2 Kɔ̀rintìyà 7 - Mokpwe: Bakwery (New Testament)

¹ Ìi Wònyamòwè kòkò, nà oma Lohwɛ̀ a ohwi ama mɔ̀ ndi à hwèlì e Tatɛ̀ ya arzu, irzɔhvɛ i hwɛ hwàanà hwa eni. Inyɛ̀ i rzɔnjɛ̀lɛ̀ hweyà ema hwe rzɔkɔ i nyo na hwèlìŋgɛ̀ hwe arzu. Inyɛ̀ i luwɛ Lohwɛ̀ na lì hwɛnɛ lòŋgɛ ema lì tani. Ène ŋgàna ndi e jo gbeyà o lì kanɛ̀ Lohwɛ̀ na oma ya àrzàhweyà.

Pàwolò a oki mɔ̀nyɛ̀ŋgì

² Nà arza nanù ema e jo lìŋgàne na mèèmà me anyu i rza tònànì tɔ̀ mòtò, i rza lìyɛlɛ tɔ̀ mòtò o màtònà ndèŋgànɛ̀lɛ̀ i rza lùkɛ̀lɛ̀ tɔ̀ mòtò.

³ Nà rza ohwi hwenè hweyà nanù o lì e akɛlɛlɛ mbako ya wòhwe. Nà ma loma lì e tìleya nanù ema, irzɔ i e lìŋgàni rzayi-rzayi, tɔ̀ e hwɛ ndi o kpelì tɔ̀ o lòŋgɛ, i hwɛni ndi o lì hwɛ mòtò moko.

⁴ Nà e hwɛnelì kumbà. Nà e kùmbelì e kòkò. È no ètìrzɛ̀ ŋmèma mo ami nyayi ema e no òkirzɛ mɔ̀nyɛ̀ŋgì rzayi-rzayi, tɔ̀ nɛ irzɔ i taka rzayi-rzayi.

⁵ Nà oma i ma ùke o erzòòkà ya Màrzèdonìyà, i rzi hwɛnɛ lì Arzìyòlɛ̀. I ma luwa nyayi na nyayi ja mètàkà. Hwatò hwà mà jo kɔnɔ hvenda ndèŋgàna i ma ohva wɔ̀ŋgɔ̀ o mèèmà me arzu èhwanja i ma hwɛ lì e lùtèyà.

⁶ Ndi Lohwɛ̀ ema a kɔ̀mɛ̀lɛ̀ e wɔ̀ ema hwa tu mèèmà, à mà jo kɔ̀mɛ̀lɛ̀ na oma mɔ̀ à mà jo òmeya Tàyìtùrzì.

⁷ Rzeketɛ hwejèelì hwe eni mɛnɛ ndi hwe ma jo lìŋgìrzɛ, ndi lì kɔ̀mɛ̀lɛ̀ la eni lì ma jo òkirzɛ mɔ̀nyɛ̀ŋgì. Mɔ̀ à mà jo òhweyà nɛ inyɔ e lìŋgàni o lì no ɛnɛ, à mà no òhweyà hvɛ nɛ o ma hweye wòhwe o mèèmà me aŋgɔ̀ na oma o rzi no òkirzɛ mɔ̀nyɛ̀ŋgì. A ma no òhweyà hvɛ nɛ inyɔ e hwɛni mèèmà o lì no ikana ekohva. Nà oma Tàyìtùrzì à mà jo òhweyà hwene hweyà hwe arzɛ, nà mà oka mɔ̀nyɛ̀ŋgì rzayi-rzayi.

⁸ Tɔ̀ nɛ eŋge kààtì, ema nà mà e tìleya e ma gbeye, e ma hweye wòhwe, na rza ohvi tɔ̀ ììlì ema nà mà e tìleya e yɔ. Tɔ̀ nɛ nà mà atiyɛ ema nà mà e tìla, nà mà ayèmbɛ nanù ema e kààtì ya ami e ma e tàtìrzɛ̀ ndi o ŋmanà hvoka hvonda.

⁹ Ndi o nàŋgɛ na lìŋgi, rzeketɛ èhwanja na me gbeyà ema e hweye wòhwe ndi na oma e ma hweye wòhwe, e ma e oŋgòwànà o lì anjiya o hwɛ̀ɛ̀mɛ̀ hwe anyu hwe wòhwe o lì gbeyà mamɛ ema Lohwɛ̀ a arza nanù ema e gbeye. È ma hweyà wòhwe, na oma Lohwɛ̀ à mà arze nanù ema e hweye. O èŋgànɛ̀lɛ̀ rzɔ, tɔ̀ nɛ irzɔ i ma gbeye nanù ema e hweye wòhwe, e rzi e hwɛ̀ɛya ndi eyà ya wòhwe.

