2 Kɔ̀rintìyà 11 - Mokpwe: Bakwery (New Testament)

Pàwolò nà i Àpɔ̀rzìtòlò ja mòlàŋgà

¹ Tɔ̀ na hwɛ ndi èèti ya mòtò, na e rzorzomeya nanù ema e no hwɛmɛ na e ohweyà tɔ̀ ŋmana eyà, e òkànèyà.

² Nà e nonelì e ŋgàna ema Lohwɛ̀ a e nonelì. Inyɔ e gbèyi ndi nàa mɔ̀ɔmbɔ̀ mo ŋgɔndɔ. Moŋgo mɔ̀ɔmbɔ̀ mo ŋgɔndɔ, mɔ̀ ndi nà mà ohwe nanù ema mòtò mɔ̀kɔ a o hwaa, ndèŋgànɛlɛ oŋgo mòtò a hwèlì ndi Yerzù Krirztò.

³ Ndi tɔ̀ nanù, na oka wɔ̀ŋgɔ̀ nanù ema, na oma Mòkarzɛ̀ à mà lukɛlɛ Èhva, nanù mɛnɛ hvɛ ndi hwa e o lukɛlɛ aŋga nanù e rza ika mèèmà me anyu me arzɛ oma Yerzù Krirztò, ndèŋgànɛlɛ e rza o mo gbèeyà na mèèmà me anyu me arzɛ.

⁴ Imba na ohwa ndi ene eyà nanù èhwanja mòtò a jelì tɛ rzi a e ohweyà ŋmɛ̀ndì ema mo rza enje ndi ŋmɛ̀ndì mo ama Yerzù Krirztò, ema irzɔ i hwèlì lì e ohweyà inyɔ e mo emeyà. Tɔ̀ e hwɛ ndi ema mɔ̀ à e ohwèlì tɛ ndi eyà ya lì hvomɛ̀nɛ̀ èlìŋgɛ̀ ema rzeketɛ yɔ ndi irzɔ je e ohweyà e emeyà. Tɔ̀ mòtò a e ohwèlì tɛ ŋmɛ̀ndì mò gbamù ema rzɛ̀kɛtɛ mo ndi irzɔ je e ohweyà, inyɔ e mo emeyà.

⁵ Nà rza lòkɛ̀ nanù ema hwanu hwatò ema hwa a hwɛlɛ wo hwiti nanù ema hwa hwèlì ndi àpɔ̀rzìtòlò ndɛnɛ hwa na akayi o èwòlò ema wɔ hwa gbeyà na a mɛnɛnɛyi tɛ na wɔ̀.

⁶ Nà tànɛyi na rzi hwiye o lì ohwe o ìtììtènì ja hwatò na oma wɔ hwa ohwa, ndi imba na rzɔŋgìtɛ̀nɛ̀ hweyà hwe arzɛ ema imba na ohwa. I ma e tɛlɛlɛ hwene hweyà hwe arzɛ ema i gbeyà.

⁷ Nà oma nà mà hwɛ o lì e ohweyà ŋmɛ̀ndì mò gbamù ema mo ma uwɛ̀lɛ̀lɛ̀yi oma Lohwɛ̀, imba na rzi e ohweyà nanù ema e no taŋgeya. Nà ma arzihwirzɛ imba mbiti aŋga nanù inyɔ e luwa èluhwe. Nà oma nà mà gbeye nanù, eyà ya wòhwe ndi nà mà gbeye nanù e?

⁸ Nà ma hwɛ ndi lì e gbeyà ndèŋgàna mòhvɛhvɛ ŋmèmba mo ndi mo ma hwɛ lì no taŋgeya. O èŋgànɛ̀lɛ̀ rzɔ ema hwɛ rzɔ ndi nàa, nà mà hwɛ ndi o lì lukɛlɛ moŋgo ŋmèmba o lì e oŋgòwànà.

⁹ È hvonda ema nà mà hwɛ na inyɔ, marzako na rzi ohve tɔ̀ yoma, ndèŋgàna rzi e tàkìrzɛ̀ Èhwanja tɔ̀ mamɛ ema nà mà arze wònyanyàŋgo hwa ami hwa Krirztò ema hwà mà uwɛ̀lɛ̀lɛ̀yi o Màrzèdonìyà hwà mà hwɛ lì no ŋgba e yɔ. Nà oma na rze tàkìrzɛ̀ o hvonda ya worzo, na rza tanɛ lì e tàkìrzɛ̀ hvɛ tɔ̀ ŋgèlì tɔ̀ hvɔ̀kɔ.

¹⁰ Nà oma na ohwa e jɔ̀kɛ̀ na mòtò wa Krirztò, tɔ̀ mòtò tɔ̀ mɔ̀kɔ o erzòòkà ya Àkayiyà a rza tanɛ a no tɛmirzɛ o lì kùmba lìya la ami o kòkò ema na rza lu etàŋgì na inyɔ.

¹¹ È ɔ̀ŋgɛ̀lɛ̀yi ema na ohwa ndi nanù èhwanja na rza e lìŋgàni e? Lohwɛ̀ a hwi ema na e lìŋgàni.

