2 Kɔ̀rintìyà 3 - Mokpwe: Bakwery (New Testament)

Hweyohwèlì hwe ŋmɛ̀ndì mò yòòmbò ehvènya

¹ È ɔ̀ŋgɛ̀lɛ̀ nanù ema irzɔ jo òhwanɛlɛ hweyà hwe gbamù o lì ayèkirzɛ̀ e? È ɔ̀ŋgɛ̀lɛ̀ nanù ema jo e ŋgba kààtì tɔ̀ lì e ijòwa kààtì o lì uŋmɛ̀lɛ̀ nanù ema i tànɛyi lì gbeyà èwòlò ò ìtììtènì ja anyu na oma hwahvɛhvɛ hwatò hwa gbeyà e? Irzɔ i rza gbeyà nanù.

² Inyɔ hwiti e hwèlì ndi o mèèmà me arzu nàa kààtì ema e tìlahwì, rzìi hwatò hwa arzɛ hwa e laŋga o lì hwiya mamɛ ema e hwèlì o tenì.

³ È uŋmɛ̀lɛ̀ nanù ema, inyɔ ndi e hwèlì e kààtì ema Krirztò à mà tile o lì jo òmana. Ène kààtì e rza enje kààtì ema e tìlahwì na e rzawo ndi e hwèlì ndi kààtì ema èlìŋgɛ̀ ya Lohwɛ̀ ema e ŋgba lòŋgɛ, e tìlì. Ène kààtì e rza tìlahwì ndi o màŋyàyi ema mà nàŋgayi tààlì, ndi e ma tìlahwa ndi o mèèmà me hwatò.

⁴ Irzɔ jo òhwi ndi nanù èhwanja ji ikayi mèèmà me arzu na Lohwɛ̀, na oma i hwèlì ndi mɔ̀kɔ na Krirztò.

⁵ Irzɔ hwiti i rza tànɛyi lì ohwa nanù ema i tànɛyi o lì gbeyà ene èwòlò irzɔ hwiti i rza tànɛyi lì e gbeyà. Lohwɛ̀ ndi à gbèyi ndèŋgàtɛ̀ na tànɛyi lì e gbeyà.

⁶ Mɔ̀ ŋmìti ndi à jo gbèyi ema i tànɛyi o lì ohwa moŋgo ŋmɛ̀ndì mo yòòmbò ehvènya. Rzeketɛ ŋmɛ̀ndì mo lì oŋgama imbenda ja yòòmbò ya koohwa. Hwatò ema hwa ika iŋgi mbenda hwa ŋwa, ndèŋgàna hwa rza hwɛ na Lohwà. Ŋmɛ̀ndì mo lì oŋgama yòòmbò ehvènya ema irzɔ jo òkolɛ mo hwèlì ndi ema Lohwɛ̀ à mà ŋgba hwatò èlìŋgɛ̀ yà wòtani, ndèŋgànɛlɛ mɔ̀ à mà gbeyà hvɛ nanù ema wɔ̀ hwa hwɛ na mɔ̀ natɛ̀ɛ na o gbìndèyà.

⁷ O nàŋgɛ Morzè mɔ̀ à mà okolɛ hwatò nanù ema wɔ̀ hwa ika imbenda ja yòòmbò ya koohwa. Lohwɛ̀ à mà tìla ini mbenda o màŋyàyi ema mà nàŋgayi tàlìi rzìi à mà ŋgba Morzè o lì okolɛ hwatò. Nà oma Lohwɛ̀ à mà ŋgbe Morzè ini mbenda à mà gbeyà worzo wa ama Morzè o lì ɛneya kɛyi-kɛyi o lì uŋmɛ̀lɛ̀ nanù ema iŋgi mbenda i hwèlì ndi mbenda ja ama Lohwɛ̀. Worzo wa ama Morzè wo ma ɛneya ndi kɛyi-kɛyi ema tɔ̀ hwatò hwa Irzàyɛ̀lì hwa rzi tànɛyi o lì ɔ̀ŋgɔ worzo wa ama Morzè. Tɔ̀ nɛ wà mà ɛneya ndi kɛyi-kɛyi rzayi-rzayi, moŋgo ŋmàye wo ma wòteyà lì ɔ̀ndɔ̀ tenyi-tenyi. Hwatò ema hwà mà oŋgama yòòmbò ya koohwa hwà ma ŋwa ndèŋgànɛlɛ hvɛ hwa rzi hwɛ na Lohwɛ̀.

⁸ O èŋgànɛ̀lɛ̀ rzɔ irzɔ jo òkolɛ tɛ hwatò ŋmɛ̀ndì mo èlìŋgɛ̀ yà Lohwà, Lohwɛ̀ a uŋmɛ̀lɛ̀ hwatò nanù ema ŋmɛ̀ndì mò eni mo hwɛni wòlìto ò lòŋgɛ la hwatò.

⁹ Lohwɛ̀ à mà uŋmɛ̀lɛ̀ nanù ema mɔ̀ ndi à hwèlì e mɔ̀ ema a karzami, e hvonda ema à mà ŋgbee Morzè imbenda. Iŋgi mbenda i ma gbeyà hwatò ò lì hwiya nanù ema mɔ̀ à o hwa kɔ̀kìrzɛ̀ o wòhwe ema hwà mà gbeyɛ. Ndi mɔ̀ à timbi ndi o lì awuŋmɛ̀lɛ̀ mɔ̀ ŋmìti o e ŋginyà ya eni o lì jo gbèeyà ema jo òhwe ndi moŋgo ŋmɛ̀ndì o lì uŋmɛ̀lɛ̀ nɛ hwatò hwa imanɛhwɛ o mba eni.

