2 Kɔ̀rintìyà 2 - Mokpwe: Bakwery (New Testament)

¹ O èŋgànɛ̀lɛ̀ ene ŋgàna e gbèyi na lutelì imba mbiti ema na rza e timbeya hvɛ, o lì e jàneyà èhvɛhvɛ ndùtù o mèèmà.

² È hwèlì tɛ ema imba na e tàtìrzɛ̀, njɛnɛ a o no lìŋgìrzɛ e? Inyɔ mɛnɛ ema no tàtìrzɛ̀.

³ Ène eyà ndi è mà gbeyà ema nà mà è tìleyà ene kààtì, ò lì arza nanù ema nà jelì tɛ, nà rza ò tàtìrzɛ̀hwɛ̀ nà hwaŋga mɛnɛ, ema hwa àŋgàmɛ̀nɛ̀yi lì nò òkirzɛ mɔ̀nyɛ̀ŋgì ema mò akɛ̀lɛ̀nɛ̀yi. Ò jɔ̀kɛ̀, nà hwi nanù ema nà ohvi tɛ mɔ̀nyɛ̀ŋgì oma inyɔ hvɛ è ohva mɔ̀nyɛ̀ŋgì.

⁴ È hvonda ema nà mà e tìleya eŋge kààtì, nà mà ohva ndùtù o ŋmèma ndèŋgànɛlɛ nà mà ji tìlana na mìrzɔlì o worzo wo ami. Nà rzi e tìleya ndi nanù ema e hwɛ̀nɛ̀ ndùtù o mèèmà me anyu, ndi nà mà e tìleya ndi nanù ema e hwiye lìmɛni ema na e lìŋgànelì.

Pàwolò àma hwànɔ̀ŋgèlì hwa ama Yerzù hwa làkìrzɛ̀ hwaŋga ema hwa gbeyà wòhwe

⁵ È hwiye nàŋgɛ nanù ema mòtò a gbèyi tɛ eyà ema e gbeyà hwatò hwa hwɛnɛ ndùtù, rzeketɛ imba mɛnɛ ndi à gbèelì nanù, a e gbèelì ndi inyɔ hwa arzɛ. Ndi ene eyà e hwèlì ndi eyà ema na rza ohwa rzayi-rzayi.

⁶ È kɔ̀kìrzɛ̀ ema rzayì-rzayì ja hwatò hwa ŋgba ene nyayi ya mòtò e mo loŋgamɛnɛyi.

⁷ O èŋgànɛ̀lɛ̀ rzɔ e mo làkìrzɛ̀ na lì mo ètìrzɛ̀ ŋmèma nàŋgɛ. Àŋga nanù e ndùtù ema a o hwɛnɛ e rza o mo lìteya.

⁸ Nà e atɛkɛ ema e mo uŋmɛ̀lɛ̀ ema e mo lìŋgàni nanù mɛnɛ.

⁹ Lìtìŋga ema lì ma gbeyà ndèŋgàna na e tìleya ene kààtì, lì hwèlì ndi nanù ema o lì hwiya ŋga e o gbeyà hweyà ema nà mà e ohweyà o lì gbeyà.

¹⁰ Tɔ̀ ima mòtò ema e làkìrzɛ̀, imba hvɛ nà mà mo làkìrzɛ̀. Eyà ema e gbèyi na làkìrzɛ̀ na e làkìrzɛ̀ ndi o nyòla anyu, Krirztò ndi à gbèyi ndèŋgànɛlɛ a hwi nanù ema nà mà e làkìrzɛ̀.

¹¹ I hwɛni ndi lì gbeyà nanù, aŋga nanù Mòkarzɛ̀ a rza jo lukɛlɛ. Èhwanja e mo hwiyelì meyànò me eni.