¹² Ène eyà ema na gbeyà nàŋgɛ nanù, na hwɛnì ndi lì e gbeyà nanù mɛnɛ aŋga nanù na rza ŋgba i àpɔ̀rzìtòlò ja mòlàŋgà ehvolo ema hwa kùmbe i kòkò ja awu nanù ema hwa gbeyà ndi molemilemi mo èwòlò ema irzɔhvɛ i gbeyà.

¹³ Hwàŋga hwatò ema hwa hwà kùmba màà mà awu o kòkò, hwa hwèlì ndi hwà-òhwèlì hwa mòlàŋgà, hwa ɔnjɔ̀ hwatò ò èwòlò ema hwa gbeyà, na oma hwa hwà lukɛlɛ nanù ema wɔ hwa hwèlì ndi i àpɔ̀rzìtòlò ja ama Krirztò.

¹⁴ Ène eyà e rzà no tàmìrzɛ̀ èhwanja, tɔ̀ Mòkarzɛ̀ mɔhvɛ a àwuŋmɛ̀lɛ̀ mo ŋmìti hwa ɛnɛ oma a hwèlì ndi aŋgèlì yà ama Lohwɛ̀ ya wòtani.

¹⁵ O èŋgànɛ̀lɛ̀ rzɔ, e rza no tàmìrzɛ̀, e hwèlì tɛ nanù ema hwàgbèèlì hwa ama Mòkarzɛ̀ hwa ohvɛ hwa awuŋmɛ̀lɛ̀ tɛ wɔ hwiti na hwàgbèèlì ema hwa okolɛ hwatò ò lì gbeyà eyà ya jɔ̀kɛ̀ na oma Lohwɛ̀ a àrzeyà. O lìrzukù e kɔ̀kìrzɛ̀ ema hwa o luwɛ e o atìŋgɛ̀ na hwegbèèlì hwe awu.

Mètàkà ema Pàwolò à mà luwe nàa Àpɔ̀rzìtòlò

¹⁶ Nà oma nà mà lome lì e ohweyà, e rzi no wowa nanù ema na hwèlì ndi èetì ya mòtò. Ndi e ɔ̀ŋgɛ̀lɛ̀yi tɛ nanù ema nà hwèlì ndi èetì, e gbeye mamɛ na e ohweyà kɔ̀yi-kɔ̀yi aŋga nanù i imbahvɛ na kùmba e kòkò teŋyi.

¹⁷ Tɔ̀ mamɛ ema na ohwa nàŋgɛ, e rza enje ndi eyà ema e Rzàŋgo e no òhwèlì nanù ema na ohwe. Nà kùmbi tɛ e kòkò ya ami, o lì ohwa tɔ̀ eyà o nàŋgɛ nanù, oma na e ohwa ndi nàa èetì ya mòtò.

¹⁸ Nà oma rzayì-rzayì ja hwatò hwa hwèlì o lì kùmba i kòkò na màà mà awu, nàa hwatò hwa ene rze, imbahvɛ na gbeyà nanù mɛnɛ.

¹⁹ Inyɔ hwiti e ohwa nanù ema e ohvi lìhwiyè, eŋge eyà e ma e gbeyà e emeyà na mɔ̀nyɛ̀ŋgì hweyà ema hweti hwe hwatò hwa e ohweyà.

²⁰ Tɔ̀ e hwɛ nanù ema mòtò a e timbirzɛ tɛ ndi nàa mòkòme, tɔ̀ e hwɛ ndi ema a e laanà, tɔ̀ e hwɛ ndi ema a e ɔnjɔ, tɔ̀ e hwɛ ndi ema a e ndinda, tɔ̀ e hwɛ ndi nanù ema a e rzamì lùumbɛ̀ o worzo, e mo emeyà.

²¹ Nà oki ìrzɔnì nanù ema i rzi hwɛnɛ ene nyayi ya ŋmèma, o lì e gbeyà ene nyayi ya eyà. Nà ohwà ndi o nàŋgɛ nanù nàa èetì ya mòtò. Nà o ayèkirzɛ nà lì kùmba lìya la ami o kòkò lì hvomɛ̀nɛ̀ hweyà na gbeyà, molemilemi na oma i àpɔ̀rzìtòlò ja mòlàŋgà i gbeyà.

²² Wɔ̀ hwa e ohweyà nanù ema wɔ ndi hwa hwèlì i wònjà ja Hibrù, imbahvɛ na hwèlì ndi wònjà ya Hibrù. Wɔ̀ hwa ohwa nanù ema, hwa hwèlì ndi hwatò hwa Irzàyɛ̀lì, imbahvɛ na hwèlì ndi mòtò wa Irzàyɛ̀lì. Wɔ̀ hwa ohwa nanù ema hwa hwèlì ndi hwatò hwa è nyɔ̀ŋgɔ̀nì ya ama Abràhamù, imba hvɛ na hwèlì ndi mòtò hwa è nyɔ̀ŋgɔ̀nì ya ama Abràhamù.

