2 Tɛ̀rzàlonìyà 3 - Mokpwe: Bakwery (New Testament)

È jo kànɛlɛlɛ

¹ Ìi wònyàmòwe o lì hvomɛ̀nɛ̀ hwehvɛhvɛ hweyà, imba na e ohweyà nanù ema e hwɛ ndi o lì jo kànɛlɛlɛ nanù mɛnɛ ema, ŋmɛ̀ndì mò gbamù mò ama Rzàŋgo mò hwɛ ndi o lì nyàleya hwahvɛhvɛ hwatò, ndèŋgànɛ̀lɛ̀ inyɛ hwatò hwa mo emeyà na èluhwe nyayi hvɔ̀kɔ na oma mo ma hwɛ na inyɔ.

² È kànɛ hvɛ nanù ema Lohwɛ̀ a jo kàrzolɛ o màà mà hwatò hwa ekɔ̀nì na hwatò hwa wòhwe ehwànja rzeketɛ tɔ̀ ima mòtò ndi à lòkɛ̀ ŋmɛ̀ndì mò gbamù mo ama Rzàŋgo Yerzù Krirztò.

³ Ndi Rzàŋgo à gbèeyà ndi na oma mɔ̀ à ohwi nanù ema a gbeyà, à ò yè ètìrzɛ̀, na lì e iŋga aŋga nanù Mòkarzɛ̀ a rza e gbeyà tɔ̀ wòhwe.

⁴ I ma ika mèèmà me arzu nanù ema Rzàŋgo à è gbèeyà o lì gbeyà tɔ̀ ima eyà ema je e ohwèlì nanù ema e gbeye, ndèŋgànɛlɛ e hwɛ ndi o lì e gbeyà.

⁵ Inyɛ̀ Rzàŋgo Yerzù Krirztò mɔ̀ ŋmìti à è gbeye o lì a embɛ nɛ Lohwɛ̀ à è lìŋgàni, ndeŋgànɛlɛ ema inyɔ hvɛ àjùlɛ̀ nà oma Yerzù mɔ̀ hvɛ ŋmìti à mà àjùlɛ̀.

Pàwolò a ohwi nanù ema mòtò a aŋgàmɛnɛ lì gbeyà èwòlò

⁶ Ìi wònyàmòwe kòkò, o lìna la ama Rzàŋgo wa arzu Yerzù Krirztò je e kànèyà o lì ahvɔ̀tɛ o mondeŋge mo hwàlòkèlì ema mo hwèlì rzìŋgà ndèŋgànɛ̀lɛ̀ ema hwa rza lìya lì hvomɛ̀nɛ̀ hwèokòlelì ema inyɔ e ma jo luwàne.

⁷ Èhwànja inyɔ hwiti e hwi nanù ema e àŋgàmɛ̀nɛ̀yi lì jo embàneyà. I rzi hwɛ rzìŋga e hvonda ema i ma hwɛ na inyɔ.

⁸ È hwi nanù ema i rzi laane tɔ̀ mòtò tɔ̀ mòlelì ema i rzi rzaahwɛ. Ndi irzɔ i ma gbeyà èwòlò na morzimbɔ mo ndɛnɛ ŋmerze na wuu nanù ema i rzi tàkirzɛ tɔ̀ mɔ̀kɔ wa anyu.

⁹ I ma gbeyà nanù rzeketɛ ema i rzi hwɛnɛ wònjà o lì e ohweyà nanù ema e jo òŋgòwànè. Ndi i ma hwɛ lì gbeyà nanù aŋga nanù tɔ̀ ima lìtumba la eyà ema i gbèeyà, e o hwɛ ndi nàa embànelì ema inyɔ hvɛ e aŋgàmɛnɛ lì oŋgama.

¹⁰ Èhwànja tɔ̀ e hvonda ema i ma hwɛ na inyɔ, i ma e kànèyà nanù ema, “Tɔ̀ ima mɔ̀ ema a rza imanɛlɛ lì gbeyà èwòlò, a rza aŋgàmɛnɛ lì ŋgbàahwa mòlelì.”

¹¹ Jo òhwa ndi ene eyà nanù ehwànja irzɔ i ma hweyà nanù ema o hwèlì lòŋgò la hwatò ò ìtììtènì ja anyu ema hwa hwèlì rzìŋga, hwa rza gbèeyà tɔ̀ eyà, ndi hwa lìŋgowa o lì rzɔ̀ɔ merzɔ̀ɔ̀ni o hweyà hwe hwahvɛhvɛ hwatò.

¹² O lìna la ama Rzàŋgo Yerzù Krirztò i kànèyà hwanu hwatò na lì hwa kòkòwɛ̀lɛ̀ nanù ema hwa lìya lòŋgɛ ema lì tɛnɛnɛ rzìi hwa gbeye èwòlò ya awu o lì luwa lì laa la wùnyà.

¹³ Ndi inyɔ wònyàmòwe kòkò, e rza hwɛni lì ɔ̀tɔ̀ o lì gbeyà hweyà hwe gbamù.

¹⁴ È hwèlì tɛ nanù ema o hwèlì mòtò ema a rza emelɛ o lì oŋgàma màmɛ ema e tìlahwì o tenì ya ene kààtì, e mo ika mìirzɔ. È rzi hwɛnɛ tɔ̀ eyà o lì mo gbeyàna, aŋga nanù oma à mà enya.

¹⁵ Ndi e rzi mo wowa nàa mɔ̀kɔ̀yèlì. Ndi nàa ŋmanyàŋgò wa anyu mɔ̀kɔ wa ama Krirztò e mo kòkòwɛ̀lɛ̀ o lì wowa hvonda.

Ìikɔ̀mi ja lìrzùkù

¹⁶ Inyɛ̀ Rzàŋgo Yerzù mɔ̀ ŋmìti ema a jo ŋgbàà ɛ̀yɔ̀lɛ̀, a e ŋgbe ɛ̀yɔ̀lɛ̀ o ihvonda ja arzɛ na o injiya ja arzɛ. Ndèŋgànɛlɛ irzɔ i kànɛ nanù ema inyɛ mɔ̀ à hwɛ na inyɔ hwa arzɛ.

¹⁷ Imba Pàwolò ndi nà tilì ini ikɔ̀mi nà lìya là ami. Ène è gbèyi ndi nàa èèmbànèlì ò kààtì jà amì jà arzɛ ema nà tìla. Nànù ndi imba nà tìla i kààtì.

¹⁸ Inyɛ̀ è ndèli yà ama Rzàŋgo wà arzu Yerzù Krirztò è hwɛ nà inyɔ hwa arzɛ.