2 Kɔ̀rintìyà 12 - Mokpwe: Bakwery (New Testament)

Lohwɛ̀ a uŋmɛ̀lɛ̀ Pàwolò hweyà o jɛ̀nɛ̀nì

¹ Nà hwɛ ndi o lì kumba lìya la ami o kòkò nanù mɛnɛ. Tɔ̀ nɛ eŋge e rza oŋgòwànà. Nà hwɛni ndi lì ɛndɛ o worzo ò lì ohwà jɛ̀nɛ̀nì nà mà ɛnɛ, na hweyà ema Rzàŋgo à ma no uŋmɛ̀lɛ̀.

² Nà hwi eyà ema e ma gbeeyɛnɛ mòtò wa Krirztò mɔ̀kɔ lìyomɛ la meya na menì me ma aka. Lohwɛ̀ à mà mo hvùma a mo ɛ̀ndɛ̀nɛ̀ o ŋmanyu yà lohwà lì karzami, na rza hwi ŋga à mà ɛ̀ndɛ ndi o èlìŋgɛ̀ ŋga o nyàmà ya nyo, Lohwɛ̀ mɛnɛ ndi à hwi mamɛ e ma gbèyɛ̀nɛ.

³ Ndèŋgana na hwi mamɛ ema e ma gbèyɛ̀nɛ na oŋgo mòtò aŋga, tɔ̀ nɛ na rza hwiyɛ ŋga e ma hwɛ ndi o èlìŋgɛ̀ ŋga o e nyàmà ya nyo. Lohwɛ̀ mɔ̀ ŋmìti mɔ̀ ndi à hwi.

⁴ Krirztò à mà mo hvùma rzi à mà ɛndɛ o Pàlàdìrzì. Àŋga ndi Lohwɛ̀ à mà mo òhweyà hweyà ema mɔ̀ à rzi hwɛmɛ ema e mòtò wa hwènàmà a ohweyà hwahvɛhvɛ hwatò.

⁵ Èŋge nyayi mòtò ɔ̀ndi imba na kumbeya lìya o kòkò, rzeketɛ o imba mbiti. Hweya ema hwe no gbeyà ema na kùmbe lìya la ami o kòkò, hwe hwèlì ndi hweyà ema hwe uŋmɛ̀lɛ̀ nanù ema na hwèlì ndi mòtò wa hwènàmà.

⁶ Nà hwɛnì tɛ lì ohva kumba, na rza o ɛnɛhwɛ ndi nàa èèti ya mòtò èhwanja na hwɛ ndi o lì ohwa e jɔ̀kɛ̀. Nà rza o kumba lìya la ami o kòkò ò iŋgi nyayi ja hweyà, aŋga nanù e rzi no ŋgba elùhwe o iŋgi nyayi ja hweyà, ndi na lìŋgàna nanù ema e no wowe nàa njɛnɛ ema na hwèlì o lì hvomɛ̀nɛ̀ hweyà ema na gbeyà na e hweyɔ ema na e okolɛ̀.

⁷ O lì arza nanù ema na rza a uŋmɛ̀lɛ̀ imba mbiti o hweyà hwe mànyakà hwɛ̀ndɛnɛ ema Lohwɛ̀ a no uŋmɛ̀lɛ̀ na o lì gbeyà ema na hweye. A gbeyà nanù ema na hwɛni nyàmbɛ o nyo ya ami ema e no ŋgba mòrziyò mondɛnɛ. Ène nyàmbɛ e ma hwɛ ndi nàa meerzenja ema Mòkarzɛ̀ à mà ome o lì no tàkìrzɛ̀ aŋga nanù na rza ohva kumba.

⁸ Nà ma kanɛ̀ Rzàŋgo ŋgèlì iyàwò nanù ema a nò ulɛ o tenì ya mono mòtàkà.

