2 Kɔ̀rintìyà 6 - Mokpwe: Bakwery (New Testament)

¹ Nà oma i gbeyà èwòlò ya ama Lohwɛ̀ na Lohwà, je e atɛkɛ nanù ema e ndèli ya ama Lohwɛ̀ ema i luwa e rzi hwɛ o ŋgundu.

² Lohwɛ̀ a ohwi na oma e tìlahwì nanù ema, “Nà oma e hvonda ya jɔ̀kɛ̀ e ma uke, nà mà hweyà eyà ema e mo òhwe. Wùùnyà wo lìrzùŋgàhwa wo ma uke, nà mà e òŋgòwàna.” È ɔ̀ŋgɔ tɛ nàŋgɛ ndi e hwèlì e hvonda ya jɔ̀kɛ̀ ema e hwɛni o lì luwa e ndèli ya ama Lohwɛ̀. È ɔ̀ŋgɔ tɛ wùnyà wo ma uka ema e hwɛni lì kɔtɔ̀wɔ.

³ Irzɔ i rza keka tɔ̀ mòtò e njiya ya eni aŋga nanù lùurzè lì rza ɛneya o èwòlò ema i hwèlì lì gbeyà.

⁴ Ndi nàa hwàgbèelì hwa ama Lohwà, irzɔ ja awuŋmɛ̀lɛ̀ irzɔ hwiti nàa hwatò ema hwa gbeyà mamɛ ya arzɛ ema e hvomɛ̀nɛ̀. I kaka mèèmà rzayi-rzayi o tenì ya mètàkà ema i luwa, o lòŋgɛ ema la eti ema i hwèlì o tenì na i ndùtù hvɛ ema i jo ùŋmànɛ̀lɛ̀yi.

⁵ Ima ananahwa, ima ikahwa o hwèwòwà, ŋgindi e ma jo urzuweyà. I ma gbeyà èwòlò ema ye eti, i ma lìya ehvɛ̀nyɛ̀ na njàwò.

⁶ Ima awuŋmɛ̀lɛ̀ hvɛ nanù ema i hwèlì ndi hwàgbèelì hwa ama Lohwɛ̀ na oma i ma gbeye hweyà hwe gbamù na mèèmà ema me rzaŋgi, Lohwɛ̀ à mà jo ŋgba lì rzɔŋgìtɛ̀nɛ̀ o lì hwiya e nyayi ya lòŋgɛ ema i hwɛni lì lìya, lì àjùlɛ̀, na lì ohva ŋmèma mo gbamù o lì oŋgòwànà hwatò. Èlìŋgɛ̀ ya wòtani ndi e jo timba, ndèŋgànɛlɛ i lìŋgàni hwatò hwa arzɛ na ŋmèma mɔ̀kɔ.

⁷ Ŋmɛ̀ndì ema jo òhwa, mo hwèlì ndi ŋmɛ̀ndì mo jɔ̀kɛ̀, ndèŋgànɛlɛ e ŋginyà ya ama Lohwɛ̀ yɔ ndi i gbeyàna o lì mo òhwa. Nà oma i gbeyà hweyà hwe gbamù, e ma gbeyà hwatò hwa rza ohvi tɔ̀ eyà ya wòhwe o lì jo rzambana.

⁸ I hwɛni ndi lì gbèeyà Lohwɛ̀ nanù mɛnɛ e hwɛ ema hwa jo eka tɔ̀ hwa rzi jo eke. Tɔ̀ hwatò hwa ohwa ndi hweyà hwe gbamù tɔ̀ wòhwe o lì jo teŋgɛ̀nɛ̀. Hwatò hwa ohwa nanù ema i awuŋmɛ̀lɛ̀ nanù ema i hwèlì ndi i nyayi ja hwatò ema i rza enje ndi irzɔ i hwèlì ndi hwatò ema jo òhwa nanù ema i hwèlì.

⁹ Hwatò hwa jo hwi kɔ̀yi-kɔ̀yi ndi hwanɛyi hwa jo ɛnɛ ndi nàa hwèèti hwe hwatò. Hwatò hwa lùtèyà ndi nanù ema i rza o hwɛ o lòŋgɛ, ndi tɔ̀ nanù i hwèlì lòŋgɛ. I hwèlì lì luwa mètàkà o màa hwatò, tɔ̀ nɛ hwa rza jo òŋwa.

