1 Yòwanìrzɛ̀ 2 - Mokpwe: Bakwery (New Testament)

Krirztò ndi à hwèlì e mòoŋgwànelì wa arzu

¹ Inyɔ ema e hwèlì nàa hwàanà hwa ami, na e tìleya ene kààtì aŋga nanù e rza gbeyà wòhwe. Ndi e hwèlì tɛ ema mòtò a gbèyi tɛ wòhwe, irzɔ jo òhvi mòtò ema a tɛmi ehve-ehve Yerzù Krirztò. Mɔ̀ ndi à jo rzorzomeya e Tàtɛ.

² Krirztò ŋmìti à mà hwɛ ndi nàa jàhwèyà ema Lohwɛ̀ à mà gbeyàne o lì jo kɔ̀tɔ̀ o wòhwe ema i ma gbeye. A ma gbeyà ndi nanù aŋga nanù irzɔ i luwa lì làkìrzɛnɛ. Rzeketɛ o wòhwe wo arzu mɛnɛ ndi o wòhwe wo hwatò hwa arzɛ hwa ene rze.

³ È hwèlì tɛ nanù ema irzɔ jè ika imbenda jà ama Lohwɛ̀, ò jɔ̀kɛ̀ ì mò hwi.

⁴ Tɔ̀ ima mòtò ema à ohwa nanù ema, “Nà mò hwi” ndi à rzi ika imbenda jà eni, à hwèlì ndi mòtò wà mòlàŋgà ndèŋgànɛlɛ è jɔ̀kɛ̀ è rza enje ò tenì yà eni.

⁵ Tɔ̀ njɛnɛ ema à gbeyà mamɛ ema eyà yà ama Lohwɛ̀ è ohwa, à uŋmɛ̀lɛ̀ nà è jɔ̀kɛ̀ nanù ema à mò lìŋgàni kɔ̀yi-kɔ̀yi. Nànù ndi irzɔ ì tànɛyi lì hwiya kɔ̀yi-kɔ̀yi nanù ema ì hwèlì nà Lohwɛ̀.

⁶ Tɔ̀ njɛnɛ ema à ohwa nanù ema à hwèlì nà Lohwɛ̀ ò ì hvonda jà arzɛ, lòŋgɛ là eni lì àŋgàmɛ̀nɛ̀yi ndi lì hwɛ nàa è là ama Yerzù Krirztò.

È mbenda hvènya

⁷ Imbùnda jà ami kòkò, ene mbenda ema nà è tìleyà nanù, è rza enje ndi mbenda hvènya, è hwèlì ndi mbenda yà mbolowa ema è mà hwɛnɛ natɛ̀ɛ nà ò hwèwòteli. Ène mbenda yà mbolowa è hwèlì ndi ŋmɛ̀ndì mò gbamù ema è mà lòmɛ lì hweyà.

⁸ Ndi tɔ̀ nanù, nà è tìleyà ndi mbenda hvènya, ehwànja è jɔ̀kɛ̀ yà eŋge mbenda è ɛneyà ò lòŋgɛ là ama Krirztò, ndèŋgànɛ̀lɛ̀ lì ɛ̀neyà ò lòŋgɛ là anyu. Èhwànja jììtìtì ì hwèlì jà aka, ndèŋgànɛlɛ ŋmàye mò jɔ̀kɛ̀ mò mà wòteyà lì hvàyeyà.

⁹ Tɔ̀ njɛnɛ ema à ohwa nanù ema à hwèlì ò ŋmàye ndi à kɔ̀wu ŋmanyàŋgò tɔ̀ ndomɛ wà eni, eŋge tùmba mòtò è hwèlì ndi ò jììtìtì nanù mɛnɛ.

¹⁰ Tɔ̀ njɛnɛ ema à lìŋgàni ŋmanyàŋgò tɔ̀ ndomɛ̀ wà eni, à hwèlì ndì ò tenì yà ŋmàye, eŋge ŋgànà è hwèlì ndi nanù ema eŋge tùmba mòtò è rza gbeyà tɔ̀ eyà ema è gbeyà hwahvɛhvɛ hwatò ò lì unda ò wòhwe.

¹¹ Ndi tɔ̀ njɛnɛ hvɛ ema à kɔ̀wu ŋmanyàŋgò tɔ̀ ndomɛ̀ wà eni nanù oma à ohvi ndi lòŋgɛ là jììtìtì. Èŋge tùmba mòtò à ɛ̀ndɛ̀ya ndi ò tenì yà jììtìtì ndèŋgànɛ̀lɛ̀ à rza hwi èki ema à ɛ̀ndɛ̀ ehwànja jììtìtì ì mà mò gbeyà à mà tìmba ndi nàa ndìma.

