeyà mamɛ ema mɔ̀ à arza nanù ema hwa gbeye.