¹⁰ Imbenda ema Morzè à mà lome lì okolɛ hwatò i ma ohva wòlìto. Hwèyòkolelì ema jo òkolɛ hwatò nàŋgɛ ema Lohwɛ̀ a o hwa làkìrzɛ̀ wòhwe wo awu me hwɛni wòlìto.

¹¹ Tɔ̀ nɛ e hwèlì nanù ema Lohwɛ̀ à mà awuŋmɛ̀lɛ̀ nɛ a hwèlì wòlìto lìrzako ema à mà gbeye yòòmbò ya koohwa ema e ma hwɛ ndi o ŋmana hvoka hvonda, à mà awuŋmɛ̀lɛ̀ nanù ema mɔ̀ à hwèlì wòlìto na oma mɔ̀ à gbèyi yòòmbò ehvènya. Ène yòòmbò ehvènya yɔ ndi e ma tikowɛ lòŋgɛ la hwatò ndèŋgànɛlɛ e o hwɛ natɛ̀ɛ na o gbìndèyà.

¹² O èŋgànɛ̀lɛ̀ rzɔ na oma i ma lòkɛ̀ nanù ema ŋmɛ̀ndì ema jo òhwa mo òhvi wòlìto rzayi-rzayi, irzɔ i ma ohwa e rzi hwɛ lì oka tɔ̀ wɔ̀ŋgɔ̀ tɔ̀ wɔ̀kɔ.

¹³ Irzɔ i rza enje ndi nàa Morzè, Morzè à mà hwanda worzò wo eni, aŋga nanù, hwatò hwa Irzàyɛ̀lì hwa rzi tànɛyi lì ɛnɛ worzo wa eni ema wo ma ɛneya kɛyi-kɛyi na oma wo ma wòteyà lì ɔ̀ndɔ̀.

¹⁴ Ndi wɔ̀ hwa rzi rzɔŋgìtɛ̀nɛ̀. Ò jɔ̀kɛ̀ lì wòteyà o eŋge hvonda lì uka natɛ̀ɛ na nàŋgɛ, hwa rza tànɛyi lì rzɔŋgìtɛ̀nɛ̀ nanù ema worzo wa ama Morzè ema wo ma hwɛ lì ɛneya kɛyi-kɛyi wo ma wɔ̀lɛ̀nɛ̀ ŋmàye mo eni. Tɔ̀ ima hvonda ema hwatò hwa hweyi tɛ mòtò a laŋga e kààtì ya yòòmbò ya koohwa hwà rza rzɔŋgìtɛ̀nɛ̀ mamɛ hwa hweyà. È gbèyi ndi nàa lìhwatu lì ma hwanda mɔ̀ŋgɛ̀lɛ̀ ma awu. È hwèlì ndi nanù ema mòtò a hwèlì tɛ oma Krirztò, ɔ̀ndi à rzɔŋgìtɛ̀nɛ̀.

¹⁵ Ò jɔ̀kɛ̀, lì wòteyà eŋge hvonda lì uka natɛ̀ɛ na yawono, tɔ̀ ima hvonda ema hwa laŋgi e mbenda ya ama Morzè, o gbeyà ndi nàa wa ɛnɛ ema lìhwatu lì hwa hwàndi mɔ̀ŋgɛ̀lɛ̀ ma awu nyayi ema wɔ̀ hwa rza tànɛyi lì hwiya mamɛ ema e hwa laŋgahwɛlɛ.

¹⁶ Ndi tɔ̀ ima mɔ̀ hwa awu ema a lòkɛ̀yi Rzàŋgo Yerzù eŋge yoma ema e gbèyi nàa lìhwatu e ma e hwandi mɔ̀ŋgɛ̀lɛ̀ ma awu e anjiya.

¹⁷ Ndi o nàŋgɛ e Rzàŋgo e hwèlì ndi Èlìŋgɛ̀. Tɔ̀ ima èki ema Èlìŋgɛ̀ ya ama e Rzàŋgo e hwèlì hwatò hwa hwɛnɛ lì wɔ̀wìrzɛ̀ la nyo.

¹⁸ Irzɔ ema Lohwɛ̀ à mà ulɛ lìhwatu ema lì ma jo hwanda marzo, ɛ̀ɛ̀mɛ̀ ya arzu e ma gbèeyà ema hwatò hwa hwiye nɛ èluhwe ya ama Lohwɛ̀ e hwèlì. Wɔ̀ hwà mà ɛnɛ nanù ema i hwèlì ndi hwatò ema i gbèeyà hweyà na oma Lohwɛ̀ a àrzeyà. Èlìŋgɛ̀ ya wòtani e jo tikowa ndi i hvonda ja arzɛ o lì hwɛ nàa Yerzù, aŋga nanù hwatò hwa ɛnɛ nɛ mɔ̀ à imbami. Rzàŋgo, mɔ̀ ema a hwèlì ndi Èlìŋgɛ̀ mɔ̀ ndi à gbeyà hwene hweyà hwe arzɛ.