2 Pètrò 1 - Mokpwe: Bakwery (New Testament)

¹ Imba Rzimɔ̀ni Pètro ema nà hwèlì è mògbèèlì nà è àpɔ̀rzìtòlò yà ama Yerzù Krirztò, nà è tìleyà ndi inyɔ hwatò ema è lòkɛ̀ Yerzù Krirztò nyayi hvɔ̀kɔ hvɛ nà oma irzɔ hvɛ ì mò lòkɛ̀. Yerzù Krirztò ndi à hwèlì Lòohwà nà Mòrzùŋgèlì hwa arzu. Mɔ̀ à tɛ̀mì ehve-ehve. Ndeŋgànɛ̀lɛ̀ mɔ̀ ndi à gbèyi ndèŋgànà irzɔ hwa arzɛ jè è mò lòkɛ̀.

² Inyɛ̀ è ndèli nà ɛ̀yɔ̀lɛ̀ yà ama Lohwɛ̀ è hwɛ nà inyɔ nà oma è hwi Lohwɛ̀, ndèŋgànɛ̀lɛ̀ nà oma è hwi Yerzù è Mòrzùŋgèlì hwa anyu.

È gbeye hweyà ò lì uŋmɛ̀lɛ̀ nanù ema Lohwɛ̀ ndi à è hvɔ̀rzì

³ È ŋginyà yà ama Lohwɛ̀ yà ŋmanyu è mà jò ŋgbàà hwèèmà hwe arzɛ ema jà arza ò lòŋgɛ, ndèŋgànɛ̀lɛ̀ è mà jò timba ò lì gbeyà nà oma Lohwɛ̀ à arza. Ène eyà è gbèyɛ̀nɛ̀ ndi nanù ehwànja i mò hwi, à mà gbeyàna è ŋginyà nà ŋmèma mò gbamù, ò lì jò hvɔ̀rzɔ̀ ò lì hwɛ hwatò hwa eni.

⁴ Ò ene ŋgàna rzɔ̀, mɔ̀ à ohwi nanù ema à jò gbèeyà hweyà hwe gbamù hwe ndɛnɛ. A gbèyi hwene hweyà hwe arzɛ nanù, aŋga nanù inyɔ e rza kpèeyà o tenì ya hweyà hwe wòhwe ema hwe hwèlì o rze. È nyɔ̀ŋgi ya hweyàrzèlì hwe hweyà hwe e nyàma ya nyo yɔ̀ ndeŋgàtɛ hwatò hwa gbeyà hwene hweyà hwe arzɛ. Hweŋge hweyà hwe gbamù hwe ndɛnɛ hwe gbèyɛ̀nɛ tɛ, ɛ̀ɛ̀mɛ̀ ya anyu e rzàŋga ndi nàa ɛ̀ɛ̀mɛ̀ ya ama Lohwɛ̀.

⁵ O lìni lìtaŋga mɛnɛ rzɔ̀, e lìmeya ndi o lì gbeyà hweyà hwe gbamù. Ndeŋgànɛ̀lɛ̀ rzeketɛ eŋge mɛnɛ, e àŋgàmɛ̀nɛ̀yi lì keka hvɛ o lì hwɛ hwatò ema hwa gbeyàna lìhwiyè o lì gbeyà hweyà hwe gbamù.

⁶ O ŋmanyu ya lìhwiyè la anyu, e hwi hvɛ lì àwòhvɛ̀lɛ̀ la anyu. O ŋmanyu ya lì àwòhvɛ̀lɛ̀ la anyu, e kake mèèmà me anyu. O ŋmanyu ya lì kaka la mèèmà me anyu, ɛ̀ɛ̀mɛ̀ ya anyu e àŋgàmɛ̀nɛ̀yi ndi lì hwɛ nàa ɛ̀ɛ̀mɛ̀ ya hwatò hwa Lohwà e hwɛni lì hwɛ.

⁷ O ŋmanyu ya lì gbeyà hweyà ema Lohwɛ̀ a arza, inyɔ hwatò hwa ama Krirztò inyɛ e ndìŋgɛ e hwɛ o ìtììtènì ja anyu. O ŋmanyu ya e ndìŋgɛ o ìtììtènì ja anyu ja hwatò hwa ama Krirztò, e lìŋgàne tɔ̀ ima mòtò.

⁸ È hwèlì tɛ nanù ema ene ɛ̀ɛ̀mɛ̀ e oŋgelì tɛ o tenì ya anyu, eŋge ŋgànà e hwèlì ndi nanù ema lìhwiyè ema e hwɛni lì hvomɛ̀nɛ̀ e Rzàŋgo ya arzu Yerzù Krirztò, lì rza hwɛ ndi ŋgundu, lìni lìhwiyè lì e gbeyà e ŋyàa hwèhvùma.

⁹ Ndi tɔ̀ njɛnɛ ema a rza hwɛnɛ ɛ̀ɛ̀mɛ̀ ya gbamù, nanù o ma mɔ̀ à gbèyi ndi nàa mòtò ema a rza ɛnɛ hvoo, tɔ̀ ema a hwèlì ndìmà. Mɔ̀ à mà hvoŋga nanù ema Lohwɛ̀ à mà mo rzàŋgìrzɛ, ndèŋgànɛ̀lɛ̀ à mà mo làkìrzɛ wòhwe wo eni.