⁹ Ndi mamɛ ema à mà no òhweyà e hwèlì ndi nanù ema, “È ndèli ya ami ema no ò ŋgbelì e o loŋgamɛnɛyi. Nà ma o ètìrzɛ̀ aŋga nanù o hwɛ o ŋmanyu ya mètàkà me arzɛ ema o lu. Èhwanja e hvonda ema e ŋginyà e rza enje o mòtò, eŋge hvonda ndi e ŋginyà ya ami e mo ètìrzɛ̀.” O nàŋgɛ nanù na oka mɔ̀nyɛ̀ŋgì o lì kumba lìya la ami o kòkò ò hweyà ema hwe uŋmɛ̀lɛ̀ nanù ema na ohvi ndi nyo ya mòtò wa hwènàmà, aŋga nanù hwatò hwa ɛnɛ nanù ema e ŋginyà ya ama Krirztò e hwèlì o tenì ya ami ndèŋgànɛlɛ yɔ ndi e no ètìrzɛ̀.

¹⁰ O èŋgànɛ̀lɛ̀ rzɔ, o nyòla ya ama Krirztò, na oka mɔ̀nyɛ̀ŋgì tɔ̀ e hwɛ ndi nanù ema na rza imbami, tɔ̀ e hvonda ema hwatò hwa no hwɛnyɛ, tɔ̀ e hvonda ema hweyà hwe no ambani, tɔ̀ e hvonda ema hwatò hwa no tàkirzɛ, na tɔ̀ o e hvonda hvɛ ema na hwèlì o ndùtù. Nà ohwa ndi ene eyà nanù èhwanja, tɔ̀ ima hvonda ema na rza ohvɛ ŋginyà, Krirztò a no ŋgba e ŋginyà.

È nyɔ̀ŋgi ya ama Pàwolò o ŋmèmba mò Kɔ̀rintìyà

¹¹ Nà ohwa ndi nàa èèti ya mòtò ndi inyɔ ndi e gbèyi ɔ̀ndeŋgàtɛ̀ na ohwa nanù. Oma inyɔ e ohwa ndi hweyà hwe gbamù o lì no hvomɛ̀nɛ̀. Tɔ̀ e hwɛ ndi nanù ema na rza enje tɔ̀ yoma, ndi hwatò ema inyɔ e hwɛlɛ i àpɔ̀rzìtòlò ndɛnɛ, i rza no akani tɔ̀ eyà.

¹² È hvonda nà mà hwɛ na inyɔ nà mà àjùlɛ̀ o lì e uŋmɛ̀lɛ̀ hwèmɛ̀nɛ̀nì ndèŋgànɛlɛ nà mà gbeyà hweyà hwe mànyakà hwe ndɛnɛ o lì uŋmɛ̀lɛ̀ nanù ema na hwèlì ndi àpɔ̀rzìtòlò ema Lohwɛ̀ a omi.

¹³ Nà oma nà mà e gbèeyà rzi e rzi no rzaweyà, inyɔ e no òhweyà nɛ imba na ohwèlì hwanɛyi hwatò hwa menɛyi ŋmèmba wòlìto ò lì e aka. È hwèlì tɛ nanù ema ene eyà e hwèlì ndi lùurzè, inyɔ e no làkirzɛ.

¹⁴ Nàŋgɛ nanù na hwèlì na wòŋgìrzɛ̀nɛ̀ o lì jà lì ehvɛhvɛ e ŋgèlì ema e ùkirzɛ̀ iyàwò, ndi imba na rza o e tàkìrzɛ̀. Imba na rza jà ndi nanù ema e no ŋgbe hwema ndi inyɔ ndèŋgàtɛ̀ na jà. È hwɛni lì hwiya nanù ema irzàŋgo na inyàŋgo ja hwàna, ja àŋgàmɛ̀nɛ̀yi lì ɔŋgeya hwàanà rzeketɛ ema hwàanà ndi hwa ɔŋgeya irzàŋgo na inyàŋgo.

