2 Kɔ̀rintìyà 5 - Mokpwe: Bakwery (New Testament)

Jo ò luwa nyo hvènya o ŋmanyu ya Lohwà

¹ Irzɔ i hwi nanù ema i nyo ja arzu ema jo òhvi anu rze, i gbèyi ndi na mawondo ema i lìya o tenì. Hwa hvàŋgi tɛ maŋga mawondo, irzɔ i hwi ema jo òhvi ndawò o ŋmanyu ya lohwa ema e rza oŋgahwɛ na mòtò wa hwènàmà. Lohwɛ̀ ndi à e oŋgi, ndèŋgànɛlɛ e hwɛ natɛ̀ɛ na o gbìndèyà.

² Jo arzarzowɛ nàŋgɛ o tenì ya lìni lìwondo, i keka ema eŋge ndawò ema e uwɛ̀lɛ̀lɛ̀yi o ŋmanyu yà lohwà e o jo rzɔŋgɛ ndi nàa lìhwatù lì kumɛnɛ mòtò.

³ I hwèlì tɛ o tenì ya eŋge ndawò, i rza o hwɛ ndi nàa mòtò ema a hwèlì morzombo.

⁴ Nà oma i lìyana na ene nyàmà ya nyo anu rze ya mɔ̀nyɛ̀, ja arzàrzòhwɛ̀ èhwanja o jo lìtani. Rzeketɛ nanù ema ja arza lì arzòlòhwɛ̀ ene nyàmà ya nyo, ndi irzɔ ja arza e nyo hvènya ema e hwèlì o ŋmanyu ya lohwa. Àŋga nanù ene nyàmà nyo ema e ŋwa e kuwa rzi e timba e nyo ema e o hwɛ̀ɛ o lòŋgɛ.

⁵ Lohwɛ̀ mɔ̀ ŋmìti ndi à jo rzekelì o lì luwa hwene hwetikowelì, ndèŋgànɛlɛ a jo òmelì Èlìŋgɛ̀ ya eni ya wòtani o lì uŋmɛ̀lɛ̀ nanù ema ene eyà e o gbèyɛ̀nɛ.

⁶ O èŋgànɛ̀lɛ̀ rzɔ jo òhve o mèèmà me arzu tɔ̀ ima hvonda nanù ema na oma i hwèlì anù rze na ene nyàmà ya nyo, i rza enje ndi o ekì yɔ̀kɔ na e Rzàŋgo.

⁷ Irzɔ i hwèlì o lòŋgɛ na nyo ja arzu èhwanja i mo lòkɛ̀ ndi rzeketɛ ema i mo ɛnɛ.

⁸ Ja àhvìtɛ̀ nanù ema a jo ŋgba nyo hvènya ndèŋgàna i hwɛni lì rzɔnjɛ̀lɛ̀ i nyo ja arzu o lì ɛndɛ lì hwɛ na Rzàŋgo Yerzù.

⁹ O èŋgànɛ̀lɛ̀ rzɔ, mèèmà me arzu me arzɛ me hwɛni ndi lì hwɛ o lì lìŋgirzɛ Yerzù o mamɛ ya arzɛ ema i gbeyà, ŋga i hwɛ o nyàmà ya nyo tɔ̀ i rzi hwɛ.

¹⁰ O èŋgànɛ̀lɛ̀ rzɔ, tɔ̀ ima mɔ̀kɔ hwa arzu na ɔ̀nɛyi a o tɛ̀mɛ̀ o hwèkàyìrzèlèlì o worzo wo ama Yerzù Krirztò o wùnyà ema a o kàyìrzɛ̀ hwatò hwa arzɛ o lì hvomɛ̀nɛ̀ hweyà ema tɔ̀ ima mòtò à mà gbèyi e hvonda ema à mà hwɛ o rze ya mɔ̀nyɛ̀. Tɔ̀ ima mòtò a o luwa etaŋgi lì hvomɛ̀nɛ̀ mamɛ ya arzɛ ema à mà gbeye o rze.

O lì hwɛ o lì ahweyànɛlɛ na Lohwɛ̀

¹¹ Nà oma i hwi nanù ema e Rzàŋgo e o kàyìrzɛ̀ hwatò, ndèŋgànɛlɛ hvɛ na oma i mo ŋgba èluhwe, i keka o lì gbeyà nanù ema hwatò hwa hwiye nanù ema ŋmɛ̀ndì i hwa ohweyà mo hwèlì ndi e jɔ̀kɛ̀. Lohwɛ̀ a hwi i nyayi ja hwatò ema irzɔ i hwèlì, imba hvɛ na hwi nanù ema inyɔ hvɛ e hwi i nyayi ja hwatò ema irzɔ hvɛ i hwèlì, na lòkɛ̀yi hvɛ nanù ema inyɔ e hwi nanù ema, jo òhwa ndi e jɔ̀kɛ̀.

