2 Kɔ̀rintìyà 1 - Mokpwe: Bakwery (New Testament)

Ìikɔ̀mi ja ama Pàwolò

¹ Imba Pàwolò e Àpɔ̀rzìtòlò yà ama Yerzù Krirztò, nà omà e mà tɛyìrzɛhwɛ na Lohwɛ̀. Imba ndi na tìlì ene kààtì o irzɔ nà ŋmànyàŋgò wà arzu wà Krirztò Tìmòtì je omelì ikɔ̀mi. Inyɔ, lì arzàŋganɛ là hwatò hwa Lohwà ema e hwèlì ò è mbowà yà Kɔ̀rintò, na hwanɛ̀yi hwatò hwa arzɛ hwa Lohwà ema hwa hwèlì o erzoòkà ya Àkayiyà.

² Inyɛ̀ è ndèli nà ɛ̀yɔ̀lɛ̀ yà ama Lohwɛ̀ Tatɛ̀ wà arzu nà Rzàŋgo Yerzù Krirztò, è hwɛ nà inyɔ.

Lòohwà ema lì ètirzɛ̀ mèèmà mè hwatò hwa arzɛ

³ Inyɛ̀ ì ŋgbe Lohwɛ̀ jèka, è Tatɛ̀ yà ama Rzàŋgo yà arzu Yerzù Krirztò. Mɔ̀ ndi à hwèlì Tatɛ̀ wà ììlì ja arzɛ nà Lòohwà ema lì ètirzɛ mèèmà mè hwatò hwa arzɛ.

⁴ À jò ètirzɛ mèèmà mè arzu ò lì hvomɛ̀nɛ̀ i ndùtù ja arzu ja àrzɛ ema i lùwa. O lì àrza nanù ema irzɔhvɛ i ètirzɛ mèèmà me hwanɛ̀yi hwatò ema wɔ̀ hvɛ hwa ohvi nyayi nà nyayi ja ndùtù. Inyɛ̀ i hwa ètìrzɛ̀ mèèmà me awu, nà omà Lohwɛ̀ mɔ̀ hvɛ à jo ètìrzɛ̀, e me arzu mèèmà.

⁵ È hwìyè nanù ema nà omà Krirztò à mà luwe mètàkà, nanù ndi irzɔ hvɛ i taka o nyòla yà eni, o èŋgànɛ̀lɛ̀ nà oma i hwèlì nà Yerzù Krirztò, Lohwà à jo ètìrzɛ̀ mèèmà me arzu gbamù-gbamù.

⁶ Ò èŋgànɛ̀lɛ̀ rzɔ i lu tɛ mètàkà, è hwèlì ndi ò lì e ètirzɛ mèèmà nà o lì luwa loŋgirzɛ. È hwèlì tɛ ema, Lohwɛ̀ a jo etìrzɛ̀yi mèèmà me arzu mèèmà me anyu meyɔ̀hvɛ me ètìrzɛ̀hwɛ. Àŋga ndi e lùwa màyìmbì mà lì àjùlɛ̀nɛ̀ mòlèmìlèmi mo mètàkà, nà lì kaka là mèèmà, nà oma irzɔ hvɛ i me àjùlɛ̀nɛ̀yi.

⁷ Ji ikayi mahvita mà arzu nà inyɔ rzayì-rzayì. I hwi ema è lu tɛ̀ mètàkà nà oma irzɔ hvɛ i taka, Lohwɛ̀ à yè ètìrzɛ̀ mèèmà, nà oma à jò etìrzɛ̀yi è me arzu.

⁸ Wònyamòwè kòkò, ì lìŋgànì ema inyɔ hvɛ e rzɔ̀ŋgìtɛ̀nɛ̀ kɔ̀yi-kɔ̀yi mòtàkà ema i lu o tenì yà erzòòkà ya Èrzìyà. Mòtàkà ema i lu mo ma jò lìtana nyayi ema i rzi hwiyè ema i karzòwà.

⁹ Nà è jɔ̀kɛ̀ ima ɔ̀ŋgɛ̀lɛ̀ ema hwa akɛ̀lɛ̀ mbako ema jo oŋwahwa. Ima lùwa mene mètàkà nanù, aŋga nanù i rza àyikɛ̀ màhvìta na irzɔ mɛ̀nɛ, ndi ji ika ndi màhvìta na Lohwɛ̀ ema à hvùmùlɛ̀ è wɔ̀ ema hwa ŋwelì.

¹⁰ Tɔ̀ nɛ i mà kombɛ̀nɛ̀ è kpelì, Lohwɛ̀ à mà jo rzùŋga. I hwèlì tɛ o ndùtù, à jò rzùŋga ndi nanù mɛnɛ. Lìhvìta là arzu lì hwèlì ndi ema Lohwɛ̀ à ò jò rzùŋga hvɛ i hvonda ja arzɛ, i hwèlì tɛ ò ndùtù.

¹¹ Lohwɛ̀ à jò rzùŋgà èhwanja è hwèlì è jò kànɛ̀lɛ̀lɛ̀. Rzayì-rzayì ja hwatò hwa jo kànɛlɛ̀lɛ̀ ndèŋgàna Lohwɛ̀ a jo nàmìrzɛ̀yi. Ène eyà e gbeyà rzayì-rzayì ja hwatò hwa eka Lohwà, èhwanja mɔ̀ à jo rzùŋgi.

