1 Yòwanìrzɛ̀ 1 - Mokpwe: Bakwery (New Testament)

È mbɔrzi ya Lòŋgɛ

¹ Nà e tìleya o lì hvomɛ̀nɛ̀ e mɔ̀ ema a hwèlì e mbɔrzi yama Lohwɛ̀ ema e jànà lòŋgɛ. Mɔ̀ à mà hwɛ nàtɛ̀ɛ na o hwewotelì, I ma hweya hweyà o lì mo hvomɛ̀nɛ̀, i ma mo ɛnɛ̀ na mìirzɔ ma arzu, i ma mo ɔ̀ŋgɔ, ndèŋgànɛlɛ i ma mo tahva na màà mà arzù.

² È mɔ̀ ema a jànà lòŋgɛ à mà àyèŋgòwɛ̀ moto hwa hwènàmà, ema hwà mà ɛnɛ na mirzɔ̀ ma awu, ndeŋgànɛ̀lɛ̀ irzɔhvɛ i ma mo ɛnɛ. I mo tɛmelì mboŋgi ndèŋgànɛ̀lɛ̀ jo e ohweyà hweyà lì mo hvomɛ̀nɛ̀ mɔ̀ ema a ŋgba lòŋgɛ la gbìndèyà, mo ema à mà hwɛ na Tatɛ̀, ndèŋgànɛ̀lɛ̀ à mà jo àwùlùhweyà.

³ Je ohweyà lì hvomɛ̀nɛ̀ mamɛ irzɔ i ma ɛnɛ na lì hweyà, aŋga nanù oma inyɔ hvɛ e ma hwɛ ndi mɔ̀kɔ na irzɔ. Ndeŋgànɛ̀lɛ̀ lìni lì ahvìyànɛ̀ la arzu, lì hwèlì ndi lì àrzàŋgànɛ̀ ema jo òhvi na e Tatɛ̀, na è Ŋmanà wà eni, Yerzù Krirztò.

⁴ Irzɔ i tìla ene kaatì aŋga nanù oma mɔ̀nyɛ̀ŋgì mo arzu mo ma onda.

Lòŋgɛ la hwatò ema hwa hwèlì o ŋmàye

⁵ O nàŋgɛ, ŋmɛ̀ndì ema i ma hweyàne Yerzù Krirztò ndèŋgànɛ̀lɛ̀ je e ohweyà e mɔ̀ mo hwèlì ndi ema, Lohwɛ̀ ndi à hwèlì ŋmàye, ndèŋgànɛlɛ a rza ohvi tɔ̀ matò wa wòhwe o nyo ya ani.

⁶ Irzɔ jo òhwa tɛ nanù ema i hwèlì mɔ̀kɔ na mɔ̀ rzi e hwɛ nanù ema mòŋgɛ ma arzu ma hwèlì ndi mòŋgɛ ma jìtìtì, oma i kɔ hweyà, ndèŋgànɛlɛ hwɛ̀ɛ̀mɛ̀ hwe arzu hwe rza enje jɔ̀kɛ̀.

⁷ Ndi i hwɛni tɛ lòŋgɛ la ŋmàye, na oma mɔ̀ ŋmìti hvɛ a hwɛni, aŋga nanù i hwɛ mɔ̀kɔ na ɔ̀nɛyi, ndèŋgànɛ̀lɛ̀ màyija ma ama e ŋmanà wa eni Yerzù, ma jo rzàŋgìrzɛ̀ o wòhwe wo arzu wa arzɛ.

⁸ Jo òhwi tɛ ema i rza ohvi tɔ̀ wòhwe, nanù oma ja alukɛlɛ ndi irzɔ hwiti ndèŋgànɛlɛ o ma e jɔ̀kɛ̀ e rza enje na irzɔ.

⁹ Ndì i purzɛlɛyi tɛ wòhwe wo arzu, mɔ̀ à ondìrzɛ̀ lì kàkɛ̀nɛ̀ la eni ndèŋgànɛ̀lɛ̀ a lì gbeyà o ŋgànà ema e hvomɛ̀nɛ̀yi. Mɔ̀ a o jo làkìrzɛ̀ wòhwe wo arzu, ndèŋgànɛ̀lɛ̀ a jo rzorza wòhwe wo arzu wo arzɛ.

¹⁰ Irzɔ jo òhwi tɛ nanù ema i rzi gbèyi tɔ̀ wòhwe, nanù oma i gbèyi ndi Lohwɛ̀ o lì hwɛ e mɔ̀ wa mòlàŋgà, ndèŋgànɛ̀lɛ̀ eyà ya ama Lohwɛ̀ e rza enje na irzɔ.