2 Tɛ̀rzàlonìyà 1 - Mokpwe: Bakwery (New Testament)

¹ Imba Pàwolò mondeŋge na Rzàyilàrzì na Tìmòtì ndi na e tilelì ene kààti. Nà e tilelì ndi inyɔ hwatò ema e hwèlì o ŋmèmba mo e mbowà ndɛnɛ ya Tɛ̀rzàlonìya, inyɔ ema e hwèlì e hwa ama Lohwɛ̀ Tatɛ̀ wa arzu na e hwa ama Rzàŋgo Yerzù Krirztò.

² Inyɛ̀ Lohwɛ̀ Tatɛ̀ wà arzu nà Rzàŋgo Yerzù Krirztò hwa è ŋgbe è ndèli nà ɛ̀yɔ̀lɛ̀.

Lohwɛ̀ à ò kàyìrzɛ̀ hwatò nyayi ema è hvomɛ̀nɛ̀

³ Ìi wònyamòwè ì hwɛni lì eka Lohwɛ̀ ihvonda ja arzɛ lì hvomɛ̀nɛ̀ inyɔ. È hvomɛ̀nɛ̀ ò irzɔ lì gbeyà nanù, ehwànja lìlòkɛ̀ là anyu lì hwèlì lì oŋga rzayi-rzayi, rzìi è ndìŋgɛ ema è à ohvànɛ mɔ̀kɔ nà ɔ̀nɛyi è olo rzayi.

⁴ Ò eŋgànɛ̀lɛ rzɔ̀, ò ìtììtènì jà ŋmèmba mò hwatò hwa ama Lohwɛ̀, irzɔ jè è gbàànà kumba ò nyòla lì ajùlɛ nà lìlòkɛ̀ ema è hwɛni, nà oma hwatò hwa è tàkirzɛ nà mètàkà mè arzɛ ema è hvomɛ̀nɛ̀.

⁵ Hwene hweyà hwe uŋmɛ̀lɛ̀ nanù ema hwèkàyìrzèlì hwe ama Lohwɛ̀ hwe tɛmi ehve-ehve. Ò eŋgànɛ̀lɛ nàa è mbàko rzɔ, Lohwɛ̀ à è wòwa nàa hwatò ema hwa hvomɛ̀nɛ̀yi ò lì hwɛ ò lìkànèyà là eni. Èhwànja ò nyòla lìkànèyà là eni ɔndèŋgàtɛ̀ inyɔ è hwèlì è akeyà ò tenì yà màkekirzɛnɛ.

⁶ Lohwɛ̀ à gbeyà hweyà nyayi ema e hvomɛ̀nɛ̀. Hwàto ema hwe e gbeyà ema è akeyà ò tenì yà mètàkà, Lohwɛ̀ à hwa jàneyà wɔ̀ hvɛ mètàkà.

⁷ Lohwɛ̀ à gbeyà nanù ema è rza lùwa mètàkà hvɛ, ndèŋgànɛlɛ à gbeyà hvɛ nanù ema irzɔ hvɛ ì rza lùwa mètàkà hvɛ. Ène eyà è ò gbèèyɛ̀nɛ̀ è hvonda ema Rzàŋgo Yerzù à uwɛ̀lɛ̀lɛ̀yi ò ŋmanyu yà lohwà lì jà nà i aŋgèlì ja eni jà ŋginyà, ndèŋgànɛ̀lɛ̀ hwa ò toŋgàhwa nà mùùnya ema mò òŋwa.

⁸ À ò kɔ̀kìrzɛ̀ hwatò ema hwa rzɔ̀rzì Lohwɛ̀, ndèŋgànɛ̀lɛ̀ hwa rzɔ̀rzì ò lì oŋgamà Ŋmɛ̀ndì mò Gbamù ema mò òhwa lì hvomɛ̀nɛ̀ Rzàŋgo wà arzu Yerzù.

⁹ Rzàŋgo Yerzù à ò hwa kɔ̀kìrzɛ̀ nà mètàkà mè gbìndèyà. Wɔ̀ hwa rza ò hwɛ èki ema Rzàŋgo à hwèlì, ndèŋgànɛlɛ wɔ̀ hwa rza ò ɛnɛ hwèyòlòwèlì hwe ŋmàye mò eni.

¹⁰ Mɔ̀ à jèelì tɛ ò woŋgo wùnyà, hwatò hwa ama Lohwɛ̀ hwa ò mò eka, ndèŋgànɛ̀lɛ hwatò hwa arzɛ ema hwa lòkɛ̀yi hwa ò tàmà rzàyi-rzàyi. Inyɔ hvɛ è ò hwɛ ò ìtììtènì ja hwànu hwatò ehwànja è mà lòkɛ̀ ŋmɛ̀ndì ema ì mà è ohweyà.

¹¹ Nà oma hwene hweyà hwe arzɛ hwe jò hwèlì ò tenì yà mèèmà mè arzu, ɔ̀ndeŋgàtɛ̀ jè è kànɛlɛlɛ. Ì kanɛ̀ nanù ema, Lòohwà là arzu à è gbèeyà nanù ema è ò tànɛ ò lì lùwa hwèèmà hwe gbamù ema mɔ̀ à arza lì è gbèeyà nà oma mɔ̀ à mà è hvɔ̀rzɛ̀ ò lì hwɛ hwatò hwa eni. Ndèŋgànɛlɛ i kànɛ hvɛ nanù ema, à gbeyàne è ŋginyà yà eni ò lì gbeyà hweyà hwe arzɛ hwe gbamù ema inyɔ è arza, è ò hwe lùwa, ehwànja è lòkɛ̀ Krirztò.

¹² Ì kanɛ̀ ndi nanù aŋga nanù, lìinà là ama Rzàŋgo wà arzu Yerzù Krirztò lì ò luwa èluhwe ò ìtììtènì jà anyu, ndèŋgànɛ̀lɛ̀ ò nyòla mɔ̀, inyɔ hvɛ è ò lùwa èluhwe. Inyɛ̀ è ndèli yà ama Lohwà là arzu nà Rzàŋgo Yerzù Krirztò, hwèyɔ ndi hwe ò gbeyà ene eyà ò lì gbèyɛ̀nɛ.