1 Tìmotì 2 - Mokpwe: Bakwery (New Testament)

Mayowà mà lì ŋgba Lohwɛ̀ èluhwe

¹ Eyà ya worzo ema na e kòkòwɛ̀lɛ̀ e hwèlì ndi nanù ema e kànɛ̀lɛlɛ hwatò hwa arzɛ. È kànɛ̀lɛlɛ hwahvɛhvɛ hwatò. È kànɛ̀ nanù ema Lohwɛ̀ a e omeya mamɛ̀ ema e arza, ndèŋgana e a mo eka o gbaamù ema a e gbèeyà na hwahvɛhvɛ hwatò.

² È kànɛlɛlɛ ikiŋgɛ̀ na hwanɛyi hwatimbelì hwa arzɛ hwa lìkànèyà. Ène e gbèeyà mɔ̀ŋgɛ̀lɛ̀ ma arzu ma hwɛ o ɛ̀yɔ̀lɛ̀ e rzi hwɛ tɔ̀ mòhvùŋgu, jo ò gbèeyà ndi na oma Lohwɛ̀ a arza nanù ema i gbeye na lì mo ŋgbaà èluhwe ihvonda ja arzɛ.

³ O lɔ̀wu o lì kànɛ̀lɛlɛ hwatò nanù. Ndeŋgànɛ̀lɛ̀ iŋgi nyayi ja màkanɛ̀ i lìŋgìrzɛ Lohwɛ̀.

⁴ Lohwɛ̀ mɔ̀ à arza nanù ema mòtò tɛ a rzuŋgahwe na o lì rzɔŋgìtɛ̀nɛ̀ e jɔ̀kɛ̀ ya Eyà ya Lohwà.

⁵ È hwiyawi nanù ema o hwèlì ndi Lohwà lɔ̀kɔ̀ mɛnɛ. Ndeŋgànɛ̀lɛ̀ o hwèlì ndi mòtò mɔ̀kɔ mɛnɛ ema a jàni Lohwɛ̀ na hwatò hwa hwènàmà o lì rzɔ̀ŋgìtɛ̀nɛ̀ lɔ̀kɔ. Oŋgo mòtò a hwèlì ndi Yerzù Krirztò.

⁶ A ma ŋgbaà lòŋgɛ la eni o lì ŋwèeyà hwatò hwa arzɛ. Èŋge kpelì ema à mà ŋwèeyà hwatò hwa arzɛ, e ma uŋmɛ̀lɛ̀ o e hvonda ya jɔ̀kɛ̀ nanù ema Lohwɛ̀ a arza nanù ema tɔ̀ ima mòtò a rzuŋgahwe.

⁷ Ène eyà ndi e ma gbèeyà Krirztò o lì no òma nàa àpɔ̀rzìtòlò o lì ɛndɛ lì ohwa ŋmɛ̀ndì mò gbamù lì hvomɛ̀nɛ̀ o lì lòkɛ̀ Krirztò na e jɔ̀kɛ̀ o hwatò ema hwa rza enje wònyà Yudà. Mamɛ ema na ohwa e hwèlì ndi e jɔ̀kɛ̀ na rza kɔ tɔ̀ eyà.

⁸ Tɔ̀ ima èki ema hwatò hwa Krirztò hwa arzàŋganɛ, imba na arza nanù ema wunyanà ema hwà mà aŋgbɛ wɔ̀ hwiti o lì gbèeyà Lohwɛ̀ hwa karzɛ màà mà awu o ŋmanyu o lì kànɛ̀. Hwàŋga hwatò hwa rza hwɛni lì hwɛnɛ hwetato ò ŋmèma tɔ̀ lì hwɛ hwatò ema hwa tɔ̀wɔ.

⁹ Nà arza hvɛ nanù ema hwàalanà hwa wɔte nyayi ema hwatò hwa ohwa nanù ema o lɔ̀wu. Hwewɔ̀tèlì hwe awu hwe hwɛni lì wanda inyo ja awu gbamù aŋga nanù morzombo mo awu mo rza lukɛlɛ wuuyana. Hwa rzi rzɛ̀ŋgɛnɛ mahvumbu ma awu nyayi ema e hwɛni mɔrzɔnɔ mo gòòlù, tɔ̀ o lì wɔtɔ̀ ŋgɔkɔhwi ema i gbeyànɛhwɛ na hwàanà màŋyàyi ma wòlìto, tɔ̀ o lì wɔtɔ̀ màatù ema mà andawa wolì ema wo koki rzayi-rzayi.

¹⁰ Ndi inyɛ ɛ̀ɛ̀mɛ̀ ya awu ya gbamù e uŋmɛ̀lɛ̀ nanù ema hwanu hwalana hwa gbèeyà Lohwɛ̀.

¹¹ Hwaalanà hwa hwɛni lì hwɛ ŋmɛ̀ɛ na o lì arzìwirzɛ wɔ̀ hwiti o lì òkànèyà nɛ wùùnyanà hwa okolɛ.

¹² Imba na rza ohwi ndi nanù ema, molanà a ohvi wònjà o lì okolɛ na lì kànèyà wunyanà. Molana a àŋgàmɛ̀nɛyi lì lìya ŋmɛ̀ɛ.

¹³ Lìtìŋga ema lì gbèyi ema na ohwa ene eyà, lì hwèlì ndi nanù ema, Adàmu e munyanà ndi Lohwɛ̀ à mà lome lì wèka ndèŋgàna a e wèka Èhva e molanà.

¹⁴ Linɛyi lìtiŋga lì hwèlì ndi nanù ema, rzeketɛ Adàmu ndi Mòkarzɛ̀ à mà lukɛlɛ, e molanà ndi Mòkarzɛ̀ à mà lukɛlɛ. O eŋgànɛ̀lɛ̀ rzɔ e molanà ndi à mà unda e mbenda.

¹⁵ Ndi Lohwɛ̀ a o rzuŋga lòŋgɛ la e molanà o hvonda ya lìyalì, e hwèlì tɛ nanù ema a ikayi ŋmèma mo eni o Krirztò, ndeŋgànɛ̀lɛ̀ a uŋmɛ̀lɛ̀ tɛ hwahvɛhvɛ hwatò ndìŋgɛ, rzìi a rzi ohve tɔ̀ ŋmanà lìtɔ̀ti la wòhwe o nyo ya eni.