Hweyohwèlì lì hvomɛ̀nɛ̀ yòòmbò e hvènya

¹² Nà oma na ama ùke o mbowà ya Trɔ̀wàrzì, o lì ohwa Ŋmɛ̀ndì mò Gbamù mo òma Krirztò, nà mà ùŋmanɛlɛ nanù ema Lohwɛ̀ à mà màa lì no lìhvoweya e njiya o lì gbeyà èwòlò ya eni.

¹³ Ndi na oma nà mà ùke aŋga, nà mà wukumeya, èhwanja na rzi ùŋmanɛlɛ ŋmana mòwè hwa Krirztò Tàyìtùrzì ema i gbèyɛ̀nɛ èwòlò aŋga. Rzi na hwa akpanɛ, na ɛ̀ndɛ e ya ami o erzòòkà ya Màrzèdonìyà.

¹⁴ Ndi na ekì Lohwɛ̀ ema a jò gbeyà ema jo ohwe ŋmɛ̀ndì mò eni. Nà oma i hwèlì mòndeŋgè na Krirztò, à mà jo gbeyà ima timba ndi nà hwatò ema Lohwɛ̀ à mà imanɛlɛ na lì timba o lì ɛnɛ jo ohwa ŋmɛ̀ndì mò gbamu ò hweki hwe arzɛ. Lohwɛ̀ à hwèlì lì gbeyà hwatò ò lì hwiya Yerzù Krirztò èhwanja ò ŋmɛ̀ndì mò eni ema i hwèlì lì ohwa. Moŋgo ŋmɛ̀ndì mò àyinɛ̀lɛ̀ o ìtììtènì ja hwatò, nàa erzunju ya gbamù ya hvɛ̀ɛ̀hvɛ̀.

¹⁵ Èrzunju ya gbamù ya hvɛ̀ɛ̀hvɛ̀, erzunju ya Krirztò ema i hwèlì o worzo wo ama Lohwɛ̀. I ohwa tɛ ŋmɛ̀ndì lì hvomɛ̀nɛ̀ Krirztò, hwatò hwa arzɛ ema hwa lòkɛ̀yi moŋgo ŋmɛ̀ndì ema jo òhwa Lohwɛ̀ a hwa rzuŋga. Ndi hwatò hwa arzɛ ema hwa rza lòkɛ̀yi moŋgo ŋmɛ̀ndì Lohwɛ̀ a rza o hwa rzuŋga.

¹⁶ O hwatò ema hwa hwèlì o njiya ema e rzɔ̀lɛ̀nɛ̀ Lohwɛ̀, ŋmɛ̀ndì mò gbamù ema irzɔ i hwa ohweyà, mo hwèlì ndi nàa erzunju ya tòòtòò ya wòhwe ema e hwa oŋwa. Hwanɛyi hwatò ema hwa hwèlì o njiya ya lì ɛndɛ o ma Lohwɛ̀, ŋmɛ̀ndì mò gbamù ema i hwa ohweyà, mò hwèlì ndi nàa erzunju ya gbamù ya hvɛ̀ɛ̀hvɛ̀ èhwanja irzɔ i hwèlì i hwa ohweyà nanù ema, wɔ̀ hwa o hwɛ o lòŋgɛ na Lohwɛ̀ o gbìndèyà na gbìndèyà. Njɛnɛ rzɔ a tànɛyi o lì gbeyà ene tumba èwòlò e?

¹⁷ O èŋgànɛ̀lɛ̀ rzɔ, i rza enje ndi nàa rzayi-rzayi ja hwanɛyi hwatò ema hwa ohwa eyà ya Lohwɛ̀ o lì yalɛ wolì. O irzɔ i rza gbeyà nanù èhwanja Lohwɛ̀ à mà jo òma o lì ohwa ŋmɛ̀ndì mò gbamù ndèŋgànɛlɛ i ma ohwa na ŋmèma mɔ̀kɔ na oma irzɔ i hwèlì mɔ̀kɔ na Krirztò. Irzɔ i hwi hvɛ nanù ema Lohwɛ̀ ndi à jo òmi o lì gbeyà ene èwòlò.