2 Kɔ̀rintìyà 9 - Mokpwe: Bakwery (New Testament)

Lì oŋgowanɛ là wònya Krirztò ò Jèrurzalɛ̀mù

¹ Nàŋgɛ nanù o rza enje tɔ̀ lìtiŋga o imba lì e tìleya lì hvomɛ̀nɛ̀ èwòlò ya lì òŋgòwàna la hwatò hwa Lohwà.

² Nà hwi ŋmèma ema e ohvi o lì hwa òŋgòwàna, ndèŋgànɛlɛ na e ohvani kumba o ŋmèma ema e ohvi o lì oŋgòwànà hwatò hwa erzòokà ya Màrzèdonìyà. Nà ma hwa ohweyà nanù ema, “Inyɔ ema e hwèlì o erzòokà ya Àkayiyà, e ma wòŋgìrzɛ̀nɛ̀ natɛ̀ɛ na o ŋma mo mburza o lì hwa ŋgba wolì.” Ŋmèma ema e hwɛni o lì oŋgòwànà hwatò me ma kɔ̀mɛ̀lɛ̀ rzayi-rzayi ja hwatò ò lì gbeyà nanù mɛnɛ.

³ O nàŋgɛ nanù na e omelì wònyàmowe hwa Krirztò, o lì arza nanù ema e kumba ya arzu ema je e ohvani e rzi jà lì hwɛ nanù ema i kɔ ndi hweyà. Ndi e hwɛ ndi nanù ema na oma nà mà hwa ohweyà nanù ema, e ma wòŋgìrzɛ̀nɛ̀ o lì hwa ŋgba wolì, e o hwa ŋgba.

⁴ Ndi tɔ̀ nanù, na jelì tɛ na hwatò ema hwa uwɛ̀lɛ̀lɛ̀yi o Màrzèdonìyà, rzi na e ùŋmànɛ̀lɛ̀ ema e rzi wòŋgìrzɛ̀nɛ̀, i hwɛnɛ ìrzɔnì rzayi-rzayi ndèŋgànɛlɛ inyɔ hvɛ e o hwɛnɛ ìrzɔnì rzayi-rzayi.

⁵ O èŋgànɛ̀lɛ̀ rzɔ, aŋga ndi nà mà lùtèyà nanù ema o lɔ̀wu ema na ome wònyànyàŋgo hwa arzu hwa Krirztò o worzò, aŋga nanù e kulɛ lì wòŋgìrzɛ̀nɛ̀ lì oŋgowanɛ lì ndɛnɛ ema e ohwi nanù ema e o hwa ŋgba. È gbèyi tɛ nanù, lì oŋgòhwànɛ̀ la arzɛ lì o wòŋgìrzɛ̀nɛ̀ ndèŋgàna na e jà. Ène ŋgàna e uŋmɛ̀lɛ̀ nanù ema e ŋgbelì na ŋmèma mɔ̀kɔ, rzeketɛ èhwanja je e nyàkìrzɛ̀.

⁶ È rzi hvoŋga o lì hwiya nanù ema, tɔ̀ njɛnɛ ema a oni ndi teŋyi a o rzaŋga hvɛ ndi teŋyi, ndèŋgàna òŋgo hvɛ ema a oni hvèyi, mɔ̀ hvɛ à ò rzaŋga hvɛ ndi hvèyi.

⁷ Mòtò tɛ a ŋgbe wolì na oma ŋmèma mo eni mo mò ohwèlì. È rzi hwɛ nanù ema a tinɛlɛhwɛyi, èhwanja, Lohwà a lìŋgàni e mòtò ema a ŋgbà na ŋmèma ema mo rzaŋgi.

⁸ Lohwɛ̀ a e ŋgba hwèèmà hwe arzɛ ema e arza, aŋga nanù oma inyɔ e ma ohva hwèèmà hwe arzɛ ema ya arza, oma inyɔ hvɛ e ma oŋgòwànà hwahvɛhvɛ hwatò. Ène ye e gbeyà nanù ema e gbèeyà hwatò hweyà hwe rzayi-rzayi hwe gbamù.

⁹ Nà oma e tìlahwì o kààtì ya Lohwà nanù ema, “A ma uŋmɛ̀lɛ̀ eenji o lì oŋgòwànà mèlìrza me hwatò, hwatò hwa rza o hvoŋga ŋmèma mo eni mo gbamù.”

¹⁰ Lohwɛ̀ ndi à ŋgbà hwatò mamɛ ema hwa ona, rzìi a ŋgba hvɛ hwatò mamɛ ema hwa laa. A o e ŋgbà mamɛ ya arzɛ ema e hwɛni lì ona, a o hwe gbeyà o lì oŋga ndèŋgànɛlɛ a o hwe gbeyà nanù ema hwe ŋyàa mbota rzayi-rzayi. A o gbèeyà ndi ene eyà nanù lì hvomɛ̀nɛ̀ mèèmà me anyu me gbamù.

¹¹ Lohwɛ̀ à ò è nàmìrzɛ̀ nyayi ema eenji ya anyu e ɛneya i hvonda ja arzɛ. Ène e gbeyà rzayi-rzayi ja hwatò hwa o eka Lohwɛ̀ èhwanja lìwoŋgo ema e hwa ŋgba ema lì uhwɛlɛ na irzɔ.

¹² Ène èwòlò ema e gbeyà e rza òŋgòwàna ndi hwatò hwa Lohwà mɛnɛ, ndi e hwèlì hvɛ ndi o lì uŋmɛ̀lɛ̀ nanù ema hwatò hwa eka Lohwɛ̀ rzayi-rzayi.

¹³ Hweya ema ene èwòlò ema e gbeyà, hwe o wuluhwa o mote, hwe gbeyà hwatò rzayi-rzayi o lì ŋgba Lohwà èluhwe, èhwanja inyɔ e hwèlì ndi o lì gbeyà na oma ŋmɛ̀ndì mò ama Krirztò mo òhwi. Inyɔ e hwɛnì rzɔ o lì uŋmɛ̀lɛ̀ mono ŋmèma mo gbamù o hwatò hwa Lohwà ema hwa hwèlì o Jèrurzalɛ̀mù, ndèŋgànɛlɛ o lì mo uŋmɛ̀lɛ̀ hvɛ o hwahvɛhvɛ hwatò hwa Lohwà.

¹⁴ Hwa okelì o lì e ɛnɛ, ndèŋgànɛlɛ hvɛ hwa e kanɛ̀lɛ̀lɛ̀ èhwanja e ndèli ya ama Lohwɛ̀ e hwèlì na inyɔ. Èŋge ndèli e olo rzayi-rzayi.

¹⁵ Inyɛ̀ je ekè Lohwɛ̀ ò è ndèli ya eni ema e rza mɛnɛhwɛ.