Lìtiŋga là lì tìla

¹² Inyɔ ema è hwèlì nàa hwàanà hwa ami, nà è tìleya ehwànja Lohwɛ̀ à mà è làkìrzɛ̀ wòhwe wò anyu ò lìinà là ama Yerzù Krirztò.

¹³ Inyɔ ema è hwèlì nàa ì tatɛ̀ ja ami, na e tìleya ehwànja e mo hwi e mɔ̀ ema a hwèlì natɛ̀ɛ na o hwewotelì. Hwèrzɔ̀mbɛ̀ hwe hwatò, na e tìleya ehwànja e akayi e Mɔ̀ ema a hwèlì Wòhwe.

¹⁴ Inyɔ ema e hwèlì nàa hwàanà hwa ami, na e tìleya ehwànja e hwi Tatɛ̀. Inyɔ ema e hwèlì nàa i tatɛ̀ ja ami na e tìleya èhwanja e hwi, e mɔ̀ ema a hwèlì aŋga natɛ̀ɛ na o hwewotelì. Hwèrzɔ̀mbɛ̀, na e tìleya ehwànja e imbami ndèŋgànɛlɛ Eyà ya Lohwà e hwèlì o tenì ya anyu, ndèŋgànɛlɛ e akayi e Mɔ̀ ema a hwèlì Wòhwe.

¹⁵ È rzi lìŋgàna e rze, tɔ̀ ima yoma ema e hwèlì o tenì ya ene rze. È hwèlì tɛ nanù ema mòtò a lìŋgàni e rze, nanù oma a rza lìŋgàni e Tatɛ̀.

¹⁶ Èhwànja hwèèmà hwe arzɛ ema hwe hwèlì o e rze ya mɔ̀nyɛ̀ hwe hwèlì ndi hweyàrzèlì hwe e nyàmà nyo, na e nyɔ̀ŋgi ya mamɛ ema mìirzɔ ma lìŋgàna lì ɛnɛ, na hweyà hwe arzɛ ema hwatò hwa ekìrzɛ̀nɛ̀ anu rze ya mɔ̀nyɛ̀, hwene hweyà hwe arzɛ, hwe rza uwɛ̀lɛ̀lɛ̀yi o ma Tatɛ̀, ndi hwe hwèlì ndi hweyà hwe e rze ya mɔ̀nyɛ̀.

¹⁷ Ène rze na tɔ̀ mamɛ ema e hwèlì o tenì ema hwatò hwa ohvi e nyɔ̀ŋgi o lì luwa ya aka lì aka, ndi tɔ̀ njɛnɛ ema a gbeyà lì emeyà la ama Lohwɛ̀, a o hwɛ o lòŋgɛ na Lohwɛ̀ natɛ̀ɛ na o gbìndèyà.

Yòwanìrzɛ̀ ama hwa aŋgoweya hwàkɔ̀ɔèlì wa ama Krirztò

¹⁸ Inyɔ ema è hwèlì nàa hwàànà hwa ami, è hvonda yà lìrzùkù è mà kombɛnɛ. Ndèŋgàna, nà oma inyɔ è mà hwèyɛ nanù ema è Mɔ̀kɔ̀yèlì wà ama Krirztò à ò jà, tɔ̀ ò naŋgɛ, rzayi-rzayi jà hwàkɔ̀ɔ̀yèlì hwa ama Krirztò hwa mà màà lì jà. Ò eŋgànɛ̀lɛ̀, è hwiyè nanù ema è hvonda lìrzùkù è mà kombɛ̀nɛ̀.

¹⁹ Ò jɔ̀kɛ̀ jɔ̀kɛ̀ hwaŋga hwatò hwa rzi hwɛ ò mòndèŋge mò arzu. Ɔndèŋgàtɛ̀ hwa mà jò akàkòwɛ̀. Wɔ̀ hwa mà hwɛ tɛ ò mòndèŋge mò arzu, oma hwa mà lìya nà irzɔ. Ndi lì akakowɛ là awu lì uŋmɛ̀lɛ̀ nanù ema ò jɔ̀kɛ̀ hwa rzi hwɛ ò mòndèŋge mò arzu.

