2 Kɔ̀rintìyà 10 - Mokpwe: Bakwery (New Testament)

Pàwolò a ohwi ama èwòlò ya eni ò Kɔ̀rintìyà e hvomɛ̀nɛ̀

¹ Imba Pàwolò, ema na arzihwirzɛ na ŋmɛɛ nàa Krirztò, na e rzorzomeya. Lòŋgo la hwatò hwa ohwa nanù ema na hwèlì tɛ na inyɔ na oka wɔ̀ŋgɔ̀ ndèŋgàna hwa ohwa nanù ema na rza enje tɛ na inyɔ na e tìleya kààtì ema ja ambirzɛnɛ.

² Nà e rzorzomelì ema e rzi gbeyà na oma hwaŋga hwatò hwa gbeyà aŋga nanù na e jɛlɛlɛ tɛ, na e ohwirzɛnɛ e rzi hwɛ tɔ̀ wɔ̀ŋgɔ̀ tɔ̀ wɔ̀kɔ. Hwatò ema na o òhwirzɛnɛ, wɔ̀ ndi hwa hwèlì hwaŋga hwatò ema hwa ohwa nanù ema irzɔ i gbeyà ndi èwòlò nàa hwatò hwa ene rze hwa e gbeyà.

³ È hwèlì jɔ̀kɛ̀ nanù ema i hwèlì ndi anù rze ndi i rza ana na oma hwatò hwa ene rze hwa ana.

⁴ Hwɛ̀ɛkɛ hwe arzu hwe njùma ema i gbeyàna o lì anana hwe rza enje nyayi hvɔ̀kɔ nàa hwɛ̀ɛkɛ hwe njuma ema hwatò hwa ene rze hwa gbeyàna o lì anana e njuma. Ndi irzɔ i gbeyàna ndi hwɛ̀ɛkɛ hwe ŋginyà hwe ama Lohwɛ̀, o lì hvàŋga i ŋguwa ja ama hwàkɔ̀yèlì hwa arzu. Hwene hwɛ̀ɛkɛ hwe njùma hweyɔ ndi irzɔ i gbeyàna o lì ɔ̀tɛlɛ̀ metaŋgo me arzɛ me mòlàŋgà.

⁵ I hwe gbeyàna hvɛ o lì wuulɛ tɔ̀ ima johwi ja lì ayèkirzɛ̀, ema hwa ohwa ema i gbeyà ema hwatò hwa rza hwiya Lohwɛ̀. I gbeyà hwatò ò lì tikowa màlùtèyà ma awu aŋga nanù màlùtèyà ma awu ma arzɛ ma o hwɛ ndi nàa Krirztò a arza ama mà hwɛ.

⁶ È hvonda ema e o gbeyɛ na oma Krirztò a arza nanù ema e gbeye na mèèmà me anyu me arzɛ, o eŋge hvonda ɔ̀ndi irzɔ jo ò rzekeya o lì kɔ̀kìrzɛ̀ tɔ̀ ima mòtò ema awuŋmɛ̀lɛ̀ nanù ema mɔ̀ à rza o gbeyà na oma Krirztò a arza nanù ema a gbeye.

⁷ È ɔ̀ŋgɔ mamɛ ema ye e hwèlì o worzo. Tɔ̀ ima mòtò ema a ikayi ŋmèma mo eni na Krirztò, a hwi nanù ema na oma mɔ̀ à hwèlì, nanù ndi irzɔ hvɛ i hwèlì na Krirztò.

⁸ Tɔ̀ na kumba ndi lìya la ami o kòkò ehwànja o e ŋginyà ema e Rzàŋgo e no ŋgbelì, tɔ̀ nà lì aka mamɛ ema imba na lì kumba naŋgɛ, na rza oka tɔ̀ ìrzɔnì. A no ŋgbelì ndi eŋge ŋginyà o lì e ètìrzɛ̀ rzeketɛ o lì e ɔ̀ndɛlɛ lìlòkɛ̀.

⁹ Nà rza arza nanù ema e lùteyà nanù ema ene kààtì ema na e tìleya e hwèlì ndi o lì e rzìrzà.