¹⁵ Nà o òka mɔ̀nyɛ̀ŋgì o lì gbeyàna tɔ̀ ima yoma ema na ohvi tɔ̀ e nyo ya ami o lì e oŋgòwànà. Nà e lìŋgàni tɛ rzayi-rzayi, rzeke inyɔ hvɛ e hwɛni o lì no lìŋgàna rzayi-rzayi.

¹⁶ Inyɔ yiti e hwi nanù ema imba na rzi hwɛ lì e kàyìrzɛ̀, ndi o hvɛhvɛ mòtò a ohwa nanù ema na hwɛ mèhvìlì ndèŋgàna nà mà e lukɛlɛnɛ mòlàŋgà.

¹⁷ Nɛ imba na tànɛyi lì e ɔnjɔ e? Nà ma ohweyà hwatò ema nà mà e omeya nanù ema hwa e ɔnje e?

¹⁸ Nà ma rzorzomeya Tàyìtùrzì ema a e jèeya, ndèŋgàna nà mà mo òmana na ɔ̀nɛyi ŋmanyàŋgo wa arzu wa Krirztò. È arza ndi lì ohwa nanù ema e hvonda ema Tàyìtùrzì à mà e jèeya à mà e lukɛlɛ e? È rza enje ndi e jɔ̀kɛ̀ nanù ema imba na Tàyìtùrzì i ohvi ndi mɔ̀ŋgɛ̀lɛ̀ mɔ̀kɔ e?

¹⁹ È hwèlì ndi nàa o ene hvonda ya arzɛ, e ɔ̀ŋgɛ̀lɛ̀ ndi nanù ema, ja a hwaandɛ ndi irzɔ hwiti o e jɔ̀kɛ̀ ema je e ohweyà. È rza enje nanù tɔ̀ ima eyà ema je e ohweyà, je e ohweyà ndi e yɔ nàa hwatò ema Krirztò a timba, ndèŋgàna Lohwɛ̀ a òkànèyà tɔ̀ ima lìtumba la eyà ema jo òhwa. I wònyamòwè kòkò, tɔ̀ ima lìtumba la eyà ema i gbèeyà, je e gbèeyà ndi o lì e ètìrzɛ̀.

²⁰ Nà oka wɔ̀ŋgɔ̀ nanù ema na jelì tɛ o lì e ɛnɛ na e ùŋmanɛlɛ e gbeyà hweyà ema na rza lìŋganɛyi, ndèŋgànɛlɛ imba hvɛ na gbeyà hweyà ema inyɔ hvɛ e rza lìŋgànɛyi. Nà oka wɔ̀ŋgɔ̀ nanù ema na jelì tɛ na e ùŋmanɛlɛ o motaŋgo, e anònànɛ̀yì mɔ̀kɔ na ɔ̀nɛyi, e ahwɛ̀nɛ̀nɛ̀yi hwètàtò, e rza o arza nanù ema ohvɛhvɛ mòtò a hwɛnɛ èluhwe, e àhwɛ̀nyɛ̀nɛ̀yì, e a o àyìndànɛ̀, e o òhva kumba ndèŋgàna e o gbeyà ndi hweyà hwe mbùnakɛ̀.

²¹ Nà oka wɔ̀ŋgɔ̀ hvɛ nanù ema na e jɛlɛlɛ hvɛ tɛ, Lohwɛ̀ a o no enyìrzɛ̀ o worzo hwa anyu. Ndèŋgànɛ̀lɛ̀ na o hwɛ rzɔ̀lùu èhwanja rzayì-rzayì ja hwatò ò ìtììtènì ja anyu hwa lìmelì ndi o lì gbeyà hweyà hwe wòhwe ema hwà mà hwɛ lì gbeyà o mòlòmɛ̀ e rzi hwɛ lì atìkòwɛ̀ o lì gbeyà mamɛ ema Lohwɛ̀ a arza. Hwa gbeyà hweyà hwe mbindo, hwa gbeyà hweyà hwe mòrzònje na lì gbeyà hweyà hwe mbindo ema hwe hwa jànà ìrzɔnì.