¹⁰ O eŋgànɛ̀lɛ̀ rzɔ wònyànyàŋgo hwa ami kòkò, e keke o lì uŋmɛ̀lɛ̀ nanù ema Lohwɛ̀ ndi à e hwɛlɛ ndeŋgànɛlɛ mɔ̀ ndi à e hvɔ̀rzì o lì hwɛ hwatò hwa eni. Nà ohwa ndi nanù ehwànja e gbèyi tɛ nanù, e rza unda o tenì ya wòhwe.

¹¹ O ene ŋgànà rzɔ̀ Lohwɛ̀ a e ŋgba e wònja ya arzɛ, o lì kpèeyà na o lì hwɛ o lìkànèyà la eni la ŋmanyu èki ema e Rzàŋgo na e Mòrzùŋgèlì wa arzu Yerzù Krirztò a kànèyà nàa kìŋgɛ natɛ̀ɛ na o gbìndèyà.

¹² O lìni lìtiŋga rzɔ, tɔ̀ nɛ inyɔ e ma lomɛ o lì hwiya hwene hweyà hwe arzɛ, ndèŋgànɛ̀lɛ̀ e lòkɛ̀yi e jɔ̀kɛ̀ ema e hwèlì o tenì, na hwɛ ndi o lì e ɔ̀ŋgɛ̀lɛ̀nɛ e hwɛyɔ.

¹³ Nà ɛnɛ nanù ema o naŋgɛ ema na hwèlì lòŋgɛ, o lɔ̀wu nanù ema na e ɔ̀ŋgɛ̀lɛ̀nɛ hwene hweyà ihvonda ja arzɛ aŋga nanù na e hwèmìrzɛ̀ màlùtèyà ma anyu.

¹⁴ Nà hwi nanù ema ŋmanà mbɔ, na hwɛni lì hwɛmɛ e rze. Rzàŋgo ya arzu Yerzù Krirztò mɔ̀ à mà gbeyà ema na hwiye nanù.

¹⁵ Nà atàkìrzɛ o lì e ohweyà hwene hweyà, aŋga nanù tɔ̀ na ŋwa ndi lì ŋwa e hwe ɔ̀ŋgɛ̀lɛ̀ ihvonda ja arzɛ.

Imbòŋgi i hwèlì ema je ɛni Ŋmàye mo ama Krirztò

¹⁶ Rzeketɛ màyìtò ema hwatò hwà mà wòndɛ̀yi ndi i ma hwɛ lì e ohweyà, e hvonda ema i ma hwɛ lì ohwa nanù ema e Rzàŋgo ya arzu Yerzù Krirztò e jà hvɛ na ŋginyà. Irzɔ hwitɛ-hwitɛ je ɛnɛ ŋmàye mo eni na mìirzɔ ma arzu.

¹⁷ Irzɔ i ma ukeya aŋga na oma à mà hwɛ lì ŋgbààhwà èluhwe na ŋmàye na Lohwɛ̀ e Tatɛ̀. Lìlo lì ma uwɛ̀lɛ̀lɛ̀yi o ŋmanyu ema Lohwà ema lì Kàrzàmi lì ma mo òhweyà nanù ema, “È Ŋmanà wa ami wa munyanà wa ndìŋgɛ ya màlìŋgo òno ema a no òkirzɛ̀ imba mɔ̀nyɛ̀ŋgì.”

¹⁸ Irzɔ hwiti i ma hweyà lìni lìlo ema lì ma uwɛ̀lɛ̀lɛ̀yi o ŋmanyu yà lohwà, e hvonda ema i ma hwɛ na mɔ̀, o e hvàko ya wòtani.

¹⁹ O eŋgànɛlɛ rzɔ, irzɔ i lòkɛ̀yi nanù ema e mbɔrzi ema hwà-òhwèlì hwa hwèlìŋgɛ̀ hwà mà ohwe e hwèlì ndi e jɔ̀kɛ̀. O lɔ̀wu nanù ema e òkànèyà eŋge mbɔrzi kɔ̀yi-kɔ̀yi, hwe hwèlì ndi nàa ètùlù ema e uŋmɛ̀lɛ̀ ŋmàye o tenì ya jììtìtì, natɛ̀ɛ woŋgo Wùnyà wo ò uka, ema wùùnya wo ò yahwɛ, rzìi Krirztò, e rzombe ya elele a o e hvanyeya o tenì ya mèèmà me anyu.

²⁰ O ŋmanyu ya hweyà hwe arzɛ, e àŋgàmɛ̀nɛ̀yi lì hwiya nanù ema, tɔ̀ mòtò a rza tànɛ lì gbeyàna lìhwiyè la eni o lì lalowa hweyà ema hwà-òhwèlì hwa hwèlìŋgɛ̀ hwà mà ohwe na oma e tìlahwì o e kààti ya ama Lohwɛ̀.

²¹ È mbɔrzi ema hwà-òhwèlì hwa hwèlìŋgɛ hwà mà ohwe, e rzi uwɛ̀lɛ̀lɛ̀yi ndi na hwatò hwa hwènàmà, ndi Èlìŋgɛ̀ yà Wòtani ndi e ma hwɛ lì lìyɛlɛ hwatò ema hwà mà ohwa eŋge mbɔrzi. Èŋge mbɔrzi e ma uwɛ̀lɛ̀lɛ̀yi ndi o ma Lohwɛ̀.