¹⁰ Imba na ohwa ndi nanù èhwanja, lòŋgo la hwatò hwa ohwa nanù ema i kààtì ema imba na e tìleya ji imbami rzayi-rzayi ndèŋgànɛlɛ jo òhvi mbɔrzi ya wòhwe o tenì. Lòŋgo la hwatò hvɛ hwa ohwa nanù ema imba na hwèlì tɛ na wɔ̀, na rza ohva tɔ̀ ŋginyà ndèŋgàna tɔ̀ mamɛ hvɛ ema na ohwa e rza ohva tɔ̀ ŋginyà tɔ̀ hvɔ̀kɔ.

¹¹ Hwàŋga hwatò ema hwa ohwa nanù, wɔ̀ hwa hwi nanù ema tɔ̀ mamɛ ema na tìlì o kààtì e hvonda ema na rza enje na inyɔ, e hvonda ema na hwèlì na inyɔ na e gbeyà.

¹² I rza tànɛyi o lì ohwa nanù ema ja amɛnɛnɛ, tɔ̀ nanù ema i hwèlì ndi nyayi hvɔ̀kɔ na hwatò ema hwa ayèkirzɛ̀ ema hwa hwèlì ndi hwatò hwa gbamù. Ndi na oma wɔ̀ hwiti hwa amɛnɛnɛ wɔ̀ na wɔ̀, ndèŋgànɛ̀lɛ̀ wɔ̀ hwa àwòhwànɛ̀lɛ̀ wɔ̀ hwiti nanù ema hwa àkànɛ̀lɛ̀yi mɔ̀kɔ na ɔ̀nɛyi, hwa hwèlì èèti.

¹³ Ndi irzɔ i rza tànɛyi o lì kùmba màà mà arzu o kòkò lì aka mamɛ ema i hwɛni o lì kumba. I hwɛni ndi o lì ayèkirzɛ̀ o èki ema Lohwɛ̀ à mà jo òmɛ ema i gbèeyà èwòlò. Èwòlò ema i gbeyà o ìtììtènì ja anyu, e hwèlì ndi èwòlò ema irzɔ ja ayèkirzɛ̀ o lì gbeyà.

¹⁴ Irzɔ i rza kùmba màà mà arzu o kòkò ò lì gbeyà èwòlò ò èki ema Lohwɛ̀ a rza jo òmɛ o lì e gbeyà. Irzɔ ndi i ma hwɛ hwatò hwa worzo ò lì uwɛ̀lɛ̀lɛ̀yi hvohvo ò lì jà

¹⁵ Irzɔ i rza kùmba màà mà arzu o kòkò lì aka lìmɛni ema i hwɛni lì kumba, eŋge ŋgàna e ohwa ndi nanù ema, irzɔ i rza kùmba màà mà arzu o kòkò lì hvomɛ̀nɛ̀ èwòlò ema hwahvɛhvɛ hwatò hwà mà gbeyɛ. Ndi irzɔ jo ikayi mahvita nanù ema na oma lì lòkɛ̀ la anyu lì olohwa, nanù ndi èwòlò ema i gbeyà e o nyàla o weki ema i gbèeyà hwèwòlò.

¹⁶ Ène e o jo gbeyà o lì ɛndɛ o hwehvɛhvɛ hweki ema hwe rzɔlɛnɛ o lì ohwa Ŋmɛ̀ndì mò Gbamù e rzi hwɛ nanù ema irzɔ i kùmba màà mà arzu o kòkò lì hvomɛ̀nɛ̀ hwèwòlò ema hwahvɛhvɛ hwatò hwà mà gbèeyà o hwehvɛhvɛ hweki.

¹⁷ Ndi nà oma è tìlàhwì ò è kààtì yà Lohwà nanù ema, “Tɔ̀ njɛnɛ ema à kùmbi lìya là eni ò kòkò, à aŋgàmɛ̀nɛ̀yi ndi ò lì li kumba lì hvomɛ̀nɛ̀ hweyà ema Rzàŋgo à mò gbèelì.”

¹⁸ Rzeketɛ hweyà hwe gbamù ema mòtò à ohwanɛ̀lɛ ò mɔ̀ ŋmìti ndi hwe uŋmɛ̀lɛ̀ nanù ema à emànɛ̀lɛ̀hwɛ̀ nàa àpɔ̀rzìtòlò, ndi è mòtò wà jɔ̀kɛ̀ ema Lohwɛ̀ à ohwa hweyà hwe gbamù lì hvomɛ̀nɛ̀ mɔ̀ ndi à emeyàhwɛlɛyi.