Pàwolò a tiko mɔ̀ŋgɛ̀lɛ̀ ma eni o yɔ̀ndɔ̀

¹² Mamɛ ya arzɛ ema e gbèyɛ̀nɛ̀yi, e jò ŋgbelì kumba. I tànɛyi lì ohwà na mèèmà me rzaŋgi ema o hwɛ̀ɛ̀mɛ̀ hwɛ arzu hwe arzɛ anù rze, rzɛ̀hvɔ̀nì na oma i hwèlì na inyɔ na mèèmà me wòtani, na e jɔ̀kɛ̀ ya arzu. Nànù ndi Lohwɛ̀ a mà tɛ̀yirzɛ ema e hwɛ. Rzeketɛ o lìhwiyè la arzù la mòtò wa hwènàmà, ììlì ja ama Lohwɛ̀.

¹³ Mamɛ ya arzɛ ema je e tilelì, e hwèlì ndi mamɛ e tànɛyi lì laŋga nà lì rzɔ̀ŋgìtɛ̀nɛ̀. Nà àhvìtɛ̀ ema e rzɔ̀ŋgìtɛ̀nɛ̀ hwenè hweyà hwe arzɛ i hvonda ja arzɛ.

¹⁴ Nà oma e ma màa lì rzɔ̀ŋgìtɛ̀nɛ̀, lòŋgo la hweyà lì jo hvomɛ̀nɛ̀, na lòkɛ̀yi ema, e o jo rzɔ̀ŋgìtɛ̀nɛ̀ kɔ̀yi-kɔ̀yi. Ène eyà e o gbeyà e hvonda ema Rzàŋgo Yerzù a o jɛ̀ɛ̀ e o òhwa ema e hwɛnì kumba na irzɔ na oma irzɔ hvɛ i hwɛnì kumba na inyɔ.

¹⁵ Nà omà na mà lòkɛ̀ ema ene eyà e hwèlì e jɔ̀kɛ̀, nà mà kàkɛ̀nɛ̀ o lì loma lì e jèeyà, aŋga nanù, e lɔ̀yìrzɛ̀ e ŋgèlì ema e ùkirzɛ̀ ihwàkɛ.

¹⁶ Nà kàkɛ̀nɛ̀yi ema nà è jèeyà, na ɛ̀ndɛ tɛ o èrzookà ya Màrzèdonìyà. Nà kàkɛ̀nɛ̀yi hvɛ ema o hwètimbelì hwe ami nà tɛ̀mɛ̀ o èki ya anyu. Àŋga nanù è nò òŋgòwànà o lì nò omà o yɔ̀ndɔ̀ ya ami ya èrzoòkà ya Jùdeyà.

¹⁷ Nà omà na mà tɛ̀yirzɛ hwenè hwètɛ̀yìrzèlèlì, na rzi tànɛyi lì tikowa mèèmà mo ami. Nà rzi tɛ̀yirzɛ hwenè hwètɛ̀yìrzèlèlì nàa e mòtò wa hwènàmà a tɛ̀yirzɛ. Nà rza enje mɔ̀kɔ ema a imanɛlɛ nanù ema, “Ɛ̀ɛ na gbeyà” rzi o mburzà ya hvonda hvɛ rzi a ohwa a ma, “Jàyɛ̀, na rza e gbeyà.”

¹⁸ O worzò wo ama Lohwɛ̀ ema a gbeyà mamɛ ema a ohwi à mà a gbeyà, jo òhwi tɛ ema i gbeyà eyà, je e gbeyà.

¹⁹ È hwèlì ndi nanù èhwanja, Ŋmɛ̀ndì mò Gbamù lì hvomɛ̀nɛ̀ e ŋmana wa Lohwà Yerzù Krirztò, ema imba, Rzàyìlàrzì, na Tìmòtì, ima e ohweyà. Yerzù a rza ohwa ama a gbeyà eyà ema a rza o gbeyɛ. A gbeyà mamɛ ema a ohwi à mà a gbeyà.

²⁰ Mamɛ ya arzɛ ema Lohwɛ̀ a ohwi ama a gbeyà, a e gbeyà na oma i hwèlì na Krirztò. Lìtìŋga lɔ lìni lì hvomɛ̀nɛ̀ hweyà ema Yerzù a gbeyà, ɔ̀ndeŋgàtɛ̀ i ohwa nanù ema, “Inyɛ̀ wo lìya nanù” aŋga nanù Lohwà a luwa èluhwe.

²¹ Lohwɛ̀ mɔ̀ ndi à gbèyi irzɔ na inyɔ i lòkɛ̀ Krirztò. Lohwɛ̀ a ɔ̀kirzɛ̀ irzɔ hwa arzɛ o lì hwɛ na Krirztò.

²² Lohwɛ̀ à mà jo ika embànèlì ya eni o lì uŋmɛ̀lɛ̀ nanù ema i hwèlì ndi hwatò hwa eni. A ika hvɛ Èlìŋgɛ̀ yà Wòtani o mèèmà me arzu, o lì uŋmɛ̀lɛ̀ ema i lùwa mamɛ ya arzɛ ema a jo kàkɛ̀nɛ̀yi.

²³ Lohwɛ̀ ndi à hwèlì e mboŋgi ya ami, e uŋmɛ̀lɛ̀ ema màmɛ ya arzɛ ema na ohwa e hwèlì ndi e jɔ̀kɛ̀. Lìtìŋga ndèŋgàtɛ̀ na rzi timbe hvɛ o Kɔ̀rintò, lì hwèlì ndi ema, na rzi arze ema e hweye wòhwe.

²⁴ I rza arza ema e hwɛ ndi nàa hwanɛyi ema, je imbɛ o lì lòkɛ̀ hweyà. Ndi irzɔ i gbèyɛ̀nɛ na inyɔ, aŋga nanù e oka mɔ̀nyɛ̀ŋgì èhwanja e tɛmi ehve-ehve o malòkɛ̀ ma anyu.