¹² Irzɔ i rza àwòhwànɛ̀lɛ̀ o lì hvomɛ̀nɛ̀ hweyà hwe gbamù hvɛ. Ndi irzɔ ja arza nanù ema e ohve lìtiŋga o lì jo gbaana e kumba, aŋga nanù e hwɛnɛ eyà ya lì ohweyà hwatò ema hwa hwɛni kumba o mamɛ ema hwa gbeyà ema hwatò hwa ɛnɛ, rzeketɛ o hweyà ema hwe hwèlì o mèèmà me awu.

¹³ Lòŋgo la hwatò hwa ohwa ndi nanù ema jo òhwa ndi nàa hwatò ema hwa kpanyi. Ène eyà e hwèlì tɛ e jɔ̀kɛ̀, nanù oma Lohwɛ̀ mɔ̀ ndi irzɔ i kànɛ. Jo òhwa tɛ hweyà nàa hwatò ema hwa rza kpanyɛ nanù oma jo òhwa ndi o lì e oŋgòwànà.

¹⁴ È ndìŋgɛ ya ama Krirztò yɔ ndi e ma wowɛ mèèmà me arzu o lì gbeyà hweyà ema i gbeyà, èhwanja i lòkɛ̀yi nanù ema Krirztò à mà ŋwèeyà hwatò hwa arzɛ. Ène ŋgàna e gbèyi ndi nàa tɔ̀ ima mòtò à mà ŋwa.

¹⁵ A ma jo ŋwèeyà ndi irzɔ hwa arzɛ, aŋga nanù hwatò ema hwa hwèlì lòŋgɛ, mòŋgɛ ma awu ma rza uŋmɛ̀lɛ̀ nanù ema hwa lìya ndi o wɔ̀ hwiti. Ndi wɔ̀ hwa hwèlì lòŋgɛ o nyòla ya ama Krirztò ema à mà ŋwa rzìi Lohwɛ̀ a mo hvùmùlɛ̀ o nyòla awu.

¹⁶ Li wòteya nàŋgɛ, inyɛ i rza wowa hwatò na oma hwa ɛneya. Tɔ̀ nɛ o ma hwɛ lìrzako ema i ma hwɛ lì ɛnɛ Yerzù na mìirzɔ ma hwatò hwa hwènàmà i rza mo ɛnɛ nanù hvɛ.

¹⁷ O èŋgànɛ̀lɛ̀ rzɔ, tɔ̀ njɛnɛ ema a hwèlì mɔ̀kɔ na Krirztò a hwèlì ndi ewèkèlì hvènya. Hwègbèèlì hwe eni hwe arzɛ hwe koohwa hwe ma aka, ndèŋgànɛlɛ a hwɛni ndi hwègbèèlì hwe hvènya hwe arzɛ nàŋgɛ.

¹⁸ Hwene hwègbèèlì hwe hvènya hwe uwɛ̀lɛ̀lɛ̀yi ndi nà Lohwɛ̀. A jo gbèelì màrzèèlì nà Krirztò. A jo ŋgbelì èwòlò ya lì ohweyà hwatò nanù ema wɔ̀ hwa tànɛyi o lì hwɛ o ɛ̀yɔ̀lɛ̀ nà Lohwɛ̀.

¹⁹ Mamɛ ema imba na ohwa, e hwèlì ndi lì hvomɛ̀nɛ̀ e kpelì ema Krirztò à mà ŋwèeyà o mbarza. Lohwɛ̀ à mà gbeyà ema hwatò hwa uke o lì ahweyànɛ na mɔ̀. Lohwɛ̀ a rza kɔki wòhwe ema hwatò hwà mà gbeyɛ ndèŋgàna a jo ŋgbelì èwòlò, o lì ohweyà hwatò nanù ema hwa tànɛyi lì hwɛ o ɛ̀yɔ̀lɛ̀ na Lohwà.

²⁰ Nà oma Lohwɛ̀ a jo òhweyà hweyà ema i hwɛni lì ohweyà hwatò, i hwèlì ndi hwatò ema hwa ohwa hweyà ema Krirztò à mà jo òhweyà ema jo òhwe. I hwèlì ndi o lì e kànèyà o lìna la ama Krirztò nanù ema e hwɛ o lì hweyànɛlɛ na Lohwɛ̀.

²¹ Lohwɛ̀ à mà hvɔ̀rzɔ̀ Yerzù o lì taka o nyòla wòhwe hwa arzu hwa arzɛ ema i ma gbeyɛ. Yerzù a rza gbèyi tɔ̀ wòhwe tɔ̀ nɛ à mà emeyà o lì ŋwa o nyòla arzu. Lohwɛ̀ à mà jo làkìrzɛ̀ wòhwe wo arzu ndèŋgànɛlɛ a ohwi à mà i rza gbeyà wòhwe hvɛ na oma mɔ̀ hvɛ a rza gbeyà wòhwe.