¹⁰ O hwèlì tɛ mòtò ema a hweyi wòhwe na oma Lohwɛ̀ mɔ̀ à àrzeyà, oŋgo mòtò a tikòwè o lì gbeyà wòhwe na oma Lohwɛ̀ mɔ̀ à àrzeyà. Ène ndi e gbeyà ema oŋgo mòtò a kɔtɔ̀we, ene rzɔ e rza tàtìrzɛ̀ tɔ̀ mòtò. Ndi hwatò ema hwa lòkɛ̀yi Lohwɛ̀, ema hwa hweyà wòhwe èhwanja hwa hwèlì ndi hwatò hwa hwènàmà, e hwa gbeyà ema hwa ŋwe o èlìŋgɛ̀.

¹¹ Ndi inyɔ e ma hweyà wòhwe, na oma Lohwɛ̀ à mà arze nanù ema e hweye, o èŋgànɛ̀lɛ̀ rzɔ, e ɔ̀ŋgɔ tɛ mamɛ eŋge e ma e jàneyà, inyɔ e ma arza ema na hwiye nanù ema e keka o lì uŋmɛ̀lɛ̀ hwatò nanù ema e rza gbeyà tɔ̀ lùurzè nàŋgɛ. È ma tata nanù ema hwaŋga hwatò hwà mà gbeyà matona o e hvonda ema e ma aka, ndèŋgàna e hwa ohweyà nanù ema hwa hwɛmɛ wòhwe wo awu. È ma oka wɔ̀ŋgɔ̀ nanù ema Lohwɛ̀ a e kɔ̀kìrzɛ̀ e hwèlì tɛ nanù ema e lìmelì ndi o lì gbeyà ini nyayi ja hweyà. È ma lìŋgàna o lì no ɛnɛ na e jɔ̀kɛ̀, e ma hwɛnɛ hvɛ mèèmà mo lì no ikana ekohva, ndèŋgànɛlɛ e kɔ̀kìrzɛ̀ hwatò ema hwa gbeyà wòhwe. Nà oma e ma gbeyà hwene hweyà hwe arzɛ, e uŋmɛ̀lɛ̀ nanù ema e rzi gbèyi tɔ̀ eyà tɔ̀ yɔ̀kɔ ya wòhwe.

¹² Tɔ̀ nɛ nà mà tile eŋge kààtì, na rza e tìleya ndi e mòtò ema a gbeyà matona tɔ̀ e mòtò ema hwa tonani. Ndi nà mà e tìla ndi nanù ema, e hwiye nanù ema, o worzo wo ama Lohwɛ̀ inyɔ e jo lìŋgàni na e jɔ̀kɛ̀.

¹³ Ɔ̀ndeŋgàtɛ̀ inyɔ e ma jo ètìrzɛ̀ mèèmà me arzu o màwùŋgà. Rzeketɛ lì ètìrzɛ̀ mɛnɛ, ndi i ma lìŋgà na oma i ma ɛnɛ Tàyìtùrzì a jàni mɔ̀nyɛ̀ŋgì. A ma jo òhweyà na oma e ma mo gbeye rzi a hwɛmɛ la atàkìrzɛ̀ ema i ma mo hwɛ o ŋmèma mo eni.

¹⁴ Nà ma hwɛnɛ kumba o lì ohweyà Tàyìtùrzì nanù ema, inyɔ e hwèlì ndi hwatò hwa gbamù. È rzi no òkirzɛ ìrzɔnì èhwanja e ma awuŋmɛ̀lɛ̀ nanù ema hweyà ema nà mà mo òhweyà hwe ma hwɛ ndi e jɔ̀kɛ̀, ŋgàna hvɔ̀kɔ hvɛ na hweyà hwe arzɛ hvɛ ema irzɔ i ma e ohweyà, hwe hwèlì ndi e jɔ̀kɛ̀.

¹⁵ Èŋge eyà e gbèyi ema ŋmèma mo eni mo hwèlì na inyɔ lì aka tɔ̀ na e hvonda ya worzo, na oma a ɔ̀ŋgɛ̀lɛ̀ nɛ inyɔ hwa arzɛ e ma hwɛnɛ ŋmèma mo lì gbeyà hweyà hwe arzɛ ema mɔ̀ à mà e ohweyà o lì gbeyà. Ŋmèma mo eni mo hwèlì hvɛ na inyɔ nanù mɛnɛ, a ɔ̀ŋgɛ̀lɛ̀ tɛ nɛ inyɔ e ma mo karzɛ na èluhwe na o lì mo òŋgòwànà hvɛ na ŋmèma mɔ̀kɔ.

¹⁶ Nà oki mɔ̀nyɛ̀ŋgì nàŋgɛ èhwanja na ikayi lìhvìtà la ami la arzɛ na ohwa.