¹⁰ I hwèlì o tenì ya ndùtù ndi o i hvonda ja arzɛ i hwèlì o mɔ̀nyɛ̀ŋgì. Tɔ̀ nɛ i rza ohvɛ hwema rzayi-rzayi ndi èwòlò ema i gbeyà e gbeyà hwatò rzayi-rzayi o lì lòkɛ̀ Lohwɛ̀. O èŋgànɛ̀lɛ̀ rzɔ eŋge e hwa gbèyi ema wɔ̀ hwa ohvi hwema rzayi-rzayi. Tɔ̀ nɛ i rza ohvɛ tɔ̀ yoma, mònàmɛ̀ mò ama Lohwɛ̀ mo hwèlì ndi e mo arzu.

¹¹ Ìi wònyàmowe, hwa e mbowà ya Kɔ̀rintò! Je e tilelì hweyà hwe arzɛ e rzi hwɛ ema je e utelì tɔ̀ eyà tɔ̀ yɔ̀kɔ. I ma e uŋmɛ̀lɛ̀ nɛ mèèmà me arzu me hwèlì o tenì.

¹² Irzɔ je e lìŋgàni, ndèŋgànɛlɛ i rza rzɔ̀rzì o lì e uŋmɛ̀lɛ̀ nanù ema je e lìŋgàni. Ndi inyɔ e uŋmɛ̀lɛ̀ nanù ema e rza jo lìŋgàni.

¹³ Nà e ohweyà ndi nàŋgɛ nàa e hwèlì ndi, hwàna hwa ami. È jo lìŋgàne na oma irzɔ hvɛ je e lìŋgàni.

È rzi gbeyà hweyà ema hwatò ema hwa rza lòkɛ̀yi hwa gbeyà

¹⁴ È rzi keka lì alatanɛ na hwaŋga hwatò ema hwa rza lòkɛ̀ Krirztò. Imba na ohwa ndi ene nanù èhwanja hwatò ema hwa tɛmi ehve-ehve na Lohwɛ̀, hwa rza ohvi tɔ̀ eyà o lì gbeyà na hweyà hwe wòhwe ema hwatò hwa wòhwe hwa gbeyà. Ŋmaye mo rza ohvi tɔ̀ eyà o lì gbeyàna jììtìtì.

¹⁵ Krirztò a rza ohvi tɔ̀ eyà o lì gbeyà na Mòkarzɛ̀. È mòtò ema a lòkɛ̀yi Krirztò a rza ohvi tɔ̀ eyà o lì gbeyà na e mòtò ema a rza mo lòkɛ̀yi.

¹⁶ È Ndawò ya Lohwà e rza ohvi tɔ̀ eyà o lì gbeyà na e ndawò ya lì hvɛhvɛ lohwà. Imba na ohwa ndi nanù èhwanja irzɔ ndi i hwèlì e ndawò yà Lohwà, Lòohwà ema lì hwèlì lòŋgɛ. È hwèlì ndi nanù, na oma e tìlahwì nanù ema Lohwɛ̀ a ohwi nanù ema, “Nà o hwɛ na hwatò hwa amì ndèŋgànɛlɛ na o lìya na wɔ̀. Hwa o no gbeyà ndi nàa e Ndawò ya Lohwà ndèŋgànɛlɛ na o ò hwa wòwa ndi nàa hwatò hwa ami.”

¹⁷ Rzàŋgo à mà òhwèyà hwatò hwa eni nanù ema, “O èŋgànɛ̀lɛ̀ rzɔ, inyɔ e lìya, e a akakowanɛ na hwaŋga hwatò ema hwa rza no lòkɛ̀yi. È rzi keka lì hwɛnɛ tɔ̀ eyà o lì gbeyà na hweyà hwe wòhwe ema hwa gbeyà. Àŋga nanù imba na e emeyà nàa hwàanà hwa ami.

¹⁸ Imba na o ò hwɛ e Tatɛ̀ hwa anyu, inyɔ hvɛ e o hwɛ hwàànà hwa ami. Imba Lòohwà ema lì karzami, imba ndi na ohwa nanù.”