²³ Wɔ̀ hwa ohwa nanù ema hwa hwèlì ndi hwàgbèèlì hwa ama Yerzù Krirztò, imba hvɛ na e ohweyà nàŋgɛ nanù ema, imba nà mà gbeyà èwòlò lì hwa aka. Nà ohwa ndi nàŋgɛ nanù nàa ŋmɛnyɛ. Nà ma gbeyà èwòlò ya ŋginyà lì hwa aka, nà mà aŋgɛ̀hwɛ̀ o hwèwòwà ŋgèlì rzayi-rzayi lì hwa aka, nà mà gbiyɛhwɛ hvonji rzayi-rzayi lì hwa aka, ndèŋgàna nà mà uŋgbɛlɛlɛ e kpelì rzayi-rzayi ja ŋgèlì lì hwa aka.

²⁴ Wonyà Yuda hwà mà no gbiyɛ rzàyiyàwò ja mbɛti na lùwa ŋgèlì ita.

²⁵ Hwatò hwa Romànì, hwà mà no anana na eeye ŋgèlì iyàwò. O hvonda hvɔ̀kɔ hwahvɛhvɛ hwatò hwà mà no ùŋma màŋyàyi natɛ̀ɛ hwà mà arza lì no òŋwa. Ŋgelì iyàwò ema mèelì me malìhwa me ma jo indane o tenì ya ŋmànja. Hvonda hvɔ̀kɔ nà mà hwɛ lì inda o tenì ya ŋmànja rzi ene e ma gbèyɛ̀nɛ wùnyà wɔ̀kɔ rzurzu ŋmerze na wùuwù.

²⁶ Nà ma ɛndɛ hweyɔ̀ndɔ̀ rzayi-rzayi, o hweŋge hweyɔ̀ndɔ̀, nà mà arza lì inda o malìhwa. Nà ma uhwa lì wɔ̀lɛ̀nɛ̀ lòoŋgɛ la ami o màà mà hwayihwɛ, o màà mà hwatò wa ami hwa wònyà Yudà na o màà mà hwatò ema hwa rza enje wònyà Yudà. Nà ma uhwa lì wɔ̀lɛ̀nɛ̀ lòŋgɛ la ami o mambowà mà ndɛnɛ o mòrzànjɛ̀, o ŋmànja na o màà mà hwatò ema hwa ahwèŋgɛ nanù ema hwa hwèlì ndi wònya Krirztò ema hwa rza enje.

²⁷ Nà ma gbeyà rzayi-rzayi ja hwèwòlò hwe ŋginyà, rzayi-rzayi ja ŋgèlì hvɛ nà mà lìya na hwehvɛnyɛ. Marzako hvɛ na rzi luwe tɔ̀ yoma ya lì laa tɔ̀ e yɔ la lì nyɔ, na rzi hwɛnɛ hvɛ tɔ̀ e hvolo ya lì laa mòlelì. Manɛyi marzako hvɛ yùululì ya ŋginyà e ma no kpeya o nyo ema na rza ohvɛ tɔ̀ yoma ya lì wɔtɔ̀.

²⁸ O ŋmanyu ya hwenè hweyà hwe arzɛ, nà mà ohva hvɛ e nyɔ̀ŋgi wùnyà tɛ o lì oŋgeya ŋmèmba me arzɛ ema me ma hwɛ o rze ya lìkànèyà lì ami.

²⁹ Mòtò a rza imbami tɛ o hweyà hwe ama Lohwɛ̀, imba hvɛ na hweyà ndi molemilemi na oma mɔ̀ hvɛ a hweyà. Hwa tonirzɛ tɛ mòtò o lì unda o wòhwe, e no tàkìrzɛ̀ rzayi-rzayi.

³⁰ Nà hwɛnì tɛ lì kùmba lìya la ami o kòkò, hweyà ema hwe gbeyà na kùmbana lìya la ami o kòkò hwe hwèlì ndi hweyà ema hwe gbèeyà hwatò hwa no ɛnɛ ndi nàa mòtò ema a hwèlì rziŋga.

³¹ Lohwɛ̀, e Tatɛ̀ ya ama Rzàŋgo Yerzù Krirztò a hwi nanù ema na rza kɔ hweyà. Jèka i hwɛ na mɔ̀ o gbìndèyà nà ò gbìndèyà.

³² È hvonda nà mà hwɛ o e mbowà ya Dàmàrzkɔ̀rzì, e mòkànèlì ema à mà hwɛ o rze ya lìkànèyà la ama e kiŋgɛ̀ Arɛ̀tàrzì, à mà ika hwàànà njùma o lì ɔ̀ŋgeyà mawohvà mà arzɛ ma e kɔ̀tɔ̀ ya mbowà ema hwa na o lɛmbɛ.

³³ Hwatò hwà mà no rzùŋgà o tenì ya morzayi, hwa no akɛlɛlɛ o e hvànàmà ema e ma hwɛ o erzù ya kɔ̀tɔ̀ ema e ma lìŋga e mbowà ya arzɛ, rzi hwa no rziirzɛ o rze rzi na hwaŋga na ɛndɛ e ya ami.