²⁰ Ndì ò inyɔ, è Mɔ̀ ema à Ɔ̀kirzɛ̀hwɛ̀ à mà è ŋgba Èlìŋgɛ̀ yà Wòtani. Ò eŋgànɛ̀lɛ̀ rzɔ inyɔ hwa arzɛ è hwi è jɔ̀kɛ̀.

²¹ Nà rza e tìleya ndi ene kaatì ehwànja e rza hwi e jɔ̀kɛ̀. Nà e tìleya ndi ehwànja e hwi e jɔ̀kɛ̀, ndèŋgànɛ̀lɛ̀ ehwànja tɔ̀ mòlàŋgà mo rza uwɛ̀lɛ̀lɛ̀yi o tenì ya e jɔ̀kɛ̀.

²² Njɛnɛ mò à hwèlì è wà mòlàŋgà e? È mòtò wà mòlàŋgà à hwèlì ndi è mɔ̀ ema à ohwa nanù ema rzeketɛ Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi. Èŋge nyayi yà mòtò ndi è hwèlì è Mɔ̀kɔ̀yèlì wà ama Krirztò. A rzɔ̀rzɔ̀ Tatɛ̀ nà è Ŋmanà wà eni wà Mùnyanà.

²³ Hwàŋga hwa arzɛ ema hwa rzɔ̀rzi è Ŋmanà, hwa rzɔ̀rzi hvɛ Tatɛ̀. Hwàŋga hwa arzɛ ema hwa imànɛ̀lɛ̀yì è Ŋmanà wà ama Lohwɛ̀, hwa imànɛ̀lɛ̀yì hvɛ è Tatɛ̀.

²⁴ Inyɔ è àŋgàmɛ̀nɛ̀yi ò lì ɛnɛ nanù ema, ŋmɛ̀ndì ema inyɔ è mà hwèyɛ natɛ̀ɛ nà ò hwèwòtèlì, mò lìyayi ò tenì yà anyu. Ŋmɛ̀ndì ema è mà hwèyɛ mò lìyelì tɛ ò tenì yà anyu, è ò hwɛ nà è Ŋmanà wà ama Lohwɛ̀ nà è Tatɛ̀.

²⁵ Èya ene ema Krirztò ŋmìti à jò kàkɛ̀nɛ̀yi, ene eyà è hwèlì ndi lòŋgɛ là gbìndèyà.

²⁶ Imba nà è tìleya ndi hwene hweyà ò lì hvomɛ̀nɛ̀ hwaŋga hwatò ema hwa arza lì è lùkɛ̀lɛ̀.

²⁷ Ndi ò inyɔ, Krirztò à mà è ondìrzɛ̀ nà Èlìŋgɛ̀ yà Wòtani ndèŋgànɛ̀lɛ̀ yɔ̀ è hwèlì ò tenì yà anyu. Ò eŋgànɛ̀lɛ̀ rzɔ, inyɔ è rza arza mòtò ò lì è okòlɛ̀ ehwànja Èlìŋgɛ̀ è mà e okòlɛ̀ hweyà hwe arzɛ, ndèŋgànɛ̀lɛ̀ hweyà ema à è okòlɛ hwe hwèlì ndi è jɔ̀kɛ̀ rzeketɛ mòlàŋga. Ò eŋgànɛ̀lɛ̀ rzɔ, nanù mɛnɛ nà Krirztò nà oma Èlìŋgɛ̀ yà Wòtani è mà è okòlɛ̀.

²⁸ Ò eŋgànɛ̀lɛ̀ rzɔ inyɔ ema è hwèlì nàa hwàanà hwa ami, è lììya ndi ò lì ahvìyànɛ̀ nà Krirztò, aŋga nanù ò wùnyà ema mɔ̀ à ò jɛ̀ɛ̀ è hwɛnɛ kumba è rza ò òhva tɔ̀ irzɔ̀ni ò lì mò uŋmànɛlɛ.

²⁹ Inyɛ̀ è hwiye nanù ema Krirztò mɔ̀ à gbeyà hweyà ema hwe hvomɛ̀nɛ̀yi ò worzo wò ama Lohwɛ̀, ò eŋgànɛlɛ inyɛ è hwìye nanù ema tɔ̀ ima mòtò ema à gbèyi mamɛ ema è hvomɛ̀nɛ̀yi ò worzo wò ama Lohwɛ̀ à hwèlì ndi è ŋmanà wà ama Lohwɛ̀.